7
Babuasi logo demu-demu
1 Ku meno no, yakena Yerusalem sik sogo sedue Parisi ey Musa logo demu so nguok go klui-klui ey Yesusnang dagu no gemang pluep-lak. 2 Ngga ey ikum-nenawon go: Yesus go andua-andua ta bu kua lu gono, ten iti go ne dedam. Ngga Yahudi go demu ey kua kerlam. 3 Seni so, babuasi lo taling go demu-demu no sedue Parisi, sikabung Yahudi temu eygo, suey so gemang kekeng. Ngganemot sogo so: ta bu kua lu gono, ten yakua dam. 4 Se senong dali: nay so teta go sip sik so weng go nogo, banim no saysuk naklay bu se lu. Ngga ey, ten mea dam. Ngga kalik go demu mata so nemotnang lo duk-neakam. Nemot tang go ten dedam sip, bu dedrop sip, ten so susuik go sip, bu suey so lu gono, nemot go sip no mea ta. Nemotnang lo duing go: ngga kalik semu go, Ki Wali Iram go suongku no kon kua goso mea lemoy.
5 Ngganemot sogo so, sedue Parisi ey Musa logo demutrui so ngunguok go sedue ey Yesus sono gemang bebat, “Ikum-a! Ta bu kua ulu gono, Mot go andua-andua ten ne dedam! Sogo kalik go-a, babuasi lo nguok go demu nogo, kua keng-neton?” 6-7 Way so Yesus lo pu go, “Motnang wamoymlue ey go sedue! Motnang tang ngge so, nabi Yesaya lo mo pu-ngam,
‘Sikabung naklay Genam go sui-a lomsuk lo pupu.
No esang! Nemotnang go dabui Genam eygo ket so.
Nemot-a Genam go sui blo sono nemotnang lo iti go, seni kua.
Nemotnang tang so semu go demu-a,
sikabung gemang ngunguok.’ (Yesaya 29:13)
8 Yang! Ki Wali Iram lo pu go walidemu-a, motnang lo ne itak. No, sikabung lo duing go tap-a, waysagi ey motnang lo gemang mlak.”
9 Nggano, Yesus lo sedue Parisi ey Musa logo demutrui so ngunguok go klui-klui eygo nogo, tandali gemang pu-nawon, “Sogo kalik go-a, babuasi go demutrui-a ta ey kokong, Ki walinebut-a motnang lo kua tupduk ne!” 10 Banim go ngge kalik Musa lo mo pen-ngam, “Moy-ay nogo kengduduk ey ta se kong!” a Nggano mo klik dali, “ moy-ay nogo, nando lo wayang go, but go nase kebong.” b 11 Way so, demu ngge-a motnang lo ne semu, “Moy-ay no pen go, ‘Motnang go wali nogo taiti, tegadi so Ki Wali Iram sono genam lo mo dok gabe.’ Ngga kali pen go-a suey. 12 Ngga kalik piam so ngunguok go, duo ngganemot unen ey nglangin eygo nogo suali taling genang tap, motnang lo gemang pupuem. 13 Esang! Ngga sik so mea ikum: demu-demu motnang lo pupluok go tang so, Ki Walinebut-a don kua goso mo lemoy. Tasam ngganemot kalik go mata so, motnang lo gemang tetebok!”
14 Tandali sikabung mata sogo Yesus lo usi go, ngge kalik gemang pen-aton, “Genam go nebut ngge, nemot go seni senong genang, suey so motnang se tup-lak. 15 Sedue Parisi lo ngunguok go, ‘Lom ba lo dedegut go logo-a sikabung go dabui kon ey mea tui.’ No, gabe pen-asitugu, ‘Sedue ba sik so pupung go logo-a, kon ey mea tui.’ ” 16 [Motnang kama gemang go sikabung, suey so se tup.]
17 Yesus, nebut ngga kalik go pen gono, sikabung mata sogo ba sik so pung go, yap meno ba sono Nemot gemang degut. Nggano Nemot go andua-andua weng-lak go gemang usi, “Nebut ngga go seni sogo kalik?” 18 Yesus lo gemang pu-won, “Esang, sogo kalik go-a motnang kua senong? Motnang go duduing, sikabung temu lo duduing go ey, mo kerlam. Se tup! Nemot go seni ngge kalik so gabe: tendam go, teguan ba no degut go logo, sikabung go dabui kon eygo yakua lemoy. 19 Dedam go ngga, dabui ba sono kua degut, ngga teguan ba sono gemang klong. Ngga sik sogo kui so mea nen.” Yesus lo pen-awon go sik so, imot gabe senong: ten dedam naklay, kon kua. 20 Yesus lo pu-nawon dali go, “Lom ba sik so pupung go logo-a, dabui ba kon mea tui.” 21-22 Dabui ba sik sogo, kunala piam-piam ngge kalik go-a gabe pupung: kamea kunala; wom kunala; sedue but kunala; kabung iti-itak kunala; nagluim kunala; dabuipiam kunala; wamoymlue kunala; wegeng kua go; nemukum; wayang kunala; dabui ta tetegue go; puplu sogo kunala.
23 Kunala piam go ngga logo-a, sikabung go wali mea waluk-sing.
Nan Siria Penisia sik sogo kabung dabui lo keng go
24 Sip ngga itak go, Yesus ip go, yakena Tirus dagu sogo sip sono gemang klong. Pung-anawon go, yakot so yap meno sono gemang degut. Nemot go duing go: Nemot pung go, sikabung mata sogo lo senong genaning so. No, ngga kalik go kua lemoy: Nemot pung go, kekayso sikabung mo senong.
25-26 Se ikum! Kabung meno, nemot go duo kaguit, naliwabu lo degut go, Yesus ngga sogo tup-natun go, kekayso kuntun go, segabuem unuik go, Yesus sono gemang wadong, “Aya! Genam go duo kaguit naliwabu lo degut go ey pla yat-a, sang!” Seni so, ngga Yahudi kabung kua, tang meno sik sogo: nan Siria Penisia.
27 Tang meno sik sogo so, way so nemot sono Yesus lo gemang pu-nawon, “Yap ba sogo ten dedam denok nogo, uduo sono yakua tega.” c 28 Ngga ey, way so ngge kalik kabung ngga lo gemang pu-natun, “Aya-dem, ngga seni so wa! No, sedue lo dam go kukup net go-a, uduo logo mea dam dali sang!” 29 Ngga ey, Yesus lo kabung ngganemot no gemang pu-ton, “Mia sop! Dabui lo don ey At no keng-santo go tang so, gabe pu-situgu, ‘Klong-a! Nggeasui go, duo ba sik sogo naliwabu mo pung gemang!’ ”
30 Kabung ngganemot klong go, yap no ikum-natun go: sip srek blo lo suey so denun sesrek, naliwabu seni-seni so mo pung.
Sedue kama wuik go Yesus lo tenuing go
31 Ngga sik sogo, yakena Tirus Yesus itak go, yakena Sidon tap lo yakena-yakena Dekapolis nesip logo tap lo, nan Galilea bu ketang sono gemang nenawon.
32 Nggano pung go nogo, sedue kama wuik go, nebut nenegap so pepen go, Yesus sono wawi go gemang weng. Ngga ey, pali genang so, Yesus no gemang wadong-netenwon, “Aya! Sedue ngge blo no ta tui-a.” 33 Nggano sikabung nesip ba sik so, banom so sedue ngga, Yesus lo wawi go gemang nawon. Se ikum: sedue ngga go kama put idi-idi no Yesus go taglang namon gemang kok. Ngga ey, mlabui tuia go, sedue ngga go nebleng sono gemang tui-nawon. 34 Ngga ey, ut blo sono nemu yalap-biwon go, nebuem nebit kangok so lek go, Iblani nebut so ngge kalik gemang pu-won, “Epata!” Nemot go seni: tenuing-a! 35 Kayseguong so sedue ngga go kama namon tenuing go, nebleng luku go gemang pali dali. Woy ngganemot no, sedue ngga nebut tuot go, gemang pen-atenawon. 36 Tasam ngga ikum-nenawon goso, Yesus lo gemang pu, “Se tup! Sikabung meno nogo kua pen. Klaya duonang go nogo kua pen!” No, esang! Ngga kalik don ey Yesus lo pu-won go nogo, sikabung temu nogo keda so gemang penklong.
37 Seni so, sikabung tawasrangglok ey ngge kalik gemang pen-nesiwon, “Ngge naklay suey so Yesus lo sang mo pluok: kama wuik go mo tenuing, nebut kua pepen go, nebut ey mo tuot go pen.”