10
Kabung tetenguo go
1 Yakena Kapernaum sik sogo, Yesusnang ip go, nan Yudea, bu Yordan ngga idi sono, gemang klong-lak. Nemotnang pung go, sikabung nsrung-nsrung ey Yesus sono gemang yaluim-nenawon. Ngga ey, nemotgokalikdali gemang nguok-tenawon. 2 Ngganemot no, sedue Parisi Yesus yatrang mlue sogo so nekunuon go, ngge kalik gemang usi, “Kenin go duduing nogo, senun ya tenguo? Yakua tenguo?” 3 Way so ngge kalik Yesus lo gemang pu-nawon, “Musa logo demutrui ba nogo, sogo kalik motnang mo ikum?” 4 Nemotnang lo pu go, “Tenguo so mo, sam tenguo genang klik go, ngga ey se itak.”
5 Nemotnang sono ngge kalik Yesus lo gemang bebat-nawon, “Se senong! Motnang go dabui demu kalik go sik so, demutrui ngga Musa lo gemang klik-ngam. 6 Se duing: takuduen seni sogo, sedue ey kabung eygo-a Ki Wali Kumam lo mo semu-ngam. 7 Ngganemot sogo so unen-nglangin-a itak go, senun ey klaya se lemoy. 8 Seni so: nemotnang ngga namonduo kua, no kenin ey senun eygo sadui klaya so gemang dok. a 9 Yang! Ki Wali Iram lo klaya so dok go, sikabung logo yakua tong-lak!”
10 Yap ba no degut gono, Nemot go andua-andua maning kua mlak goso, tandali gemang usi-nenawon, “Sogo kalik so kabung sedue logo yakua tenguo?” 11 Way so Yesus lo pu go, “Senun, nando lo itak go, kabung meno-a iti go, sedue ngganemot lo kamea tap gemang pupluok.” 12 Ngga kalik dali, kenin-a, senun lo itak go, sedue meno-a iti go, kamea tap so nemot lo gemang pupluok.
Denok blo sono gualaklum king genang
13 Se ikum! Ku meno no, Yesus sono sikabung gemang weng-lak. Ngga ey, denok blo no Yesus lo ta tui sogo. No, sikabung ngga, Yesus go andua-andua lo gemang bebat. 14 Ngga kalik Yesus go andua-andua lo semu go ikum gono, dabuipiam go gemang pu-won, “Ngga kalik kua semu, denok go tap kua puem-ey. Se senong: nemotnang kalik go sikabung-a, Woy Wali Iram tamlak go blongdon duduing mea degut. 15 Motnang se tup: ngge seni so! Nando sedue, duo ngge kalik, seguay so kua lemoy go, Woy Wali Iram tamlak go blongdon duduing mea kua degut.” 16 Ngga ey, denoktiat dabui ba no Yesus lo yaluim go, nemotnang blo no ta gemang tui.
Blongdon duduing degut genang tap
17 Tap masi ku no Yesus tetaut gono, sedue klaya duo, Nemot mit sono weng go, Yesus ba no unuik go, gemang usi-nawon, “Klui, mot suey dato! Kikiwaliblong ba no degut genang, tasam suey go sogo kalik go-a ya semu-lu?” 18 Way so Yesus lo pu go, “Sogo tang so, Genam suey goso pu-to? Kukunan blo sogo sedue suey go klayanang go kua, Ki Wali Iram seguong-a klaya teguop go! 19 Se tup: suey so dabui lo Ki Wali Iram go demutrui-a mot lo se keng! Ngge kalik gabe: sedue kua but go kebong, kamea kua semu, wom kua king, nebut iwot kua pu, wamoymlue kua semu, moy-ay nogo ta ey suey so se kong.” b 20 Sedue ngga lo gemang tenguo, “Klui! Ngga naklay, seguay go sik so, suey so genam mo pluok.” 21 Ngga ey, Yesus, nemot no yalap gono, klum ey gemang pu-nawon, “Ngge dato klaya go-a, mot lo se pluok! Yangga: klong go, mot go taut naklay duoy so nay go, sikabung taut kua gono se wasey. Ngga ey, mot weng go, Genam no se keng! Se senong: way so Kikiwaliblong taut-a mot nogo mea ikak.” 22 Nebut ngga tup-won gono, taut miam ey go nogo, dabui ba yakay sang se nega.
23 Nemot go andua-andua no nemu yalap gono, ngge Yesus lo gemang pen-nawon, “Esang, taut mata sogo sikabung Woy Wali Iram tamlak go blongdon duduing degut genang, deding ba lo.” 24 Nemot go anduayap nebut ngga tup gono, dabui belui go suali ey gemang tra. No, tandali suey so Yesus lo gemang pen-awon, “Duoyap! Seni so, Woy Wali Iram tamlak go blongdon duduing degut genang, diding ba lo. 25 Yatrang ngge se tup: put seguay go kekedik go ba logo keda so menay unta mea kua degut. No, taut mata sogo sikabung Woy Wali Iram tamlak go blongdon duduing no degut genang, deding ba seni lo, menay unta ey kua kerlam!”
26 Yesus go andua-andua nebut ngga tup go, lom ey ngang-nenawon go, ngge kalik gemang pen-neton, “Ngga kalik go, Kikiwaliblong ba sono go, nando-a ya sesuoy?” 27 Ngga ey, nemotnang sono Yesus lo nemu yalap go, gemang pu-tenawon, “Kukunan sikabung nogo tap ngga yakua lemoy. No, Ki Wali Iram nogo, yakua lemoy go, kua!”
28 Nggano Yesus sono Petrus lo gemang pu-tenawon, “Ikum-a, atnang ngge Mot no keng genang sogo so, taut naklay mo itak.”
29-30 Yesus lo pu go, “Kua kay! Nando sedue Genam sogo so, nggano Genam go deguo teguop sogo so, yaptenglam, kukunuyap, kabuisruoyap, unen-nglangin, danonnang, usu, yap naklay, nando lo itak go, nemot nogo miam dega ey, way tandali mea ikak. Yang, kikiwali inim mea iti dali! 31 Se senong: banim temu go sikabung miam eygo-a, mesip sono mea tenguo; mesip sogo sikabung miam eygo-a way so banim mea besi.”
Iseng lek genang nebut da nangglik tete so pen go
32 Ku meno no Yerusalem nogo so Yesus ey Nemot no keng go sikabung ey betugun-lak. Yesus-a banim besi go, Nemot go andua-andua mesip sogo kunala walong bata so gemang duing. Nggano, Nemot no keng go sikabung temu suali ey gemang tra.
Ngganemot no Yesus, Nemot go kuoy go andua 12 banom so usi gono, Nemot tang go nogo nebut tandali gemang pen-abiton. 33 Ngge kalik, “Nggeasui go Yerusalem sono gabe i-beton. Ngga no pung gono, taiti so pupuit go trang-trang dega ey, Musa logo demutrui so nguok go klui-klui eygo ta sono, Blong Dem mea itak. Nggano idekeba nemotnang lo taling gono, but go kebong genang so, Nemot mea pu. Ngga ey, Roma saula sono mea itak. 34 Ngge kalik nemotnang lo mea pluok: wayang nebut Nemot sogo mea pu; mlabui mea seguop; tegan lo mea srap; but go mea kebong. No, ku nangglik tete no, tandali Nemot mea nglong.”
Yesus ey klay gono tamlak genang
35 Ku meno no, Sebedeus go danon, Yakobus ey Yohanes ey, Yesus sono weng go, gemang pu-kleton, “Aya Dem! Sogo-sogo so atnamon lo wadong go, Mot lo se iti!” 36 Yesus lo pu go, “Motnamon sogo-a ya pluok-lu?” 37 Nggano gemang pu-kletenawon, “Ngga suey, ku lemoy-ayun go nogo, Iram so blongdon ba no got-lo go, atnamon, meno-a tasemla idi no, meno-a takali idi no se taling!” 38 Nggano, nemotnamon sono ngge kalik gemang pu-nawon, “Mot lo wadong-keto go ngga, seni mo senong? Genam no iti genang iseng, motnamon logo ya drop? Genam lo lek go ide motnamon ya degut dali?” 39 Nemotnamon lo pu-klewon go, “Ya, mea degut.” Way so Yesus lo gemang pu go, “Yang! At lo tra genang iseng dali motnang logo mea drop. Nggano Genam lo lek genang ide, motnang mea degut dali. 40 No, takali idi ey tasemla idi eygo no suing genang, Genam logo yakua taling. Ngga nang sogo sedue-sedue, Ki Wali Aya lo dali mo taling.”
41 Nebut ngga andua temu tup-nenawon go nemotnamon nogo sagui gemang kong-nenawon. 42 No, nemotnang Yesus lo usi gono, ngge kalik gemang pen-anawon, “Se senong: kukunan ta so mlak go deguena-deguena, ku sono blung-a gemang kekenok. Nggano, woy-woy go don lo ta logo ey mea poplong. 43 Motnang-a ngga kalik kua! Motnang sik sogo nando wengkabui so duduen go, koybutasemu so nemot-a se lemoy! Nggano, nemot andua nogo kebali-a se pluok! 44 Ngga ey, banim besi go sedue so nando lemoy genang so duen go, blong duoyap naklay nogo koybutasemu so nemot se lemoy. 45 Ki Wali Iram sik sogo Blong Dem kalik se: sikabung lo tebok genang so kua weng; sikabung-a tebok genang so Nemot pung go gabe. Seni so: sikabung mata sogo ta itak genang so, way so Nemot tang go wali-a mo itak gabe.”
Bartimeus nemu pung go pali go
46 Nggano, Yesus Nemot go andua-andua ey, yakena Yeriko sik sogo pung go Yerusalem no koklong go, Yesus no sikabung nsrung-nsrung ey gemang keng-lak. Se ikum: ngga sogo sedue klaya duo, tap keteng so tawadong so gemang got-tenawon. Nemot go nemu mo pung sang. Ngga Bartimeus, Timeus go danon. 47 Sedue nemu pung go ngga tup-nawon go, ngga lo koklong go yakena Nasaret sik sogo Yesus gemang. Ngga tang so nemot lo gemang usi-tenawon, “Yesus, iram Daut sik sogo Duo! Genam nogo dabui klum tra-a.” 48 Tandali-tandali, da mata so usi goso, don ey sikabung lo gemang bebat-nenawon, “Yakot so ya! Nebut ngga kua pen!” No, tandali kangok dega so gemang usi-nawon, “Iram Daut sik sogo Duo! Genam nogo klum tra-a.” 49 Yesus tebung-nawon go gemang pu, “Nemot ey wawi go weng-a!” Ngga ey, sedue nemu pung go ngganemot no gemang pu-nenawon, “Dabui don kok go ip-a! Mot so Yesus usi go se.” 50 Ngga ey, nemot go amka walong go sok gono, keda so ip go, Yesus mit sono gemang bewon. 51 Ngga ey, nemot no Yesus lo gemang usi, “Mot lo duduing go, mot nogo sogo-a Genam lo ya tebok?” Sedue nemu pung go ngganemot lo gemang pu, “Aya Dem! Genam nemu pli go, suey so ikum genang so duing go se.” 52 Ngga ey Yesus lo gemang pu, “Klong-a! Genam no dabui lo keng-to go tang so, mot go wali mo sesuoy!” Ngga ey nemu pli go, nemot kekayso gemang ikum. Nggano, Yerusalem tap no Yesus ey gemang keng-nawon.