22
Woy Wali Iram go blongdon degut genang
1 Nggano, tandali nebut benuey so woy-trang sono Yesus lo gemang pepen, 2 “Woy Wali Iram tamlak go duduing pung go, danon kabung dok walop deguena meno lo iti go kalik gabe. 3 Ku meno no, tamot-tamot no deguena lo pu go, ‘Walop keng genang deguo glop nogo se wasey-sing!’ No, esang, walop ngga nogo so deguo wet go glop moyso. 4 Ngga ey, nemot go tamot temu yaluim go gemang pen-anawon: glop no ngge kalik so pu-sing, ‘Menay seguay go-babu go tong go, yam so suik go. Walop sogo ten, dali-dali mo ta-sing. Weng-a, walop ya pla go!’ 5 No, deguo mo wet go glop kua tup. Temu usu ku lo, temu duoy kebali so ne koklong-lak. 6 Esang! Tamot-tamot-a, sikabung temu lo mlak go, iseng taling go, but go ne kebong. 7 Ngga ey, deguena ngga dabuipiam go, nemot go plesedue pu go, tamot-tamot so but go sikabung ngga yam so tuk-sing. Yakena ngga koy lo gemang puit-dak. 8 Ngga kalik naklay lemoy gono, ngge kalik nemot go tamot-tamot no gemang pu-tenawon, ‘Genam go duo nogo kabung dok genang walop dali-dali mo ta gabe. No, glop sogo sikabung-a beney kua ne. 9 Ngganemot sogo so, tap ketang lo koklong go, motnang ey tegu go sikabung-a pu go tebadali se weng-lak! Walop ngge nemotnang lo pla genang.’
10 Ngga ey, tamot-tamot ngga klong-lak go, tap ketang logo sikabung nemotnang lo tegu go gemang wawi-sing. Sikabung koneygo-konkuago lo, walop sip yam so se damoy-anatun. 11 No esang! Deguena ngga, glop ey tegu so pung go, walop amka kua kok go sedue, gemang ikum-nawon. 12 Sedue ngga so deguena lo gemang pu-tenawon, ‘Dem, mot sogo kalik go-a, walop amka kua kok goso degut-to?’ No, sedue ngga logo nebut way kua tenguo-srenawon. 13 Ngga ey, tamot-tamot no deguena lo pu-tenawon, ‘Sedue ngge, tamasi tegan dok go, ku klik go ba sono se betep!’ Ngga ba so, unebu ey, wasrang kluim eygo-a mea negot-tenayon.”
14 Nebut benuey yam so pen gono, Yesus lo gemang pu, “Nemot-a Woy Wali Iram go blongdon degut genang mata so usi go, temu dato-a seni so mea degut.”
Yesus partay Parisi sik sogo sedue lo yatrang go
15 Ngga blo idi lo sedue Parisi a klong go, klay taduing got-nenawon go gemang pu, “Sogo kalik usi gono, kuklue eygo so Yesus ya pu-eyon.” 16 Ngga no, Parisi no keng go sedue temu ey, partay Herodes b sik sogo sedue-sedue eygo, klay gono mot-dak go yatrang so Yesus no klong go, gemang usi-netenawon, “Aya klui! Atnang senong go, seni eygo sedue, Mot-a gabe. Ki Wali Iram go tap ibe nogo nemudi so gabe nguok-togoy. Sikabung dali nogo suali Mot logo kua tetra. Sikabung tang eygo, Mot logo yakua pleng. 17 Nggeasui go, se pen-sando! Roma go wengkabui kangok go, Kaysar nogo blasteng duoy, imot logo ya semu? Yakua? Mot lo duing go, c sogo kalik?” 18-19 No, dabui ba sogo kunala piam go ngga, Yesus mo senong. Nggano, ngge kalik gemang pu-nawon, “Sogo-sogo so, Genam nogo wamoymlue so usi-kesanto? Wamoymlue eygo sedue, motnang gabe! Duoy-a, Genam sono taling-a!” Ngga ey, Roma go duoy klaya Yesus sono gemang taling-nenawon. 20 Ngga ey, ngge kalik Yesus lo gemang usi, “Duoy sen ngge temoy nogo, nando go nebuemnemu ey sui eygo klik?” 21 Nggano, nemotnang lo pu go, “Roma go deguena kangok go, ngga Kaysar go nebuemnemu tamasi klik go!” Ngga sik so, Yesus lo pu go, “Ya! Ngga kalik go, Kaysar go, Kaysar sono se iti! Ki Wali Iram go-a, Ki Wali Iram sono se iti!”
22 Way so ngga kalik Yesus lo pen go tup-nenawon go, ta wasrang glok ey nemotnang kuikui go, Yesus-a itak go, gemang klong-lak.
Yesus partay Saduki sik sogo sedue lo yatrang go
23 Se senong! Partay Saduki sik sogo lo duing go, “Mo kebong go sikabung, tandali go ya kua nglong.” Ku ngganemot dali nogo, Yesus piam genang so, sedue Saduki weng go ngge kalik gemang usi-nenawon, 24 “Aya klui! Ngge kalik go Musa lo mo pen-ngam, ‘Duo kua tui gono, kenin kebong go, nemot logo senun nalo ntaton lo se dam! Ntaton kebong go nogo duo tui genang.’ ” d 25 No, atnang nogo ngge kalik go mo lemoy, yap tenglam ba sogo ntatonnang 7 yam so gemang. Kabung ntaton trang lo iti go, nemot nogo duo kua tui gono, gemang kebong sang. Way so senun nalo-a ntaton lo dam-nawon. 26 Duo kua tui gono, ntaton ngga ne kebong dali. Ngga ey, nalo ngga ntaton meno lo gemang iti dali. Ngga kalik so, e... ntaton sat seni, ngga kalik dali se lemoy-dapwon. 27 I go sogo, kabung ngga gemang kebong dali.
28 Sedue Saduki lo usi go, “Ngga kalik go, yansi sikabung tandali nglong go nogo, nemotnang sik sogo nando lo senun so kabung ngga ya pu? Nemotnang naklay kabung ngga mo iti.” 29 Way so Yesus lo gemang pu-tenawon, “Motnang go tap naklay mo nega seni! Wali Sam klaut ey Woy Wali Iram go blongdon ey maning motnang kua senong dali ba?” 30 Se senong! Sikabung kebong go tandali nglong genang ku nogo, sedue iti-kabung iti ya kua. No, Blong Dia yakena ba sogo Kiwali tamot kalik mea suing. 31 Kebong go sikabung tandali nglong genang, Wali Sam klaut ba no Ki Wali Iram lo pu go, motnang kua ikum? 32 “Ablaham, Isak, Yakop go Ki Wali Iram Genam ngge gabe! Kebong go sikabung go Ki Wali Iram, kua! No, kiki sogo sikabung go Ki Wali Iram, Nemot gabe!” e
33 Se senong: Yesus lo nguok go ngga, sikabung mata sogo tup gono, ta wasrang glok ey kuikui go, kunala-a duduing.
Demutrui nago-a kangok
34 Yang! Sedue Saduki sogo Yesus lo pen golo, way sogo nebut ya kua pen-nesrenawon go, sedue Parisi tup gono, nebut klay gono gemang degut-nenawon. 35-36 Ngga ey, nemotnang sik sogo sedue meno, yangga Musa logo demu so ngunguok go, Yesus yatrang genang so gemang usi-nawon, “Aya klui! Musa lo iti go demutrui nago-a kangok?” 37 Ngga ey, sedue ngga no Yesus lo gemang pu-nawon, “Woy Wali Iram, mot go Ki Wali Iram nogo klum-a dui ey Mot se tetaling, dabui ey, don ey, kunala naklay eygo lo se!” f 38 Ngga demu kangok go, klaya tete sogo gemang! 39 Nggano, namon tete sogo, demu ngganemot ey kerlam go, ngge gabe: mot go saysuk nogo kalik dali, anduasi yap nogo klum se pupluok dali! g 40 Demu namon nggenemot temoy no Musa logo ey, nabi-nabi lo klik go demu naklay ey kekayso gabe mo dok.
Yesus ey Daut eygo
41 Se senong! Tegadi so Ki Wali Iram lo dok go Iram, Yesus sogo, partay Parisi logo kua yang. Ngga tang so, sedue Parisi temu Yesus mit no yaluim go sono, Yesus lo gemang usi-nawon, 42 “Tegadi so Ki Wali Iram lo dok go Iram sogo, sogo kalik so, motnang lo duduing? Ngga nando go Danon?” Way so nemotnang lo pu go, “Daut sik sogo duo-a mea pung-ayon.” 43 Ngga ey nemotnang no Yesus lo gemang pu-nawon, “Ngga seni so lo! No, Nemot ngga Woy Wali Iram. Sogo temoy no, Daut, Wali Waglo lo taling gono, tegadi so pu go Iram ngga, ‘Genam go Woy Wali Iram sogo’, nemot lo ya pu? Se duing! Ngge-a Daut lo mo pen,
44 ‘Genam go Woy Wali Iram nogo Ki Wali Iram lo mo pen.’
‘Mot genam go tasemlea idi no pla suing!
E… mot go plesi naklay pedueng go
Mot go masi ba no At lo mea ta-sing!’ (Mazmur 110:1)