4
Ki wali bu yelung-a Samaria kabung no Yesus lo pen go
1-3 Nan Yudea so Yesus got-tenawon go nogo, Nemot no keng go sikabung, mata dega so. Ngga ey, tang Parisi go woy-woy gemang senong-nenawon, “Yang! Sikabung Yesus lo bu tutui go, mata dega so, Yohanes Busotuigo ey kua kerlam.” Yesus tang go logo bu kua tui-tenawon. No, Nemot go andua-andua lo bu gemang tutui. Sedue Parisi tup go ngga, Yesus senong-nawon goso, nan Yudea itak go, namboy nan Galilea no tandali gemang-nenawon.
4 Nan Galilea sono go, Samaria tap lo gemang koklong. 5 Koklong go, yakena Sukar no gemang pung-nenawon. Yakena ngga, danon Yusup nogo so babuasi Yakop lo itak go nan, dagu so. 6 Ngga sogo babuasi Yakop lo tuet go bumu gemang. Yesus koklong go, wabedong go woy 12 nogo, saysuk lasu goso, bumu ketang no nim gemang la-nawon. 7-8 Yesus go andua-andua-a, ten idok so yakena sono mo nenawon. Ngga ey, wabedong go bu gluik so Samaria kabung-a gemang kuntun. Nggano, Samaria kabung sono Yesus lo pu go, “Debui-a! Genam no bu gluik go iti-sando, genam bunuo eygo se!” 9 No, way so Samaria kabung lo gemang tenguo-natun, “Mot sedue Yahudi. Sogo kalik goso Samaria kabung no bu wadong-togoy?” Sikabung Yahudi ey, sikabung Samaria eygo tegan suey so kua keduik go nogo. 10 Way so kabung ngga sono pu-nawon go, “Esang! Mot, Ki Wali Iram sik sogo taiti maning kua senong, Genam maning kua senong-sresanto dali ba? No, na senong go sogo, Genam no wali bu wadong-sresanto go, gemang mo iti-sresatu! Bu ngganemot, yelung eygo, tong-kuatong.” 11 No, wali bu so pu go kua senong goso, tandali kabung ngga gemang usi-natun, “Aya! Mot, buot kua go! Bu ngge, ngga ba so git-tenatun go, sogo kalik wali bu ngganemot mo gluik-to? 12 Esang! Mot babuasi ey kua kerlam! Bumu ngge, imot go babuasi Yakop tang so, atnang no mo itak-nengam. Bu ngge nemot tang golo gluik go mo drop, nggano, nemot go menay nogo mo iti go drop-nengam dali. Sogo kalik go-a, Mot logo taiti-a, kangok dega?” 13 Yesus lo pu go, “Babuasi Yakop sik so, bumu ngge ba sik so sikabung lo bu gluik go drop go, nemotnang bunuo tandali go ey gabe tetra. 14 No, Genam lo iti go bu-a drop go, bunuo senang so tandali go nemot yakua tetra. Seni, so, Genam lo iti genang bu ngganemot, yelung bu so nemot go dabui ba sik so mea pipi. Nggano, wali min bu sik so, wali inim-a mea pung.” 15 Ngga kalik so tup gono, kabung ngga lo gemang pu, “Aya! Genam no, wali bu ngganemot-a iti sando! Bunuo tandali go genam yakua tra genang. Ngge sono, tandali genam uweng genaning.” 16 Ngga ey, Yesus lo pu go, “Mot, klong go, mot go sedue wawi go, se kebando!” 17 No, kabung ngga lo pu go, “Genam, sedue kua!” Way so Yesus lo gemang pu-tenawon, “Seni so lo! Mot go sedue kua lo. 18 Mot, sedue taidi yam so mo iti-itak. Nggeasui go sedue ngga, mot go sedue kua dali. Ngganemot sogo so, mot seni so mo pu-to, ‘Genam sedue kua.’ ”
19 Kabung ngga, Yesus lo pen go tup gono, gemang pen-tenatun, “Aya! Genam mo senong: Mot ngge, senong eygo sedue! 20 Seni so, genam senong go: atnang go babuasi lo taling go, genamnang Ki Wali Iram no ta kong genang, meduim Gerisim blo no se klak. No, motnang sedue Yahudi lo pu go: Ki Wali Iram no ta kong genang sip, Yerusalem seguong so klaya gemang. Sogo kalik so?”
21 Way so Yesus lo pu go, “Mot senong go Genam sono dabui iti go mea keng. Seni so, ku gabe pupung, Ki Wali Iram no ta kong genang, meduim ngge blo nogo yakua klak, nggano, Yerusalem nogo yakua klong dali. 22 Esang! Ki Wali Iram no ta kokong genang, suey so motnang kua senong. Atnang sedue Yahudi-a, Ki Wali Iram ta kokong genang tap mo senong. Se duing: sikabung nogo sesuoy genang walitap ngga, sedue Yahudi sik so gabe mo pung. 23 Se senong: Ki Wali Aya dui ey! Ku meno pung-ayun genang, nggeasui go mo pung gabe: Wali Waglodon ey, seni eygo-a ta mea kokong! Ngga kalik go sikabung-a Ki Wali Aya gabe uwet! 24 Yang! Ki Wali Iram wagloblong lo damoy go. Wali Waglo go don logo tang so, Ki Wali Iram nogo dewi, suey so, Nemot go duduing no sikabung logo mea pu.”
25 Nggano, Yesus no kabung ngga lo pu go, “Genam senong go, tegadi so Ki Wali Iram lo dok Iram mea pung. Nemot weng gono, walitap naklay mea pen-ayon!” 26 Nggano, Yesus lo pu go, “Genam, mot no nebut so pepen go ngge, Iram ngganemot gabe!”
Samaria sikabung no deguo teguop pen-asitun go
27 Woy ngganemot no, Yesus go andua-andua weng-lak go, dabui ba lo gemang duing-netenawon, “Sogo kalik goso, kabung ngga ey nebut ne pepen!” No, dia no pu genang yakua.
28-29 Ngga ey, bot-a kabung ngga lo itak-natun go, tandali yakena sono gemang kap-situn. Nggano, sikabung no gemang pen-situgun, “Pla ikum-a! Genam go tasam naklay dia sono sedue ngga lo yam so pen go. Tegadi so Ki Wali Iram lo dok go Iram, Nemot ngga?” 30 Yakena sogo, sikabung, tup-nenawon gono, Yesus mit sono gemang nebanuon.
Wasma nogo nebut
31 Ngga temu ey, Nemot go andua-andua lo gemang pu, “Aya, ten ya dam go.” 32 No, way so Yesus lo pu go, “Genam go ten gabe. No, ten ngge, motnang kua senong.” 33 Yesus lo pu go ngga tup gono, nemotnang go seguong so gemang pen-netenawon, “Sikabung meno logo ten nemot no mo iti?” 34 Yesus lo gemang pu, “Genam Ki Wali Iram lo mot-dak go mo weng. Genam go ten ngga, Ki Wali Iram go duduing-a pupluok genang. Nggano, genam go ta no, iti go kebali-a, yam so gabe ya semu.” 35 Seni so, motnang lo duing go, “Banu namon-namon dali no wasma mea seni!” No, motnang no Genam lo pu go, “Ikum-a! Sikabung mata so ngga go, usu wasma seni go kalik so, iti yam nogo se! Nggeasui go ku no kebali ngganemot se pluok. 36 Seni so, wasma so i-iti go sedue, seguot nang sogo seni, gabe mo iti. Yang! Senang wali nogo-a, seni ngga nemot lo gemang iyaluim. Ngga ey, nemot so kuali go ey, nemot so iti go ey, klay gono yakay kangok so gabe tetra. 37 Ngge, seni so mo pen-nengam gabe: meno duo a lo, nemot-a kuali go, duo meno lo seni mea iti! 38 Genam lo pu go, ‘Motnang se klong! Motnang lo kua kuali go usu sik sogo wasma tuet genang. Seni so, usu ngga sikabung meno lo kuali go, no, nemotnang go kebali sik sogo seni, motnang lo se iti.’ ”
39 Samaria sikabung, yakena Sukar sogo, kabung ngga lo pen go, “Sedue ngganemot lo, genam go tasam dia no yam so pen-nawon go.” Ngga, tup gono, Yesus no sikabung mata so gemang keng-nenawon. 40 Samaria sikabung ngganemot, Yesus ey tegu gono, suey so, ta ey kong-nenawon gono, gemang pu-nenawon, “Aya! Mot, ngge no ya suing?” Nggano, ku namon ey, Yesusnang, ngga nogo gemang got-nenawon. 41 Seni so, walitap Yesus tang so nguok go nogo, Yesus nogo sikabung mata dega so gemang keng-nenawon. 42 Ngga sik so, kabung ngga no gemang pu-netenawon, “Mot lo pen go seguong sik so atnang kua keng. No, nemot tang golo nguok go walitap atnang mo tup. Ngga sik so keng go gabe: tegadi so Ki Wali Iram lo dok go Iram, kukunan sesuoy genang, Nemot ngge gabe!”
Nan Galilea sono tandali klong go
43 Ku namon yam so, yakena Sukar sogo got-nenawon gono, nan Galilea no Yesusnang gemang klong. 44 Seni so, banim no Yesus tang go mo pu-yom, “Senong eygo sedue nemot go yakena tang go nogo, ta ey suey so yakua kong.” 45 No, nan Galilea no pung gono, suey so Yesusnang sikabung lo gemang wawi-nenawon. Seni so, walop Paska so Yerusalem sogo no, Yesus lo semu go tasam nemotnang lo mo ikum. Ngga tang so, nan Galilea no, tandali Yesus weng go nogo, nemotnang yakay kangok. 46 Nggano, yakena Kana, nan Galilea sogo no, Yesusnang gemang pung. Banim go, yakena ngganemot no bu anggul sogo Yesus lo gemang lemoy.
Se senong: amble duo wengkabui go denun, sadui sogo, i go seni kebong yam nogo, yakena Kapernaum so to-tenatun. 47 Wengkabui tup-nawon go, “Nan Yudea sik sogo, nan Galilea no Yesus mo weng.” Ngga ey, yakena Kana no bewon go, Yesus pu go, yakena Kapernaum no klong genang so. Nemot go denun kebong yam nogo sadui pali genang so. 48 No, wengkabui ngganemot no Yesus lo gemang pu-tenawon, “Esang, tasam-tasam kangok go motnang kua ikum go, yakua keng.” 49 No, wengkabui lo pu-nawon go, “Aya! Genam go duo maning kua kebong gono, keda so weng-a!” 50 Ngga ey Yesus lo pen go, “Klong-a! Mot go duo mo suey-wa!” Yesus go nebut dabui lo keng gono, amble duo ngga gemang klong. 51 Tap, maning beton gono, yap sik sogo deguo gemang pen-nenawon, “Aya! Mot go duo mo pali.” 52 Wengkabui, deguo ngga tup gono, gemang usi-nawon, “Kaning-a, duo tandali mo suey?” Nggano, tamot lo pu go, “Inenga wabedong, nemot go nengkoy mo kua.” 53 Nggano, wengkabui gemang duing-nawon, “Seni so, woy ngganemot no, Yesus lo pu golo, ‘Mot go duo mo pali!’ ” Ku ngganemot sik so, wengkabui go yaptenglam, duomenggo, naklay, Yesus no gemang keng-nenawon.
54 Ngga lo, tasam namon tete sogo, nan Galilea no Yesus lo semu go gabe.