10
Domba nogo nebut benuey
1 Nggano, ngge kalik go nebut benuey sikabung no Yesus lo gemang pen-nawon, “Seni so Genam lo gabe pepen, betui ba sono go yataput lo nando kua degut go, tema blo lo klak go, ngga wom sedue. 2 No, yataput lo degut pung go-a, ngga dombayay sogo wengkabui gemang. 3 Betui yay so suing go, wengkabui ikum gono, yatap mea tenuing. Ngga ey, domba nemot go-nemot go sui wengkabui lo usi go, dia sono mea wawi go pluep-lak. 4 Dia no pluep-lak gono, wengkabui banim besi go, domba-domba mesip so mea keng-lak. Seni so, dombayay sogo wengkabui go nebut bluem nemotnang mo senong. 5 Sedue meno no domba-domba keng genang, yakua. Yang! Meno duo go nebut bluem kua senong go nogo, suali so nemotnang mea kuek-lak.” 6 Esang! Nebut benuey Yesus lo pen go seni, sikabung ibe kua senong-nesrenawon.
Yesus dombayay wengkabui suey go
7 Nemotnang kua senong goso, Yesus lo gemang pu-tenawon, “Seni so Genam lo gabe pen-asitugu, Genam ngge, domba degut pung genang yataput gabe. 8 Mesip so pung go ngga, wom sedue ey, nenagluim duo ey gemang. Nemotnang go nebut nogo, domba yakua tup! 9 Genam ngge, yataput. Genam ba lo nando degut go, nemot-a mea sesuoy. Pung degut go ten mata so nemotnang, mea tegu. 10 No, wom sedue logo, wom so menay truik go but go, waluk genang sogo-a mea degut. Yang! Wali teguop iti genang so Genam-a weng go gabe. 11 Domba yay wengkabui suey go, Genam! Kebong suali kua goso, Nemot go domba nogo wali dui ey Wengkabui lo mea iti. 12 No, duoy nay sogo sedue, menay iseng eygo ikum go, domba-a banom itak go, nemot mea kap. Nemot tang go domba kua go nogo. Ngga ey, domba banom-banom menay iseng ey golo mea suep-lak. 13 Duoy nay so yay suing go sedue lo duing go: domba banom itak go kap go, nueya! Ngga, sedue meno go domba wa. 14-15 Genam-a dombayay wengkabui suey go! Genam dabui lo Ki Wali Aya mo senong. Nggano Ki Wali Aya dabui lo Genam mo senong. Ngga kalik dali so, Genam go domba-domba, suey so dabui lo mo senong. Ngga ey, Genam dabui lo suey so nemotnang lo mo senong dali. Yang! Genam go wali naklay, domba-domba nogo so gabe iti. Nemotnang nogo sogo, Genam mea kebong. 16 Seni so, Genam go domba temu a gemang dali. No, nemotnang go betui ngge so kua. Nemotnang ngga, Genam lo klong go mea wawi! Genam go nebut nogo nemotnang mea tup. Ku ngganemot no, blung klaya goso nemotnang mea lemoy. Nemot yay sogo wengkabui klaya seguong. 17 Nemotnang wawi genang so, Genam kebong go, wali inim tandali iti go tang so, Genam nogo Ki Wali Aya go klum kangok. 18 Se senong: Genam go wali sikabung logo yakua but go kebong. Ngga at lo iwat goso mea lemoy. Seni so: Genam tang go duing go, wali ngge itak go, wali inim-a tandali iti genang, ngga Genam go ba so! Ngga lemoy genang so Genam Ki Wali Iram lo mot-dak.”
19 Ngga kalik Yesus lo pen golo, way-way so nebut sikabung Yahudi lo gemang sok-netenawon. 20 Temu lo pu go, “Naliwabu degut golo, mo mawo wa! Sogo so, nemot nogo tup-ketogoy?” 21 No, temu lo pu go, “Kua! Sedue mawo logo, nebut ngga kalik go yakua pen. Naliwabu go don logo, sedue nemu pung go yakua pli!”
Ki Wali Danon so Yesus wa go
22 Ku kua luik gono, yakena Yerusalem no walop kangok go gemang pla. Ki Wali yap tenuing-nengam go, tandali sikabung lo duing go walop. Ku ngganemot nogo, dalip kangok. 23-24 Yesus, Ki Wali yap go seboy, nemot go sui ‘Salomo go seboy’ lo wet-tenawon gono, sedue Yahudi Nemot mit no gemang pluep. Nggano, gemang usi-nenawon, “Tap nega go ba no, atnang kua itak ey! Tegadi so Ki Wali Iram lo dok Iram, Mot ngge seni sogo, neguon so se pen-asando.”
25 Way so Yesus lo pu go, “Genam lo mo pen-ayu wa! No, motnang kua keng-ketogoy. Se senong: tasam-tasam Ki Wali Aya go sui no At lo pupluok golo gabe tetaling: Genam ngge tegadi so dok go Iram gabe. 26 Seni so, Genam go domba no kua degut go tang so, motnang yakua keng. 27 At lo pepen go nebut, Genam go domba lo mea tup. Genam nemotnang suey so mo senong, ngga ey, Genam nogo mea keng. 28 Nemotnang nogo Wali inim-a, Genam lo mea iti. Nemotnang kebong go nogo, mea kua nega. Seni so, meno duo logo Genam go ta ba sik sogo nemotnang yakua sok. 29 Genam go ta ba sono Ki Wali Aya lo itak go, seni dega ey. Meno duo logo yakua lek. 30 Se duing: Ki Wali Aya, Genam ey klaya gabe.”
31 Ngga kalik pen go nogo, demu lo Yesus srom genang so, woy-woy Yahudi gemang usey-nenawon. 32 Ngga ikum gono, nemotnang sono Yesus lo pu go, “Ki Wali Aya sik sogo tasam suey go mata dega so, motnang nogo so Genam lo mo taling. Sogo kalik go tabat semu-tu goso, Genam demu lo ya srom-kelo?” 33 Sedue Yahudi lo pu go, “Mot go tabat tang sogo so kua, no wayang nebut Mot lo pu go, ‘Genam ngge Kiki Iram dali, no, esang, Mot sedue seguong!’ ” 34 No, Yesus lo pu go, “Yang! Motnang go demutrui no mo pen, ‘Ki Wali Iram lo pu go, Genam go duoyap motnang gabe.’ b 35-36 Seni so, Wali Sam klaut ba no klik go ngga, mea lemoy. Ngga ey, sedue no ‘Ki Wali duoyap’ so Ki Wali Iram lo temuit go, ngga seni so klik go, sogo tang so Ki Wali Danon so Genam lo pu go, motnang lo ne tenguo-ketogoy, ‘Ki Wali Iram Yesus lo mo wayang.’ Sogo sik so, Genam Ki Wali Danon sogo yakua pu? Seni so kukunan blo no teguop so Ki Wali Iram lo mot-dak go Genam gabe! 37 Genam lo pupluok go, Ki Wali Aya sik sogo, ngga motnang lo kua yang go, ngga ey Genam nogo kua keng go, nueya! 38 No, Genam lo pupluok go, Ki Wali Aya sik sogo, ngga yang go, no maning kua keng go, tasam-tasam suey go-a At lo pupluok go tang so, motnang se keng. Tasam-tasam sik so se senong, ‘Ki Wali Aya, Genam ba no, nggano Genam Nemot ba no gabe susuing!’ ” 39 Ngga tup go sik so, Yesus mlak so woy-woy Yahudi tandali weng go. No, Yesus-a sesuoy so pung go gemang klong.
40 Bu Yordan ngga idi, Yohanes Busotuigo golo banim bu tui go sip no, Yesus gemang got-netenawon. 41 Nggano, sikabung mata so, Nemot mit sono gemang weng-lak. Nemotnang lo pu go, “Yang! Tasam kangok go klaya nang go, Yohanes logo kua semu. No, Yesus sogo nebut, seni so mo pen-yom.” 42 Ngga tang so, Yesus no dabui iti go sikabung mata so gemang keng-nenawon.