16
Taut tap ey walitap eygo
1 Nemot go andua-andua no, ngge kalik go nebut benuey, Yesus lo gemang pen-anawon, “Wengkabui meno, nemot go taut mata dega so. Nemot go kebali sedue meno lo yay gemang suing. No esang! Wengkabui no sedue temu lo weng go, gemang pen, ‘Aya! Drangyay sogo lo, mot go drang ey taut ey, tebadali tetega go.’ 2 Nebut ngga tup gono, drangyay sogo wawi go, gemang usi, ‘Genam go drang tebadali mot lo tega go, seni so? Nggeasui go, drang sogo sam naklay idok go se weng. Genam go drangyay tandali mot lo yakua suing.’ 3 Nebut ngga kalik tup-nawon gono, dabui ba lo gemang duing-nawon, ‘Ye, nggeasui go, sogo kalik ya semu-lu? Usu kebali semu genang, genam don kua. Duoy-a uwadong go, suongsut ey. 4 Yang! Yap ba sono sedue temu lo yansi genam wawi genang, mo duing-tu gabe.’ 5 Ngganemot no, drangyay sogo lo, duoy way tandali maning kua iti go sedue-sedue usi go gemang pluep-lak. Nggano, sedue klaya tete no gemang usi-tenawon, ‘Mot logo way, genam go wengkabui no maning kua iti go, kata yam so?’ 6 Sedue ngganemot lo pu go, ‘Di saitun sik sogo mlay genam logo tong 100 yam so.’ Way so, drangyay sogo lo pu go, ‘Sam ngge ba no keda so se klik: tong 50 yam so duoy maning kua iti.’
7 Nggano, sedue namon tete sogo no gemang usi, ‘Mot logo maning kua iti go kata yam so?’ Sedue ngga lo pu go, ‘Ya, genam logo maning mata so. Ngga, tendam 100 keba yam so.’ Nggano drangyay sogo lo pu go, ‘Ikum-a! Mot go sam ngge go. Se klik-silu: tendam 80 keba yam so duoy maning kua iti go.’ Sikabung temu nogo, drangyay sogo lo ngga kalik dali gemang semu-nawon.
8 No, se ikum! Nemot go wengkabui, tasam ngganemot ikum gono, drangyay sogo no gemang pu-tenawon, ‘Mot kalong ey! Yansi genang kunala, suey so mot lo mo senong.’ ”
Nggano tandali Yesus lo pu go, “Se senong! Kukunan sikabung, kunala kalong ey, blong eygo duoyap ngga kalik kalong kua duing. 9 Nggeasui go, lema go drang piam golo, andua-andua mea yaluim. Ngga tang so, yansi lema don kua go nogo, blong dia yakena ba sono go wawi go motnang mea degut.”
10 “Kua kay! Drang seguay go dabui lo yay suing go, drang babu go yay dabui lo mea suing dali. Drang seguay go suey so dabui lo yay kua suing go, taut kangok go yay dabui lo mea kua suing dali. 11 Kukunan taut yay suey so motnang kua suing go, taut blong seni eygo motnang nogo nando lo ya itak? 12 Ngge se duing dali: motnang seni eygo nemudi so kua wali go, motnang tete sogo blongdon sogo kalik ya lek?
13 Koybutasemu wengkabui namon nogo yakua tebok. Yang, wengkabui meno nogo-a klum ey mea, meno nogo-a kekena ey mea pupluok. Ngga kalik dali: Ki Wali Iram nogo ey lema Beno a nogo ey ya kua pluok.”
14 Ikum-a! Sedue Parisi, drang sogo kangok so gemang duduing. Nebut ngga tup-nenawon go, neblengseguo gemang klik-nenawon. 15 Ngga ey, nemotnang no Yesus lo pu go, “Seni eygo, nemudi sogo sedue so ibe lo pu genang-a don ey gabe uwet-ketogoy. No, dabui ba sogo Ki Wali Iram lo mo senong. Yang! Sikabung lo blo sono iti go-a, Ki Wali Iram lo gabe waydang.”
Demutrui go seni Yesus lo mangking go
16 Walitap seni eygo senong genang so Yesus lo gemang pen-atenawon, “Musa logo demutrui ey nabi-nabi eygo lo klik go, mo nguok-nesanton, e... Yohanes Busotuigo no gabe pung. Ngga sik so iti go, e... nggeasui gono, pung go Woy Wali Iram go tamlak go blongdon duduing degut genang deguo teguop gabe pepen. Ngga ey, blong ngga ba sono degut sogo, don ey sikabung naklay lo gabe u-usey. 17 Kua kay! Ut ey nan ey ngge, nega genang gabe, no, Musa logo demutrui-a, kluip seguay go klayanang yakua nabay-sing.” 18 Ngga nemot sogo so gabe pen-asitugu, “Senun nando lo itak go, kabung meno-a iti go, ngga kamea so nemot gemang uwet. Kabung itak go ngga, nando lo iti go kamea so gemang uwet dali.”
Demutrui tenguo go deguo teguop kua tup dali
19 Musa logo demutrui ey nabi-nabi eygo logo pen go, maning don eygo senong genang so, nebut yatrang meno, ngge kalik Yesus lo gabe pen,
“Se ikum: sedue meno taut mata dega sogo gemang. Amka walong go nggano lenan teguop lo semu go-a gemang kokok. Kuno-woyno walop seguong-a gemang pepla. 20 No, se ikum dali: yap seboy sogo, taut kua go sedue klaya gemang. Nemot go sui: Lasarus. Nemot go saysuk naklay, yaulat kuo lo mo pung-sing. Taut miam eygo sedue go yataput lo gemang to-tenawon. 21 Yap ba sik so net go ten kukup-a dam so duduing goso Lasarus gemang bung-tenawon. No, esang! Nemot go kuo iblon so uduo gemang pluep-netenawon. 22 Ku meno no Lasarus gemang ip-nawon. Nggano Ki Wali tamot lo Lasarus go seni wawi go, babu Ablaham ey nim gemang la-tebawon.
Ngga ey, taut mata sogo sedue kebong go gemang tuet dali. 23 Sedue ngge, kebong sip no idakoy ba no gemang betep. Nemu yalap-biwon go, Ablaham ey klay goso Lasarus susuing go gemang ikum. 24 Ngga ey, gemang usi-biwon, ‘Babu Ablaham! Genam nogo klum duing-a! Lasarus mot-dak go, nemot go taglang-a, bu ba no suik go kunyon go, genam go nebleng-a suot sogo se! Ngge nogo, koy iseng kangok go.’ 25 Nebut ngga tup gono, way so babuasi Ablaham lo pu go, ‘Mamdat! Mot tang so se duing, kukunan blo no rley seguong so mo got-nayo. No, kukunan blo sogo, yakay kua goso Lasarus mo got-nayom. Ngganemot sogo so, nggeasui go, ngge so nemot yakay ey gabe. Ngga nogo, iseng-a mot lo se tetra. 26 Se senong: mot ey genam eygo nesip logo, day kangok go gemang. Ngga sono atnang klong genang, yakua. Ngge sono motnang weng genang yakua dali.’ 27 Sedue ngganemot Ablaham go nebut tup gono, tandali gemang pu-biwon, ‘Ngga kalik go, Lasarus-a pu go, aya go yap no se nayon! Genam go aka ey sat yap ey, taidi yam so gemang. 28 Nemotnang no se pen, at lo pluok go kalik, kua semu. Sip iseng eygo ngge ba no nemotnang degut genaning!’ 29 No, sedue ngga go nebut tup gono, Ablaham lo pu go, ‘Mot go aka ey sat yap eygo no pen so, sogonang so Lasarus ya klong? Musa ey nabi-nabi eygo lo nguok go walinebut, nemotnang nogo gemang. Demutrui ngga don dega ey. Tandali go tebok genang, yakua. Ngga-a dabui lo se keng!’ 30 Nggano, sedue ngganemot lo tandali pu go, ‘Babu Ablaham, tap ngganemot nogo nemotnang kua kekeng! No, kebong go sip sik so tandali klaya duo pung goso, nemotnang tupduk go, nemudi sogo tap lo mea keng.’ 31 Way so, Ablaham lo pu go, ‘Musa ey nabi-nabi eygo lo nguok go nebut nogo kua keng go, kebong sip sik so pung golo pen go nogo, yakua keng dali.’ ”