11
1 Andua 12 yam sogo no nebutmang ngga yam so king-nawon go, Israel go yakena-yakena sono deguo teguop nguok genang so, tandali Yesus gemang koklong.
Yesus ey Yohanes Busotuigo ey
2 Tasam-tasam, Iram Yesus lo pupluok go iway, boy ba no Yohanes gemang tup-nawon. 3 Ngga ey, Yohanes go andua temu, Yesus mit sono mot-dak go gemang weng-lak. Nggano pung go nogo, Yesus no ngge kalik nemotnang lo gemang usi, “Tegadi so Ki Wali Iram lo dok go Iram, Mot ngge? Sedue meno-a ya bung-etugu?” 4 Ngga ey way so Yesus lo pu go, “Klong-a! Motnang lo ikum go, motnang lo tup go-a Yohanes no nase pen-kenalo! Ngge tup gono, nemot mea senong: tegadi so dok go Iram, Genam ngge gabe! 5 Yang ngga sikabung: nemu pung go tandali nemu pli go; masi ip go; yaulat eygo sadui pali go; kama wik go tenuing go; kebong go tandali nglong go; taut kua go sikabung nogo sesuoy genang deguo teguop gabe pepen.
6 Se senong, dabui lo keng go Genam sik so kua teguey go, nemot ngga Ki Wali Iram go suongku no nenem-yakay ey gemang!”
7 Yohanes Busotuigo andua-andua ngga tandali klong gono, sikabung miam eygo ngga sogo no nebut ngge kalik Yesus lo gemang pen-tenawon, “Banim go kaseglokpay so, Yohanes Busotuigo lo nebut pepen go nogo, sogo kalik go ikum genang so kenayo: bluim nebit lo luluing go ikum genang so? Ngga kalik Yohanes Busotuigo kua gabe! 8 Amka teguop go ey kok go sedue ikum genang so? Ngga kalik Yohanes Busotuigo kua gabe! Amka teguop go ey kok go ngga, pemlenta go yap kangok go ba no deguena dega, deguena temu ey susuing go, mea ikum. 9 Yohanes Busotuigo no weng gono, sogo kalik go-a motnang mo ikum? Ki Wali Iram lo iwat go-a pupluok go nabi ikum? Yang! Nemot ngga nabi gemang! No, seni-a gabe pen-asitugu, ‘Sedue ngga, Ki Wali Iram lo mot-dak go nabi ey kua kerlam. Nemot go sipsuing blo so!’ 10 Se tup! Yohanes sogo ngge kalik mo klik. Ki Wali Iram lo mo pu,
‘Ikum-a! Banim temu no At go tamot pu go gemang koklong.
Woy Dem go tap nemudi sogo nemot lo mea kebuo!’ (Maleakhi 3:1)
11 Ayanang, mianang! Motnang nogo seni so gabe pen-asitugu, ‘Klay duonang go kabung lo tui go duo, Yohanes Busotuigo kalik maning kua pang gabe. Nemot go sipsuing blo dega so! No, Woy Wali Iram go blongdon duduing wawi genang so usi go sikabung, nemot-a seguay go, Yohanes ey kua kerlam. Nemotnang go sipsuing blo so gabe. 12 Se senong! Yohanes Busotuigo wali kebali tamlak go ku sik so, Woy Wali Iram go blongdon duduing kukunan blo no mo pung. No, esang! Walitap ngga koysaula lo gabe uwaydang. Seni so, walitap ngga sikabung temu lo mlak genang, don ey nemotnang lo gemang waydang. 13 Se senong! Yohanes Busotuigo ku no pung go, Musa logo demu, nabi-nabi lo pu go walitap lo mo taling-neakam. 14 Yang! Ki Wali Iram lo tegadi so dok go Iram maning kua weng go nogo, nabi Elia-a banim se pung. Senong so nando lo duduing go, ngge-a se senong: Nabi Elia ngga, Yohanes Busotuigo gemang! 15 Nando kama gemang go, nebut ngga se tup!
16 Nggeasui go tupduk go kua keng go sikabung, sogo kalik go yatrang lo ya taling-lu? Yang! Nemotnang ngge, yem so susuing go denok kalik. Andua-andua lo usi go,
17 ‘Esang! Motnang nogo so suling atnang lo u go,
no, motnang usre kua wata ne;
uyagui-a kamso semu go,
no, genuing motnang kua susuing ne.’
18 Seni so, Yohanes weng go nogo ten kua dam, bu kua drop. Nggano way so iwot go motnang lo ne pu, ‘Ngga nali degut golo yane go sedue wa!’ Ngga ey, kama-a nemotnang ne ketok. Kua keng! 19 Ngga blo idi lo, Blong Dem pung go, tendam budrop, way so nemotnang lo ne pu, ‘Ikum-a! Ten-bu mata so dam-ton go, blasteng so iyaluim go sedue go andua gabe. Nggano, kuklue piam konkebamling eygo andua Nemot gabe dali.’ Ngga ey, kama-a nemotnang ne ketok. Kua keng dali.
No, se ikum! ‘Ki Wali Iram go duduing seni eygo-a, takebali so andua-andua lo gabe tetaling.’ ”
Yakena-yakena kua teguey goso dawin ey Yesus lo bebat go
20 Ku ngganemot nogo, yakena-yakena so ngge kalik Yesus lo gemang bebat-nawon, “Nemot-a tasam-tasam kangok go Genam lo taling go, no, dabui logo iwot-dak go kua teguey ne!”
21 “Yakena Korasim, yakena Betsayda se tup! Idekeba dega motnang nogo dali gemang. Nemot-a motnang go nemuku no, tasam kangok go lelemoy go, konkebamling sik sogo motnang kua teguey ne. Se duing! Banim go, saula meno yakena Tirus ey Sidon eygo, tasam kangok go ngge kalik lemoy go, walu so kuklue piam konkebamling sogo, genuing-a u ey suing go, teguey go nemotnang ne mo keng. 22 No, motnang no gabe pen-asitugu, ‘Kisebui ku nogo, yakena Tirus ey Sidon eygo no iti genang ide ey. No, motnang nogo ide kangok go dega-a mea iti.’ ” 23 Yakena Kapernaum, se tup! Esang, motnang lo duing go: ut blo sono go, atnang mea iti. No, ngga yakua, kisebui-a mea iti. Sikebong sip sono, kukuim ba sono mea betep. Motnang nesip no taling go tasam kangok-kangok go, yakena Sodom a no taling go, nemotnang teguey go, koy logo kua kuim go, nggeasui go nogo yakena ngga go sip maning gemang. 24 No, gabe pen-asitugu, “Kisebui ku nogo saula meno yakena Sodom nogo ide eygo mo taling. No, motnang nogo ide dega eygo-a mea taling.”
Ki Wali Danon go seni nogo
25 Ku ngganemot dali nogo, ngge kalik Yesus lo gemang pu-nawon, “O, Ki Wali Aya! Ut-nan so semu go Ki Wali Kumam! Seni so, sui kua go sikabung nogo-a, senong blongdon naklay Mot lo neguon so gabe ngengap. No, sui dega eygo kunala kalong eygo nogo, senong blongdon naklay Mot lo mo saguip. Ngganemot sogo so, taitisuey kangok so gabe pu-ebitugu! 26 O, Aya, Mot go kunala nogo ey seni so ngga mo but gabe. 27 Genam go ta sono blongdon naklay, Ki Wali Aya lo mo itak gabe. Yang! Sikabung klayanang go logo Danon kua senong, Nglangin seguong lo Danon gabe senong. Nggano, Danon seguong lo Nglangin mo senong. Yang, nandonang sono Nglangin Danon lo taling go, nemotnang-a Ki Wali Aya gabe senong dali.”
28 Gabe pen-asitugu, “Motnang, ide eygo, yam so mo lasu go sikabung! Ba weng-a, Genam mit no! Motnang nogo nimla teguop tom eygo-a mea iti. 29-30 Pen-asitugu go-a waysagi ey tupduk go se keng. At lo guglung go ide-a motnang logo se lek. Se senong: motnang no glung-situgu go ide ngge, tom ey iwa-iwa dato so. Yang! Dodon kua, susuot seguong so, dabui blo sono go, kua i-iti. Nebut ngge motnang lo keng go, nim ey mea la.”