8
Kamea sogo no mlak go kabung
1 Ngga sik sogo, meduim Saytun lo srek so Yesus gemang klong. 2 Ngga utep wadikua seni go tandali Ki Wali yap ba no Yesus gemang degut-nawon. Ngga ey, sikabung mata so Yesus sono weng-lak go, got-nawon go, gemang nguok-tenawon.
3 Se ikum! Kamea sogo no mlak go kabung, walinebut so nguok go klui ey, sedue Parisi eygo lo wawi go, Yesus mit no, sikabung nesip ba no gemang betep-nenawon.
4 Ngga ey, ngge kalik gemang usi-netenawon, “Aya klui! Kamea sogo no kabung ngge, atnang lo mlak go.” 5 Musa logo demu no klik go, “Ngge kalik go kabung, demu lo sruom go se kebong! Mot lo duing go, sogo kalik ya semu?” 6 Yesus go kuklue wet genang yatrang so ngga kalik usi-nenawon go. No, ku sono, Yesus kenuon go nan temoy no, ta glang lo sam-a klik-tenawon. 7 Tandali u-usi goso, Yesus wisi so ip go nemotnang no gemang pu, “Kuklue kua pupluok go sedue lo keduong sogo demu se tuk!” 8 Nebut ngga-a pu gono, ku sono kenuon go ta glang lo nan temoy no sam-a tandali gemang klik-tenawon. 9 Ngga ey, nemotnang klay-klay yam so lek-lak. Sedue-sedue sik so iti go, e... kabung ngga seguong-a banom sip ngga no gemang itak. 10 Tandali wisi so ip gono, kabung ngga sono Yesus lo gemang usi-nawon, “Mot so mlak go weng go sedue-sedue, nago no mo klong? Mot nogo idekeba kua taling-nesrewon?” 11 Kabung ngga lo pu go, “Woy Dem, kua taling-srewon! Nemotnang mo klong-lak!” Nggano, way so Yesus lo pu go, “Mot nogo idekeba Genam lo yakua iti dali. Mot se klong! No, nggeasui go sik so iti go, piam tandali go kua semu!”
Kukunan sikabung nogo blong Yesus gabe
12 Ku meno so, sikabung mata sogo no Yesus lo gemang pu-tenawon, “Genam ngge, ku klik go ba sogo sikabung nogo neblong gabe! Nando genam no keng go, ku klik ba logo nemot yakua koklong, no, wali neblong mea ngap.”
13 Nebut ngga tup gono, Yesus so ngge kalik sedue Parisi lo gemang pen-netenawon, “Mot tang so saysuk nogo nebut pen-atogoy go ngge, seni kua!” 14 Way so Yesus lo pu-nawon go, “Genam tang so, genam go saysuk nogo nebut pen-atugu go, nueya! No, Genam go nebut ngge, seni eygo keng genang sogo gabe! Genam tang so mo senong: Genam ngge nago sik so mo weng, nggano, nago sono ya klong. No, ngga motnang kua senong. 15 Motnang lo ikum gono neyboy go ngga, sikabung lo ikum go sik sogo. No, Genam lo ikum go-a, seni sogo-a gabe pepen, sikabung logo kalik, kua! 16 No, Genam lo ikum go-a pepen go, seni sogo-a, nemudi sogo-a gabe tetaling! Se senong: Genam tang so banom kua, no Wali Aya, Genam so mot-dak go weng go, Genam ey gabe susuing! Genam nogo nebut Ki Wali Aya lo gemang pepen dali!”
17 Nggano, Yesus lo pen go, “Motnang go demutrui ba no, klik go, ‘Nebut kerlam go-a Namon duo lo pepen go, ngga seni sogo gemang!’ ” 18 Ngga kalik dali gabe pepen, “Genam sogo nebut pepen go, namon ey gemang! Yangga, Genam tang go ey, Aya Genam so mot-dak go weng go ey gabe.” 19 Sedue Parisi lo gemang usi-nenawon, “Mot go aya nemot nago so?” Ngga ey, way so Yesus lo pu go, “Genam ey, Genam go Aya ey motnang maning kua senong. Genam motnang lo senong goso, Genam go Aya mea senong dali!”
20 Nebut ngge naklay, Ki Wali yap ba no, taut so teta go degu mit no, Yesus lo pen-anawon go. No, Nemot mlak genang sogo yakua, nemot go ku maning kua pung go nogo.
Kukunan sik so Yesus kua pung
21 Tandali Ki Wali yap ba sogo no nebut Yesus lo gemang pen-atenawon, “Genam mea klong! Nggano, Genam so motnang lo mea wet-kelo. No, Genam eygo yakua tegu. Motnang, piam konkebamling ba no mea kebong-kelo. Genam klong go sip nogo, motnang yakua pung!” 22 Yesus go nebut tup gono, sikabung Yahudi gemang bega-nenawon, “Ye! Motnang se tup! Yesus lo pen go, ‘Sip meno no Nemot mea klong. Ngga sono go, imot yakua keng.’ Nemot tang so luk go kebong sogo so gabe mo?” 23 Nggano, way so nemotnang no Yesus lo pu go, “Ngga kalik kua! No, kukunan blo sogo sedue-sedue, motnang gabe. Genam ngge-a, blo sik sogo weng go gabe. 24 Ngganemot sogo so, Genam lo mo pen-atu, ‘Motnang, mot go piam konkebamling ba no mea kebong-kelo. Genam sono dabui iti go motnang kua keng go, ‘Genam Sesuoy Iram ngga nemot!’ Ngga tang so, mot go piam konkebamling ba no mea leguot-kelo.’ ” 25 Nemotnang maning kua senong goso, gemang usi-netenawon, “Mot ngge, nando ne?” Nggano, way so Yesus lo pu go, “Kuduong sik so yam so Genam mo pen-asanyu, e... nggeasui gono gabe pung. Teguopey go yakua pen. Genam ngge, Sesuoy Iram Genam gabe! 26 Motnang nogo pen genang-a mata so gemang. Esang, tasam piam go motnang logo mata so. No, se senong: Genam so mot-dak go weng go, Nemot seni sogo, nemudi sogo, keng genang gabe! Nemot sik so Genam lo tup go, ngganemot-a, kukunan sikabung nogo Genam lo gabe ngunguok!” 27 Sikabung kua senong-nesrenawon, Yesus lo pen go ngga, Ki Wali Aya tang goso pen go nebut. 28 Ngga tang sogo so Yesus lo gemang pu, “ Ki Wali Iram sik sogo Iram di blo no motnang lo glung-kelo gono, mea senong, ‘Genam ngge, Nemot lo!’ Nggano, mea senong dali, ‘Genam logo, Genam tang sogo kua sesemu, no, Ki Wali Aya lo pen go-a, gabe ngunguok!’ 29 Ki Wali Aya, Genam so mot-dak go, Genam ey klay goso gabe. Nemot logo Genam banom go kua itak. Nemot go dabui no but go-a, Genam lo pupluok go nogo.”
Kupiamgo tegan sikabung so dok go mea plet-dak
30 Ngga kalik Yesus lo pen go nogo, Yesus no dabui iti go sikabung mata so gemang keng-nenawon. 31 Nemot no keng so duduing go sedue Yahudi nogo, Yesus lo gemang pen-atenawon, “ Genam lo nguok go nebut no waysagi ey mlak go, Genam no keng go andua seni motnang gemang. 32 Ngga sik so, tap seni eygo Genam lo taling go, senong go mea mlak. Senong ngganemot lo motnang mea plet.” 33 No, Yahudi sikabung temu lo pu go, “Sogo tegan plet genang sogo so, mot lo pen-atogoy? Esang! Atnang ngge, Ablaham sik sogo duo, saula meno go koybutasemu sogo, kua dok gabe!” 34 No, Yesus lo pen go, “Kua kay! Ngge-a se senong: nando, piam konkebamling-a sesemu go, Kupiamgo koybutasemu so, tegan lo mo dok gemang. 35 Seni so, koybutasemu, yap dabui ba nogo senang so yakua suing. No, Danon-a, yap dabui ba nogo senang so mea susuing! 36 Ngga tang sogo so, gabe pepen, ‘Motnang go tegan Danon lo mo plet-dak go, motnang seni-seni so mea plet-dak.’ 37-38 Yang, Genam mo senong: motnang ngge, Ablaham go duoyap gabe. No seni so, motnang go aya meno dali. Aya ngga lo pepen go-a, nggeasui go motnang gabe tetaling. Ikum-a! Nemot-a Genam lo pepen go, Wali Aya lo taling go, Genam go nebut, motnang go dabui ba nogo kua tui go nogo, Genam but genang-a gabe usey-ketogoy.” 39 Sedue Yahudi lo pu go, “Kua! Babu Ablaham ngga, atnang go ‘aya!’ ” Way so Yesus lo pu go, “ Seni so, motnang babu Ablaham go danonnang sogo, babu Ablaham logo kalik mea duk dali! 40 No esang! Nemot-a, Ki Wali Iram lo pu go nebut seni-a At lo pepen go, Genam but genang so motnang lo usey-ketogoy ne. Se duing: ngga kalik babu Ablaham lo kua taling-ngam! 41 No, motnang-a sedue meno go don lo tui go gabe. Ngga ey, motnang lo pupluok go, nemot go tasam ey mo kerlam!” Yahudi go woy-woy lo tenguo go, “Kamea duo atnang kua! Atnang go Aya, Ki Wali Iram.” 42 Way so ngge kalik Yesus lo gemang wa-nawon, “Ki Wali Iram, motnang go Aya sogo, Genam nogo klum ey motnang mea! Se senong: Genam ngge, Ki Wali Iram sik so weng go. Genam tang go duduing no kua weng, no, Ki Wali Iram lo mot-dak go tang so, Genam mo weng. 43 Sogo sik so, motnang, Genam lo ngunguok go nebut ya kua senong? No, Genam mo senong: motnang, Genam lo ngunguok go nebut suey so, walong so yakua tup. 44 Motnang, Kupiamgo danonnang! Ngga ey, nemot go duduing-a keda so motnang lo gemang wet-ketogoy! Motnang se senong, ‘Takuduen sik sogo, Kupiam lo sedue mo bubut, e... nggeasui gono gabe pupung. Ki Wali Iram logo seni eygo, Kupiamgo logo kua mlak gabe. Yang! Nemot wamoymlue eygo-a gemang tetaling: wamoy iram, piam go min, nemot gabe! 45 No, Ki Wali Iram sik sogo seni eygo-a, Genam gabe pepen. Ngga tang so, Genam go nebut ngga mlak genang, motnang yakua.
46 Motnang se pen! Piam konkebamling Genam lo semu go, motnang sik sogo klaya duo logo ya taling-yon? Kua! Seni sogo-a Genam lo pepen go, sogo temoy no, dabui lo Genam sono keng genang, motnang moyso? 47 Yang, seni so lo! Ki Wali Iram go sikabung, Ki Wali Iram nogo mea tup. No, motnang, Ki Wali Iram go danonnang kua. Ngga tang so, keng genang sogo, motnang yakua!”
Yesus senang so gemang
48 Ngga naklay tup go nogo, way so Yesus no, Yahudi go woy-woy lo gemang pu-netenawon, “Tapui duo puplu sogo, naliwabu lo degut go, Mot ngge gabe.” 49 No, Yesus lo pu go, “Ki Wali Iram no Genam logo ta gabe kokong. No, Genam go sui iway motnang lo kua i-iti. 50 Genam tang so, Genam go sui-a kua uwet gabe. Genam go sui blo sono iti genang so uwet go, Woy Wali Iram gemang. Genam go tap nemudi so ikum go, Nemot lo mea taling.”
51 Motnang no seni-seni so Genam lo gabe pepen, “Genam go nebut no dabui lo seni so keng go, kebong nemot logo mea kua ikum.”
52 Nebut ngga tup gono, woy-woy Yahudi gemang bega-nenawon, “Nggeasui, genamnang mo senong: mot mo yane! Se senong: babu Ablaham tang go mo kebong. Nggano nabi-nabi mo kebong dali. No esang! Mot lo pu-to go, ‘Genam go nebut no nando lo keng go, nemot kebong go don yakua tra.’ 53 Babu Ablaham tang go mo kebong, nggano, nabi-nabi mo kebong dali. Mot ngge, nando? Mot blo so susuing go, nemotnang ey kua kerlam?” 54 Ngga ey, nemotnang no ngge kalik Yesus lo gemang pen-nawon, “Genam tang so, Genam go sui-a uwet go, seni kua. Genam go sui so blo no i-iti go ngga, Ki Wali Aya gabe. Se duing: Motnang lo pupu go, ‘Imot go Ki Wali Iram’, ngga Ki Wali Aya, Nemot gemang. 55 No, motnang, Nemot kua senong, esang! Genam-a, Nemot mo senong: Nemot go nebut no tupduk go, suey dato so Genam gabe kekeng. Genam lo pu go, ‘Nemot Genam lo kua senong go, ngga wamoymlue so, motnang logo kalik, Genam lo mea semu. No, Nemot Genam lo mo senong, nggano, Nemot go nebut-a waysagi ey gabe mlak. 56 Se senong: banim no, tasam ngge babuasi Ablaham mo senong: kukunan blo no Genam li go ikum go nogo, nemot yakay ey!’ ” 57 Nebut ngga tup go nogo, woy-woy Yahudi lo pen go, “Nago yam so babu dapyo? Maning Mot kua tui gono, babu Ablaham mo kebong. Sogo kalik go-a, babu Ablaham Mot mo ikum-yo?” 58 Yesus lo, tandali pu-nawon go, “Seni so, babu Ablaham maning kua tui go nogo, Genam gemang.” 59 Ngga ey, sagui kangok so woy-woy Yahudi lo gemang kong-nenawon. Nemotnang lo duing go, ngge piam kangok go! Nggano, Yesus sruom go kebong genang so, demu gemang idok-nenawon. No, yakot so Ki Wali yap ba sono son go, Yesus gemang klong.