2
Yakena Kana no klaya tete sogo tasam kangok go Yesus lo taling go
1 Ku meno dali no, yakena Kana nan Galilea no, kabung dok walop gemang kong-nenawon. Ku ngganemot nogo, Yesus go unen, Maria, ngga dali so gemang. 2 Yesus, nemot go andua-andua ey, walop sono glop so gemang usi dali.
3 Walop kong-netewon go, nesip no se pupung, anggul bu-a yam so gemang kua-anatun. Nggano, Yesus sono unen lo gemang pu-tenatun, “Nemotnang go anggul bu yam so kua go se!” 4 No, unen sono way so Yesus lo pu go, “Mia, Genam no kua pu! Genam dia sono taling genang ku, maning kua pung go se!”
5 Ngga ey, bu so uwasey go sikabung sono unen lo klong go gemang pen-anatun, “Kua kay! Ngge sono Yesus weng go, sogo kalik Nemot lo pu go, ngganemot-a keng go se semu!”
6 Se ikum: ngga sogo sro kangok go, Yahudi go demu lo pu go kalik masi bu lu genang, bu so sesre go 6 yam so kong go gemang gigit. Sro klaya go ba no sre genang bu, liter 100 yam no. 7 Ngga ey, Yesus klong go, bu so uwasey go sikabung no gemang pu-tenawon, “Sro lue sogo nggenemot ba no bu sre-a!” Ngga tup gono, 6 yam sogo sro ba no, bu sre-netenawon, damoy ey tey-sing. 8 Ngga ey sedue meno no Yesus lo pu go, “Bu ngga, seguay so gluik go, walop wengkabui no se iti go klong!” Nemotnang lo gluik go, walop wengkabui sono iti go gemang klong. 9 Nggano, anggul ngga walop wengkabui lo gemang tra-nawon. Ngga ey duing-nawon go, “Anggul ngge suey dato, tom kangok go.” Seni so, nemot kua senong, anggul ngge nago sik so mo lemoy. 10 Walop wengkabui, kua senong go nogo, nawon go, sikabung dok-newon gono gemang pu-tenawon, “Sogo kalik go-a yabung? Anggul tom kangok go-a banim mea wasey. Ngga-a, mata so drop gono, tom seguay go-a mea wasey, nemotnang tom suey so tandali yakua tra go nogo. No, mot logo, ngga kalik kua semu-sreto, anggul tom eygo-a mesip so ne wasey-togoy!”
11 Yakena Kana, nan Galilea no keduong seni so tasam kangok go ngge, Yesus lo semu go gabe. Dia sono go Yesus go blongdon, tasam ngge lo gemang nenguon. Ngga ey, Nemot go andua-andua gemang senong, “Yang! Tegadi so Ki Wali Iram lo dok go Iram, Yesus gabe!”
12 Walop yam sogo no, Yesus unen ey, ntatonnang ey, nggano Nemot no keng go andua-andua ey, yakena Kapernaum, nan Galilea sono gemang-nenawon. Ngga sogo, ku nago yam so gemang got-nenawon dali.
Ki Wali yap seboy logo sikabung nay sogo teta go yat-nawon go
13 Yahudi go walop Paska se dedagu. Yerusalem no Yesusnang gemang-nenawon. 14 Ki Wali yap seboy sogo, sapi, domba, wiyagui, naynang sogo so keduik go, gemang ikum-nawon. 15 Ngga ikum gono, tegan demun Yesus lo semu go, Ki Wali yap seboy sik sogo, naynang so keduik go menay gemang yat-nawon. Nggano, nay so teta go sip, kekayso iwot-sing go, duoynang ey ku no gemang suk. 16 Nggano, wiyagui so nay go sono gemang pu-nawon, “Wi ngge, ngga sono, idok go klong-a! Nay sip so, At go Aya go yap kua lemoy!”
17 Nggano, nemot no keng go andua-andua gemang duing-nenawon, seni so, tasam ngge, Wali Sam klaut ba no mo klik,
“Ki Wali Iram!
Mot go Yap nogo dabui klum kangok dega golo,
Genam ey mea kuim!” (Mazmur 69:10)
18 Yesus go tasam ngga ikum gono, Yesus nogo nebut dawin ey Yahudi go iram-tegay lo gemang waydang-nenawon, “Nando lo pu gono, tasam ngga kalik go semu-to? Tasam kangok go meno nggeasui se semu-silo, genamnang senong genang: seni-seni so, Ki Wali Iram lo mot-dak go ngga, Mot gabe!”
19 Ngga ey, way so Yesus lo pu go, “Yap ngge-a ngga sono se togut! Ku nangglik ba no, tandali At lo mea klik-silu.” 20 No, kua senong go nogo ngge kalik nemotnang lo gemang pen-netenawon, “Ye, sogo kalik ya? Yap ngge, yagui 46 ba no klik go, sogo kalik so ku nangglik ba nogo Mot lo ya klik-lo?”
21 No, Ki Wali yap nogo ngga nebut benuey, Nemot go saysuk so pu go. 22 Ku nangglik tete sogo no, kebong go sik so Yesus nglong gono, Nemot no keng go andua-andua gemang duing-nenawon, “Seni so, Wali Sam klaut ba nogo buong genang nebut klik genang, ngga Yesus lo mo pen-ayom dali. Nggano, Yesus lo pen go sono, suey so dabui lo gemang keng-nenawon.”
Sikabung go duduing naklay Yesus lo senong go
23 Walop Paska sogo so, Yesusnang kota Yerusalem so got-netenawon. Ngga ey tasam mata so, Yesus lo pluok go gemang ikum-nenawon. Yesus go sui nogo kunala, kangok so sikabung mata sogo lo gemang duing-netenawon. 24 No, nemotnang sono go Yesus tang go logo kua keng-srenawon. Seni so, nemotnang go kunala naklay, Yesus mo senong. 25 Yang! Yesus nogo, teguopey tang sedue meno lo yakua pen. Sikabung lo duing go tap naklay, Nemot mo senong.