YOHANES
1
Sikabung ey suing so Senong Iram pung go
1 Takuduen seni sogo, Senong Iram gemang. Yangga, Blong Iram. Nemot Ki Wali Iram ey klay goso. Nemot Ki Wali Iram gabe. 2 Yang! Takuduen sogo, Ki Wali Iram ey Nemot klaya gemang. 3 Ki Wali Iram lo duing goso, ut-nan, ulu-semu, wi-dasi, sikabung, naklay Senong Iram lo semu-ngam go gabe. Klayanang go, Nemot lo kua semu go kua! 4 Senong Iram ngga wali min. Sikabung go waliblong Nemot gabe. 5 Blong ngganemot, sikabung ku klik go ba sono ngap go, ku klik go logo blong ngga yakua sut.
6 Ngga ey, sedue klaya duo-a, Ki Wali Iram lo mot-dak go gabe weng. Sedue ngga: Yohanes Busotuigo. 7 Yohanes, Neblong ngganemot sogo deguo, ibe sono senong genang pen so, Ki Wali Iram lo pu go mo weng! 8 Seni so, Blong ngga Yohanes tang goso kua pu gabe. No Blong ngganemot sogo deguo pen genang so, Yohanes pung go.
9 Yang! Sikabung naklay go wali so nenguon go Blong seni, kukunan blo sono mo weng gabe. 10 Senong Iram go blong lo kukunan naklay mo damoy. Yang! Kukunan ngge, nemot-a Senong Iram lo semu go, esang, Nemot ngga kukunan kua senong-nesrenawon. 11 Senong Iram, nemot-a saulatang no pung go, Nemot go sikabung lo ne tenguo sang. 12 No, Nemot so wawi-keng go sikabung nogo-a, waglo, blongdon-a Nemot lo gabe iti. Ngga ey, Ki Wali Iram go danon-denun so nemot mea lemoy. 13 Sedue ey kabung eygo duduing no ngga yakua pu. Ki Wali Iram go duduing no, kikiwali inim-a gabe i-iti.
14 Seni so, Ki Wali Iram sik sogo Senong Iram, sedue so lemoy go, imot ey klay gono mo suing. Klum ey seni eygo Nemot mo damoy. Nemot go blongdon, imot mo ikum-eyom. Yang! Ngga Ki Wali Aya go Danon klayking blongdon eygo dega.
15 Yohanes Busotuigo, Danon klayking nogo so, ngge kalik mo usi-anakam, “Sedue nggenemot so pu-nayu go gabe, ‘Genam blo idi logo, Sedue klaya mea pung-ayon. Nemot kangok dega, genam eygo kua kerlam. Se duing: genam maning kua tui go nogo, nemot gemang.’ ” Ngge Yohanes Busotuigo golo pen go.
16 Se senong: Danon go klum naklay damoy dega eygo tang so, imot, blong duoyap nogo Nemot go klum tong-kua tong gabe. 17 Yang! Ki Wali Iram logo demutrui Musa lo mo iti. No, Ki Wali Iram go klum ey, seni eygo-a, Blong Dem Yesus lo gabe tetaling. 18 Seni so, Ki Wali Mani Iram, kukunan sikabung logo yakua ikum. No, Danon klayking seguong lo taling go gabe senong. Nemot Ki Wali Iram eygo klaya. Danon tang so Ki Wali Iram gabe senong-eton.
Yesus sogo deguo banim temu no Yohanes lo pen-tenawon go
19 Ngge, Yohanes Busotuigo go saysuk nogo tangpen go:
Ku meno no, taiti so pupuit go trang-trang ey nemotnang go kebali sedue ey, Yahudi go iram-tegay lo mot-dak go gemang usi-nenawon, “Seni sogo-a se pen: mot ngge, nando?” 20 Nemotnang lo usi gono, kay seguong neguon so Yohanes lo gemang pen-anawon, “Esang! Sikabung Israel ta mlak genang Iram tegadi so Ki Wali Iram lo dok-nangam go ngga, genam kua!” 21 Ngga ey, tandali nemotnang lo usi go, “Ngga kalik go, mot nabi Elia?” a Yohanes lo wa go, “Genam Elia kua!” Tandali usi go, “Ngga kalik go, mot nabi dega, Musa b kalik go, tandali pung-to?” Yohanes lo pu go, “Kua, genam, ngga kua dali!”
22 Nemotnang go usi, yam so seguoy-nawon goso, ngge kalik dawin ey gemang usi-netenawon, “Ngga kalik kua go, seni sogo, mot ngge nando? Mot tang so, mot go saysuk nogo nebut pen-atogoy? Iram-tegay nogo sogo kalik ya pen-enalu?” 23 Nggano, Yohanes lo pu go, “Ya! Motnang se tup, genam mea pen-asilu. Genam ngge, Ki Wali Sam klaut ba no nabi Yesaya lo pen-ngam go. Yangga,
‘Kaseglok seguong-a semu go duen sogo, sedue klaya duo,
nebut so ngge kalik pepen go:
Motnang go, Iram uweng genang tap, nemu di so se kebo!’ (Yesaya 40:3)
Ngga nabi Yesaya lo klik go. Se senong: genam, ngganemot gabe!”
24-25 Partay Parisi sik sogo tamot-tamot ngganemot lo tandali gemang usi, “Mot, tegadi Ki Wali Iram lo pu go Iram kua go, Elia kua go, nabi kangok go meno kua go! Sogo so, sikabung bu pu go, mot lo ne degut-togoy? Mot ngge, nando?” 26 Nggano, Yohanes lo pu go, “Yang! Genam lo, bu-a pu go gabe dedegut. No, imot nesip sogo, Sedue klaya duo gabe. Motnang, Nemot kua senong. 27 Genam weng gono, Nemot mesip so gabe weng dali. Nemot-a tegadi so dok go Iram gemang! Esang! Nemot go taut no ta mlak genang, genam logo yakua.”
28 Ngge naklay, yakena Betania, bu Yordan ngga idi no, Yohanes lo bu tui-tenawon gono, lemoy go.
Yohanes lo taling-nawon go Yesus ngge Ki Wali Iram sik sogo Iram
29 Ngga utep go, Yohanes mit no Yesus uweng go, gemang ikum. Ngga ey, gemang taling-nawon, “Ikum-a! Ngga, Ki Wali Iram logo domba c kukunan blo sogo sikabung go piam konkebamling suep-genang. 30 Motnang nogo, Nemot so genam lo pen-ayu go gemang, ‘Sedue mesip so gemang uweng. Nemot, Genam eygo, kua kerlam, Nemot kangok dega. Genam maning kua tui go nogo, Nemot gemang. 31 Maning go nogo, genam, Nemot kua senong dali. Seni so, sikabung Israel nogo Nemot pung sogo be, motnang bu-a genam lo gabe tutui.’ ” 32 Nggano, Yohanes lo yang go, “Genam mo ikum, Ki Wali Waglo, ut blo sik so, wiyagui kalik li go, Nemot blo no mo gualing. 33 Ngga ku nogo, genam Yesus maning kua senong. No, Ki Wali Iram lo mot-dak goso, genam weng go, bu gabe tutui. Seni so, genam nogo mo pen, ‘Nago ku no, sedue meno blo no Ki Wali Waglo li go suing go, ngga sik so mea senong: sikabung go wali teguop genang sogo, Ki Wali Waglo logo Sedue ngge lo mea tui-yon.’ ” d 34 Genam tang so, ngga lemoy go mo ikum. Genam gabe yang, “Nemot ngge, Ki Wali Iram go Danon.”
Kuduong so Yesus no keng go sedue
35 Ngga utep go, Yohanes Busotuigo, nemot no keng go sedue namon ey, bu so tutui go sip so gemang got-netenawon. 36 Sip ngganemot lo Yesus koklong gono, Yohanes lo gemang taling-nawon, “Ikum-a! Ngga, Ki Wali Iram sik sogo Domba Nok!” 37 Yohanes no keng go, sedue namon, nebut ngganemot tup gono, Yesus no gemang keng-klenawon.
38 Yesus, taton sono lekek go, sedue namon nemot ey klong sogo ikum gono, gemang usi-nawon, “Mot namon sogo so uwet-kletogoy?” Nggano, nemotnamon lo pu go, “Rabi! - Nemot go seni: Aya klui! - Mot nago so susuing?” 39 Yesus lo pu go, “Weng-a! Genam go sipsuing, ba ikum-a!” Nggano, duo namon, Yesus ey klong go, Yesus, susuing go sip no gemang pung. Ku yam so use no pupung go nogo, nemotnamon ngga so Yesus ey gemang got-klenawon.
40-41 Yohanes Busotuigo go nebut, Yesus no keng go sedue meno gemang tup-nawon. Ngga, Andreas, Simon Petrus go ntaton. Ngga utep go, Simon Petrus ey tegu gono, gemang pen, “Tegadi Ki Wali Iram lo pu go Iram, atnamon mo tegu. ‘Tegadi so pu go Iram’ ngga, Blong Dem, iram so temuit go.” 42 Nggano, Simon Petrus Andreas lo wawi go, Yesus mit no gemang klenawon. Simon ikum gono, gemang pu-tenawon, “Genam, mot mo senong. Mot go sui: Simon! Yohanes go danon. No, mot go sui nggeasui go sik so, Kepas so gabe temuit-situgu!” Se senong: ‘Kepas’ Yunani nebut sogo, Petrus, ngga: ‘demu’.
Pilipus ey Natanael ey Yesus lo usi go
43 Ngga utep dali, Yesus lo duing go, nan Galilea sono gemang klong. Galilea no pung go, Pilipus ey Yesus gemang tegu. Pilipus so Yesus lo pu go, “Weng-a! Genam sono mot se keng!” 44 Pilipus, yakena Betsayda, nan Galilea sik sogo. Ngga, Andreas, Petrus eygo yakena dali. 45 Nggano, Natanael dem tegu gono, Pilipus lo gemang pen-nawon, “Tegadi so Ki Wali Iram dok go Iram, nabi-nabi logo Wali Sam klaut ba no Musa lo klik go ey, atnang mo tegu. Nemot go sui: Yesus, yakena Nasaret sik sogo, Yusup go danon.” 46 No, way so Natanael lo tenguo-nawon go, “Esang! Suey go, yakena Nasaret sik sogo ya pung? Ngga, tapui yakena.” Nggano, Pilipus lo pu-nawon go, “Mot tang so pla ikum-a!”
47 Natanael uweng go ikum gono, Yesus lo pu go, “Ikum-a! Ngge, sedue Israel seni-seni gemang! Kunala piam go Nemot logo kua duduing.” 48 Ngga ey, ngge kalik so Natanael lo gemang pu-nawon, “Aya! Sogo kalik-a genam, Mot lo senong-santo?” Nggano, Yesus lo pu go, “Mot Pilipus lo maning kua pu gono, di ara nuik ba sogo no mot Genam lo mo ikum.” 49 Nebut ngga tup gono Natanael lo pen go, “Yang! Aya klui, Mot ngge, Ki Wali Iram go Danon! Sikabung Israel nogo Iram dega, Mot gabe!” 50 Ngga tup go nogo, Yesus lo usi go, “Di ara nuik ba so mot susuing go Genam lo pen go tang so, dabui iti go Genam no keng-santo go? Se senong: tasam kangok go temu, tasam ngge ey kua kerlam go, mot go nemu lo mea ikum-salo.” 51 Seni so, ngge Genam lo gabe pepen, “Ut tegek go, Blong Dem mit no klak-li go Ki Wali tamot-tamot mea ikum.”