24
Blong Dem go ku lemoy go
Ki Wali yap togut genang
1 Ki Wali yap ba sik sogo Yesusnang pung go koklong gono, Nemot lo kuoy go andua-andua, Ki Wali yap sono ta tetaling, nebut ngge kalik gemang pepen, “Ikum-a! Ki Wali yap teguop go se!” 2 Ngga ey, nemotnang sono ngge kalik Yesus lo gemang pen, “Motnang, naklay ngga suey so mo ikum?” Motnang no gabe pen-asitugu, “Yap ngge so klik go demu klayanang go, demu blo dali nogo tui go mea kua gigit. Naklay-naklay togut go mea kesuop.”
Banim temu no iseng kukunan blo nogo mea tra
3 Ku ngganemot nogo, meduim Saytun blo no Yesus got-awon go, nebut banom pen genang so, Yesus mit sono Nemot go andua-andua yaluim-sing go, ngge kalik nemotnang lo gabe usi-nenawon, “Kaning so, ngganemot ya lemoy-ayun? Atnang nogo pen-a! Mot pung sogo nogo, sogo tasam lelemoy gono, ikum go ya senong-elu? Kukunan ngge yam genang sogo sik so ya senong?”
4 Way so Yesus lo pu go, “Motnang-a kunala temoy no se! Motnang go duduing sikabung lo saguip genaning! 5 Ngga senong genang, suey so ngge-a se duing: sikabung mata so, Genam go sui no pung go mea weng. Ngga ey, ngge kalik mea pepen, ‘Genam ngge Ki Wali Iram lo tegadi dok go iram ngganemot, a sikabung tamlak genang gabe!’ Nggano, tap nega go sono sikabung mata so nemotnang lo wawi go mea degut. 6 Ngga ey, ple kluim, plepung genang atuia motnang mea tup-kelo. Dabui suali-a kua tra! Ngga naklay seni so lemoy genang gemang. No, i go sogo ku ngga maning kua pung. 7 Se senong! Saula tang meno ip go, saula meno ey ple so mea tutui. Nggano, nan meno ey nan meno ey ip go ple mea pupung dali. Kluongku kangok go mea pung. Nggano kuysu kangok go mea sret-ayun. 8 No, Woy Dem pung genang ku ngga lo maning kua taling. Ngge duo tui genang iseng tangtui go tra go kalik.
9 Ngga lelemoy go nogo, ide-iseng eygo taling genang so, plesedue go ta sono motnang mea iti. Ngga ey, motnang, nemotnang lo but go mea kebong. Genam go sui tang sogo so, saula-saula dabui ikle eygo mea tra. 10 Ngga ey, Genam no keng go sik sogo, mata so sikabung mea teguey. Way-way so plesedue go ta sono nemotnang mea iti. Nggano, way-way so dabui ikle mea tra dali. 11 Kupiamgo tamot wamoy sogo mata so mea weng-lak. Tap piam go ba sono go, kupiam go tamot lo pepen go tang so, sikabung wawi go mea nega. 12 Taybat piam go-a pupluok go, miam ey lemoy go tang so, tandali go way-way klum mea kukua. 13 No, nandonang-a don ey susuing go, e... i go sogo ku no pung go, sesuoy gono wali yakay ba nogo, suey so nemot-a mea pung. 14 Se senong! Woy Wali Iram go duduing Yesus lo tamlak go deguo teguop pepen klong go, e... kukunan sring no-sring no mea pung. Ngga ey saula-saula naklay mea senong, ‘Seni so! Ki Wali Iram lo tegadi so dok go Iram, Yesus gabe.’ Ngga blo logo, i go sogo ku gemang ya pung.”
Idekeba kangok go mea pung
15 Yesus lo tandali pu go, “Wali Sam klaut ba nogo nebut b ngge nando lo ikum go, seni suey so se senong! Ngge-a nabi Daniel lo mo klik-nangam, ‘Ku meno no, waluk genang tasam piam go, Ki Wali yap teguop ba nogo mea klik-neyon.’ Tasam piam go ngganemot, Teguop go sip ba no ip go, motnang ikum go senong go, se duing-kelo, ‘Nggeasui go piam go ku mo pung gabe!’ 16 Ngga tang so gabe pen-asitugu, nan Yudea sogo sikabung kumeduim sono se kuek-lak. 17 Seboy dia so nandonang susuing go, teguopey taut ikak sogo yap ba sono go kua degut. 18 Nggano, usu sogo sikabung, ku klik go usene srek genang amka suey go iti so, yap sono kua kap ne. 19 No, esang! Duo nu sogo ey duo min so kokok go mianang eygo-a, ide dega ey gabe. 20 Dewi kangok so motnang se pupu, ‘Dalip eygo ku no lemoy genaning. Ngga ey, Ki Wali Iram go Sabat ku no lemoy go, motnang kuek eygo.’ 21 Yang! Ku ngganemot nogo, iseng-sesat kangok dega so mea tra. Iseng ngga tra go, takuduen sik sogo maning kua lemoy. Ngga ey, tandali go iseng ngga kalik go ya kua pung dali. 22 Iseng-sesat eygo ku ngga walong so lemoy go, klayanang go sinok mea kua sesuoy. No, Ki Wali Iram lo kuoy go sikabung no duing go tang so, ngga lemoy genang ku tebot so mea pedueng.
23 Ku ngganemot nogo, ngge kalik motnang no sikabung lo mea pu, ‘Ikum-a! Ki Wali Iram lo tegadi so dok go Iram ngga so, ngga go!’ Ngga tup go, motnang-a kua keng! 24 Yang! Wamoy sogo iram-iram mata so pung go mea weng-lak. Nemotnang lo mea pen, ‘Atnang Ki Wali Iram lo tegadi so dok go iram gabe!’ No, seni so, nemotnang ngga wamoymlue sogo. Ngga ey, Kupiamgo tamot wamoy so pluep go, mea weng dali. Tasam-tasam kangok go nemotnang lo mea taling. Tasam-tasam tang so Ki Wali Iram lo kuoy go sikabung mlue go, nega genang. 25 Motnang-a suey so se senong! Banim temu no motnang nogo ngge At lo mo pen gabe. 26 Nago no mot sono sedue lo pu go, ‘Ikum-a! Dikuagosip kaseglokpay so Blong Dem gemang!’ Motnang-a, ngga sono go kua klong! Kua go, ngge kalik so nemotnang lo pu go, ‘Ikum-a! Degu ba so Blong Dem ngga go!’ Motnang-a kua keng! 27 No, ngge se senong: Blong Dem pung genang ngga, woy klak sik so woy sut sono kuydop sebuk go kalik Blong Dem kekayso mea pung. 28 Se duing! Menay kebong goso ngga blo lo uduobay lo pluep go ikum go kalik, sikabung naklay lo Blong Dem mea ikum.”
Blong Dem pung-ayon genang
29 “Iseng kangok go ngga lemoy go blo idi logo, ku walong kua luik gono, ku klik goso woy mea but. Ngga ey, blong kua goso banu mea kenip. Ut blo logo top ku sono mea teglik go negot-sing. Ngga ey, ut ta so mlak go don mea sret-ayun. 30 Ku ngganemot no, Blong Dem weng genang tasam ut blo no mea ikum. Ngga ey, saula-saula kukunan blo sogo naklay sadui bong ey mea pling. Yang! Blong Dem utkenuim blo lo, blongdon ey uweng go, nemotnang lo mea ikum. 31 Nggano, Kiwali tamot Blong Dem lo mot-dak go mea klong. Koklong gono, kabui tui-yon go kluim kangok dega eygo, Ki Wali Iram lo mo kuoy go sikabung c woy klak sik sogo, woy sut sik sogo, sada sik sogo, dun sik so, ut sring ngge idi sik so, ut sring ngga idi sik sogo, Ki Wali tamot lo mea yaluim-sing.
32 Motnang no gabe pen-asitugu, ‘Di ara sik sogo kunala iguong plet go, tuik net gono blup pupung go, motnang ngga ikum go se senong: yang, woy dalu gabe tong-aton.’ 33 Ngga kalik dali so, ngge pen-atugu go naklay mo lelemoy go, motnang se senong, ‘Ku yam so buem tebot-a, i go taput no mo pupung gabe!’ 34 Motnang no gabe pen-asitugu, ‘Nggeasui go tang maning kua nega gono, naklay ngge mea lemoy. 35 Yang! Ut ey nan eygo mea nega. No, Genam lo pen-atugu go nebut-a, yakua nega gabe.’ ”
Walipeli suey so suing genang mangking
36 Blong Dem weng genang ku, sikabung klayanang go logo ya kua senong. Kiwali tamot Blong Dia yakena so susuing go kua senong. Ki Wali Danon kua senong dali. Ngga, Ki Wali Aya tang go ba seguong so gemang.
37 “Se senong! Blong Dem weng genang ku, babu Noak got-akam go ku no lemoy go, ngga kalik dali so mea lemoy. 38 Bu kangok so maning kua pung go, e... Noak bayi ba no degut go ku nogo, ngge kalik sikabung got-nenakam: ten-a dedam, bu-a dedrop, kabung-a iti-itak. 39 Nemotnang kua senong, sogo kalik go ya lemoy. Nggano, ku ngganemot nogo bu kangok go klak golo sikabung yam so lek go mo leguot. Ngga kalik dali Blong Dem pung genang ku nogo mea lemoy-ayun. 40 Ku ngganemot nogo, namon duo usu sogo, meno-a wawi go meno-a mea itak. 41 Kabung namon klay goso kebali sesemu go, meno-a wawi go keklak meno-a mea itak. 42 Ngganemot sogo so, walipeli suey so se suing! Se duing: kaning so motnang go Woy Dem ya pung-ayon, motnang kua senong gabe!
43 Nebut yatrang ngge kua kay: yap ba sogo sedue, nemot mo senong go, kaning so wom sedue wadi go ya pung, ngga kalik senong go, suey so yapyay mea suing, yap no wom sedue lo degut genaning. 44 Ngga kalik go, walipeli yay suey so motnang se susuing. Blong Dem weng genang ku ngga motnang logo yakua senong.”
Tamot suey go ey tamot piam go ey
45 “Motnang, suey so kengduk go, kunala kalong eygo tamot kalik se suing: kebali sedue nogo tendam genang woy, nemot lo suey so tetaling go, wengkabui so mea paysing. 46 Yang! Wengkabui pung go ku no, kebali so tamot ngga pupluok go ikum go, nenem-yakay eygo tamot ngga gemang. 47 Ngge seni so mea lemoy: naklay-naklay yay suing genang don tamot ngga sono mea itak. 48-50 No, tamot kua seni go-a, dabui ba lo ngge kalik pu go, ‘Ye, wengkabui maning kua pupung-wa!’, ngga ey tamot temu demun nemot lo suey go, andua-andua ey takeduik go bu-a dedrop go, seni so, nemot kua senong go ku no, wengkabui pung so mea pung. 51 Wengkabui pung go, tamot ngga nogo idekeba-a mea taling. Tengang lo but go nemot mea kebong. Yang! Nemot nogo taling go idekeba, wamoymlue eygo sikabung go sip sono mea betep. Sip ngganemot ba so, unebu ey sring kluim eygo-a mea nenegot.”