11
Lasarus nglong go
1-2 Sedue meno nemot go sui: Lasarus. Ku meno no sadui kangok so nemot gemang srek-nawon. Yakena Betania so nemot susuing. Demanon Maria ndengon Marta ey yakena ngganemot so gemang. Yang, Yesus go masi mlay lo lu go, betodop lo drok-nayum go, Maria ngganemot gabe.
3 Lasarus sadui sogo deguo, Maria ey Marta eygo logo, Yesus no gemang pung, “Aya, mot go andua sadui sogo.” 4 Deguo ngga tup gono, Yesus lo pu go, “Sadui ngga logo Lasarus yakua kebong wa! No, sadui ngga lemoy golo, Ki Wali Iram nogo sikabung ta kong genang. Ngga ey, Ki Wali Iram Danon go sui blo no mea pu dali.” 5 Se senong: Maria, Marta, nggano Lasarus nogo Yesus dabuiklum ey. 6 No, Lasarus sadui sogo deguo Yesus tup-nawon go, keda so kua klong. Ku namon ey namboy gemang got-nawon. 7 Ngganemot no, Nemot go andua-andua no gemang pu, “Weng-a, tandali nan Yudea no imot ya klong go.” 8 Nemot no keng go andua lo pu go, “Ye! Demening go, but sogo so demu lo srom go, sedue Yahudi lo pluok-nebayom go. Sogo tang so tandali go ngga sono Mot ya klong?” 9 Ngganemot no nebut yatrang ngge kalik Yesus lo gemang pen-nawon, “Ku blong sogo woy 12 yam so gemang. Sedue ku blong so koklong go, nemot go masi sogo-sogo nogo yakua dak, kukunan blo sogo neblong a ikum go nogo. 10 No, ku klik ba lo koklong go sedue, sogo-sogo nogo masi ey mea kling.” 11 Nggano Nemot go andua-andua no gemang pen dali, “Andua Lasarus usene so mo srek. Nemot wisi genang imot mea klong.” 12 Ngga ey way so Yesus go andua-andua lo pu go, “Aya, nueya, nemot tang so mea buong lo.” 13 No Yesus go nebut seni suey so nemotnang kua senong. Lasarus seni so mo kebong. No, nebut benuey kalik so Yesus pen go. 14 Ngganemot sogo so dia sono Yesus lo gemang pu-nawon, “Lasarus mo kebong. 15 Lasarus sadui sogo mit nogo keda so Genam kua klong go, ngga suey! Genam nogo suey so dabui don ey motnang iti genang. Weng-a! Nggeasui, nemot mit sono imot ya klong go.”
16 Yesus go andua-andua temu no, Tomas Didimus lo pu go “Esang, imot ya klong, Yesus ey klay gono imot kebong sogo be.”
Walitap Yesus tang go gabe
17 Se senong: yakena Betania no Yesus pung go nogo, ku namon-namon yam so demu put ba lo Lasarus kebong go mo srek. 18 Yakena Betania, yakena Yerusalem dagu so: woy nesip yam no mea klong. 19 Ngga tang so Lasarus kebong go u kluo genang, Maria ey Marta eygo mit no sikabung Yahudi mata so gemang pluep.
20 Yakena Betania no Yesus dedagu, Marta tup-natun go, Yesus ey tegu so tap no gemang natun. Maria-a, yap ba so gemang got-tenatun. 21-22 Marta, Yesus ey tegu gono, gemang pen-natun, “Aya, ngge so mot na susuing go, at go kemdet Lasarus kua kebong be. No genam mo senong, Ki Wali Iram no mot lo uwadong go, Ki Wali Iram tup go mea iti!” 23 Way so Yesus lo pu go, “Marta! Kemdet Lasarus tandali mea nglong.” 24 Marta lo pu go, “Yang, Yesus! Genam mo senong. Ku yam sogo no sikabung kebong go ey Lasarus mea nglong.” 25 Yesus lo pu go, “Genam ngge nglong genang kikiwali nuik gabe. Se senong: Genam sono dabui iti go kekeng go, nemot-a mo kebong go mea wali. 26 Nggeasui uwali go, Genam no dabui iti go kekeng go nogo, kiki wali-a gabe iti. Saysuk ngge kebong go, nueya! Kiki wali nemot ey gabe. Nebut ngge mot ya keng?” 27 Ngga ey Marta lo pu go, “Yang Aya! Mot no dabui lo genam gabe kekeng. Mot ngge Ki Wali Danon, tegadi so Ki Wali Iram lo dok Iram, sikabung sesuoy genang so, kukunan blo no weng genang.”
Yesus u kluo-nawon go
28 Yesus go nebut naklay Marta tup gono, ndengon Maria mit no yap no tandali gemang klong. Maria, Marta lo usi gono, gemang seglup-natun, “Yesus ngga go, mot so Nemot pu go.” 29 Nebut ngga tup gono, kayseguong Maria ip go, Yesus ey tegu so gemang natun. 30 Woy ngganemot nogo yakena Betania nogo Yesus maning kua degut, Marta ey tegu go sip so got-tenawon.
31 Ukluim ba lo yap so susuing go sikabung, Maria keda so ip go koklong go ikum go, Maria no gemang keng-lak. Nemotnang lo duing go: Lasarus ukluo so simu sono Maria gemang koklong.
32 Yesus mit no Maria pung gono, sedue Yahudi go demu kalik, Yesus go masi ba no unuik go, Yesus no ngge kalik gemang pu-natun, “Woy Dem, mot ngge so na susuing go, kemdet kua kebong be!” 33-34 Sikabung ukluim ey Maria no keng go ikum go, dabuipiam ey Yesus gemang tra-nawon. Ngga ey, kangok so dabuiklum tra go Yesus lo usi go, “Lasarus so tui go demuput, kay?” Sikabung lo pu go, “Weng-a Aya! Atnang lo mea taling.” 35 Ngga ey, u Yesus gemang kluo-nawon dali. 36 Sikabung Yahudi temu lo pu go, “Ikum-a! Lasarus nogo Yesus go dabuiklum kangok.” 37 No, sikabung temu lo pu go, “Nemu pung go sedue tandali Nemot lo mo pali. Sogo sik so Lasarus yakua tebok ne? Ngga kalik go nemot kua kebong gabe!”
Lasarus nglong go
38 Dabui kangok so Yesus tra-nawon go, demuput sono gemang klong. Simu ngga demuput, nemot go yatap demu lo gemang wik. 39 Nggano Yesus lo pu go, “Demu ngga se leging.” No, Lasarus go demanon Marta lo ngge kalik gemang pu-natun, “Woy Dem! Lasarus go saysuk mo nemon, kebong go ku namon-namon yam so mo srek.” 40 Yesus lo pu go, “Esang! Mot no mo pen, ‘Genam sono dabui lo mot keng go, Ki Wali Iram go blongdon mea ikum-silo.’ ” 41 Yatap so wik go demu, sedue Yahudi lo gemang leging-nenawon. Nemu blo sono yalap-biwon gono, ngge kalik Yesus lo gemang pu-nawon, “Wali Aya, taitisuey! Genam lo uwadong go, Mot lo mo tup. 42 Genam mo senong, ku no woy no Genam nogo-a Mot gabe tutup. No, sikabung mata sogo senong genang so, nggeasui go gabe pupu. Nemotnang keng genang, Genam kukunan blo no Mot lo mot-dak go li gabe.” 43 Nebut ngge yam so pen gono, kangok so Yesus lo gemang usi-nawon, “Lasarus! Mot pung sando-a!” 44 Nggano Lasarus nglong go gemang pung. Tamasi amka lo pok go maning kua plet. Ngga ey nebuemnemu amka lo maning kebet b go gigit. Nggano Yesus lo pu go, “Amka plet-a! Lasarus ip go se klong.”
Yahudi go iram-tegay Yesus mlak genang nebut pu go
45 Maria mit no ukluo so pung go sikabung Yahudi mata so, Lasarus nglong go ikum gono, duing go: tegadi so Ki Wali Iram lo dok Iram, Yesus gabe. 46 No, sikabung temu klong go, sedue Parisi no Lasarus nglong go nebut, gemang pen-nenawon.
47 Nebut ngga tup gono, Yahudi go iram-tegay naklay nebut gemang degut-nenawon. Nggano way-way so ngge kalik gemang usi-netenawon, “Sedue ngga tasam kangok go mata so semu-ton go. Sogo kalik so ya semu-eyon? 48 Ngga kalik so Nemot lo semu-ton lo, kua nabay go, nemot sogo Iram so sikabung naklay lo mea pu-neyon. Nggano, nemotnang banom sogo taitak go, Roma go plesedue imot go nan sono degut go, Ki Wali yap mea togut. Ngga ey, sikabung naklay mea tuk-sing.”
49 Ngga sogo trang dega klaya gemang, nemot go sui: Kayapas. Yagui ngganemot nogo nemot Ki Wali Iram nogo taitisopuit go wengkabui dega. Ngge kalik gemang pen-nawon, 50 “Ye! Motnang puplu so ba! Se senong: Sikabung naklay nega eygo, klaya duo-a kebong go, suey!” 51-52 Seni so, nebut ngga nemot go kunala lo kua pu. No, yagui ngganemot nogo trang dega so nemot taling go, senong eygo sedue kalik, Kayapas lo pu go gemang. Se duing: Kayapas lo pen go nebut seni dega ey gemang. Yangga: sikabung Yahudi nogo so Yesus-a but go se kebong. No, tang Yahudi seguong nogo-a kua. Ki Wali Iram go duoyap saula-saula naklay sik sogo, klay gono yaluim genang so, Yesus-a mea kebong. Ngge, Kayapas lo pu go nebut, seni. No, Kayapas tang go seni ngga kua senong. Nebut seguong-a tebadali mo pen. 53 Ku ngganemot sik so iti go, Yesus but genang kunala klaya Yahudi go iram-tegay mo lemoy.
54 Se senong: Sedue-sedue Yahudi nesip sogo nogo, dia logo tandali yakua nguok. Ngga sik sogo yakena Eplaim no Yesus gemang klong. Yakena ngganemot kaseglokpay dagu so gemang. Ngga so, Nemot no keng go andua ey Yesus gemang got-netenawon.
55 Ku meno no, sedue Yahudi go walop kangok go gemang dedagu. Nemot go sui, ‘Paska’. Nggano sikabung mata so nan Israel sik so yakena Yerusalem no, gemang weng-lak, Yahudi go demu nogo, walop ngga pla genang sogo, kon banim se suep.
56 Sikabung mata so Ki Wali yap go ba no yaluim go, kamso Yesus so gemang wet-netenawon. Ngga ey, way-way so ngge kalik gemang u-usi, “Kay! Walop sogo Yesus ya pung, yakua?”
57 Seni so, Ki Wali yap sogo taitisopuit go trang-trang ey, sedue Parisi eygo, ngge kalik gemang pen-nenawon, “Nago no Yesus ikum go, atnang no se pen, Nemot mlak sogo be.”