12
Sabat ku no gandum bubuo Yesus go andua-andua lo dam klong go
1 Ki Wali Iram go ku Sabat blong go nogo, gandum usu damoy lo Nemot go andua-andua ey Yesus gemang koklong. Ten tra goso, andua-andua lo gandum buo go, ta lo ntrui go gemang dedam klong. 2 Gandum buo go dedam go, sedue Parisi ikum gono, Yesus sono ngge kalik gemang pu-netenawon, “Sabat ku nogo kebali kua semu, nimla genang ku ngge gabe! Ikum-a! Demutrui Mot go andua-andua lo seguoy go se!” 3-4 Way so nemotnang sono Yesus lo pu go, “Iram Daut lo pluok-ngam go, Wali Sam klaut ba no klik go, motnang maning kua ikum? Iram Daut nemot no keng go sedue ey ten piam so tra goso, Ki Wali yap ba no degut-nayom go, ngga ba sogo loti iti go, nemotnang no wasey go, mo dam-nenayom. Nemot-a, loti ngganemot Daut ey nemot no keng go eygo logo ya kua dam. Taitisopupuit go trang logo so mea dam. No, ten sogo so dam go ngga piam so kua pu ne.”
5 Ngge se senong dali, “Wali Sam klaut ba nogo Musa lo mo klik, ‘Sabat ku nogo, Ki Wali yap ba no kebali taitisopuitgo trang lo pupluok go, piam sogo ya kua pu.’ 6 Don ey motnang nogo gabe pen-asitugu, ‘Ki Wali yap ba so lemoy go, seni ey. No, Genam, Woy Dem-a seni teguop dega gabe.’ 7 Esang, motnang sedue Parisi! Wali Sam klaut ba no nebut ngge Ki Wali Iram lo pen go, ‘Klum-a banim se senong, ngga At lo iwat go gemang. Taiti so puit go menay, Genam moyso!’ a Sedue Parisi! Nebut ngganemot-a suey so motnang mo senong go, kuklue kua go sedue sogo teguopey piam so motnang lo kua pu! 8 Se senong: Blong Dem-a, Sabat ku go Wengkabui dega gabe. Ku ngganemot nogo Nemot lo iwat go mea lemoy.”
Sabat ku no taidi kebong go sedue Yesus lo pali-nawon go
9 Ngga sik so koklong go sedue Yahudi go dewi yap ba sono Yesus gemang degut-nawon. 10 Dewi yap ba sogo, sedue taidi kebong go gemang. Sedue ngga ikum go, Yesus neyboy genang tap uwet goso wamoy so sedue Parisi lo gemang usi-netenawon, “Yesus! Sabat ku nogo sadui eygo sedue ya suey, ya kua?” 11 No, way so nemotnang sono ngge kalik Yesus lo gemang pu, “Se duing! Sabat ku no, motnang sik sogo sedue go domba-a klaya, mu ba sono pui, ngga kalik ikum go ya itak? Nemot kebong eygo sogo ya kua lek? Yang, mea lek. 12 No sikabung, domba kalik kua. Sikabung go seni kangok dega.” Yatrang ngganemot sik so, gabe senong, “Sabat ku nogo tasam suey go-a se sesemu!” 13 Ngga ey, taidi kebong go sedue sono Yesus lo gemang pu, “Mot go ta walong so sra-ya!” Sedue ngganemot nemot go ta walong so sra go, ta suey go idi kalik, nemot go ta gemang pali-anatun.
14 Ngganemot naklay ikum-nenawon gono, dewi yap ngga sik so kuek-lak go, Yesus but genang nebut gemang pu-nenawon. 15a No, nemotnang go atuia ngga Yesus mo senong, ngga ey Nemot-a sip meno sono gemang klong.
Ki Wali Iram lo kuoy go tamot suey go
Matius 12:15b-21
15b Yesus no keng go sikabung mata dega so gemang. Ngga ey, nemotnang naklay go sadui-sadui yam so Yesus lo gemang pali-sing. 16 No, ngge kalik dawin ey Yesus lo gemang pen-tenawon, “Genam ngge nando b ibe nogo namboy kua penklong!” 17 Ngga kalik pu goso, nabi Yesaya lo ngge pen-ngam go gemang lemoy,
18-21 “Ikum-a! Tamot Genam lo kuoy go gemang.
Nemot nogo-a Genam klum kangok.
At go yakay gabe!
At go Waglo nemot blo no Genam lo mea tui.
Ngga ey, Ki Wali Iram logo tap nemudi sogo seni eygo
saula-saula no Nemot lo mea taling.
Nemot nebut way babu sogo yakua pu,
tap-tap logo nemot go kayang sikabung lo ya kua tup!
Don kua go sikabung,
bluim teguok go kalik ya kua tong go pui.
Ngga ey sui kua go nogo, sagoy kalik,
sikabung lo sut genang, Nemot ya kua.
E... seni eygo, nemudi sogo tap no don ey Nemot mea suing.
Nemot go sui no duduing eygo saula-saula, mea bubung!” (Yesaya 42:1-4)
Kupiamgo ey Yesus kua kerlam
22 Ngganemot blo idi lo, naliwabu lo mlak go sedue, Yesus mit no, sedue temu lo wawi go gemang weng. Nali lo degut go sedue ngganemot go nemu mo pung. Ngga ey, mawo so ne dali.
Se ikum! Sedue mawo nemu pung go ngga tandali Yesus lo mo pali. Nemu tandali pli go, kekayso nebut ey gemang pen-tenawon. 23 Sikabung mata sogo, tasam ngga ikum go, nega-nenawon. Ngga ey, ngge kalik Yesus so gemang pen-netenawon, “Nggenemot tegadi so dok go Daut sik sogo Danon gabe mo?” 24 No, sedue Parisi tup-nenawon gono gemang pu-netenawon, “Kupiamgo don lo naliwabu yat-ton go wa!” 25 No, nemotnang go kunala senong go, way so sedue Parisi no ngge kalik go yatrang Yesus lo gemang pen-won, “Saula tang klaya go, suey so klay gono kua suing go, banom-banom sran go, don mea teguok. Ngga kalik dali so, yaptenglam naklay, banom-banom suep go, yakena klaya go don eygo mea kua suing.” 26 Yatrang ngge sik so se senong: Kupiam golo Londa dali yat go, ngga kalik go Kupiamgo tang so don mea nega. Nemotnang go seguong so ngga kalik sesemu go, sogo kalik so don eygo nemotnang ya suing? 27 Motnang, we-keto go, ‘Kupiamgo don no pu goso, Yesus lo iyat go.’ No, motnang sedue Parisi no keng go sedue logo, mo senong: Kupiamgo logo naliwabu yakua yat. Ngga sik so nemotnang lo mea yang: Genam so motnang lo pu go nebut, seni kua! 28 No, Ki Wali Waglo go don lo naliwabu Genam lo yat go sik so mea senong, “Seni so, nggeasui go ku no atnang mit no Woy Wali Iram go blongdon gabe mo pung.”
29 “Kua kay: banim no Kupiamgo don-a se dok. Se duing: sedue don eygo sik sogo taut gluik genang, banim sedue ngganemot-a tegan lo se dok! Nggano nemot go yap ba no degut go, yap ba logo taut mea ikak go kuek. Nago no banim sedue don eygo ngganemot kua dok go, taut mea kua degut go ikak. 30 Ngge se senong: klay gono Genam eygo nandonang kua susuing go, Genam nogo nemot wayang go gemang. Nggano Genam ey klay go nogo nando kua yaluim go, banom-banom sogo nemot lo gemang susuep.
31 Ngganemot sogo so, gabe we-situgu, ‘Sikabung no pupluok go, piam, uwayang, ngga mea suep. No, Ki Wali Waglo no nando lo wayang go, suep genang yakua. Piam ngga senang so mea gigit. 32 Ki Wali Iram sik sogo Blong Dem so paysing pu go, kuklue ngga mea suep. No, Ki Wali Waglo no wayang go, suep genang ya kua. Kukunan ngge nogo, yansi go kuklue ngga ya kua suep dali.’ ”
33 “Genam lo pupluok go ngge suey go, piam go, yatrang ngge sik so se senong.
Di so motnang lo pu go, ‘Ngge di suey go.’ Di ngga go don-a, suey dali gemang. No, motnang lo pu go, ‘Ngga kua seni go di.’ Don kua seni dali gemang. Yang! Di, don tagot go sik so seni suey go, piam go kayseguong mot mea senong. 34 Ey, sedue Parisi! Motnang lema nok kalik, motnang go lom sik sogo iseng gemang pung. Dabui waluk go ba sik sogo, tap suey go-a, sogo kalik motnang logo ya pen? Yang, motnang go dabui ba no tram go-a, lom ba logo gemang pupung. 35 Se senong: nemot go ba sogo suey golo tram go, suey go-a wawi go mea pung dali. No, nemot go ba sogo piam golo tram go, piam go dali-a mea taling. 36 Yang! Gabe pen-asitugu, ‘Piam go nebut naklay, Ki Wali Iram kisebui ku no tang ey mea usi. Mot tang-mot tang so se wa-kebalo.’ 37 Seni so, mot go nebutpen tang so, motnang sogo ngge Ki Wali Iram lo mea yang, ‘Ngge seni eygo sedue, ngga piam so taling go sedue.’ ”
Yesus lo taling go tasam nogo tupduk go kua keng
38 Yesus lo pu go nebutmang naklay tup gono, Musa logo demu so ngunguok go ey partay Parisi sik sogo sedue ey weng go, ngge kalik Yesus sono gemang usi-netenawon, “Aya klui! Tasam kangok go meno taling go ikum-elu so, ikuntu go se.” 39 No, Yesus lo gemang tenguo, “Esang! Nggeasui go tang, dabui lo kua keng, yam so kuklue lo mo waluk. Tasam-a uwet go tang. Nggeasui go tasam kangok go meno ya kua taling-srelu. Yang! Nabi Yunus no lemoy go tasam seguong-a mea ikum-kelo. 40 Se duing! Dasi kangok go teguan ba so, kuklik nangglik yam so Yunus mo suing. Ngga kalik dali, kukunan go sani ba nogo, Blong Dem mea got-nayon. 41 Ki Wali Iram go nebutmang nabi Yunus go lom lo pen go tup gono, piam itak go, sikabung yakena Ninewe dabui lo mo keng. Genam no lemoy genang tasam ngge kangok dega, nabi Yunus no lemoy go ey ya kua kerlam. No, nemot-a tasam ngganemot ikum go, motnang tupduk go kua keng. Ngganemot sogo so, yansi go, Ninewe sikabung ey nggeasui go tang ngge ey klay gono ip go, ngga ey motnang sono nemotnang lo ta mea nat.
42 Se senong dali: iram kabung nan Syeba, sada idi sik sogo, iram Salomo go kunala kalong eygo, tasam nemudi sogo iway tup go ikum genang so, ket sik so mo weng go pung. No, Blong Dem nogo se duing: Nemot so got-ton go ngge, kangok dega, Salomo go senongkalong ey kua kerlam. Ngganemot sogo so yansi kisebui ku nogo, iram kabung ngga, nggeasui go sikabung ey mea ip-lak. Ngga ey nemotnang nogo iram kabung lo ta mea nat dali.”
Kukunan sik sogo naliwabu lo tandali degut go
43-44 “Ngge suey so se senong: sedue ba sik sogo kuasep piam go naliwabu mo yat go, dikuagosip no kap go, nemot suing genang sip meno kamso wet go, kua ikum go, ngge kalik mea pu, ‘Genam suing genang sip kua go se! Nggeasui go itak-nayu go sip sono tandali mea degut-nalu.’ Ngga ey, ikum go, ‘Ye! Yap yam so sengan go, ulue so ba git-atugun?’ 45 Yang seni so, ngga kalik ikum go, kuasep piam go naliwabu ngga lo deguo wet go, kuasep naliwabu 7 yam so piam dega go, wawi go, sedue ngga ba sono degut go mea suing-lak. Yang! Ide ey, iseng kangok dega so sedue ngga lo mea tra.
Se senong! Nggeasui go waluk go sikabung nogo ngga kalik go tasam mea lemoy dali.”
Yesus ntatonnang eygo nogo nebut
46 Sikabung ibe ey nebut so Yesus maning pepen gono, Nemot go unen Maria, ntatonnang ey Yesus tegu genang so gemang weng-lak. Ngga ey gemang pen-netenawon, “Nggeasui go Yesus ey atnang nebutpen sogo se.” 47 Ngganemot no, ngge kalik Yesus sono sedue meno lo gemang pu-tenawon, “Ikum-a! Mot go mia ey, satyap ey, nebut Mot ey pen genang so uwet go.” 48 No, sedue ngga sono ngge kalik Yesus lo gemang tenguo-nawon, “Nandonang-a At go mia ey, satyap ey?” 49 Ngga temu ey Nemot go andua-andua sono ta taling gono, ngge kalik gemang pu-tenawon, “Se senong! Ngge, Genam go mia, satyap eygo gabe!” 50 Kua kay! “Genam go Ki Wali Aya lo iwat go-a, nandonang lo pupluok go, nemotnang ngga Genam go mia ey satyap eygo gemang.”