12
Mlay kinemon eygo Maria lo ut go
1 Walop Paska pla genang, ku 6 yam so itak gono, yakena Eplaim sik so Betania, Lasarus nglong go yakena sono, Yesus gemang klong. 2 Nggano pung go, Yesus wawi genang ten, gemang kong-nenawon. Yesus nogo ten ngganemot Marta lo gemang ta-natun. Nemotnang ey Lasarus ten gemang dam-nenawon. 3 Woy ngganemot nogo, mlay kinemon teguop go, samonsuip klaya Maria lo iti go, Yesus go masi blo no gemang pi-natun. Nggano betodop lo gemang drok-natun. Mlay ngga go duoy blo dega so. Yap ngganemot ba naklay, mlay kinemon seguong-a tengin.
4-5 Yesus go andua meno, nemot go sui: Yudas Iskariot lo ngge kalik gemang pu-nawon, “Esang! Mlay ngganemot, duoy kangok golo iti go se! Sogo so, duoy so kua nay? Duoy-a taut kua go sikabung no be wasey.” 6 Nebut ngga Yudas Iskariot lo pu go, taut kua go sikabung no wasey genang so, kua. No, wom tebok, nemot mo mlay. Ibe go tatui ba sogo duoy, nemot lo tamlak go, wom so i-iti go nogo. 7 Yudas go nebut Yesus lo tup gono gemang pu-tenawon, “Maria kua bebat! Ngge, Genam kebong go, mu no tuet genang sogo tasam gabe. 8 Kuno-woyno taut kua go sikabung, motnang ey gemang. No, Genam kua.”
9 Yesus, yakena Betania so susuing go, sikabung Yahudi mata sogo tup go, ngga sono gemang nenawon. Yesus ikum seguong so kua klong, no, kebong sik so Yesus lo nglong go Lasarus ikum genang so. 10 Ngganemot sogo so, Lasarus but genang atuia Yahudi go trang-trang lo gemang semu-nenawon dali. 11 Seni so, Lasarus nglong go tang so, sikabung Yahudi mata so, Yesus no dabui iti gemang keng-lak.
Yerusalem sono sek ey iway ey go ba lo Yesus degut go
12-13 Ngga utep go, walop Paska nang sogo sikabung Yahudi, yakena Yerusalem no gemang pluep-lak. Nemotnang gemang tup-nenawon, “Yakena Yerusalem nogo so, Yesus tap-a gemang kunton!” Ngga ey, wotdop, buendop srem, sikabung lo idok go, sek ey iway eygo ba lo, Yesus gemang wawi-nenawon. Ngge kalik so gemang pu-nesiton,
“Hosana!
Yesus go sui iway blo dega so!
Woy Wali Iram go sui ba lo Nemot gabe uweng!
Sedue Israel go Iram dega!” (Mazmur 118:26)
14 Keleday ikum gono, klak go suing go, Yesus gemang koklong. Tasam ngga lemoy go, Wali Sam klaut ba no, ngge mo klik-nengam,
15 “Yerusalem sogo mesru-masru, suali kua tra!
Keleday blo lo Motnang go Iram, uweng go. Ikum-a!” (Zakharia 9:9)
16 Ku ngganemot nogo, nebut ngga go seni Yesus go andua-andua logo kua senong. No, Ki Wali Iram go blongdon ba sono Yesus wawi go, keleday blo no klak go duing gono, gemang senong-nenawon, “Seni so lo, Wali Sam klaut ba no klik go tasam ngga, Yesus so taling go.”
17 Se senong: Lasarus mu ba sik so Yesus lo usi go nglong go, sikabung lo ikum go, ngga naklay ibe no tandali-tandali gemang pen klong. 18 Ngga mo tup go nogo, Yesus wawi genang sikabung mata so gemang pluep-lak.
19 Ngga ikum gono, way-way so ngge kalik sedue Parisi lo gemang pen-nenawon, “Esang, imot go atuia, kua lelemoy. Kukunan blo sikabung naklay Yesus no gabe kekeng.”
Yesus no keng genang, sikabung Yunani logo duduing dali
20 Yakena Yerusalem no walop pla genang, saula-saula Ki Wali Iram no takong genang so mo weng dali. 21 Ngga ey, Yesus lo kuoy go andua Pilipus, yakena Betsayda, nan Galilea sik sogo no, saula meno duo gemang klong. Nemot lo usi go, “Yesus ey Atnang tegu sogo se!” 22 Ngga ey, Andreas no Pilipus lo gemang klong go pen. Nggano Yesus nogo gemang pen-klenawon. 23 Saula-saula lo duing go tup gono, Yesus lo gemang pu-tenawon, “Ki Wali Iram go blongdon ey Blong Dem suing genang ku, gabe pupung. 24 Seni so gabe pen-asitugu, ‘Wasma nok klaya go, nan ba no kua kuali go kebong go, seni yakua tagot. No, nan ba no kuali go kebong go, seni mata sogo mea tagot! 25 Saysuk yay seguong-a, kebong suali-a susuing go, wali mea nega. Kukunan blo nogo wali suali kua go, nemot go wali yakua nega, senang wali-a mea tegu. 26 At go kebali semu genang sogo, Genam no se keng! Nago no Genam susuing go, kebali sedue At ey se susuing dali. At go kebali so pupluok go sui-a blo sono Ki Wali Aya lo mea iti.
Nebut ngge, sedue Yunani lo Andreas ey Pilipus ey gono usi goso, Yesus lo pen go.’ ”
Kebong genang sogo nebut Yesus pen-nawon go
27 Nggano Yesus lo pu go, “Genam dabui ide ey tra-tugu go se! Nggeasui go, sogo-a ya pen-alu? Ngge kalik ya pu, ‘Aya sop! Iseng eygo ku, Genam sik sogo se tenguo!’ No Genam senong go, ‘Ku ngganemot lek genang so, Genam weng go gabe!’ 28 O, Ki Wali Aya! Mot go blongdon se taling!”
Ngga ey ut sik sogo ngge kalik gemang pu, “Genam go blongdon mo taling-sanyu. Nggeasui go, blongdon ngga tandali Genam lo mea leguit!”
29 Nebut ngga sikabung mata sogo tup-nenawon go, nemotnang lo gemang pu, “Ngga, kukluim!” No, temu lo pu go, “Ku kluim kua! Ngga, Ki Wali tamot lo Yesus no nebutpen go!”
30 No, nemotnang no pu go, “Nebut ngga, Genam nogo so kua pu. No, motnang senong genang so, tuot go gemang. 31 Seni so, nggeasui go, kukunan go piam mea neguon. Ngga ey, kukunan so mlak go Kupiamgo mea pedueng. 32 No, kukunan blo nogo, Genam ngge di no tegak go, Genam nogo so, sikabung naklay mea wawi.” 33 Ngga pen-nawon go ngge, Nemot kebong genang tap taling go.
34 Ngga tup gono, way so sikabung lo pu go, “Demu no klik go, tegadi so Ki Wali Iram lo dok Iram pung go, senang so Nemot mea suing, yakua kebong. No, mot lo pen-ato go, ‘Kukunan blo no, di no Blong Dem mea glung.’ Ngga nago kalik go Blong Dem ne?” 35 Ngga ey, Yesus lo pen go, “Motnang ey susuing genang sogo Blong, ku tebot dato gabe. Blong maning gono, motnang go walitap se uwet! kuklik go ba no motnang degut genaning! Ku klik go ba lo koklong go sikabung, tap mea nega. 36 Motnang ey maning Blong susuing gono, Blong nogo dabui lo se keng! Blong duoyap so motnang lemoy genang.”
Yam so nebut ngga pen gono, ngga sik sogo, Yesus klong go, gemang son-nawon. Saysuk sikabung nogo kua taling-srenawon.
Sikabung go nemu Ki Wali Iram lo sagum go
Yohanes 12:36b-43
37 Yang! Nemot-a nemu ku no tasam mata so taling go, tegadi so Ki Wali Iram lo dok go Iram sogo, Yesus kua yang-nesrenawon. 38 Seni so, nabi Yesaya lo pen go, gabe lelemoy,
“Wali Iram! Atnang logo nebut nogo, Nando-a mo keng?
Nando no Woy Wali Iram go don dega mo taling-kunto?” (Yesaya 53:1)
39-40 Dabui logo nemotnang ngga yakua keng. Se senong: Yesaya lo pu dali go,
“Ki Wali Iram lo pu go,
‘Nemotnang go nemu Genam lo mo pung;
Nemotnang go dabui demu kalik so,
nemu yakua ikum genang sogo; kunala mea kua plet-dak;
Genam sono tandali nemotnang iwot-lak ey go!
Ngga ey, nemotnang go dabuikuo, Genam lo gemang ne ya suey.’ ” (Yesaya 6:10)
41 Ngga kalik so pen go ngga, Yesus go blongdon Yesaya lo ikum-ngam go tang sogo so mo pen-angam.
42 Nemot-a, ngga kalik go, Yesus nogo dabui, Yahudi go woy-woy mata sogo lo gemang duduing, “Seni so, tegadi so Ki Wali Iram lo dok go Iram, Yesus gabe!” No, ibe sono go yakua pen. Yahudi go dewi so pu go yap-yap sik sogo sedue Parisi lo yat eygo so. 43 Esang! Sikabung lo ta kong genang seguong-a uwet go, sui Ki Wali Iram lo iti genang-a, nemotnang logo kua uwet.
Yesus no tupduk go dabui lo se keng
44 Kangok so Yesus lo gemang pen-anawon, “Genam no dabui iti go nando keng go, Genam sono kua! No, Genam so mot-dak go Ki Wali Iram sono, nemot mo keng gemang. 45 Genam nando lo senong go, Genam so mot-dak go Ki Wali Iram mo senong gemang! 46 Kukunan blo sono blong so Genam weng go, dabui iti go Genam no keng go sikabung, kuklik ba lo yakua suing genang! 47 Genam go nebut tup gono, waysagi kua mlak go sedue, nemot nogo idekeba Genam lo yakua iti. Seni so, Genam weng go, idekeba iti genang sogo so kua! Sikabung wali sesuoy genang so Genam weng go gabe. 48 No, Genam go nebut mo tup go, waysagi ey kua mlak go, nemot neyboy genang sogo gemang. Ku yam sogo no, nemot Genam lo pepen go nebut ngge lo mea neyboy. 49 Yang, Genam go duduing tang so kua pepen gabe. No, Genam so mot-dak go Ki Wali Aya lo pu go-a gabe pen-atugu. 50 Genam mo senong: Ki Wali Iram lo mot-dak deguo, kikiwali inim iti genang gabe.
Se senong: naklay-naklay Genam sono Ki Wali Aya lo pen go-a, gabe pen-atugu!” Seni!