19
Yesus ey Sakeus tegu go
1 Yakena Yeriko no Yesusnang gemang pung. Ngga ey yakena lo gemang naton. 2 Blasteng so iyaluim go sedue meno, Sakeus ngga so gemang. Taut mata dega so nemot lo mo gluik. 3 Yesus pung go tup go, kangok so gemang duing-nawon, “Yesus sogo kalik go sedue?” Sikabung mata sogo lo wik go, ngga no Sakeus go saysuk tebot go, Yesus yakua ikum. 4 Ngga ey, Yesus ikum genang so, tap sono banim kap go di ara blo no gemang klak. 5 Yesus koklong go, sip ngganemot no pung go, di blo sono nemu gemang yalap-biwon. Sakeus ikum gono, Yesus lo gemang we-biwon, “Dem Sakeus! Kedaso li-kundo ya! Nggeasui go, mot go yap no Genam ta sogo se!” 6 Yesus lo pu go tup gono, di blo sik so keda so Sakeus li go, dabui yakay ey Yesus glop so wawi go, yap sono gemang klong. 7 Ngga kalik go sikabung temu ikum go, dabui ba segut gemang iti. Ngga ey, gemang sok-netenawon, “Ikum-a! Piam eygo sedue go yap no, glop so Yesus degut go!” 8 No, wisi so Sakeus-a ip-nawon go, Woy Dem no gemang pu, “Aya! Genam go taut nesip lo mea wasey. Taut kua go sikabung no, temu mea ikak. Nggano, nando go taut, wamoymlue no genam lo gluik go, da namon-namon yam so tandali mea iti.” 9 Nebut suey go ngganemot tup gono, Yesus lo gemang we-tenawon, “Nggeasui go yaptenglam nega go ngge, Ki Wali Iram lo mo sesuoy gabe. Seni so, babuasi Ablaham go duo dali gabe. 10 Yang! Blong Dem weng go, walitap nega go sikabung uwet go, sesuoy genang tap seni-a tegu genang so.”
Woy Dem pung genang nebut benuey
11-12 Yesus ey koklong go sikabung, Nemot go nebut tup go gemang duing-nenawon, “Yakena Yerusalem no Yesus degut go, Woy Wali Iram tamlak genang blongdon duduing keda so mea pung-ayun.” Ngganemot sogo so, nebut benuey meno ngge kalik Yesus lo gemang pen-anawon, “Iram tuik genang so, saula meno go nan no deguena meno gemang klong. Iram so nggano temuit gono, tandali mea weng.
13 No, maning kua klong gono, nemot go kebali sedue tanamon yam so usi go, nemotnang no duoy klay-klay gemang wasey-nawon. Ngga ey, gemang pen-nawon, ‘Genam klong go nogo, duoy ngge nay so nase usey.’ 14 No, nan nok ngga sogo temu, deguena duo ngga iram so temuit genang moyso. Ngganemot sogo so, mesip so tamot mot-dak klong go gemang pu, ‘Sedue ngga iram so temuit go atnang moyso.’
15 Ngga blo idi lo, iram temuit gono, tandali yakena no deguena ngga gemang weng. Pung gono, drang iti go sedue usi go gemang pluep-lak. Nemot senong genang so, nemotnang no iti go duoy nay go ngga kata yam so mo lemoy. 16 Banim, klaya tete sogo sedue no gemang usi. Sedue ngga lo pu go, ‘Aya deguena! Mot lo, genam no duoy iti go, nggeasui go tanamon so mo lemoy.’ 17 Way so wengkabui lo pu go, ‘Suey dato! Kebali sedue suey go, mot gabe. Kebali seguay go dato, dabui lo don ey mot lo pluok go, yakena tanamon tamlak genang wengkabui so mot genam lo gabe tetaling.’ 18 Nggano namon tete sogo lo pu-tenawon, ‘Aya deguena! Mot lo iti go duoy, nggeasui go taidi yam so mo lemoy.’ 19 Deguena lo pu go, ‘Yakena taidi tamlak genang wengkabui so genam lo gabe tetaling.’ 20 Ngganemot no, nangglik tete sogo weng go, gemang pu-tenawon, ‘Aya deguena! Mot go duoy ngganemot-a be! Kua genaning sogo so, keba ba no genam lo mo tui. 21 Seni so, mot don dega eygo sedue. Mot logo sedue meno go tebadali go mea lek. Kua kuali go di sik sogo, mot logo didon mea buo. Duoy kua genaning suali so, nay genang sogo duoy ngge genam logo kua usey.’ 22-23 No, sedue ngge no deguena lo pu go, ‘Kebali sedue piam go, mot gabe! Nemot-a mo senong go: sedue don dega ey go, genam gabe. Sedue meno tete sogo, tebadali go ey genam lo lek go. Kua kuali go di sik sogo don bubuo go. Sogo so, tatuisip no, duoy kua klong go tui ne? Ngga kalik go, genam nggeasui pung go, duoy ngga nok dato gabe ikum. Esang! Nggeasui go mot tang so pen-to kalik so, mot nogo idekeba mea iti.’ 24 Ngganemot no, nemot mit no yaluim go sikabung no deguena lo gemang pu, ‘Duoy ngga, nemot go ta sik sogo lek go, duoy tanamon yam so lemoy go sono se iti.’ 25 No, ngga sogo sikabung lo pu go, ‘Aya deguena! Nemot tete sogo tanamon yam so gemang! Teguopey sogo so ya tebok?’ 26 Nggano, way so deguena lo pu go, ‘Seni so, seni eygo nogo, mata so nemot no mea tebok. No, seni kua tagot go, seni seguey go nemot sik sogo mea lek dali. 27 Nggeasui go, genam iram temuit genang so wayang go sikabung, ngge sono se weng-lak! At go nemu damoy so se tuk-sing.’ ”
Yesus go nebut benuey ngga no yam.
Sek ey yakay ba lo Yerusalem sono Yesus degut go
28 Yakena Yeriko sik sogo, Yerusalem sono banim besi go Yesus gemang koklong. 29 Saytun meduim no Betpage ey Betania yakena eygo dagu no, banim klong genang so andua namon, ngge kalik Yesus lo gemang mot-dak, 30 “Damoy temu sogo yakena sono motnamon se kenalo! Yakena no dedegut goso keleday nok tegan lo dok go mea ikum-klenalo. Keleday nok ngganemot, sikabung logo maning kua klak. Di sik sogo nemot go tegan plet gono, Genam sono wawi go se kebando! 31 Motnamon so sedue lo usi go, ngge kalik se pu-klenalo, ‘Woy Dem go duduing no keleday nok blo no Nemot klak genang so wawi go gabe koklong.’ ” 32 Nemotnamon klong go, Yesus lo pen go kalik gemang ikum-klenawon. 33 Nemotnamon, keleday nok tegan so peplet gono, keleday nok so pong go sedue lo gemang usi-nawon, “Kay, motnamon, keleday nok, sogonang so peplet?” 34 Way so sedue ngga no gemang pu-klenawon, “Woy Dem go duduing no keleday nok blo no Nemot klak genang so wawi go gabe koklong.” 35 Ngga ey, keleday nok wawi go Yesus mit no gemang kebanuon. Yesus mit no pung gono, nemotnang go amka walong go, menay blo no gemang sey-nenawon. Ngga ey, Yesus klak genang sogo ta gemang mlak-nenawon.
36 Keleday nok blo lo Yesus koklong go, tap lo amka Nemot no keng go andua-andua lo gemang sey-netenawon a
37 Yerusalem no Yesusnang se pupung. Saytun meduim lili gono, tasam-tasam kangok go Yesus lo pluok go ikum go tang so, Ki Wali Iram go sui yakay ey don ey blo sono Nemot go andua-andua mata sogo lo gemang iti-nesiton. 38 Ngge kalik,
“Mot Iram! Ki Wali Iram lo iwat go,
teguop yakay eygo, Mot blo no gabe!
Woy Wali Iram go sui ba lo Mot uweng go.
Ngengam-yakay eygo Blong dia yakena so;
ta kokong Ki Wali Mani Iram nogo ey gabe!” (Mazmur 118:26)
39 Se ikum! Sedue Parisi temu, ngga sogo sikabung ey koklong golo gemang usi-netenawon, “Aya klui! Mot go andua-andua ey bebat-a. Ngga kalik so kua pepen ey!” 40 No, Yesus lo pu go, “Kua bebat! Yakot so nemotnang suing so pu go, demu naglap ngge lo ta mea kokong!”
Yakena Yerusalem so Yesus lo u kluo go
41 Yesus koklong, yakena Yerusalem ikum go, yakena ngga sogo u gemang kluo-nawon. 42 Ngga ey gemang we-tenawon, “Esang! Nggeasui go ku no mot ikum go, ngengam keduik genang tap gabe ya senong. No, mot go nemu nogo maning kua taling. 43 Ngge-a mea lemoy-ayun! Saula meno go plesedue weng go, wok teguot-neyon go, butebuem-butebuem no mea suing. Sip klaya go sono mot negi go susuep yakua pla-kelo. 44 Seguay go-babu go naklay nemotnang lo mea tuk-sing. Yap-yap naklay togut go nan ey mea tram. Seni so, demu meno, demu meno blo nogo tui go kua. Sogo temoy no ngga ya lemoy-ayun? Yang! Ki Wali Iram go gualaklum pung-atun go, kua ikum go sang!”
Dewi sip so Ki Wali yap se lemoy
45 Ki Wali yap seboy no Yesus degut go, nay so teta b go sedue-sedue gemang yat-nawon. 46 Ngga ey, gemang pu-tenawon, “Wali Sam klaut ba no ngge mo klik, ‘Dewi so pupu go sip so Ki Wali yap se lemoy!’ No, sinebutsi sip so motnang lo lemoy go be.” c 47 Se senong: kuno-kuno, Ki Wali yap ba no degut go deguo teguop-a Yesus lo gemang nguok-tenawon. Nggano, Yesus but genang klayta, Yahudi go iram-tegay lo gemang duing-nenawon. 48 No, Yesus but genang tap suey go kua ikum. Yang! Yesus eygo sikabung mata so, klay goso Nemot lo ngunguok go nebut so tutup go.