6
Sikabung 5 ribu ten Yesus lo iti go
1 Nebut mang naklay Yesus lo pen-nawon gono, Galilea bu, Tiberias bu so pupu dali go, ngga idi no gemang klong.
2 Tiberias bu ngga idi nogo, Yesus sono sikabung mata dega so gemang keng-lak. Tasam-tasam kangok go, sadui sogo sikabung tandali Yesus lo pali go ikum go nogo. 3 Ngga ey, meduim blo sono Nemot go andua-andua ey Yesus gemang klak. 4 Ku ngganemot nogo sedue Yahudi go walop Paska mo dedagu.
5 Yesus meduim blo sogo no nemu yalap-siwon go, sikabung, mata dega so, Nemot mit no weng go, gemang ikum. Nggano, ngge kalik andua Pilipus sono, Yesus lo gemang usi-won, “Sikabung ngge naklay lo dam genang, ten nago no ya iti-eyon?” 6 Pilipus go kunala senong genang so, yatrang Yesus lo ngga usi go. Seni so, tasam kangok go semu genang Yesus mo duing. 7 Way so Pilipus lo gemang tenguo-nawon, “Duoy namon eygo dato lo iti go ten logo, sikabung mata dega sogo nogo tayakuatemoy.”
8-9 Nggano, Yesus go andua meno Andreas, Simon Petrus go ntaton lo, gemang pu, “Esang! Ten taidi ey dasi namon dato eygo-a, dem sop ngge logo-a, be! Sogo kalik so sikabung nogo ngge dato logo tayakuatemoy?” 10 Ngga ey, Yesus lo pu go, “Sikabung naklay pu go se suing-lak.” Ngga ey, sikabung naklay, neguen blo no gemang suing-lak. Sedue seguong-a go 5 ribu yam so. Duokabung tagu kua i-nenawon.
11 Nemotnang naklay, ku no suing go, loti ey dasi ey Yesus lo iti go, Ki Wali Iram sono taitisuey gemang pu-biwon. Nggano, ten ey dasi ey betok go, sikabung suing go sono gemang wasey-sing. 12 Ten ngga dam golo, sikabung naklay nu ey se temoy-lak! Nggano, Nemot go andua-andua no Yesus lo pu go, “Ten temu itak go, kua tega, sip ba no se yaluim!” 13 Ngga ey ten temu itak go yaluim-nenawon go, kala 12 yam sogo gemang tram.
14 Tasam kangok go Yesus lo semu go ngga ikum gono, ngge kalik sikabung lo gabe bega-netenawon, “Ye! Ki Wali Iram sik sogo nabi kangok go seguong logo so tasam ngge kalik go mea pluok! Seni so gabe: Yesus ngge, banim so babuasi Musa lo pu-ngam go kukunan blo no weng genang nabi a ngganemot gabe.” 15 Ngganemot sogo so sikabung lo duing go: Yesus wawi go ta lo plong go, nemotnang nogo iram so temuit genang. No, kunala ngganemot nogo, Yesus kua keng-srenawon. Ngganemot sogo so, meduim sono Yesus banom gemang klong.
Bu blo lo masi lo Yesus klong go
16 Ku yam so klik gono, Yesus go andua-andua bu ketang no gemang uneng. 17 Ku kiklik go nogo, bung-netenawon go, nemotnang mit nogo Yesus maning kua pung. Ngga ey bayi no nemotnang-a klak go, yakena Kapernaum sono gemang wok-nesaton. 18 Ngga ey, beap alui eygo nebit kangok go se kokong. 19 Nemotnang bayi lo wok-nesaton go, bu nesip no pung go, bu blo lo masi lo Yesus uweng go, gemang ikum-nesawon. Ngga kalik ikum gono, suali kangok so gemang tra-nenawon. 20 No, nemotnang no Yesus lo pu-sawon go, “Motnang suali kua tra! Ngge, Genam lo be.” 21 Ngga ey, bayi ba no Yesus wawi genang so, gemang duing-nenawon. No, woy ngganemot dali no bayi bu ngga idi no keda so se rlo.
Yesus so sikabung mata sogo wet-netenawon
22 Ngga utep go, sikabung mata sogo, bu ngga idi so maning itak go, tandali Yesus ey tegu genang so gemang pluep. No, esang! Nemotnang mo senong, “Inenga bayi klaya golo Yesus go andua-andua banom mo klong. Yesus kua keng. Nemot nago so got-ton?” 23 Woy ngganemot nogo yakena Tiberias sik sogo ketang ngga no bayi temu gemang kok. Sip ngga taitisuey Woy Dem lo pu go, sikabung ten iti go sip dagu no. 24 Yesus, Nemot go andua ey ngga sogo kua go, sikabung ngga ikum go, ngga sogo bayi no klak-sing go, yakena Kapernaum no Yesus wet sogo so gemang klong-lak.
Ki Wali Iram nogo tap inim Yesus gabe
25 Bu ngga idi no, Yesus ey tegu gono, sikabung lo gemang usi, “Aya klui! Kaning-a ngge nogo Mot pung-ayo?” 26 No, nemotnang no ngge kalik Yesus lo gabe pu-nawon, “Genam seni-seni so gabe pepen: Genam lo pluok go tasam seni senong so kua uwet. No, ten dam go nu ey temoy go tang so, motnang gabe wet-ketogoy. 27 Se senong! Pegop genang ten dam sogo-a motnang kua uwet. No, yakua pegop genang ten-a kangok so se u-usey! Ten ngga Blong Dem lo iti go, wali inim lemoy genang. Yang! Ngga nang so, Ki Wali Aya tang golo Blong Dem mo temuit gabe.”
28 Yesus go nebut tup gono, sikabung mata sogo lo gemang usi, “Ki Wali Iram lo iwat genang, sogo-a atnang ya semu-elu?” 29 Way so Yesus lo pu go, “Ki Wali Iram go duduing klaya seguong gabe. Yangga, Genam, Nemot lo mot-dak go weng gono, dabui-a iti go se keng.” 30 Way so nemotnang lo pu go, “Ngga kalik go, sogo kalik go tasam-a ya taling lo b genamnang ikum gono, senong-elu gono, keng-elu sogo?” 31 Se duing, “Nan Mesir sik so babuasinang pung go uweng go ku nogo, kaseglokpay, Wali Sam klaut ba no ngge mo klik-ngam,
‘Blo sik sogo ten mo ikak go dam-nenangam.’ ” (Mazmur 78:24)
32 Nggano, way so Yesus lo gemang pen, “Yang, Ngge se senong go keng. Blo sik sogo ten ngga, Musa lo kua, Genam go Aya-a, Ki Wali Iram lo iti go. Yang! Nggeasui go Ki Wali yakena sik sogo, Genam, wali ten seni, Ki Wali Aya lo gabe iti! 33 Ki Wali Iram sik sogo wali ten seni ngga, Ki Wali yakena sik sogo li go Blong Dem gabe. Kukunan blo sogo sikabung nogo, wali ten Nemot lo gabe i-iti.” 34 Ngga tup gono, way so nemotnang lo pu go, “Ngge suey! Nggeasui go, wali ten ngganemot-a, atnang nogo se iti-sando.” 35 Yesus lo pu go, “Wali ten ngganemot Genam ngge gabe! Genam sono nando weng go, dabui iti go Genam sono keng go, senang sogo ten nemot yakua tetra! Bunuo senang sogo yakua tetra dali. 36 No, banim pen go kalik, ‘Genam motnang logo mo ikum. No, dabui iti go Genam sono go, yakua keng!’ 37 Se senong: Genam go ta sono Ki Wali Aya lo iti go sikabung naklay, Genam mit sono uweng go, Genam logo yakua tenguo! 38 Yang! Ki Wali yakena sik so weng go, Genam tang go duduing-a pluok genang so kua. No, Genam so mot-dak go weng go Ki Wali Iram lo duing go-a, lemoy genang so. 39 Genam so mot-dak go weng Ki Wali Iram go duduing, ngge kalik gabe: Genam go ta ba sono Nemot lo itak go sikabung, klaya nang go nega eygo! No, ku yam sogo no, kebong sik sogo, tandali nemotnang Genam lo mea nglong! 40 Genam go Wali Aya go duduing: Danon nando lo ikum go, Nemot sono dabui iti go keng go, ki wali inim-a Nemot lo mo iti gabe. Ngga ey, ku yam sogo no, kebong sik sogo, tandali nemot Genam lo mea nglong!”
41 Yesus lo pu, “Ut blo sik sogo wali ten Genam ngge gabe.” Ngga tang so, nebut ey sedue-sedue Yahudi se iti-nenawon, esang! 42 Ngge kalik nebut gemang sok-netenawon, “Nemot ngge Yusup go danon se! Unen-nglangin imot mo senong. Sogo kalik go-a, Nemot lo ne pu-won, ‘Ki Wali yakena sik so Nemot mo li gabe?’ ” 43 Ngga ey, way so Yesus lo pu go, “Dabui piam ey, nebutsegut kua iti!” 44 Se senong: Genam sono klaya duo nang go weng genang, yakua gabe. No, Genam so mot-dak go Wali Aya lo lek go sikabung-a, Genam sono mea weng-lak. Nggano, ku yam sogo nogo, kikiwali inim iti genang, Genam sono nando-a weng go, Genam lo mea nglong.
45 Se senong! Wali Sam klaut ba nogo ngge mo klik-nengam,
“Sikabung naklay Ki Wali Iram lo mea nguok.” (Yesaya 54:13)
Yang, Ki Wali Iram lo nguok go tup go-a, Genam sono nemotnang naklay mea weng. 46 Kua kay! Ki Wali Aya sedue klaya duo logo kua ikum. No, Ki Wali Iram sik so weng golo, Nemot mo ikum. Ngga Blong Dem tang go.
47 Seni-seni so Genam lo gabe pepen, “ Genam sono dabui iti go keng go, nemot kikiwali inim mo iti gabe. 48 Se senong: wali ten Genam ngge gabe! Kiki wali inim Genam logo so mea iti. 49 Kaseglokpay no, ut ba sik so net go ten babuasi lo dam go, no, nemotnang mo kebong dali. 50 No, nggeasui go Ki Wali yakena sik sogo wali ten, nando lo dam go mea kua kebong. 51 Yang! Wali iti genang ten, Ki Wali yakena sik so li go, Genam ngge gabe. Ten ngge nando lo dam go, kikiwali inim nemot lo mea iti. Seni so, Genam lo iti genang ten, Genam go saysuk gabe. Ngga, kukunan sikabung wali genang so gabe i-iti.”
52 Yesus go nebut tup gono, sedue-sedue Yahudi lo gemang waydang-netenawon, “Sogo kalik so, Nemot go kedong iti go, imot lo ya dam-eyon?” 53 Way so, nemotnang sono Yesus lo gemang bebat-nawon, “Esang! Blong Dem go kedong motnang kua dam go, Nemot go kin kua drop go, motnang ba nogo kikiwali inim mea kua gigit. 54 No, Genam go kedong nando lo dam go, Genam go kin drop go, nemot nogo, kikiwali inim-a mea iti. Ngga ey, ku yam sogo nogo, kebong go sip sik so, tandali nemot Genam lo mea nglong. 55 Seni so, Genam go kedong ngge, wali ten seni, wali bu seni gabe! 56 Genam go kedong nando lo dam go, kin drop go, Genam ba so nemot mea gigit; nemot ba so Genam mea susuing dali. 57 Genam, Kiki Wali Aya lo mot-dak go gabe weng. Ngga ey Wali Aya logo tang so Genam gabe uwali. Ngganemot kalik so, Genam dabui ba no nando lo iti go, Genam tang sogo so nemot mea uwali. 58 Ngge, Ki Wali yakena sik sogo wali ten seni. Babuasinang lo dam go ten, ey kua kerlam: nemotnang mo kebong. No, wali ten ngge nandonang lo dam go, kiki so mea uwali.” 59 Ngge naklay, yakena Kapernaum no, dewi yap ba no nguok go gabe.
Yesus lo nguok go nebut sikabung lo waydang go
60 Wali ten so pen go tup gono, Yesus no keng go sedue temu lo gemang pen-netenawon, “Nebut ngge, ide dega ey. Nando-a ya keng?” 61-62 Seni so, Nemot no keng go sedue, Nemot lo nguok go nebut waydang-nenawon go, mata so. Yesus tang go mo senong-nawon. Ngga ey Nemot lo pen go, “Motnang waydang-ketogoy go? Yansi go, Blong Dem tandali Ki Wali Iram mit sono keklak go ikum go, maning ya waydang-kelo?”
63 Seni so, kiki wali-a, Ki Wali Waglo lo gabe i-iti. Kin-kedong logo yakua. Motnang no Genam lo pen-atu go ngga, Wali Waglo lo damoy go kikiwali inim. Sikabung tang sogo, yakua senong. 64 No esang! Motnang sik sogo, sikabung temu Genam no dabui iti go, nemotnang kua keng go gemang. Seni so, Yesus mo senong: Nemot nogo yakua keng go, ngga ey, sedue Yahudi go ta nogo, nando lo ya itak.
65 Ngganemot sogo so Yesus lo pu go, “Genam mo pen-tu: Ki Wali Iram lo kua iti go, Genam sono go motnang tang so yakua weng.” 66 Sikabung mata so, waydang go, Yesus no keng go sik so mo teguey-lak. Tandali Yesus nogo kua keng.
67 Nggano, Nemot go andua 12 yam sogo no, gemang usi-tenawon, “Genam sik sogo, motnang yakua kuek dali?” 68 Simon Petrus lo pu go, “Woy Dem! Nando mit no genamnang kuek so ne? Mot lo pepen go nebut lo, senang wali tong kua-tong go i-iti go se. 69 Atnang lo senong gono, dabui iti go keng go: tegadi so Ki Wali Iram lo dok go Iram teguop, Mot gabe.”