9
Sedue nemu pung Yesus lo pali-nawon go
1 Ku meno so, Nemot go andua-andua ey Yesus koklong go, nemu pung goso tui go sedue gemang ikum-nenawon. 2 Ngga ey, Yesus go andua lo usi-nenawon go, “Aya, nemu pung goso tui go sedue ngge, sogo sik so? Kuklue nando lo mo pluok: unen-nglangin lo? Nemot tang go lo?” 3 Usi ngga tup gono, way so Yesus lo gemang pu, “Nemot go, unen-nglangin go kuklue tang so kua! No, Ki Wali Iram go blongdon, nemot no lemoy golo, sikabung ikum genang so, nemu pung goso tui go. 4 Se senong: ku maning kua klik gono, Ki Wali Iram, Genam so mot-dak go weng go kebali imot se semu! Ku klik-ayun go nogo, kebali ngga mea kua semu. 5 Kukunan blo sogo nogo, kukunan sikabung nogo, Genam ngge neblong gabe!”
6 Ngga kalik pen-anawon gono, mlabui nan blo no tuia go, nan ey Yesus lo bluot gono, sedue ngga go nemu sono gemang ut-nawon. 7 Ngga ey, sedue nemu pung no Yesus lo pu go, “Bumu Siloam sono nalo go, nebuemnemu bu se ulu. Se senong: Siloam, nemot go seni ‘Ki Wali Iram lo mot-dak go’. Ngga ey, sedue ngga nawon go, nebuemnemu bu ulu go, tandali banuon go, nemu mo pli-dapnawon.”
8 Yakena sikabung, nggano nemot tap so duoy so uwadong go senong gono, gemang usi-netenawon, “Tap no suing go, duoy so uwadong go sedue, ngge nemot?” 9 Sikabung temu lo pu go, “Yang! Ngge, nemot lo!” No, temu lo pu go, “Kua! Ngge, nemot kalik go sedue meno.” No, nemot tang so gemang pu-nawon, “Seni so lo, genam ngge lo.” 10 Nggano, sikabung temu lo usi go, “Sogo kalik golo, mot go nemu, mo pali?” 11 Ngga ey, sedue ngga lo pen-nawon go, “Mlabui ey nan bluot go, genam go nemu no Yesus lo ut go. Nggano, Yesus lo pu go, ‘Klong-a! Bumu Siloam no bu se ulu!’ Genam klong go, saysuk bu ngga no ulu gono, uweng go, nemu pli go gabe ikum.” 12 Nggano sikabung lo usi go, “Sedue ngganemot, nago so?” Way so sedue ngge lo pu go, “Se, nago so?”
Woy-woy Yahudi lo usi-nenawon go
13 Nggano, nemu pali go sedue, sikabung lo wawi go, sedue Parisi sono gemang klong. 14 Se senong: mlabui, nan ey bluot go, sedue nemu pung gono ut go, ngga Ki Wali Iram go ku kangok go, Sabat ku no semu go. Demu nogo ngga yakua lemoy! 15 Ngga tang sogo so, sedue Parisi lo gemang usi, “Mot go nemu, sogo kalik, tandali go mo pali?” Sedue ngga lo pen go, “Mlabui nan ey Yesus lo bluot gono, genam go nemu temoy no gabe ut. Nggano, bu ulu gono, genam go nemu gabe pli.” 16 Sedue Parisi temu lo pu go, “Esang! Ku Sabat no, tasam ngga klik go semu go, ngga piam! Sedue ngganemot Ki Wali Iram lo mot-dak goso yakua weng! Ku Sabat nogo, nim kua suing go.” No, sedue Parisi temu lo pu go, “Piam konkebamling eygo sedue logo, sedue meno tandali go yakua pali.” Ngga sik so, nemotnang ba nogo, nebut sok-sok gemang lemoy-anatun. 17 Nggano, nemu pali go sedue no tandali sedue Parisi lo gemang usi-nenawon, “Sedue ngga, sogo kalik? Se pen: mot go nemu Yesus lo pali go, seni so? Mot logo, sogo kalik duing?” Ngga ey, sedue ngga lo pu go, “Ki Wali Iram sik sogo nabi Nemot gabe.”
18 No, seni so, tasam ngganemot Yahudi go woy-woy lo suey so kua keng-srenawon. Ngganemot sogo so, nemot go unen, nglangin gemang usi go weng. 19 Nggano, nemotnamon no gemang usi-nenawon, “Mot namon go duo ngge, nemu pung goso tui? Sogo kalik so, nemot go nemu, mo pali?” 20 Nggano, unen, nglangin lo pu go, “Nemot-a, atnamon go duo, nemu pung goso tui go lo. 21 No, nggeasui go, nemot go nemu mo pli. Genamnamon kua senong: sogo kalik so mo lemoy? Nggano, nemot go nemu nando lo mo pali, atnamon kua senong dali. Yang, nemot tang gono usi-a! Nemot mo babu. Nemot tang so se pen.” 22 Woy-woy Yahudi suali sogo so, ngga kalik so gemang pen-klenatun. Seni so, woy-woy Yahudi nebut mo pu-nenawon, “Yesus tegadi Ki Wali Iram lo dok go Iram so nando lo, yang go, sedue ngganemot Ki Wali yap ba sik sogo se yat.” 23 Ngga tang sogo so, gemang pu-klenatun, “Nemot tang gono usi-a! Nemot mo babu lo.”
24 Sedue nemu pali go, tandali usi gono, sedue Parisi lo gemang pu-netenawon, “Seni sogo-a, Ki Wali Iram go suongku nogo se pen-asilo! Genamnang senong go, sedue ngga piam konkebamling ey.” 25 Nggano, sedue ngga lo pu go, “Yesus piam ey go, genam kua senong! No, genam senong go: banim nogo genam yakua ikum, nggeasui go genam go nemu mo pli.” 26 Nemotnang lo usi go, “Sogo kalik semu gono, mot go nemu Yesus lo mo pali?” 27 Sedue ngga lo pu go, “Ye! Genam lo mo pen-atu. No, motnang kua tup! Sogo sogo so, tandali go ya tup-kelo? Motnang, Yesus no keng dali so gabe mo duing-ketogoy?” 28 Ngga kalik tup gono, sagui kangok so woy-woy Yahudi lo gemang kong-nenawon. Nggano, gemang pu-netenawon, “Atnang ngge, Musa no keng go. Mot-a gemang, Yesus no keng go. 29 Genamnang babuasi Musa senong go gabe: nemot eygo nebut Ki Wali Iram lo mo pen. No, Yesus, genamnang kua senong: Nemot, nago sik sogo?” 30 Nggano, nemu mo pali go sedue lo pu go, “Ye! Genam go nemu Nemot lo pali go. Motnang-a, maning ne nega-ketogoy, ‘Nemot, nago sik so, mo weng!’ 31 Imotnang naklay mo senong: Ki Wali Iram, piam konkebamling eygo sikabung nogo, yakua tup. No, Ki Wali Iram lo iwat go suey so, dabui lo nando duduing go, sedue ngganemot go dewi keda so Ki Wali Iram lo mea tup. 32 Kukunan lemoy go sik so, e... nggeasui go nogo, sedue nemu pung goso tui go, nemu pli go iway kua tup. 33 Yesus, Ki Wali Iram sik so kua weng go sogo, ngga kalik go tasam Nemot logo yakua semu.”
34 Sedue Yahudi lo pu go, “Mot ngge, kon ba no tui go. Genamnang mot lo nguok so?” Ngganemot no, sedue ngga, Ki Wali Yap kangok go ba sik sogo gemang yat go, woy-woy lo gemang pu, “Tandali go kua degut!”
Ki Wali Iram go blongdon duduing Yesus logo so tetaling go
35 Sedue nemu pali go, Ki Wali Iram go yap ba sik so yat go, Yesus tup-nawon go, nemot ey gemang tegu. Nggano, Yesus lo gemang usi, “Se pen: Ki Wali Iram sik so Blong Dem sono mot dabui lo kekeng?” 36 No, sedue ngga lo pu go, “Aya! Ngganemot, nando? Genam no se pen! Nemot nogo keng sogo be.” 37 Ngga ey, Yesus lo pu go, “Nemot, mot lo mo ikum! Nggeasui go, nebut so Nemot ey mot gabe pepen!” 38 Nggano, sedue ngga lo pen go, “Aya, mot no dabui lo genam keng sogo.” Nggano, Yesus go masi ba no unuik go, ta gemang kong-nawon. 39 Ngga ey, Yesus lo gemang pen-tenawon, “Kukunan sono weng go, sikabung Genam lo totong genang so. Yangga: sikabung temu nemu pung go, nemu mea pli; sikabung temu, nemu eygo, nemu mea kli. Nemot go seni: Blong Dem no keng go sedue, Nemot go blongdon mea ikum; Blong Dem kua wawi sedue, Nemot go blongdon mea kua ikum.”
40 Yesus lo pen go Sedue Parisi lo tup go, gemang pu-netenawon, “Esang! Mot lo duing go: atnang go nemu mo pung? Ngga kua!” 41 Yesus lo pu go, “Se duing: nemu motnang kua go, nemot go seni: Blong Dem weng go kua senong. Ngga tang so, idekeba yakua lek. No, motnang tang so lo pu go, ‘Genamnang go nemu kua kli.’ Nemot go seni: Musa go tap motnang mo senong. No, Musa lo taling go Blong Dem wawi genang, motnang moyso. Ngga tang sogo so, piam ngga nogo idekeba gemang.”