7
Plewengkabui Yesus sono don ey keng go
1 Yam so nguok gono, yakena Kapernaum sono Yesus gemang degut-nawon. 2 Ngga sogo, Roma go plewengkabui a gemang. Nemot go koybutasemu sadui kangok so tra go, gemang to-tenawon, i go kebong yam no. Koybutasemu ngga nogo plewengkabui klum dega ey. 3 Yesus sogo iway tup gono, sedue Yahudi go woy-woy plewengkabui lo mot-dak go, Yesus wawi so mea klong. Nemot go koybutasemu sadui so sesrek go, Yesus lo pali genang so. 4-5 Woy-woy Yahudi ngga, Yesus ey tegu gono, plewengkabui lo kuongking go kalik don ey gemang usi-nenawon, “Weng-a Aya! Plewengkabui ngga, sedue suey go se! Imot sikabung Yahudi nogo, nemot klum kangok. Se senong: atnang go dewi yap, suey so nemot lo pu go mo klik-eyu.” 6 Nebut ngga tup-nawon gono, keng go Yesus gemang klong. Se senong: plewengkabui go yap no se dedagu, wengkabui lo andua-andua pu go, Yesus sono gemang klong. Plewengkabui, suali go, nemot lo gemang we-nawon, “Aya! Mot don kangok, genam don seguay. Esang! Genam go yap ba no Mot degut genang yakua! 7 No, ngge sik so nebut dato-a pu-silo, ngga ey, suey-a na pung-anayun!” 8 Yang! Plewengkabui genam ngge gabe. Genam blo sogo plewengkabui gemang dali, ku sono go at go plesedue tala nogo, genam go don mea taling dali. Plesedue tala no at lo pu go, “Klong-a! Nemotnang mea klong. Weng-a! Nemotnang mea weng. Ngge-a se semu! Nemotnang lo ngga mea semu!” 9 Nebut ngga tup gono, yakay ey gemang pling. Ngga no, sikabung mata sogo no iwot go, ngge kalik gemang pu-nawon, “Se ikum! Ki Wali Iram sono don dega ey dabui lo sedue ngge gabe keng. Israel sikabung klayanang go nemot kalik keng go Genam kua tegu.” 10 Yang! Andua-andua ngga, plewengkabui go yap no tandali pung go, ikum go: koybutasemu sadui sogo, Yesus lo pu go woy no tandali mo pali.
Yakena Nain sogo ngguot Yesus lo nglong go
11 Ngga temu ey, yakena Kapernaum sik sogo, yakena meno, Nain sono Yesus gemang koklong. Ngga: Nemot go andua ey sikabung temu mata sogo ey Nemot gemang klong. 12 Koklong go, yakena Nain go yataput no se dedagu, sedue temoy tuet genang so lek go sikabung ey gemang tegu-nenawon. Seni so, ngguot ngga, kabung nalo go danon klaya go. 13 Kabung nalo no ikum gono, dabuiklum Yesus lo gemang tra-nawon. Ngga ey, ngge kalik kabung nalo no gemang pu-nawon, “Mia, U kua kluo ey!” 14 Se ikum: peti so lek go sedue namboy ip gono, Yesus weng go peti no ta lo gemang tuing-nawon. 15 Nggano, ngge kalik Yesus lo gemang pu-nawon, “Dem, nglong-a!” Ngguot ngga ip go, sikabung temu ey nebut-a gemang pen-tenawon. Ngganemot no, unen go ta ba sono ngguot ngga gemang itak-nawon.
16 Tasam ngge ikum go, sikabung naklay suali ey gemang tra-nenawon. Ngganemot sogo, Ki Wali Iram go sui iway-a gemang pu-netenawon, “Nabi kangok go klaya, imot nesip no mo pung-awon! Nemot go blung nogo Ki Wali Iram dabui mo iwat gabe.” 17 Yang! Nan Yudea ey nan seding no-seding no, Yesus logo tasam-tasam bu kalik se dayap-asitun.
Yesus ey Yohanes Busotuigo ey
18-19 Ku ngganemot nogo, Yohanes Busotuigo Herodes lo boy ba no mo betep. Yesus sogo iway tup gono, Yohanes lo kuoy go andua namon gemang mot-dak. Woy Dem sono klong go se usi, “Tegadi so Ki Wali Iram lo dok go Iram, Mot ngge? Sedue meno-a ya bung-etugu?” 20 Nemotnamon, Yesus mit no kenawon go, Yesus no ngge kalik gemang pen-klenawon, “Genam namon Yohanes lo mot-dak goso weng go, mot no nebut ngge usi so, ‘Tegadi so Ki Wali Iram lo dok go Iram, Mot ngge? Sedue meno-a ya bung-etugu?’ ” 21 Se ikum: woy ngganemot dali nogo, sikabung sadui sogo, naliwabu lo degut go, nemu pung go, naklay Yesus lo gemang susuey. 22 Ngganemot sogo so, Yesus lo pu-nawon go, “Klong-a! Motnang lo ikum go tup go-a Yohanes no se pen-klenalo!” Yangga sikabung: nemu pung go tandali nemu pli go; yambi masi ip go; yaulat eygo sadui pali go; kama wik go tenuing go; kebong go tandali nglong go; taut kua go sikabung nogo deguo teguop gabe pepen.
23 Se senong, “Dabui lo keng go Genam sik so kua teguey go, nemot ngga Ki Wali Iram go suongku no nenem yakay ey gemang!”
24 Yohanes Busotuigo go andua-andua ngga tandali klong gono, sikabung miam eygo sono ngge kalik Yesus lo gemang pen-anawon, “Banim go kaseglokpay so, Yohanes Busotuigo golo nebut pepen go nogo sogo kalik go ikum so kenayo? Bluim nebit lo luluing go ikum genang so? 25 Srem teguop go ey kok go sedue ikum genang so? Srem teguop go ey kok go, ngga deguena dega, deguena temu ey woy yap ba no klay goso mea susuing. 26 Sogo kalik go-a motnang mo ikum? Ki Wali Iram lo iwat go pen genang sogo tamot? Yang! Nemot ngga nabi gemang! No, motnang nogo gabe pen-asitugu, ‘Nemot go sipsuing blo so gemang!’ 27 Seni so, tegadi so dok go Iram pung genang, Wali Sam klaut ba no, ngge Yohanes so mo klik gabe. Ki Wali Iram lo pu go,
‘Ikum-a! At go tamot mot-dak go banim temu no gemang koklong.
Mot go tap nemudi sogo nemot lo mea kebuo!’ (Maleakhi 3:1)
28 Ayanang, mianang! Gabe pen-asitugu: klay duonang go kabung lo tui go sik sogo, Yohanes Busotuigo kalik go, maning kua pang gabe. Nemot go sipsuing blo dega so! No, ngge se senong dali: Woy Wali Iram go blongdon duduing ba sogo seguay go-a, Yohanes blo so gabe.” 29 Sikabung naklay Yohanes Busotuigo golo bu mo tui-sing go nebut ngga tup go, Ki Wali Iram sono iway gemang iti-nenawon, “Ki Wali Iram go walitap seni eygo nemudi so gabe!” Seni so, ngga kalik dali kon eygo blasteng so yaluim golo, gemang iti-nenawon. 30 No, sedue Parisi ey Musa logo demutrui so ngunguok go, Yohanes lo bu kua tui go nogo, Ki Wali Iram logo walitap gemang tenguo.
31 Nggeasui go tang ngge dabui lo kua keng go, sogo kalik go yatrang lo ya taling-silu? 32 Yang! Dia-a susuing go denok kalik nemotnang sono, andua-andua lo ngge kalik usi go,
“Esang! Motnang nogo so suling atnang lo u go,
motnang usre ne kua wata;
u yawi-a kamso semu go,
genuing motnang kua susuing ne.”
33 Seni so, Yohanes weng go nogo ten kua dam, bu kua drop. Nggano way so iwot go motnang lo ne pu, “Ngga nali degut go sedue lo pupluok go wa!” 34 Ngga ey, Blong Dem weng go, Nemot tendam-budrop, no, way so motnang lo ne pu, “Ikum-a! Nemot ten-bu mata so dedam go. Nemot blasteng so iyaluim go sedue go andua, nggano, kuklue piam konkebamling eygo andua, Nemot gabe. 35 No, se senong: Ki Wali Iram go duduing seni eygo, At go takebali pupluok golo gabe mo taling.”
Yesus sedue Parisi go yap no ten dam-nawon go
36 Se ikum: sedue Parisi meno lo, Yesus, nemot mit no glop kalik ten dam genang so gemang usi. Nggano, Yesus klong go, nemot go yap ba sono degut gono, suing go ten so dedam. 37 Ngga ey, yakena ngga sogo kabung tap piam golo koklong go, gemang. Ibe naklay mo senong: ngga kamea kabung. Kabung ngganemot, Yesus sedue Parisi go yap no, ten dam so weng go tup-natun go, mlay kinemon suey dato go ey samonsuip ey iti go, gemang degut-natun dali. 38 Kabung ngga, yap ba no degut go, Yesus go taton no, masi ku no ip gono, u gemang kluo-natun. Nggano, nemot go unebu lo, Yesus go masi yam so say. Ngganemot sogo so, nemot go betodop walong golo, Yesus go masi temoy nogo unebu gemang drok-natun. Yam so drok gono, Yesus go masi no nebuem kong gemang tebok-natun. Nggano mlay kinemon suey dato golo gemang ut-natun. 39 Sedue Parisi, Yesus so wawi go weng go, tasam nggenemot ikum gono, dabui ba lo gabe duing, “Esang! Yesus, nabi kua wa. Nabi sogo, gemang mo senong-srewon: ngge kamea kabung!” 40 No, Yesus nemot go kunala senong go, sedue Parisi no ngge kalik so gemang pu-nawon, “Simon, nebut benuey mot no pen-alu go, ngga suey?” Nggano Simon lo pu go, “ Aya klui, pen-a, genam tup sogo.” 41 Ngganemot no, Yesus lo gemang pen-nawon, “Sedue klaya duo lo, sedue namon duo no, duoy namboy gemang wasey: meno no, duoy 50 so, meno no duoy 500 so. 42 No, tandali iti genang sogo, sedue namon ngganemot, tap kua. Ngganemot no, sedue taut mata sogo lo pu go, ‘Ngge nueya, genam nogo tandali go kua iti!’ Nebut benuey ngge, yam so pen gono, Simon no Yesus lo gemang usi nawon, 43 ‘Simon! Sedue namon nggenemot, nando go yakay-a kangok?’ ” Simon lo pu go, “ Genam lo duing go, duoy mata so iti go sedue!” Yesus lo pu go, “Yang, nemot lo!” 44 Ngganemot no, Yesus, kamea kabung no nemu yalap gono, Simon no gemang pen-nawon, “Simon, mot duoy seguay so iti go sedue kalik. Esang! Mot go dabui klum seguay dali! Kabung ngge no mot se ikum: nemot, duoy mata so iti go sedue ngganemot kalik go. Yang, nemot go dabui klum kangok dali. Mot se senong: mot go yap no Genam degut go, demutrui kalik, genam nogo masi bu ulu genang sogo bu, mot lo kua iti. No, Genam go masi bu, kabung go unebu lo gabe ulu-tun. Nggano nemot go betodop lo mo drok. 45 Genam degut go nogo, genam nogo ta kua luik, nggano, demutrui nogo kalik, nebuem kuong-a kua tebok. No, degut go sik so iti go, Genam go masi no, nebuem kuong gabe tebok-tegun. 46 Ngganemot no, Genam go wengkabui nogo mlay, mot lo kua ut-sreto. No, Genam no mlay kinemon suey go mo ut-tun. 47 Simon! Ngganemot sogo so, Genam lo gabe pu, ‘Kabung ngge lo Genam no nemot go taiti klum kangok so mo taling-tun. Ngga sik so mea senong: nemot go piam mata dega, naklay mo suep. No, esang, nando go piam seguay so suep go, nemot go taiti seguay so mea taling dali.’ ” 48 Ngga ey, kabung ngga no Yesus lo pu go, “ Mot go konkebamling mo suep!”