7
Yesus go ntatonnang keda so kua keng
1 Ngga sik sogo, nan Galilea sogo yakena-yakena lo walitap nguok so Yesus gemang wet-siton. Nan Yudea no klong genang, Yahudi go iram-tegay Yesus but so duing go nogo, moyso.
2 Se senong: sedue Yahudi go walop kangok go gemang dedagu. Nemot go sui, ‘Bla ba walop’. a 3 Nggano, ngge kalik Yesus so ntatonnang lo gemang wayang-netenawon, “Ye, se ip! Sip ngge Mot se itak. Nan Yudea no se klong! Mot no keng go sikabung Mot go tasam kangok go ikum genang!” 4 Ibe senong genang so duduing go, duen ba so kua susuing. No, dia sono se pung, kukunan naklay ikum go, senong genang. 5 Esang! Ntatonnang, Yesus nogo dabui iti go kua keng. 6 No, nemotnang no ngge kalik Yesus lo pu go, “Nggeasui go Genam go ku no maning kua pung! No, ku no-ku no motnang go ku gabe pupung! 7 Motnang nogo, ku klik go ba lo uwet go sikabung logo sagui yakua kong. No, Genam nogo dabui piam-a nemotnang gemang tetra! Nemotnang go kuklue piam konkebamling Genam lo tetaling gono go. 8 No, walop sogo motnang-a se klong! Genam go ku, maning kua pung go nogo, Genam mea kua keng!”
9 Nebut ngge, ntatonnang no pen-nawon gono, Yesus tang go-a Galilea no gemang got-nawon.
Mesip so Yerusalem no walop sogo Yesus gemang-nawon
10 Ntatonnang, Yerusalem no walop sogo banim klong-lak gono, mesip so yakot so banom Yesus gemang-nawon, sikabung temu senong genaning.
11 Woy ngganemot nogo, Yahudi go iram-tegay, walop ba lo Yesus so ta tui go wet-netenawon. Ngga ey, gemang u-usi, “Kay! Yesus nago so?” 12 Yakena naklay sik sogo sikabung mata sogo lo Yesus sogo nebut gemang seglup-netenawon. Temu lo duing go, “Yesus, sedue suey go.” No, temu lo pu go, “Sikabung mata so tap piam go sono Nemot lo ngunguok go se.” 13 No, Yesus sogo nebut, dia sono go sikabung logo kua pen-nesrenangam. Nemotnang, Yahudi go iram-tegay no suali go tang sogo so.
14 Walop nesip no, Ki Wali yap kangok go ba no Yesus degut-nawon go sikabung ngga sogo-a gemang nguok-tenawon. 15 Yesus go nebut tup gono, Yahudi go iram-tegay gemang nega-netenawon. Ngga ey, gemang pupu, “Sedue ngge klui logo kua nguok! No, naklay mo senong dega!” 16 Way so Yesus lo pu go, “Genam lo ngunguok go ngge, Genam tang go duduing no kua. No, Ki Wali Iram, Genam so mot-dak go weng go duduing-a, Genam lo gabe ngunguok. 17 Ki Wali Iram go duduing no nando uwet go mea senong, ‘Yesus lo ngunguok go ngge, Ki Wali Iram sik sogo, Nemot tang go duduing.’ 18 Nemot go duduing tang go-a nando lo ngunguok go, nemot tang go sui so uwet go. No, Nemot so pu go weng go sui-a nando lo iti go, ngga seni eygo sedue gemang. Ngga, tamot suey go, wamoy tap nemot kua tetaling. 19 Ayanang! Banim no, motnang no demutrui, babuasi Musa mo iti. No, motnang sik sogo klaya duo logo demutrui ngganemot nogo kua keng. Sogo tang sogo so, Genam ya but-kelo?”
20 Nggano, Yesus no sikabung mata sogo lo ngge kalik gemang pu-nenawon, “Ye! Mot yane sogo. mot but genang so nando wet-ton?” 21 Way so Yesus lo pu go, “Genam lo, ku kangok gono, sedue sadui sogo klaya dato pali go nogo, motnang ey mo nega-kenayo. 22 No se duing: motnang no tasam saduisuktong genang, Musa lo mo pu-ngam. Ngga, Musa tang golo kua taling, no, babuasi Ablaham, Isak, Yakop banim dega sik sogo, mo pung. Nggeasui go, ku kangok go nogo, motnang lo tasam saduisuktong go gabe sesemu dali. 23 Tasam ngga suey: demutrui no keng genang so, motnang lo pupluok go. Sedue sadui sogo, Genam lo pali go, sogo temoy no sagui ne kokong? 24 Saysuk temoy no ikum go-a, kua pen, no seni sogo-a suey so ikum go, se pen!”
Ki Wali Iram lo tegadi so dok go Iram ngga Yesus
25 Yesus go nebut ngga kalik go Yerusalem sogo sikabung temu tup gono, gemang pepen, “Ngge, but genang so, iram-tegay lo uwet-neton go, Yesus? 26 Ikum-a! Dia no nebut don ey pen-tenawon go Nemot se! Nemot nogo nebut way sedue-sedue lo pu genang, yakua. Iram-tegay seni so mo duing, ‘Nemot ngge, tegadi so Ki Wali Iram lo dok go Iram?’ 27 No, se duing: Ki Wali Iram sik sogo Iram ngganemot weng go, sikabung mea kua senong, nemot nago sik sogo sedue! No, sedue ngge nago sik sogo, imot mo senong.”
28 Ki Wali yap ba so Yesus nguok-tenawon gono, kangok so ngge kalik gemang pen-anawon, “Yang! Genam ngge nando, motnang mo senong. Nggano, Genam go yakena nago sogo. No, Genam tang go duduing no, kua weng gabe. Kukunan blo nogo ngge, Ki Wali Iram lo mot goso, Genam mo weng. Ki Wali Iram seni-a taling go! No Nemot, motnang kua senong. 29 Nemot sik so weng go tang so, Nemot-a Genam mo senong gabe. Nggano, Genam ngge, Nemot lo mot-dak goso weng go gabe!”
30 Woy ngganemot no, Yesus mlak sogo so Yahudi go iram-tegay gemang usey-netenawon. Mlak genang sogo ku maning kua pung go nogo, ta kua tuing-nesrenawon. 31 Se senong: Yesus no dabui iti go keng go sikabung, mata so. Nemotnang lo pu go, “Tegadi so Ki Wali Iram lo dok go Iram weng go nogo, tasam-tasam kangok go mata so, Yesus lo semu go kalik go, nemot ya semu dali? Yang! Ki Wali Iram sik sogo Iram, Yesus ngge gabe.”
Ngge, sikabung mata sogo lo duing go. 32 Yakot so sikabung lo seseglup go, “Ki Wali Iram sik sogo Iram Yesus ngge gabe.” Nebut ngga tup gono, sedue Parisi ey, taiti so puit go trang-trang, Wali yap yay so susuing go plesedue pu goso, Yesus mlak so gemang klong.
Ki Wali Iram mit no tandali Yesus klong genang
33 Ngga kalik go ikum gono, sikabung no Yesus lo gemang pu-tenawon, “Motnang ey Genam suing genang ku, tebot dato gabe iti. Ngga ey, tandali, Genam so mot-dak go weng go mit no, mea klong. 34 Se senong! Genam sogo motnang lo mea uwet. No, yakua tegu. Seni so, Genam susuing go sip nogo, motnang yakua weng.”
35 Yahudi go iram-tegay, nebut ngga tup gono, way-way so gemang pen-netenawon, “Nemot imot logo yakua tegu go? Ngga kalik go, nago no Nemot taut-ton? Nan-nan meno no, sikabung Yahudi ngga sogo nguok genang so pen-aton? 36 Duduing ngge seni sogo kalik? ‘Motnang, Genam sogo mea uwet, no Genam eygo yakua tegu’. Nggano, ‘Genam klong genang sip nogo, motnang yakua pung.’ Sogo so, ngga kalik go ne pen-won?”
Yahudi go sedue-sedue lo ngga kalik gemang pen.
Ki Wali Waglo iti go nebut
37 Walop ku, ku klaya itak go, ngga, walop seni, ku kangok go. Nggano, Ki Wali yap ba no Yesus ip gono, sikabung no don ey genang pen-atenawon, “Nando, bunuo ey tetra go, Genam sono se weng, bu drop genang sogo! 38 Nando, Genam nogo dabui iti go keng go, Nemot so Wali Sam ba no ngge mo klik, ‘Nemot go dabui ba sik sogo, wali min bu yelung ey mea betep.’ ”
39 Se senong: Yesus lo pen go ngge, Wali Waglo so pepen go. Seni so, Ki Wali Iram mit no maning Yesus kua klak go, Wali Waglo maning kua li. No, Nemot klak gono, Yesus no dabui iti go keng go sikabung nogo Wali Waglo mea iti.
Yesus ngga nando?
40 Yesus go nebut tup gono, sikabung gemang pu-netenawon, “Nemot ngge, nabi b dega Musa kalik, weng genang seni so gabe!” 41-42 Sedue temu lo pu go, “Nemot ngge tegadi so Ki Wali Iram lo dok go Iram gabe.” No, sedue temu lo way so pu go, “Kua! Ki Wali Iram sik sogo wengkabui, nan Galilea sik sogo, yakua pung! Yakena Betlehem, nan Yudea sik so Nemot mea pung.” Seni so: Wali Sam klaut ba no mo klik, “Ki Wali Iram sik sogo Iram, babuasi Daut go mlena-walasrang no pung go duo. Babuasi Daut go yakena Betlehem no Iram ngga mea tui. Nan Galilea sik sogo yakua weng!” 43 Kunala kua kerlam goso, sikabung nebut sok-sok so gemang lemoy-anatun. 44 Seni so, Yesus mlak so, sikabung temu lo, duing-nenawon go. No, Yesus go saysuk no tuing genang, klaya duonang logo yakua.
Yesus go nebut iram-tegay Yahudi lo waydang go
45 Ki Wali yap yay so susuing go plesedue, ulue so tandali pung gono, sedue Parisi ey, taiti so pupuit go trang-trang eygo lo gemang pu, “Sogo temoy no, mlak go Nemot kua wawi go weng?” 46 Plesedue lo pu go, “Nebut don ey Yesus lo pepen go se, sedue meno lo pepen go ey kua kerlam.” 47 way so, iram-tegay lo pu go, “Nemot go nebut wamoymlue nogo, motnang mo keng dali? 48 Genamnang, iram-tegay ey sedue Parisi eygo sik sogo klaya nang go, Nemot go nebut nogo kua keng. 49 No, sikabung ibe, Musa go demu kua senong go-a, Yesus nogo gemang kekeng. Ngga, nemotnang mo kuklue.” 50-51 Yang! Ngga sogo, woy meno gemang, nemot go sui: Nikodemus. Nemot, Yesus ey, da klaya mo tegu. Ngge klik nemot lo gemang pu-nawon, “Imot go demu no, maning kua tra go wet go, idekeba-a banim go yakua iti? Nemot go nebut-a banim se tup-eyon. Naklay senong go sik so, idekeba iti genang mea pu.” 52 No, wengkabui meno lo pu go, “Ye! Mot, nan Galilea sik sogo tapui duo dali?” Wali Sam ba no suey so ikum-a! Ngga ey, mot mea senong, “Ki Wali Iram sik sogo nabi, nan Galilea sik sogo yakua pung.” 53 Ngga ey, nemot go yap-yap sono, iram-tegay Yahudi gemang klong-lak. Yesus mlak genang ku maning kua pung.