5
Bumu Betesda no sadui eygo sedue Yesus lo pali go
1 Ku meno no, sedue Yahudi go walop so, nan Galilea sik so kota Yerusalem sono Yesus gemang klong. 2 Yerusalem sogo yataput ‘domba’ dagu so bumu meno gemang. Nemot go sui: Betesda. Bumu ngganemot go seboy taidi yam so. 3 Seboy ngganemot logo, sadui sogo sikabung mata so gemang sesrek: nemu pung go, yambi sogo, kandong sogo. [Nemotnang naklay, bumu ngganemot, kekeyung goso bung-netenawon. 4 Seni so, bumu ngganemot, Woy Dem go Wali tamot blo sik so weng golo mea keyung. Nggano, bu keyung go nogo, banim mot go degut go, nemot go sadui naklay mea pali.]
5 Seboy ngganemot sogo, sedue meno gemang, yagui 38 yam so, sadui so to-nayom go. 6 Sedue ngganemot ikum-nawon go, Yesus mo senong, “Walong dega so sedue ngga sadui mo to-nayom.” Nggano, nemot no Yesus lo gemang usi-nawon, “Mot, sadui pali so, duing-togoy?” 7 Ngga ey, sedue ngga lo pu go, “Woy Dem! Genam duduing go se! No, genam bumu keyung gono, iti go nik genang sedue kua go! Genam don kua go nogo, tap maning koklong, bu mu ba nogo, banim sikabung meno-a mo li.” 8 Ngga tup gono, Yesus lo pu go, “Nggeasui go, buong-a, mot go sip srek lek go se klong!” 9 Woy ngganemot dali no, sedue ngga, sadui pali go sip srek lek go, gemang klong.
Tasam ngge Ki Wali Iram go ku Sabat no, Yesus lo semu-nawon go. Se senong: Yahudi go demu nogo, ku Sabat nogo kebali yakua semu! 10 Ngganemot sogo so, sedue sadui sik so pali go sono Yahudi go iram-tegay lo gemang pu-netenawon, “Ngge, ku kangok go. Sip srek kua lek go koklong ey!” 11 No, sedue ngga lo pu go, “Genam go sadui so pali go sedue lo pu go, ‘Mot go sip srek lek go se klong!’ ” 12 Nggano, Yahudi go iram-tegay lo gemang usi-nenawon, “Mot nogo, ngga kalik go, nando lo pu-nawon?” 13 No, sikabung mata sogo ba no Yesus saguip go nogo, sadui so pali go sedue ngga kua senong-srenawon.
14 Woy meno no, Ki Wali yap kangok go ba no tandali Yesus, sedue ngganemot ey gemang tegu-nawon. Ngga ey, nemot no Yesus lo gemang pu-tenawon, “Mot go sadui mo pali gemang! No, tasam piam go tandali go kua semu! Mot nogo, idekeba kangok go iti genaning.” 15 Ngga ey, sedue ngganemot lo, klong go, Yahudi go iram-tegay no gemang pen-tenawon, “Genam go sadui, Yesus lo pali go!”
16 Se senong: tasam ngga kalik, ku kangok gono Yesus lo semu go sik so, Yahudi go iram-tegay senong go, Yesus waydang genang tap gemang wet-netenawon. 17 No, Yesus lo gemang pen, “Senang so Genam go Ki Wali Aya kebali gabe pupluok. Genam logo kebali gabe pupluok dali.” 18 Yahudi go iram-tegay ngga kalik go tup gono, Yesus but genang tap kangok so gemang usey-netenawon. Seni so, iram-tegay lo duing go, ku Sabat nogo demu seguong-a Yesus logo kua seguoy. No, Nemot lo pu go ‘Ki Wali Iram, Genam go Aya!’ Nemot go seni: Ki Wali Iram ey Nemot mo kerlam. Ngga piam kangok go.
Ki Wali Iram go don Danon no iti go
19 Yahudi go iram-tegay no way so ngge kalik Yesus lo gemang pu-nawon, “Seni so, sogo-sogo Danon tang go lo yakua pluok. No, sogo kalik so Nglangin lo pupluok go-a, Danon lo ikum gono, gemang tetaling. Yang, Nglangin lo sesemu go kalik, kerlam so Danon logo gemang pupluok dali. 20 Seni so! Danon nogo, Nglangin go klum kangok. Ngga tang so, Danon no Nemot lo pupluok go naklay gabe tetaling. Yang, Danon nogo imening go tasam kangok go dega, Nglangin lo mea taling dali. Ngga sik so, motnang gabe nega-ketogoy. 21 Se senong: sikabung kebong go, tandali Ki Wali Aya lo nglong gono wali inim i-iti go, ngga kalik dali Danon lo iwat go sedue nogo-a, wali inim gabe iti dali. 22 Sikabung nogo kisebui Ki Wali Aya tang so kua i-iti. No, Danon go ta sono kisebui iti genang don mo itak gabe. 23 Ngga ey, Nglangin no ta kokong go kalik, Danon nogo sikabung ta mea kong dali. Yang! Danon nogo nando ta kua kokong go, Danon so mot-dak go Nglangin nogo, ta kua kong dali.”
24 “Yang! Ngge, seni so gabe pen-ategu, ‘Genam lo pen go nebut no suey so nando lo keng go, nggano, Genam so pu go weng go Ki Wali Aya sono dabui iti go, senang wali-a mo iti gemang. Kisebui, mea kua taling. Seni so, kebong sik sogo nemot itak go wali sono mo wawi gemang.’ 25 Seni so gabe pen-asitugu, ‘Ku ngganemot mo pung gabe: sikabung mo kebong go, Ki Wali Danon lo pu go nebut mea tup. Nemot go nebut tup go sikabung-a, tandali mea nglong. 26 Ki Wali Aya tang go, Wali min! Ngga kalik dali, Wali min so Danon gabe! 27 Danon ngge, Ki Wali Iram sik sogo Blong Dem! Ngganemot sogo so, kukunan no kisebui iti genang don, Danon go ta sono mo iti gabe. 28-29 Nebut ngge tup go, motnang ey kua nega! Seni so, ku mo pung gabe: sikabung kebong go naklay, Danon go nebut tup go, sikebong sip itak go, mea buong-lak. Tasam suey go-a sesemu go, nglong go nogo, wali inim-a mea iti. Tasam piam goso sesemu go, nglong go nogo, kisebui-a mea iti.’ ”
Yesus sogo nebut Ki Wali Iram lo pen go
30 Tandali Yesus lo pu go, “Genam tang go duduing nogo, tebadali Genam lo mea kua semu. No, Ki Wali Iram lo pu go tupduk go seguong-a, Genam logo gabe pupluok. Ngganemot sogo so, Genam lo pu go, seni ey, nemudi so gabe. 31 Nggeasui go, Genam tang go, saysuk nogo nebut pepen go, ngga, seni kua gemang. 32 No, Genam sogo nebut meno duo lo mo pen dali go, nemot lo pen go ngga, seni so gemang! Ngga Yohanes Busotuigo golo pen go! 33 Yang! Yahudi go iram-tegay lo mot go tamot-tamot, Yohanes Busotuigo mit no mo klong. Nggano, Genam sogo nebut seni-a Yohanes lo mo pen-anayom. 34 Ngge kalik pen go, se senong: Genam nebut sedue lo pepen genang so, genam kua uwet gabe. No, motnang sesuoy genang-a gabe pen-situgu. 35 Seni so, Yohanes ngga, sagoy nang kalik blon go mo kong. Neblong ngganemot lo ngap gono, motnang yakay mo tra. 36 No, Genam lo pepen go ngge, seni kangok dega gabe! Yohanes lo pen go seni ey kua kerlam: Wali Aya lo pu go tasam-tasam, teguop so lemoy genang, At lo gabe pluok-tugu. Ngga sik so senong genang: Ki Wali Iram lo mot-dak gono, Genam mo weng gabe! 37 Ngga kalik so, Genam so mot go weng go, Ki Wali Iram lo Genam sogo nebut mo pen dali. No, motnang Nemot maning kua ikum, nggano Nemot go nebut maning kua tup. 38 No, esang! Dabui ba nogo Ki Wali Iram go nebut suey so tup go, waysagi ey motnang logo kua mlak.
39 Nemot-a motnang mo senong go: senang wali inim go tap ngga, Wali Sam klaut ba so gemang! Ngga nang sogo, Sam ngga senang so motnang lo gemang i-ikum. Ngga ey mea duing: motnang senang wali mo iti. No se senong: Wali Sam klaut ba nogo, Genam nebut-a gemang pepen. 40 No, esang! Genam sono weng go, senang wali inim iti genang, motnang moyso.” 41 “Nueya! Sikabung Genam nogo ta yakua kokong go. 42 No, motnang-a genam mo senong: Ki Wali Iram nogo klum, motnang go dabui ba nogo kua gemang. 43 Ki Wali Aya go sui ey Genam weng go. No, Genam motnang lo mo tenguo ne. Yang, sedue meno, nemot tang go don no weng go-a, motnang logo gabe wawi. Esang! 44 Sui blo sono sikabung meno lo pu genang-a, motnang tang go uwet go. No, motnang go sui blo sono Ki Wali Iram lo pu genang-a, motnang kua uwet ne. Sogo kalik so Genam no dabui iti go motnang ya keng?
45 Se senong: Ki Wali Iram go suongku nogo, motnang nogo kisebui Genam lo mea kua taling. No, seni so, kisebui ngga, motnang lo duduing go Musa logo-a mea taling. 46 Yang! Musa go tap no seni so motnang lo keng go, Genam nogo mea keng dali. Genam sogo nebut naklay Musa lo mo klik-ngam. 47 No, Musa lo klik go nebut no motnang kua keng go, sogo kalik Genam lo pepen go nebut nogo, motnang ya keng?”
Yesus go nebut, Yahudi go, iram-tegay nogo so, pen go, ngge no yam.