6
Yakena Nasaret sikabung lo Yesus paysing go
1 Sip ngganemot sik sogo, Yesus, Nemot go andua-andua ey, Nemot go yakena sono gemang klong. 2 Ku Sabat pung go nogo, Nemot dewiyap no degut go, walinebut gemang nguok-tenawon. Sikabung mata so nebutpen ngga tup go, gemang kuikui-nenawon. Ngga ey, ngge kalik gemang pu-netenawon, “Ye! Sogo kalik go-a, ngunguok genang kunala kalong eygo ngge, nago sik so mo pung? Nemot lo pluok-ton go tasam-tasam ngga, nago sik so mo iti-yom? 3 Nemot ngga, imot mo senong: Maria go danon, di kebali so sesemu go sedue. Nggano, ntaton Yakobus, Yoses, Yudas nggano Simon gemang. Nggano demanonnang ngge so imot ey gabe got-eton dali!” Ngga tang so, Yesus lo nguok go nemotnang lo gemang wayang. 4 Way so ngge kalik nemotnang no Yesus lo gemang pen-nawon, “Sip meno-meno nogo suey so senong eygo nabi nogo tup go mea keng. No, nemot go yakena tang go ey yaptenglam eygo ba nogo yakua tup, sang.”
5 Yakena ngga nogo, Yesus lo tasam kangok go klayanang go kua pluok-srenawon. No, sikabung nangglik ey go sadui sogo blo no ta tui-won go, sadui gemang suey. 6a Se senong: Yesus tang go kuikui go duing-ton, “Sogo temoy no, Genam nogo dabui lo nemotnang kua kekeng?”
Deguo teguop penklong so andua 12 Yesus lo mot-dak go
Markus 6:6b-13
6b Ngga sik sogo, yakena-yakena dagu sogo no sikabung no walinebut nguok so, Yesus gemang klong. 7 Ku ngganemot no andua 12 usi-sing gono, namonduo-namonduo so Yesus lo gemang mot-dak. Ngga ey, nemotnang nogo don, naliwabu yat genang Yesus lo gemang iti. 8 Nggano nemotnang nogo tegadi ngge, gemang dok-won, “Tapmasi koklong go, sogo-sogo motnang logo kua iti! Ten, keba, duoy kua iti dali. No, teguoli-a se mlak. 9 Masi suk-a se kok, no amka namon eygo kua iti go klong, klaya go-a, nemot gemang.” 10 Nggano, meno gemang pu-won dali, “Motnang yap nago ba sono mo wawi go, yap ngga seguong so se susuing, yakena ngga sik sogo motnang mea ip go klong. 11 No, yakena meno no motnang degut go, suey so motnang sikabung lo kua wawi go, tenguo go, yakena ngga nogo motnang kua suing. Ngga ey yakena ngga nase itak. No, maning kua itak gono masi sung-a se tegue. Ngga sik so senong genang: nemotnang eygo yakua tegu.”
12 Ku ngganemot no, Yesus go tamot-tamot ngga gemang klong-lak. Tasam piam go sik sogo sikabung teguey genang, deguo teguop-a gemang penklong. 13 Naliwabu mata so nemotnang lo gemang yat. Ngga ey sikabung sadui sogo nemot go wengkabui blo no mlay tui go, nemotnang sadui gemang pali-sing.
Yohanes Busotuigo wengkabui tong go mo kebong
14 Tasam-tasam Yesus lo pupluok go iway, deguena Herodes gemang tup dali. Seni so: sedingno-sedingno Yesus go sui ibe tup go mo senong. Sikabung lo pepen go, “Tandali Yohanes Busotuigo mo nglong gabe. Ngga tang so, tasam-tasam dega ngga, Yesus logo gemang pupluok.” 15 No, sikabung temu lo pu go, “Nemot Elia.” Temu dali lo pu go, “Nemot nabi! Banim go nabi-nabi ey mo kerlam.”
16 Iway ngga kalik go Herodes tup go, gemang pu-ton, “Seni so, ngge Yohanes Busotuigo! Banim no genam lo pu goso, wengkabui tong go, nggeasui go tandali mo nglong.”
17 Seni so, ngge kalik Herodes lo mo duing: banim no nemot lo pu goso, Yohanes Busotuigo mlak go, tamasi dok go boy ba no mo betep! 18 Se senong: Herodias ntaton Pilipus go senun, Herodes lo gluik go, senun lemoy go tang so, nebut dawin ey ngge kalik Yohanes Busotuigo lo gemang bebat, “Demu kua go! Herodias mot lo gluik go ngga, tasam piam go!” 19 Ngganemot sik so, Yohanes nogo Herodias dabui gemang piam-natun. Yohanes but go kebong genang so mo duing, no kua lelemoy. 20 Se senong: Yohanes nogo, deguena Herodes suali ey. Nemot senong go, Yohanes ngga seni eygo nemudi sogo teguop go sedue. Ngga nemot sogo so Yohanes go wali yay nemot lo gemang susuing. Seni so, Yohanes logo nebutpen, suey so tutup so Herodes lo duduing. Nemot-a, nemot go dabui ba nogo segley lo wang go kalik tetra.
21 Se ikum! Herodias go kunala piam go lemoy genang ku gemang pung-atun. Ngga Herodes tui go ku no. Ku ngganemot no, Nemot go kebalisedue, plewengkabui, nan Galilea sogo deguena, trang, kosenang, naklay nogo, walop kangok go Herodes gemang iti-nawon. 22 Glop go nemu damoy so, Herodias go denun lo degut go, usre suey so gemang wata-natun. Ngga ikum go, yakay kangok so glop gemang tra-nenawon. 23 Ngganemot sogo so ngge kalik gemang pu-nawon, “Debui! Usre wata-to go, suey dato! Sogo-sogo so mot lo pu-silo go, genam lo mea iti.” Ngga ey, tanat go Herodes lo pu-nawon, “Ngge ibe gabe mo ikum! Mot lo wadong go naklay: drang, duoy, taut, mot nogo mea iti-silu.”
24 Ngga ey, unen no usi genang sogo kap go, gemang usi-tun, “Mia, genam sogo-a ya pu-balu?” Unen lo gemang pu-tugun, “Klong-a! Yohanes Busotuigo go wengkabui-a se wadong-balo!” 25 Keda so tandali kabung denok ngga, Herodes sono degut go gemang pu-batun, “Kekayso, Yohanes Busotuigo go wengkabui-a, wakay no king go se iti-sando!”
26 Ngga kalik pu go tup gono, dabui ba no u kalik Herodes gemang tra-won. No, glop blo no tanat go nogo, yakua tenguo. 27 Ngga ey, kekayso plesedue meno pu go gemang klong, Yohanes Busotuigo go wengkabui tong go iti go weng genang so. Plesedue ngga nawon go, boy ba no degut go, Yohanes go wengkabui gemang tong. 28 Wengkabui ngga wakay no king go weng go, kabung denok go ta no gemang iti. Nggano, unen sono gemang iti-natun.
29 Yohanes go andua-andua, ngga tup go, gemang klong-lak. Ngga ey Yohanes go temoy lek go, mu no gemang tuet-nenawon.
Ten seguay go sikabung 5 ribu no wasey go
30 Andua 12 Yesus lo mot-dak go ngga, weng go, Yesus mit no klay gono gemang yaluim. Ngga ey, nemotnang lo ngunguok go, takebali pluok go naklay, Yesus sono gemang pen-nenawon. 31 Sikabung mata so wengklong go tang so, Yesus ey andua-andua ey ten dam sogo yakua. Ngga ey nemotnang no gemang pu-ton, “Weng-a, seduekuagosip no dia suing genang imot ya klong!”
32 Ngga sik so, banom so suing genang, bayi no blongot go, seduekuagosip sono gemang rlat-nenawon. 33 No, Yesusnang koklong go, sedue temu lo ikum go pen gono, ibe mo senong dali. Nemotnang yakena-yakena sik sogo, banim masi tap lo kuek go Yesus ey tamot-tamot ey maning kua pung gono, sip ngganemot no gemang pluep-lak. 34 Nggano, Yesus koklong go metuik no bayi se kokok, sikabung miam eygo gemang ikum-nawon. Ngga ey dabui ba u kunala ey gemang tra-nawon. Seni so, nemotnang domba nogo kalik, no, yay sogo sedue kua sang! Ngga ey, nemotnang nogo walinebut batawalong so Yesus lo gemang nguok-nawon.
35-36 Walong so nguok go nogo, use woy yam sogo no, Yesus sono, nemot go andua lo gemang pu-neton, “Aya! Ngge seduekuagosip, ngga no, ku yam so klik go, yamso kurleng nebut ikak-anatugun go se! Yakena-yakena sono sikabung ngge pu go nase klong-lak! Ten nay sogo-a iti go dam genang.” 37 Way so ngge kalik Yesus lo gemang tenguo-nawon, “Sikabung nogo ten motnang lo se iti!” Way so nemotnang lo pu go, “Ye! Sikabung ngge temoy kalik go, ten iti genang, sogo kalik ya? Ten iti genang duoy, kua nemot go se!” 38 Nggano, nemotnang no Yesus lo gemang pu won, “Se ikum! Motnang logo ten keba ba sogo nago yam so?” Ikum-nenawon gono, gemang pu, “Loti taidi yam so, dasi namon eygo-a gabe.”
39 Yesus lo pu go, “Neguen disua kiki sogo blo no klay gono sikabung yaluim go se suing-lak.” 40 Sikabung gemang suing-lak. Klay gono gemang yalui-sing, 100 yam sogo, 50 yam sogo.
41 Klay gono suing-lak gono, loti taidi ey dasi namon eygo ta no Yesus lo iti go, ut sono nemu yalap-biwon gono, teguopguala Ki Wali Iram sik so gemang wadong-biwon. Ngganemot no, loti betok go, Nemot go andua-andua no idok go, sikabung mata sogo no gemang wasey-sing. Nggano dasi namon eygo, betok go Nemot go andua-andua no iti go, sikabung naklay nogo gemang wasey dali. 42 Ten ngga dam golo, nu yam so temoy-nenawon. 43 Se ikum: loti temu itak go, naklay Yesus go andua-andua lo yaluim go, kala 12 damoy ey gemang tram. Dasi temu ngga kalik gemang mo yaluim dali. 44 Ten dam-newon sedue seguong-a go-a i go 5 ribu yam no.
Bu blo lo masi lo Yesus klong go
45 Ten yam so dam gono, kekayso Nemot go andua-andua no Yesus lo pu go, “Banim temu no yakena Betsayda bu ngga idi sono bayi no blongat go motnang se klong. Ngga ey, sikabung mata sogo, nemotgo-nemotgo sip no pu go tandali gemang klong-lak.” 46 Sikabung suey pu gono, banom meduim don meno blo no, dewi pu genang so Nemot-a gemang klak.
47 Ku yam so kiklik, Nemot go andua-andua bayi ey bu nesip no mo pupung. No, banom meduim so maning Yesus-a got-tenawon. 48 Ngga ey, Yesus mo ikum-siwon: way-way so nebit ey tenguo go nogo, bayi dom so uwok go, tomeytup-nesiton. Ngganemot sogo so, wadi nesip ku nebit yam no, Yesus bu blo lo nemotnang mit sono gemang weng. Nemot go duduing, banim besi go bayi ketang lo klong genang so.
49-50 Yesus bu blo lo uweng go, Nemot go andua-andua naklay lo ikum, suali tra go sogo, ngge kalik gemang bega-netenawon, “Ikum-a! Dabuilap ngga uweng go!” Kay seguong so, Yesus lo gemang pu-nawon, “Yakot so ya! Ngge, Genam lo wa, suali kua tra ey!” 51 Bayi blo sono klak-nawon gono, kekayso nebit gemang tebung. Nemot go andua-andua kukui go, ta wasrang-a glok-netenawon. No, seni suey so kua senong-srenawon. 52 Esang! Nemotnang go dabui maning demu kalik. Seni so, banim temu no, sikabung mata sogo no, ten seguay dato golo iti go mo dam. No, tasam ngga lemoy go, kunala maning, Yesus go don dega suey so maning kua senong dali.
Genesaret sogo sikabung sadui eygo Yesus lo pali go
53 Nemotnang bayi lo koklong, yakena Genesaret no gemang pung. Nggano bu ketang no nemotnang go bayi gemang kok. 54 Bayi ba sik sogo demening nemotnang li gono, sikabung ngga sogo, Yesus ikum go mo senong-nenawon, “Ye! Ngga Yesus go!” 55 Ngga sikabung nebut tup go, ngga sono, ngge sono nemotnang kuek go, yakena seding-seding sik sogo, sadui eygo sedue kebleng no king go, Yesus mit sono gemang weng-lak.
56 Yang! Yakena kangok go, yakena seguay go nogo, Yesus koklong go, sadui eygo sikabung nay sip nogo, sikabung temu lo lek go gemang tui-sing. Ngga ey, Nemot sono sikabung sadui sogo lo gemang wadong, “ Mot go amka seding dato no ta lo genamnang mlak sogo se!” Seni so, sikabung naklay, Nemot go amka seding no ta mlak go, kekayso nemotnang go sadui ey gemang pali-sing.