25
Duo kaguit tanamon taidi-a kunala ey taidi-a puplu so
1 Yesus lo tandali pu go, “Woy Wali Iram lo tamlak go duduing lemoy genang, benuey ngge kalik gabe tetaling: kabung dok genang tap bung so, duo kaguit tanamon pelita a ey natunlak go. 2 Nemotnang sik sogo taidi-a kunala ey taidi dali puplu so. 3 Puplu sogo pelita seguong-a iti go, no, tete sogo mlay kua sre ne. 4 Kunala eygo logo samonsuip no tete sogo mlay ey gemang sre. 5 Tap bung so got-neton go, kenin eygo sedue keda so kua pung goso, duo kaguit naklay usene tra go, se srek-nenawon. 6 Wadi nesip go sikabung lo mot usi go gemang tup-nenawon, ‘Kenin uweng go! Klong go keda so nase tegu!’ 7 Duo kaguit ngga buong-lak go, nemot go-nemot go pelita suey so dali gemang semu-nenawon. 8 Nggano, kunala eygo kaguit sono ngge kalik puplu sogo lo gemang we-netenawon, ‘Atnang nogo mlay temu sre-kesando-a! Atnang go pelita i go sut yam nogo se!’ 9 No, way so kunala eygo kaguit lo pu go, ‘Kua! Ngga kalik go, imot naklay nogo mlay mea kua nemot. Ngge suey: kenalo go, mlay inim-a, duoy lo se sre-kenalo!’ 10 No, mlay sre so nemotnang koklong gono, kabung dok genang kenin pung go, kaguit taidi kunala eygo-a, walop yap ba sono keng go degut go, yatap se kadun-nenawon. 11 Nggano, kaguit temu ngga mesip so weng go, yatap no tetegak gemang u-usi, ‘Woy Dem! Woy Dem! Yatap tenuing-a! Atnang degut sogo se!’ 12 No, way so Nemot lo pu go, ‘Esang, motnang Genam kua senong!’
13 Benuey ngge sik so se senong: tete sogo ey yay dali motnang se susuing! Woy Dem tandali pung-ayon go ku, imot logo kua senong.”
Woy Dem lo taling go kebali nogo nebut benuey
14 Woy Wali Iram lo tamlak go duduing lemoy genang, benuey ngge kalik gabe taling-situgu, “Nan meno sono deguena koklong go kalik. Deguena klong sogo no, nemot go trang-trang itak go nogo drang gemang wasey-sing. Drang ngga nay go miam ey goso nemotnang lo lemoy genang. 15 Ngge kalik gabe wasey-nawon: klaya tete sogo trang nogo drang, taidi yam so gemang ikak. Namon tete sogo nogo, drang namon ey gemang iti-nawon. Ngga ey, nangglik tete sogo trang nogo, drang klaya so gemang iti-nawon. Ngga naklay, nemot go-nemot go don ey ikum gono wasey go. Ngga kalik yam so wasey-nawon gono, deguena gemang ip-nawon. 16 Deguena klong gono, drang taidi yam so ikak go trang nawon go, naynang sogo taut idok go, keda so nay go, drang ngga taidi yam dali so gemang tebok. 17 Namon tete sogo trang, drang namon ey iti go logo, ngga kalik dali gemang semu-nawon go, drang namon dali ey gemang tebok. 18 No, nangglik tete sogo trang, drang klaya iti go-a nawon go nan mu tuet gono, ngga ba no gemang kok. 19 Ku walong kua luik gono, deguena tandali pung go, drang wasey go tagu i genang so, trang-trang gemang usi-sing. 20 Klaya tete sogo trang, taidi yam so ikak go weng go, deguena no ngge kalik gemang pen-tenawon, ‘Aya deguena! Genam no mot lo ikak go drang taidi yam so. Drang ngga at lo nay go, nggeasui go taidi yam dali so mo tebok be.’ 21 Ngga tup gono, ngge kalik gemang pu-nawon, ‘Mot senongkalong ey go trang! Mot go tasam ngga kalik semu go, mot mo keng. Ngga ey, yay suey so mot lo mo suing. Drang seguay go mot no ikak go, suey so mot lo mo nay go, mot lo mlak genang kebali kangok go-a, at lo mea iti dali. Nggeasui go, deguena go yakay ba sono degut go mot-a se suing.’ 22 Ngga ey, namon ey iti go tete gemang weng, nemot lo pu go, ‘Aya deguena! Genam nogo drang, namon ey mot lo iti go. At lo nay go, nggeasui go namon dali so mo tebok be.’ 23 Ngga ey, deguena lo pu go, ‘Mot teguop go! Mot go tasam ngga kalik semu go, mot mo keng! Ngga ey, yay suey so mot lo mo suing. Drang seguay go mot no ikak go suey so mot lo mo nay go, mot lo mlak genang kebali kangok go-a, at lo mea iti dali. Nggeasui go, deguena go yakay ba sono degut go mot-a se suing.’ 24 Ngga ey, drang klaya iti go tete gemang weng dali. Nggano gemang pen-atenawon, ‘Esang aya! Genam mo senong, mot lo ta mlak go don dega ey. Sedue meno lo seguot pung go sik sogo, tebadali mot logo mea gluik go dam. Nago no mot lo kua bubluim go didon seni, mot logo mea buo. 25 Drang at no iti go ngga, nega genaning suali so, nan mu-a tuet go, ngga ba no at lo mo kok. Mot go drang ngganemot-a tabunga gabe iti-go kuntu.’ 26 Ngga ey, deguena lo pu-nawon go, ‘Esang! Mot sesrok eygo, tupduk kua go sedue! Seni so, mot nemot-a mo senong, genam don eygo, sedue meno go seguot sik sogo genam logo mea gluik. 27 Ngga kalik go, drang so king go sip ba no drang ngga sogo so kua king ne, ngga ba no nok ey tui gono, tandali genam nogo mo iti be. 28-30 Se tup! Nggeasui go, sedue ngge sik sogo drang ngge tandali iti go, drang tanamon yam so lemoy go trang sono se iti. Seni kua go kebali sedue ngga, ku klik go ba dega sono se betep. Ngga ba no, unebu ey sring eygo-a mea negot.’ ”
Nebut benuey ngge sik so, Woy Wali Iram tamlak go duduing lelemoy go, ngge se senong: wali kebali seni ey tagot go nogo-a, nemot nogo miam ey Ki Wali Iram lo mea tebok. No, seni kua tagot go-a, seguay go gemang go, tandali Ki Wali Iram lo mea lek.
Ku yam sogo no kisebui taling genang
31 Ayanang, mianang! Blong Dem, Nemot go blong ba lo Wali tamot ey weng-lak go nogo, Iram demu blong eygo blo no Nemot mea suing. 32 Ngga ey, kukunan sogo saula-saula naklay Nemot go suongku sono, Wali tamot lo wawi go mea yaluim. Nggano, sikabung banom-banom so, Nemot lo mea tenong-sing! Domba ey kambing ey, nemot so pong golo wasey-sing go kalik. b 33 Nando domba tete sogo, ta semlea idi no mea yaluim-sing, nggano, nando kambing tete sogo, ta kali idi no mea yaluim-sing. 34 Nggano, ta semlea idi sogo-a Woy Dem lo ngge kalik mea pu, “Weng-a! Motnang Ki Wali Aya lo mo klum go sikabung! Genam go blongdon ba no pla degut-a! Seni so, takuduen sik so, motnang nogo so blongdon naklay Ki Wali Iram lo dali mo tui-ngam.” 35-36 Se duing! Genam ten tra go ku nogo, Genam nogo ten motnang lo mo iti; Genam bunuo tra go ku nogo, Genam nogo bu motnang lo gluik go mo iti; Genam, amble suk meno so pung go nogo, yap ba nogo motnang lo Genam wawi go mo degut; Genam amka kua go nogo, At nogo amka motnang lo iti go mo kok; Genam sadui sogo nogo, Genam ta, motnang lo mo suk; Genam boy ba sogo nogo, Genam nemu sogo motnang lo klong go mo ikum. 37-39 Ngga naklay tup go nogo, Ki Wali Iram lo iwat go sikabung ngganemot lo mea pu, “Woy Dem, genamnang kua senong go. Kaning so mot tenday gono atnang lo tegu go ten mo iti? Kaning so Mot nogo genamnang lo bu gluik go mo iti? Kaning-a amble suk meno so pung go, atnang lo mo tebok? Kaning-a Mot ulue so susuing gono ikum go, amka atnang lo mo iti go kok? Kaning so, Mot sadui sogo mo ikum, nggano, Mot boy ba sogo nogo mo klong go ikum?”
40 Ngga ey, Iram ngganemot lo mea pu, “Nando sui kua go sikabung ngge sik sogo klaya duo no motnang lo semu go, ngga Genam nogo so semu go gemang.” 41 Ngganemot no, ta kali idi sogo no, ngge kalik Nemot lo mea pu, “Klong-a! Ki Wali Aya lo mo wayang go sikabung! Genam go suongku sik sogo nase klong! Kupiamgo ey, nemot go tamot eygo nogo so idakoy nebleng dali puit go ba no se degut! 42-43 Se duing! Genam ten tra go nogo, ten motnang logo ne kua iti; Genam bunuo tra go nogo, bu gluik go kua iti ne; amble suk meno so Genam pung go nogo, yap ba nogo Genam motnang lo kua wawi go degut ne; Genam ulue sogo nogo, amka motnang logo kua iti ne; Genam sadui sogo nogo, ta motnang lo kua suk dali; boy ba sogo nogo, Genam nemu motnang lo kua ikum ne. 44 Nggano, Woy Dem sono nemotnang lo mea pu, ‘Kaning-a Mot tenday go genam logo mo ikum? Bunuo tra go nogo kaning-a at logo mo ikum? Ngga ey, amble suk meno sogo Mot mo tegu? Ulue sogo nogo kaning-a mo ikum? Ngga ey, genamnang logo ne kua tebok?’ ”
45 Ngga ey, ngge kalik so nemotnang sono Woy Dem lo mea pu dali, “Drang kua go, sui kua go sikabung ngge sik sogo klaya duo no kua tebok go, ngga Genam sono mot lo kua tebok go gemang! 46 Yatrang ngge suey so se senong! Nemotnang ngga idekeba-a senang so lek genang so pu go mea degut-lak. No, seni eygo nemudi sogo sikabung-a, kikiwali ba sono wawi go mea degut.”