21
Ki Wali Iram sono iti go taiti seni
1 Ki Wali yap ba no suing gono, nemu so bung-tenawon go, tasam ngge kalik Yesus gemang ikum: taitisip ba no duoy taut mata sogo lo gemang king. 2 Ngga ey, kabung nalo kenin kebong go, taut kua go, duoy kluip namon dato-a gemang king-natun dali. 3 Ngga Yesus lo ikum go, gemang we-nawon, “Se tup! Kabung nalo ngge lo iti-tun go taiti-a kangok dega, sikabung temu logo ey kua kerlam. 4 Seni so, drang miam eygo sik so, sikabung lo mo iti. No, moynalo ngge taut kua. Nemot go ten iti genang duoy naklay, Ki Wali Iram nogo so mo iti-tun.”
Yansi Lemoy genang Yesus lo pen go
5 Ki Wali yap ba sogo no, sikabung lo pu go, “Ikum-a: Ki Wali yap dega, demu sam suey golo klik go, nggano Ki Wali Iram nogo taiti teguop dato go itak-nengam go.” Nebut ngga tup gono, Yesus lo gemang pu, 6 “Esang! Motnang lo ikum-ketegoy go ngge togut genang ku gemang. Seni so, naklay mea kesuop, klaya nang go demu, meno blo nogo mea kua kong.” 7 Ngga sogo sikabung lo usi go, “Aya klui! Kaning so ngga ya lemoy-ayun? Ngga lemoy genang, sogo kalik go tasam no ya senong-eyun?” 8 Ngga ey, Yesus lo pu go, “Motnang mlue genaning, kunala temoy no se! Sedue mata so weng go, Genam go sui no mea we-netogon, ‘Tegadi so Ki Wali Iram lo dok go Iram genam ngge gabe. Ku ngganemot gabe pung-atun.’ Motnang-a, nemotnang nogo kua keng!
9 Ple kluim nggano, plepung genang atuia motnang tup-kelo go, dabui suali-a kua tra! Ngga naklay seni so lemoy genang gemang. No, i go sogo ku maning kua pung.” 10 “Se senong! Saula tang meno ip go, saula meno ey ple so mea tutui. Nan meno ey nan meno ey ip go ple mea pupung dali. 11 Kuysu kangok so mea lek; ten mea kua-ayun; kusadui dalu mea kong-ayun; tasam-tasam suk suali eygo ut temoy no mea lemoy. 12 No, naklay maning kua lemoy gono, banim motnang-a ple-tengang kalong ey truik mea mlak. Dewi yap ba sogo sedue go ta sono iti go, demun suey gono, boy ba no mea betep. Nggano saula Roma go iram-tegay sono motnang tang-usi genang so mea wawi, ngga naklay Genam go sui no keng go tang sogo so. 13 Ngga lemoy go, se senong, ‘Nggeasui go, Yesus go walitap ibe go suongku no wa genang ku gabe!’ 14 Se senong: nemotnang no pen genang sogo teguopey kua duing. Dabui demu-a se betep! 15 Motnang nogo senongduduing kalong eygo-a Genam lo mea iti. Nebut way koysaula sik sogo klaya duo logo mea kua pen. 16-17 Esang! Genam go sui no keng goso, motnang sogo dabui ikle kangok so sikabung naklay lo mea tra. Amble saula meno ey motnang go moy-ay, aka-satyap, desui-menggo, andua-andua lo klayta mea keduik. Yang! Motnang sik sogo temu but go mea leguot dali. 18 No, suali-a motnang logo kua tra! Blong duoyap go wali tebadali pui go yakua nega. 19 Se senong: motnang don ey dabui klaya iti go tang so, wali-wali so mea sesuoy.”
Yerusalem mesuop genang nebut
20 “Yakena Yerusalem, ple lo wok teguot go, motnang ikum go se senong: Yerusalem mesuop genang ku gabe dedagu. 21 Nan Yudea sogo sikabung, meduim sono se kuek! Yakena Yerusalem sogo sikabung, keda so pung go se kuek! Nggano, usu sogo sikabung yakena ba no teguopey go kua degut! 22 Ngga, idekeba iti genang ku gemang! Ngga ey Wali Sam klaut ba no klik go naklay mea lemoy. 23 Ku ngganemot nogo duonu eygo mianang, duo min so maning leleguit mianang ey! Esang dabui klum! Sikabung ngge nogo kisebui dega mea iti. Nan ngge no koywong iseng kangok go-a mea lemoy. 24 Sikabung temu, tengang lo uluk go mea kebong. Ngga ey temu saula meno lo dok go, nan sedingno-sedingno mea wasey-sing. Yerusalem yakena, Ki Wali Iram kua senong go saula go masi lo, plo-plo so mea gualing. No, saula-saula no itak go ku yam gono, mea yam.”
Blong Dem pung genang ku
25 “Koysaula lo taling go ide yam go, ngge mea lemoy: tasam-tasam woy temoy nogo, banu nogo, ut top nogo mea ikum-neyon. Nggano, kukunan blo nogo, beap alui kluim kangok go lemoy golo, suali so saula-saula ey mea kukui. 26 Yang! Ut blo sogo, woy, banu, ut top naklay suep-sing go ikum go, mea duing, ‘Kukunan sogo kalik ya?’ Ngga ey, sikabung naklay suali lo yam so mea lasu-sing. 27 No, se ikum! Ku ngganemot no, Blong Dem Nemot go blongdon ey, utkenuim blo lo li-yon go mea ikum-eyon. 28 Tasam ngge naklay lelemoy go, don ey motnang ip go nemu se bubung! Motnang suey so sesuoy genang ku, keda so mea pung.”
29 Nggano, ngge kalik go yatrang meno Yesus lo gemang pen-nawon, “Motnang di ara no se ikum! 30 Tuik demening go pung go, motnang mo senong: usu woy tong so gabe. 31 Ngga kalik dali so, genam lo pen-tu go tasam-tasam mo lelemoy go, motnang mea senong: Woy Wali Iram tamlak go blongdon duduing i go buem tebot-a gabe! 32 Motnang nogo, seni-seni so gabe pen-asitugu, ‘Ngge maning kua lemoy go, nggeasui go tang ngge, maning gemang.’ 33 Ut-nan naklay mea nega. No, Genam lo pepen go-a mea kua nega.”
Wali wegeng ey senang so se bubung
34 “Motnang go wali wegeng ey suey so se bubung! Walop-a bu dedrop seguong nogo-a, motnang dabui kua iti. Motnang go dabui, saysuk wali genang duduing lo kua lelek. Pungso-punggo ku ngga, dali motnang se bubung! 35 Yang! Ku ngganemot pung genang yakua senong. Kekayso, sikabung kukunan blo sogo naklay no, sado kalik mea tebuo. 36 Yay suey so se bubung! Don iti genang dewi senang so motnang se keklak! Tasam ngge naklay sik so sesuoy so kap genang, don ey Blong Dem go suongku nogo motnang mea ip.”
Sikabung naklay Yesus lo nguok go
37-38 Wadikua-wadikua go, sikabung naklay, Ki Wali yap ba no Yesus lo nguok genang so gemang weng-lak. Ku blong sogo, Ki Wali yap ba no Yesus lo gemang nguok-tenawon. Ku klik gono meduim Saytun lo srek so gemang bewon.