11
Sek ey yakay eygo ba lo kota Yerusalem sono Yesus degut-nawon go
1 Yesusnang ip go koklong e... kota Yerusalem sono dedagu, yakena Betpage nggano Betania, meduim Saytun mit sogo no mo pung. Ngga sik so Yesus Nemot go andua namon, mot go, gemang pu-tenawon, 2 “Motnamon yakena ngga temu sono klenalo go, kay seguong ngga sogo keleday nok meno tegan lo, dia no keduik go, mea ikum-klenalo. Sedue, menay ngganemot blo nogo, maning kua klak go suing. Tegan plet-klenalo go, ngge sono se wawi go weng! 3 Sedue lo usi go, ‘Sogo nang sogo so plet-kletegoy?’ ngge kalik so se pu-klenalo, ‘Woy Dem go duduing no nemot blo no Nemot klak genang so gabe wawi go koklong. Nemot lo pu goso, keda so mea wawi go weng.’ ” 4-5 Nemotnamon klong go, gemang ikum-klenawon: Yang! Keleday nok ngganemot, tap so yataput dagu no tegan lo keduik go gemang susuing. Ngga ey, duo namon, nemot so peplet gono, sikabung ngga so got-netenawon golo gemang usi-nenawon, “Menay ngganemot, sogonang so plet-kletogoy?” 6 Ngga tup gono, Yesus lo pen go kalik so, gemang pen-klenawon. Ngga ey ngga sogo sikabung nebut way kua pu. Nggano nemotnamon itak go gemang klong. 7 Nemotnamon, menay ngga wawi go, weng gono, nemot go tatondi blo no amka sey go, Yesus nemot blo no gemang klak go suing-nawon. 8 Woy-banu, mesru-masru lo nemotnang go amka, tap lo gemang sey-nesiwon. Nggano temu lo, wot dop ibot go, weng go, tap lo gemang sey dali. 9 Nemot no keng go koklong go sikabung, banim besi go ey, mesip sogo ey golo, ngge kalik gemang bega-nesiwon,
“Hosana! Mot go sui iway blo sono se pu!
Mot Woy Wali Iram go sui ba lo uweng go.
10 Suey teguop! Asi Daut go sipsuing dega, keda so mea pung.
Hosana, sip blo dega sogo so Ki Wali Iram got-togoy go.”
11 Nggano, Yerusalem no Nemot degut gono, Ki Wali yap no gemang klong. Ngga ey naklay nemu wet-nawon gono, ku kiklik goso, yakena Betania sono, Nemot go andua 12 yam sogo ey gemang klong.
Di ara seni kua tagot go
12 Ngga utep go, Yesusnang, yakena Betania itak go, koklong gono, Yesus ten gemang tra-nawon. 13 Ngga ey, ket sik so, di ara gemang ikum-siwon. Nemot go dop kangok so mo semu. Di ngganemot ba no pung gono, nemu tong-tenawon, don kua ikum-srenawon. Nemot go seni tagot genang sogo un maning kua pung go nogo. 14 Nggano, ngge kalik so, di ngganemot no gemang pu-nawon, “Mot go seni sedue klayanang go logo mea kua buo go dam!” Nemot go andua-andua nebut ngga kalik pu go, gemang tup-nenawon dali.
Ki Wali yap ba nasrok giang-nawon go
15 Yerusalem no pung gono, Yesus, Ki Wali Yap ba no degut go, nay so teta go idok go sikabung, ikum gono gemang yat-nawon. Nemotnang go nay so teta go kebleng, nggano wi yagui duoy nay nang so teta go, sipsuing naklay gemang iwot dak-siwon. 16 Nggano, sikabung temu no, Yesus lo gemang pu-tenawon, “Nay nang sogo taut, yap ngge ba logo, yakua idok!” 17 Yang! Nebutdrom gemang nguok-tenawon, Wali Sam klaut ba nogo ngge kalik go mo klik gabe,
“Genam go yap,
saula-saula nogo dewi pu genang sip so mea pu!
No, motnang lo iwot go nay sip so,
sinebutsi yap so gabe ta-ketogoy.” (Yesaya 56:7; Yeremia 7:11)
18 Yesus lo semu go tasam ngganemot tup gono, Yahudi go trang-trang ey Walidemu so ngunguok go woy-woy ey, Yesus but genang sogo tap, gemang uwet-netenawon. Sikabung mata so, Yesus lo ngunguok gono, yakay ey kekeng-lak go tang sogo so, nemotnang suali gemang tra-netenawon. 19 Ku kiklik go nogo, Yesusnang Yerusalem itak go gemang klong-lak.
Di ara newi go sik so, Yesus lo, nebutmang pen-awon go.
20 Ngga utep wadikua go, Yesusnang tandali koklong, di ara ngganemot mit no pluep go, gemang ikum-nenawon: Ye! Di ara ngganemot, blo sik so iti go, e... srang ba no pung go, mo newi! 21 Petrus ngga kalik ikum gono, Yesus lo di ngganemot so pu go, tandali duing go, Yesus no gemang pu-tenawon, “Aya klui, ikum-a! Mot lo pu go di ngga, mo newi.” 22 Nggano way so Yesus lo gemang pu, “Ki Wali Iram nogo dabui lo se keng! 23 Motnang nogo, nebut seni sogo gabe pen-atugu. Seni so, nando sedue, lekluik kua goso dabui lo keng go, nemot lo pu go, ‘Meduim ngga, ngge sik so iti go, beap no se degut.’ Ngga, seni so mea lemoy. 24 Ngganemot sogo so, gabe pupu dali, ‘Dewi ba no, sogo kalik so motnang lo wadong go nogo se duing, dewi ngga seni so gabe mo lemoy.’ 25 Mot dewi pu so ip go nogo, banim no mot go kon meno duo nogo duing go, wa go, se suep! Ngga tang sogo so, mot go piam-piam Ki Wali Iram lo mea suep dali.” 26 [Mot logo, ngga kalik kua semu go, Ki Wali Iram, Senang Wali Sip ba sogo logo, mot go piam-piam mea kua suep dali.]
Yesus go don nago sik so iti go
27 Nggano, Yesusnang tandali Yerusalem no gemang pung. Ki Wali Yap kangok ba sogo keteng lo koklong gono, Yahudi go klui-klui, iram-tegay, trang-trang ngga sogo, Nemot mit no gemang nekunon. 28 Nggano, Nemot no, gemang usi-nenawon, “Nago sik sogo don lo Mot logo tasam-tasam ngganemot semu-tegoy? Nggano, Mot nogo don ngganemot nando lo mo iti?” 29 Ngga ey, nemotnang sono Yesus lo gemang pu-tenawon, “Ngga senong nang sogo, banim no Genam lo motnang nogo nebut meno mea usi lu, ngganemot Genam sono motnang lo se pen-kesando! Ngga so, mea pen-asalu. Genam lo pupluok go nago sik sogo don lo.” 30 Se pen! Yohanes lo bututui go, sikabung sik so? Ki Wali Iram sik so? Ngga ey, nemotnang go seguong so, way-way so gemang pen-netenawon, “Imotnang lo ngge kalik pu-eyon go, ‘Ki Wali Iram sik sogo’, Nemot lo mea pu-sanyon, ‘Ngga kalik go, sogo so, nemot nogo motnang ne kua keng?’ ” 31-32 No, imot lo pu-eyon go, “Kukunan go don lo. Sogo kalik so? Sikabung mata sogo nogo ey imot suali se tra! Seni so, sikabung mata sogo lo ngge kalik mo pu, ‘Yohanes ngga seni sogo Ki Wali Iram lo kuoy go tamot Nemot go duduing pupluok genang sogo.’ ” 33 Ngga sik so, Yesus no ngge kalik nemotnang lo gemang pu-nenawon, “Esang! Genamnang kua senong!” Nggano, Yesus lo nemotnang no way so pu go, “Ngga kalik go, Genam logo motnang nogo mea kua pen dali, Genam nago sik sogo don lo tasam kangok go pupluok!”