23
Blong duoyap-a ku sono se suing
1 Ngga ey sikabung ibe ey andua-andua eygo no ngge kalik Yesus lo gemang pen-atenawon, 2 “Se tup! Sedue Parisi ey Musa go demutrui so ngunguok go klui-klui eygo sogo gabe pen-asitugu, ‘Nggeasui go ku, Musa go sipsuing blo no wengkabui so suing go, ta nemotnang lo gabe mlak.’ 3 Ngganemot sogo so, nemotnang lo ngunguok go-a, tupduk so se! Tamasi naklay logo ngga se pupluok dali! No, esang! Nemotnang go wali piam go-a motnang logo kua keng! Nemot-a, nemotnang logo gemang ngunguok, nemotnang tang sogo kua kekeng gemang. 4 Se senong! Ide eygo-a dok go, sikabung blo no nemotnang lo gemang tui. No, ide ngga ta mlak go pupluok genang nemotnang tang go logo ya kua. 5 No, ibe lo ikum genang tasam-tasam-a, nemotnang lo gemang pupluok. Se ikum: kuibey kangok go-a a dewi pu genang so nemotnang lo dok go, ngga ey, amka walong srem ey semu go-a kok go, sikabung temu go ey kua kerlam. 6 Walop sip ey, dewi yap ba no degut go, sipsuing suey go, sedue sui eygo lo susuing go-a, nemotnang logo gemang uwet. 7 Nay sip nogo, nemotnang sono ta kong genang-a kangok so ne uwet. Nggano, nemotnang ‘Aya klui’ so sikabung lo usi genang-a, kangok so duduing.
8 No, se senong! ‘Klui’ sogo, motnang sikabung lo usi genang, kua! Motnang go Klui klaya seguong, blong duoyap, klay gono susuing go anduasiyap-a, motnang gabe. 9 Kukunan sedue nogo ‘aya’ sogo, motnang logo kua usi! Yang! Motnang go Aya klaya seguong. Ngga Blong Dia yakena sogo Ki Wali Aya seguong-a gemang. 10 Nggano, tap so tetaling go sedue sogo, ‘woy dem’ so motnang logo kua usi dali! Motnang go Woy Dem klaya seguong gabe. Yangga, tegadi so Ki Wali Iram lo dok go Iram-a klaya. 11 Yang! Motnang sik sogo nando kangok go, nemot-a seguay so se lemoy. 12 Nemot tang so blo sono go, nando lo iti go, ku sono go nemot-a Ki Wali Iram lo pu go mea suing. No, nando-a nemot tang so ku sono suing go, blo sono go nemot-a Ki Wali Iram lo mea iti.
Yahudi go woy-woy Yesus lo bebat go
13 Esang! Walinebut so ngunguok go ey sedue Parisi ey! Wamoymlue lo motnang mo tram. Woy Wali Iram go blung degut genang tap, sikabung go nemu damoy so, motnang lo gabe kekabut. Seni so, tegadi so Woy Wali Iram lo dok go Iram lo taling go tap, motnang logo kua degut, no, sikabung meno Nemot no keng genang, gabe uwaydang-ketogoy. Motnang seglaplu!
[ 14 Esang! Musa logo demu so ngunguok go ey sedue Parisi ey! Motnang wamoymlue lo tram go. Nalo-nalo keninnang kebong go yap motnang lo ne gugluik. Nggano, dewi walong-walong so motnang lo pu golo nemotnang go nemu gemang sagum. Motnang seglaplu! Ngga tang so motnang nogo idekeba kangok so mea iti, sikabung piam go temu ey kua kerlam.]
15 Esang! Walinebut so ngunguok go ey sedue Parisi ey! Wamoymlue lo motnang mo tram. Nggaku-nggaku motnang koklong go, motnang go tap no klayduo keng genang-a, mo uwet. No, motnang sono sikabung ngga keng go, Kupiamgo duoyap so motnang lo ne lelemoy. Motnang seglaplu! 16 Esang! Nemu mo pung go woy-woy motnang gabe! Ngge kalik motnang lo pupu go, ‘Ki Wali yap no pu gono, tanat go, ngga seni kua. No, Ki Wali yap ba sogo taut, emas lo klik go sono pu go, ngga suey, tanat go-a seni ey mo dok gemang.’ 17 Yang! Puplu sogo, nemu pung go sedue-sedue! Se pen, ‘Nago-a seni eygo? Taut emas lo semu go-a? Ki Wali yap-a? Genam lo mea pen, emas tang go iku kua. No, Ki Wali yap tang so, iku eygo so emas gemang lemoy. Ngga naklay Ki Wali Iram sono taling go gemang.’ 18 Ngge kalik, motnang lo pu dali go, ‘Taiti so pupuit go demusung no pu go, tanat go ngga seni kua. No, demusung blo sogo taiti go sui no pu go tanat go logo-a, gemang ya dok.’ Ngga motnang lo puplu so pupu go. 19 Ey, motnang nemu pung go sedue-sedue! Motnang se pen! Sogo-a seni kangok go? Taiti-a? Taiti so pupuit go sip-a? Genam lo mea pen, ‘Yangga, taiti so pupuit go demusung. Demusung logo so, ngga blo sogo taiti, teguop go sogo gemang lelemoy.’ 20 Se senong! Taiti so pupuit go sono nando lo tanat go ngga, taiti so pupuit go demusung blo sogo naklay no, gemang mo pu dali. Ngga naklay Ki Wali Iram sono taling go gemang. 21 Ngga ey, Ki Wali yap sono, nando lo pupu go, se senong: Ki Wali yap ba sogo Woy Wali Iram sono gemang mo pu dali. 22 Nggano, Blong Dia yakena go sui no nando lo pu go, nemot se senong: Iram demu sono go nemot lo mo pu gemang. Ngga, iram demu sogo Ki Wali Iram go sui no mo pu dali gemang.
23 Motnang, sedue Parisi ey Musa logo demutrui so ngunguok go klui-klui ey! Ki Wali Iram lo iwat go-a, motnang logo kua ngunguok gabe. Se duing: demutrui no taling go taiti motnang lo gemang iyaluim.Yangga: didon seni go in nogo, tanamon yam so wasey go, klaya Ki Wali Iram tete sogo, sesrok kua goso suey so gemang i-iti. Esang! Nemot go seni seguay ne. No, don ey Musa go demu ngge-a gabe taling-situgu: Ki Wali Iram go duduing nogo ey but go-a, way so se i-iti. Sikabung dali nogo tasuey seni eygo-a kua kay. Yangga:
- nemudi so demutrui no tetaling genang;
- klum eygo tetaling genang;
- nebut so pepen go seni ey pluok genang;
Ngga naklay dabui lo motnang, sedue Parisi ey Musa logo demutrui so ngunguok go klui-klui ey, kua kekeng.
Yang, motnang go seguot sik sogo teguop i-iti go, ngga suey. No, Ki Wali Iram go duduing nogo ey but go-a way so ne itak! 24 Motnang piam! Nemu mo pung go woy-woy! Suey so duing-a! Srobuwali dato bu ba sik sogo-a motnang lo ngga sogo rli go ne betep. No, menay kangok go-a, bu ey motnang lo drop go ne gugut!
25 Esang! Motnang wamoymlue eygo tang! Bu so dedrop go daysruk ey tendam genang saulabon eygo dia idi-a, suey so motnang lo gabe ulu. No, dabui ba-a kon ey ne, gugluik kunala lo nenagluim lo mo tram-sing. Motnang seglaplu! 26 Motnang nemu kua go sedue Parisi! Banim no ngge-a se semu! Dabui ba sogo bu-a motnang se ulu, ngga tang so dia idi kon kua goso mea lemoy.
27 Esang! Musa go demu so ngunguok go ey sedue Parisi ey! Motnang, wamoymlue lo tram go tang! Seni so, teguop so simu demu lo klik go kalik motnang gabe. Dia idi sik so ikum go, ibam-ibam so, nemu rlam so. Nemot-a, dabui ba sogo-a, yam so mo pegop. 28 Motnang ngga kalik dali, sikabung go nemu damoy sogo seni eygo, nemudi sogo kalik i-ikum. Demutrui uwayang go nogo, dabuipiam lo damoy go, dabui naklay mo waluk.
29-30 Musa go demu so ngunguok go ey sedue Parisi ey! Motnang, wamoymlue lo tram go. Se duing! Banim no mo kebong go, Ki Wali Iram lo kuoy go nabi-nabi ey Ki Wali Iram no iwat go sikabung eygo so tuet go simu-a, teguop so motnang lo mo bubuong. Ngga ey, motnang go dabui ba no ngge kalik duduing go, ‘Yagui klaya gono, Ki Wali Iram go nabi-nabi ey atnang na tui go sogo, nemotnang but genang, kua keng be.’ Ngga kalik pepen go, esang. Motnang seglaplu! 31 No, se senong! Ngga kalik motnang lo pu go tang so, seni so motnang lo mo yang, ‘Nabi-nabi so but go sikabung ngga, atnang go babuasi. Atnang ngge, nemotnang sik sogo sinok wang go gabe. Nabi-nabi ngganemot so but go tang, atnang gabe got-etugu!’ 32 Esang! Ngga kalik go, mot go babuasi lo maning kua pluok go taybat, nggeasui go yam so motnang lo se semu-kesilo. 33 Ey, motnang lema nok kalik go! Idekeba ngga sik sogo, sogo tap lo motnang ya kuek? Yakua. Idekeba ngganemot motnang se lek! Idakoy ba nogo motnang mea degut. 34 Tap piam go ngga motnang pupluok go tang so, Ki Wali Iram sik sogo nabi-nabi, senongduduing kalong eygo sedue, nggano wali inim so tetaling go klui-klui, motnang sono mot-dak go gabe ya klong. Wali piam go sik so teguey go, kikiwali inim-a nemotnang lo taling genang. No, esang! Nemotnang sik sogo temu, motnang lo but go mea kebong. b Di temoy sono temu mea glung go kebong! Ngga ey temu dali, Yahudi go dewi yap ba no demun iseng eygo-a motnang lo mea inya-kelo. Ngga ey temu dali but genang so saula-saula go yakena sono truik go mea kuek-lak. 35 Se senong! Wali Sam klaut ba no klik go, kuklue kua go sikabung tebadali but go kebong go kin way, motnang go tang lo gemang ya wa-kebalo. Yangga, Habel kuduong so but go sik so iti go, e... nabi Sakaria, Berekya go danon i go so but gono mea pung. c Seni so: Sakaria ngga, Ki Wali yap ba no, teguop sip ey taiti so pupuit go sip eygo nesip no, motnang go tang lo but go gemang. 36 Gabe pen-asitugu, ‘Yang! Idekeba ngga naklay, nggeasui go motnang tang ngge blo no mea glung seni.’ ”
Sikabung Israel ikum gono Yesus go dabui ba u lo dasing go
37 Nebut ngga yam so Yesus lo pen-nawon gono, yakena Yerusalem dabui tra go, ngge kalik gemang pen-atenawon, “Esang! Yerusalem sop! Ki Wali Iram logo nabi-nabi motnang lo but go mo kebong. Walitap taling genang so weng go sikabung, demu logo motnang lo mo srom. Se senong: ayang nok unen lo tabang ba nogo yaluim go kalik, mot go duo yaluim genang so, da mata so At lo mo duing. No, esang! Motnang lo mo waydang gabe. 38 Ikum-a, motnang go yakena ngge, sikabung kua goso ulue so mea itak. 39 Yang! Gabe pen-asitugu, ‘Nggeasui go sik so, motnang Genam ya kua ikum, e... ku meno no mea pung.’ Ku ngganemot nogo motnang lo mea bega-kelo, ‘Mot Blong Dem! Woy Wali Iram go sui ba lo uweng go! Mot go sui iway-a blo sono se iti!’ ”