3
Wali inim nogo nebut Nikodemus ey pen-klenawon go
1 Sedue meno gemang. Nemot partay Parisi sik sogo wengkabui meno, nemot go sui: Nikodemus. 2 Ku meno no, wadi go kuklik ba lo, Nikodemus Yesus mit no gemang weng. Ngga ey ngge kalik Yesus no gemang pen-atenawon, “Aya klui, genam naklay mo senong: Ki Wali Iram sik sogo tap suey so Mot lo gabe nguok-togoy. Seni so, Mot lo semu go tasam sedue seguong logo yakua pluok, Ki Wali Iram lo mot-dak weng go Mot gabe!” 3 Way so Yesus lo gemang pen-tenawon, “Mot suey so se tup! Seni so, sedue tang sogo, Ki Wali Iram go blongdon duduing yakua ikum. No, sedue ngga-a tandali tui goso, mea ikum!” 4 Way so Nikodemus lo pu go, “Sogo kalik go-a, sikabung babu go dega, tandali moy go sani ba no degut gono ya tui?” 5 Ngga ey, Yesus lo pu go, “Suey so se tup. Bu ey Ki Wali Waglo go don eygo lo maning kua tui go, Ki Wali Iram go blongdon senongduduing yakua mlak. 6 Yang! Sikabung go saysuk ngge, moy-ay lo tui go gabe. No, wali inim iti genang, ngga kalik kua. Wali ngga, Ki Wali Waglo go don logo so mea iti. 7 Sikabung naklay, tandali tui genang so, At lo pu go-a kua nega se togoy! 8 Yatrang ngge-a se senong, ‘Ta logo nebit yakua mlak, no saysuk nogo-a mea tra. Sikabung nebit go tap kua senong. Wali Waglo lo tandali tui genang sikabung go tap, ngga kalik dali gabe.’ ” 9 Nggano, don ey Nikodemus lo pu-nawon go, “Sogo kalik so ngga ya lemoy?” 10 Way so Yesus lo pu go, “Esang! Sikabung Israel nogo Ki Wali Iram go tap, mot lo tetaling go! Sogo kalik go-a tap ngge mot kua senong? 11 Mot suey so se tup! Genam lo senong go nggano ikum go-a mot nogo gabe pen-asitugu. No, motnang Parisi sik sogo sedue, nebut ngga nogo sang kua kekeng ne. 12 Yang! Kukunan blo nogo tasam At lo pen go, motnang yakua keng go. Sogo kalik so, Ki Wali sip sik sogo nebutpen go nogo, ya keng-kelo? 13 Se duing: sedue klaya nang go, kukunan sik so Ki Wali Sip no klak go ikum genang, yakua. No, Blong Dem-a mo senong gabe. Nemot, Wali sip sik so ku sono weng go tang so.
14 Babuasi Musa lo taling go tasam mot se duing: blung Israel, tap no, piam taling go tang so, iseng kangok so tra go, kaseglokpay no, lema tembaga di blo sono Musa lo mo glung, sikabung Israel ngga ikum golo, tandali sesuoy go pali genang. Ngganemot kalik dali, Blong Dem di blo no mea glung. 15 Ngga ey, Blong Dem no dabui iti go sedue-a, Yesus ey klay gono lemoy golo, kikiwali inim mea iti. 16 Seni so, kukunan sikabung nogo Ki Wali Iram gualaklum katu eygo tang so, Danon klayking-a mo iti-kunuon. Ngga ey, Nemot no dabui iti go nando keng go, nega genaning, way so kikiwali inim-a mea iti.
17 Danon klayking, Ki Wali Iram lo mot-dak go weng go, kukunan idekeba sikabung no taling genang so, kua. No, sikabung wali genang so uweng. 18 Ki Wali Iram go Danon klayking no dabui iti go nando keng go, nemot nogo idekeba yakua iti. No, dabui iti go nando kua keng go, nemot nogo idekeba gemang. 19 Seni so, ngge kalik Ki Wali Iram sik sogo kisebui gemang tetaling: nemot-a kukunan blo no Blong Iram pung go, wali piam go tang so, ku klik go sono, sikabung dabui gabe i-iti. 20 Yang! Tasam piam go nando lo pupluok go, Blong Iram nogo dabuipiam kangok so gemang tetra. Blong Iram sono weng genang nemot moyso. Nemot, ku klik go ba seguong so mea susuing, nemot go tasam piam go ikum genang so. 21 No, tap nemudi sogo nando lo keng go, Blong Iram no weng genang, nemot yakay ey. Nemot go, tasam suey go ikum go nogo, suongsut mea kua tra!”
Yesus ey Yohanes Busotuigo eygo nebut
22 Ngga ey, Yerusalem sik sogo Yesus nemot go andua-andua ey nan Yudea no gemang nenawon. Ku kata yam so suing gono, sikabung nemotnang lo bu gemang tui-nenawon dali. 23-24 Seni so, ku ngganemot nogo, Yohanes Busotuigo boy ba sono go maning kua mlak go betep. Se senong: Yohanes lo sip Enona, yakena Salim dagu no, sikabung Yohanes Busotuigo golo bu gemang tui-tenawon. Ngga sogo, bu mata so. Sip ngga sono sikabung weng go, nemot lo bu tutui genang.
25 Ku ngganemot no Yohanes go andua-andua, Yahudi sedue meno ey, gemang sok-netenawon, “Musa logo demu nogo, wali piam go sikabung, kon kua genang bu logo yakua suep.” 26 Ngga ey, Yohanes mit no pluep go, gemang pen-netenawon dali, “Aya, klui! Ngga ku no, mot ey bu Yordan ngga idi sogo no, mot lo taling go sedue ngga, mot maning duduing? Mot mo senong? Nggeasui go, Nemot lo bu gemang tutui dali. Nggano, sikabung naklay nemot sono gemang koklong.” 27 Ngga ey, Yohanes Busotuigo golo pu go, “Ki Wali Iram lo taling go-a, sikabung logo mea pupluok.” 28 Genam lo pen go, motnang tang so mo tup, “Genam ngge, tegadi Ki Wali Iram lo dok go Iram kua. No, Nemot nogo, tap so kebo go, genam gabe! 29 Sikabung mata sogo ngga kalik Yesus lo bu tui go nogo, genam yakay kangok. Se duing: kabung dok sogo kalik, sedue ngga nemot-a kabung ngga go gemang. No, nemot go andua, dagu no suing go nemot lo pepen go tup go, yakay-a, kangok so gabe tetra. Yesus kebali ta mlak go nogo, genam go yakay, mo tram gabe. 30 Ngge suey! Yesus-a se bebabu, genam-a se seguay.”
Sam ngge so klik go atuia
31-32 Ayanang, mianang! Ngge naklay tup go nogo, se senong: blo sik so nando-a weng go, kangok dega gemang. No, kukunan sik sogo lo pung go, kukunan blo nogo nebut-a gemang pepen. Nando blo sik so weng go, Nemot ngga sikabung naklay blo no gemang gigit. Ngga so ikum go, ngga so tup go-a Nemot lo gemang pepen. No, esang, sikabung mata so Nemot go deguo nogo kua keng! 33 No, Yesus go nebut waysagi ey nando lo mlak go, ngga tang so nemot lo mea yang dali, “Ki Wali Iram dui ey! Nemot lo pen go nebut, seni so, keng genang.” 34 Se senong: Ki Wali Iram lo mot go Wali nebut-a, Nemot lo gabe pepen. Ngga ey, Nemot sono Wali Waglo damoy ey Ki Wali Iram lo mo iti gabe. 35 Danon nogo, Ki Wali Iram klum kangok dega. Ngga ey, Nemot sik sogo, Blongdon naklay, Danon go ta no mo itak gemang. 36 Danon ngganemot no duduing klaya, don ey nando keng go, nemot nogo wali inim-a mea iti. No, Danon, ngganemot no kua tupduk go sedue, wali inim yakua iti. Yang! Senang so nemot blo no Ki Wali Iram lo taling go kisebui-a, mea gigit.