13
Piam kua itak go koytap lo mea keng
1 Ku ngganemot no, sikabung temu weng go, ngge kalik Yesus no gemang pu-nenawon, “Nan Galilea sedue, Ki Wali Iram nogo menay so pupuit gono, idekeba Roma go wengkabui Pilatus lo taling go, tengang lo nemotnang gemang ibot. Seni so, yakena Yerusalem no Ki Wali yap ba no tasam ngga mo lemoy. Taiti nang so pupuit go menay kin, sedue kin ey mo bluot sang. Ngga idekeba kangok dega!” 2 Nebut ngga tup gono, nemotnang sono Yesus lo pu go, “Ngga kalik go idekeba nemotnang no taling go, motnang lo duing go, nemotnang go kuklue-a kangok dega, sikabung Galilea temu ey kua kerlam?” 3 Genam lo pu go, “Kua! Nemotnang go piam, sikabung meno ey mo kerlam. No, se tup! Taybat piam go sik sogo motnang yakua teguey go, ngga kalik mea leguot-sing dali!” 4 Yatrang meno gabe pen-asitugu, “Banim go, yakena Yerusalem sogo plenemu so luluik go yap gemang! Nemot go sui: Siloam. Ku meno no, yap ngganemot togut go, sedue 18 yam so, demu negot golo gluik go gemang leguot. Ngga lemoy go motnang lo duing go, nemotnang go taybat-a kangok dega, Yerusalem sikabung temu eygo kua kerlam?” 5 Gabe pen-asitugu, “Kua! Ngga kalik so kua! No, taybat sik so motnang kua teguey go, ngga kalik mea leguot-kelo dali! Ngge, motnang nogo, seni so gabe pen.”
Ki Wali Iram nogo seni kua tagot go sikabung
6 Nggano, nebut yatrang ngge, Yesus lo gemang pen-anawon dali, “Sedue meno go usu sogo, wow gemang. Nawon go ikum go, wow seni klayanang tagot go kua ikum. 7 Ngga ey, kebali sedue so gemang pu-tenawon, ‘Yagui nangglik yam no kamso genam ikum go, wow seni kua tetagot. Nan ba ten-a yam so nemot lo lelek go, nase tuo-silo.’ 8 No, kebali sedue lo, pu-nawon go, ‘Aya! Yagui klaya dali, namboy nemu ya luik. Nuik nogo nan ey sung eygo-a genam lo mea suk. 9 Seni kua tagot goso yagui ngga no aya lo pu go kalik tuo go, mea betep.’ ”
Tuen-tuen sogo kabung tandali pali go
10 Ku Sabat meno no, dewi yap meno ba so, deguo teguop so Yesus gemang nguok-tenawon. 11 Ngga ba sogo nali piam go degut golo, tuen-tuen so koklong go kabung meno gemang. Yagui 18 yam so, sadui, ngga kalik go ey nemot uwet go. Nemudi sogo yakua teguik go klong. 12 Kabung ngga ikum gono, Yesus lo usi gono gemang pu-nawon, “Mia! Mot go sadui mo suey!” 13 Nggano, kabung ngganemot blo no Yesus lo ta tui go, kekayso gemang ip-natun. Ngga ey, Ki Wali Iram sono go tasuey ey gemang kong-tenatun. 14 No, esang! Ki Wali Iram go ku Sabat no, sadui Yesus lo pali go sogo so, dewi yap wengkabui-a dabui gemang piam-nawon. Ngga ey, sikabung mata sogo no gemang pen-tenawon, “Kebali ku, taidisoklaya yam so gemang! Sogo so ku ngganemot ba no kua weng, sadui pepali genang? Ki Wali Iram go ku nogo, sadui pali genang yakua!” 15 Nggano, nemot sono Woy Dem lo pu go, “Motnang seglaplu! Se duing: Ki Wali Iram go Sabat ku no sapi, kambing, sikabung naklay lo tegan plet go, bu gemang i-iti dali. 16 Mot lo wet-togoy go, Genam kua senong! Se duing: kabung ngge, yagui 18 yam so, Kupiamgo tegan lo dok go mo uwet. Babu asi Ablaham go denun nemot ngge gabe dali. Sogo temoy no, Ki Wali Iram go ku nogo, nemot so Kupiamgo lo dok go tegan, ya kua plet dali?” 17 Nebut ngga, yam so pen-nawon go nogo, Nemot so waydang go sikabung, suongsut eygo so nebut way kua tuot-srenawon. No, sikabung miam eygo-a, Yesus lo pluok go tasam nogo yakay kangok so gemang pla-nenawon.
Woy Wali Iram go blongdon duduing tamlak go
18 Nggano, Yesus lo pu go, “Woy Wali Iram go blongdon duduing tamlak genang, sogo kalik? Senong genang, sogo kalik go yatrang lo ya pen-asilu? 19 Woy Wali Iram go blongdon duduing tamlak genang, sawi un dato sedue lo uwawi go, nemot go usu no kuali go kalik gemang. Nemot-a, sawi un ngga seguay seni, no, pung go walong go nogo, di kangok go kalik nemot mea lemoy. Ngganemot no, wi ut ba lo pling go uwet go weng go lo, di kali-kali ngganemot temoy no ut gemang klik-nenayon dali.”
20 Ngganemot no nebut benuey meno Yesus lo gemang pen-nawon dali, “Ki Wali Iram go blongdon duduing tamlak go senong genang, sogo kalik go yatrang lo ya pen-asilu? 21 Se senong! Ki Wali Iram go blongdon duduing, tom beap kalik gemang. Seguay dato so mianang lo tui go, ten mata sogo naklay ba nogo, nemot tom so mea lemoy.”
Sesuoy genang tap nogo nando-a ya degut
22 Yesus, Yerusalem tap lo koklong go, yakena-yakena sono degut go, sikabung nogo, Ki Wali Iram go tap gemang nguok-siton.
23 Nggano, Yesus sono sedue meno lo gemang usi-nawon, “Aya! Sikabung nangglik eygo-a ya sesuoy?” Ngga ey, Yesus lo pu go, 24 “Yang, kekedik ba lo degut genang, kangok so seguot se pung! Se senong: sesuoy yataput lo degut genang sikabung mata sogo lo mea u-usey. No, yakua! 25 Yatrang ngge kalik mea lemoy: yap ba sogo Woy Dem buong go, yataput yam so kadun gono, motnang dia nenguon no ip go yatap no tetegak go, mea usi, ‘Woy Dem! Woy Dem! Yatap tenuing-a, genam degut sogo se!’ No, woy ngganemot no, motnang sono yap wengkabui lo mea pu, ‘Motnang genam kua senong! Motnang nago sik sogo?’ 26 Ngganemot no, motnang lo mea pu, ‘Genamnang, mot ey klay go nogo, ten mo dam, bu mo drop! Nggano, genamnang go seboy nogo, Mot lo mo nguok-nayo dali!’ 27 No, way so Woy Dem lo mea pu, ‘Seni-seni so, genam kua senong: motnang nago sik sogo! Sikabung kua seni go, tap piam seguong lo motnang koklong go! Ngge sik sogo nase klong-lak!’ ” 28 Tandali Yesus lo pu go, “Ku ngganemot nogo, babuasi Ablaham, Isak, Yakop, nggano nabi-nabi naklay, Ki Wali Iram go blong dia yakena ba sogo mea ikum-kebalo. No, motnang tang go, dia no mea itak. Ngga ey, unebu ey, sring kluim eygo-a motnang lo mea gogot. 29 Se senong: woy klak sik sogo, woy sut sik sogo, beap sik sogo, ketui sik sogo, saula-saula naklay pluep-lak go, Ki Wali Iram go blong dia yakena ba sono, ten dam yakay ey semu genang, mea wawi go degut. 30 Se duing dali: mesip so tup go sikabung-a, banim mea besi. Nggano, banim no tup go sikabung-a, mesip sono mea tenguo.”
Yakena Yerusalem nogo dabui klum Yesus tra-nawon go
31 Woy ngganemot dali no, sedue Parisi temu weng go, Yesus no gemang pu, “Mot ngge no tandali kua suing! Sip meno no se kap! Deguena Herodes, mot but sogo so, uwet go.” 32 No, Yesus lo pu go, “Motnang klong go, lema seni kua go ngganemot no se pen, ‘Naliwabu iyat go, sadui-sadui Genam lo mea pepali. Nggeasui go ku, ngga kalik sesemu go, utep go ku ey Genam lo mea semu dali. No, ku nangglik tete teguop gono Genam mea pung. 33 Se senong: Genam go kebali tapmasi maning kua yam gabe. Yerusalem sono go, Genam se klong! Nggeasui go ku, utep go ku, nggano, napu go ku nogo tap ngga lo suey so mea klong. Se senong: Ki Wali Iram go nabi, tap lo koklong mo luk go ngga piam. Yerusalem nogo-a nabi-nabi but go mea kebong, sang.’ ” 34 “Esang! Yerusalem-sop! Ki Wali Iram logo nabi-nabi, motnang lo but go mo kebong. Nggano Ki Wali Iram lo mot go tamot-tamot, demu logo motnang lo mo srom. Nemot-a, seni so! Ayang nok tabang ba no unen logo kalik, yatrang At lo mo yaluim. No, esang! Ngga motnang lo gemang mo waydang.” 35 Ikum-a, motnang go yakena ngge, ulue so sikabung kua goso mea itak. Yang! Motnang nogo seni so ngge kalik gabe pu-situgu, “Nggeasui go sik so Genam motnang logo yakua ikum, e... ku meno no mea pung. Ku ngganemot no motnang lo mea bega-kelo,
‘Mot go sui iway-a blo sono se pu!
Woy Wali Iram go sui ba lo Mot uweng go.’ ” (Mazmur 118:26)