20
Yesus iram-tegay lo usi go
1 Ku meno so, Ki Wali yap ba so Yesus lo gemang nguok-tenawon. Se ikum: sedue Yahudi go iram-tegay, trangkose naklay Yesus mit no gemang weng-lak. 2 Ngga ey ngge kalik gemang usi-nenawon, “Nggeasui go, atnang sogo se pen-sando! Nago sik sogo don lo tasam-tasam pluok-togoy? Don ngga nando lo mo iti?” 3-4 Ngga tup gono Yesus lo pu go, “Ngga kalik usi-keto go, way so Genam lo usi go-a, se pen-kesando: Yohanes Busotuigo, nando go don lo butui-tenayom? Ki Wali Iram sik sogo lo? Kukunan blo sik sogo lo? Se pen-kesando!” 5 Nggano, iram-tegay seguong so, gemang sok-netenawon, “Ki Wali Iram sik sogo don logo so pu-eyon go, way so Yesus lo mea pu-sanyon, ‘Ngga kalik go, nemot nogo, sogo so kua keng ne?’ 6 No, ngge kalik pu-eyon go, ‘Kukunan go don lo’, ngge sogo sikabung naklay lo imot demu lo mea srom. Kua kay: Yohanes ngga, Ki Wali Iram go duduing pupluok genang sogo nabi, ibe lo mo yang.” 7 Ngganemot no, Yesus sono gemang pu-netenawon, “Nago sik sogo, Yohanes go don iti go, atnang kua senong.” 8 Nemotnang lo wa go tup gono, way so Yesus lo pu go, “Nueya! Ngga kua pen go, tasam ngge nando sik sogo don lo pluok-tugu go, mea kua pen-srelu dali.”
Yesus tenguo go kisebui-a mea lek
9 Yesus iram-tegay lo tetenguo goso, sikabung temu no nebut benuey ngge-a Yesus lo gemang pen, “Sedue klaya gemang. Usu klik-won go, yam so gemang kuali-nawon. Ngga ey, yay suing genang so kebali sedue-sedue sono usu ngga namboy gemang itak. Wasma seni go, sedue ngga ey se wasey. Ngga ey, nan meno sono sedue ngga gemang ip-nawon. Walong so nan ngga sogo mea got-nayon. 10 Yang! Wasma seni go ku no, nemot tete sogo king go weng genang, tamot klaya mot-dak go, usu kebali sedue mit no gemang klong. No esang! Demun-a tamot ngga usu kebali sedue lo klak-nenawon go, yat go ta ulue so gemang klong. 11 Namon tete sogo tamot mot-dak go, usu kebali sedue sono gemang nawon dali. No esang! Demun-a suey go, wayang go, ta ulue dali so tamot ngga nemotnang lo tenguo go tandali gemang bewon. 12 Nangglik tete sogo tamot, usu wengkabui lo mot-dak go, gemang klong dali. No, demun suey go kin ey, lek go usu tema idi no gemang betep-nenawon. 13 I go sogo, usu wengkabui gemang duing, ‘Sogo-a, ya semu-lu? Yang! Genam go dem sop-a gabe. Nemot-a mot-dak go mea nayon. Nemot nogo-a suali ey mea tra-nenayon.’ 14 No, danon ikum gono, usu sogo kebali sedue go seguong so gemang pen-netenawon, ‘Ikum! Ngga, nemot go danon seni gabe! Nglangin go naklay nemot go ta sono mea pui. Nemot-a but-eyon go, ngge naklay imot lo gluik genang.’ 15 Ngga ey, danon, nemotnang lo mlak go, ku lo lek go, usu tema idi no but go gemang kebong.
Nggano, sikabung sono Yesus lo usi go, ‘Usu wengkabui tandali weng go nogo, sogo-a usu kebali sedue nogo ya semu-nayon?’ 16 Yang! Seni so nemot mea pung-ayon. Nggano, usu sogo kebali sedue but go mea leguot-sing. Ngga ey, sedue meno go ta sono usu ngge mea itak.”
Nebut benuey ngge go seni sikabung mo senong: imot, sedue Yahudi, usu kebali sedue ngganemot. Usu wengkabui, ngga Ki Wali Iram! Saula meno go ta no walitap itak genang tup gono, sikabung ngga sogo lo pu go, “Kua lemoy-wa!” 17 No, nemotnang no, nemu yalap gono, Yesus lo gemang pen-tenawon, “Yakua lemoy go? Wali Sam klaut ba no, sogo kalik mo klik? Nebutdop ngge-a gabe,
‘Yap so kiklik go sedue lo betep go batklong,
don dega ey mo pung.
Yapdi nemu klaya so batklong ngga mo king.’ (Mazmur 118:22)
18 Seni so, batklong ngganemot blo no pui go sikabung, mesuop go mea kebong. Nggano, batklong ngganemot lo nedik go sikabung, muep go sung so mea lemoy.” 19 Yahudi go klui-klui, trang-trang naklay nebut benuey ngga go seni mo senong. Ngga, nemotnang so pen-nawon go. Ngganemot sogo so, woy ngganemot no Yesus mlak sogo so nemotnang lo gemang duing. No, ngga kua lemoy-anatun. Sikabung mata sogo no suali go nogo.
Yesus mlak genang klayta duing go
20 Yesus mlak genang, Yahudi go trang-trang lo don ey gemang duing-nenawon. Kuno-woyno Yesus mlak genang ku suey go-a gemang uwet. Ngga ey, klay sedue-a seni sogo sedue kalik, ta lo gemang semu-nenawon. Sado ba nogo kalik Yesus pui go, mlak go Roma go gubernul go ta sono itak genang. 21 Yesus no ngge kalik klay sedue lo gemang usi, “Aya klui! Atnang senong go: tap, Mot lo ngunguok go, seni eygo. Ki Wali Iram nogo tap nemudi so Mot lo gabe ngunguok. Nggano sikabung meno nogo, tang eygo Mot logo yakua pleng. 22 Ngganemot sogo so nemudi so se pen-sando, ‘Imot go demu no pu go, imot sedue Yahudi, Roma go deguena Kaysar nogo blasteng ya iti? Yakua? Sogo kalik duing-togoy?’ ” a 23 No, Yesus mo senong: wamoy so nemotnang lo usi go. Ngganemot sogo so, gemang we-nawon, 24 “Genam sono duoy klaya se leguit! Ngga ey, se pen-kesando: duoy temoy nogo, nando go sui, nggano nando go nebuemnemu mo klik?” Nemotnang lo pu go, “Kaysar go nebuemnemu klik go.” 25 Ngga ey Yesus lo pu go, “Yang! Kaysar go, Kaysar sono se iti! Ki Wali Iram go-a, Ki Wali Iram no se iti!” 26 Ngga kalik pu go nogo, Yesus go kuklue kua tegu-nesrenawon. Yesus lo we-nawon go ngga, sikabung mata sogo mo tup dali. Kuikui go, tandali go kua usi-nesrenawon.
Yesus so sedue Saduki lo yatrang go
27 Ngga temu ey, sedue Saduki temu Yesus mit no, gemang weng-lak. Se senong: sedue Saduki lo duing go, kebong go sikabung, tandali go yakua nglong. 28 Ngga tang so, yatrang mlue sogo, Yesus no gemang usi-nenawon, “Aya klui! Musa go demu no ngge mo klik, ‘Kabung iti go, duo kua tui goso kebong go, nemot lo itak go kabung nalo, ntaton lo se dam! Nemot tete sogo duo tui sogo be.’ 29 No, ngge kalik lemoy go, sogo kalik ya? Se tup: sedue meno, ntatonnang ey, taidisonamon yam so gemang. Kabung iti go, duo kua tui gono, ntaton trang gemang kebong. 30 Ngga ey, senun nalo ngga, ntaton namon tete sogo lo gemang dam. No, duo kua tui gono, ntaton namon tete sogo gemang kebong dali. 31 Ngga kalik dali so, ntaton nangglik tete sogo nogo gemang lemoy dali. Namon-namon tete sogo, e... taidisonamon tete sogo ngga kalik dali duo kua tui gono, gemang kebong. 32 I go seni sogo, kabung ngga gemang kebong dali. 33 Atnang logo ngge kalik gabe usi, ‘Yansi go, tandali sikabung nglong go nogo, kabung ngga go kenin, nando? Nemotnang naklay senun so mo iti go nogo.’ ” 34 Nggano, Yesus lo pu go, “Yang! Kukunan sikabung sedue gabe iti, kabung gabe dodok. 35 No, Ki Wali Iram lo iwat go sikabung tandali nglong go, senang wali yakena no degut go, teguopey kabung kua idok, sedue kua iti. 36 Ki Wali tamot kalik nemotnang gemang uwali. Tandali go yakua kebong. Tandali nglong go nogo, Ki Wali Iram go duoyap nemotnang ngga gemang.” 37 Tandali Yesus lo pu go, “Sikabung tandali nglong genang nogo nebut, Musa logo demutrui no neguon so mo klik dali gemang! Yangga, deding ba sik so, Ki Wali Iram lo pu-ngam go,
‘Genam ngge, Ablaham, Isak,
ngga ey Yakop go Ki Wali Mani Iram gabe!’ (Keluaran 3:6)
38 Ngga nemot go seni: kebong genang sikabung go Ki Wali Iram kua! No, kiki sogo sikabung go Ki Wali Mani Iram, Nemot gabe. Nemot nogo sikabung naklay kiki seguong so.” 39 Musa logo demutrui so nguok go klui temu lo gemang pu-nenawon, “Aya klui! Teguop dato so nebut mo pen-ato.” 40 Seni so, tandali Yesus sono, usi genang sedue, kua.
Yesus ey Daut eygo
41 Yahudi go klui-klui sono ngge kalik Yesus lo gemang usi, “Sikabung lo we-neton go, tegadi so Ki Wali Iram lo dok go Iram, ngga Daut go mlena walasrang no pung go duo gemang. No, ngganemot, sogo kalik? 42 Se duing! Sam Masmur ba no Daut tang so mo klik,
‘Genam go Woy Wali Iram no, Ki Wali Iram lo mo pen:
Genam go tasemlea idi no Mot pla suing!
43 E… Mot go plesi naklay, Mot go masi ba no mea suing-lak!’ (Mazmur 110:1)
44 Nemot sogo, ‘Woy Wali Iram’ so Daut lo pu go, sogo kalik ‘Daut go duo sogo’ imot ya pu?”
Demutrui so nguok go nogo kunala temoy no se
45 Sikabung mata so tup-netenawon gono, ngge kalik Nemot go andua-andua no Yesus lo gemang pen, 46 “Motnang Musa logo demutrui so nguok go klui-klui nogo kunala temoy no se! Amka walong go ey glung go, tap logo, nay sip logo, sikabung mata sogo lo nemotnang no takokong genang so gemang uwet. Walop sip ey dewi yap ey gono degut go, sipsuing suey go, sedue sui eygo lo susuing go-a gemang uwet. Ngga, nemotnang yakay dega ey. 47 No, se senong: kabung nalo-nalo go yap ba taut, wamoymlue so, nemotnang lo gemang gugluik. Sikabung go kunala saguip genang so, dewi walong-walong so nemotnang lo gemang pupu. Yang! Idekeba kangok go-a nemotnang no Ki Wali Iram lo mea iti. Sikabung temu nogo idekeba ey kua kerlam.”