4
Yesus yatrang mlue go
1-2 Yesus, Ki Wali Waglo lo tram gono, bu Yordan sik sogo tandali gemang klong. Ki Wali Waglo go don lo wawi go kaseglokpay sono Yesus pung go ku 40 yam so gemang uwet-nawon. Ngganemot nogo, Yesus pui genang yatrang, Kupiam golo gemang mlue. Tenday got-nawon go, i go sogo no, ten piam-piam so tra. 3 Ten se tetra, Yesus no Kupiam golo pu-tenawon, “Ki Wali Danon seni so mo, nggeasui go pu-silo go, demu ngge-a ten so se lemoy!” 4 Way so Yesus lo gemang tenguo, “Wali Sam klaut no mo klik,
‘Tendam seguong lo sikabung yakua uwali!’ ” (Ulangan 8:3)
5 Ngga no, Yesus, Kupiam golo wawi go, ku meduim meno blo dega sogo no gemang klong. Sip ngganemot blo sik so Yesus sono kukunan go kungap naklay kekayso Kupiam golo gemang taling-nawon. 6 Ngga ey, Yesus sono gemang we-tebawon, “Kukunan ngge blongdon ey naklay genam go ta sono mo itak! Genam wengkabui gabe! Nando sono genam lo itak genang, mea itak-silu. 7 Susubu-a naklay wit-sando go, blongdon ngge, Mot sono mea itak-silu.” 8 No, way so Yesus lo tenguo go, “Ngga yakua! Wali Sam klaut ba no, ngge mo klik,
‘Genam ngge, Ki Mani Wali Iram gabe!
Genam seguong nogo-a, dewi se but.
Ngga ey, Genam go sui iway-a blo sono go, mot lo se i-iti.’ ” (Ulangan 6:13)
9 Ngga ey, Yesus mlue genang so wawi go, Yerusalem sono kebewon go, Ki Wali yap blo dega no Kupiamgo ey gemang pung-klebawon. Ngge kalik Kupiam golo gemang we-tebawon, “Ki Wali Danon seni sogo, ngge blo sik so, Mot se sip-silo! 10 Wali Sam klaut ba no Mot sogo ngge mo klik,
‘Pui go nogo, Kiwali tamot mot-dak go
weng-lak golo mot yay mea suing.’ (Mazmur 91:11-12)
11 Ngge mo klik dali gabe,
‘Ta sra go blo no mot mea pui-nalo,
masi nawit genaning.’ ”
12 Ngga ey, way so ngge kalik Yesus lo tenguo go, “Wali Sam klaut ba no ngge mo klik,
‘Woy Wali Iram, mot go Ki Wali Iram gabe.
Nemot nogo yatrang kua mlue!’ ” (Ulangan 6:16)
13 Yatrang ngga naklay mlue gono, Yesus sik sogo Kupiamgo namboy gemang klong.
Nan Galilea no deguo teguop Yesus lo pen go
14 Kaseglokpay sik sogo, nan Galilea sono Ki Wali Waglo go don lo Yesus gemang-nawon. Seni so, Ki Wali Waglo lo tandali Nemot don mo kok. Yesus pung-nawon go iway yakena-yakena gemang tup-nenawon. 15 Yang! Yakena-yakena go dewi yap ba lo Yesus gemang nguok-siton. Nemot lo nguok go tup gono, Nemot go sui iway sikabung naklay lo gemang iti-netenawon. 16-17 Nggano, babu-dapnawon go yakena Nasaret no gemang pung-anawon. Ku Sabat nogo dewi yap ba sono nemot go sam so gemang degut. Wali Sam klaut ikum go sikabung no pen genang so, Yesus ip gono, nabi Yesaya lo klik go sam-a Nemot sono gemang iti-nenawon. Sam ngga iti go plet-nawon go, banim no ngge kalik klik go Ki Wali nebut-a, gabe ikum-nawon,
18 “Ki Wali Waglo, Genam blo no gabe gigit!
Genam Nemot lo mo temuit gabe.
Sikabung taut kua gono,
deguo teguop pen genang so, Nemot lo mo dak gabe!
Ta tegan dok go sikabung plet genang so;
nemu pung go sikabung nemu pli genang;
idekeba eygo taitak genang.
19 Yang! Ki Wali Iram go ku suey go pung genang,
mo pung-atun gabe!” (Yesaya 61:1-2)
20 Sam ngga rlok go, nemot so iti go sedue no, tandali iti go, nebutpen genang so gemang got-nawon. a Ngga ey, dewi yap ba sogo sikabung naklay Yesus seguong no nemu-a bung-netenawon, “Sogo kalik ya pen-ayon?” 21 Nggano ngge kalik Yesus lo gemang pen-tenawon, “Nggeasui go, nebut ngge tup-keto go naklay gabe mo lemoy! Wali Waglo lo temuit go, Genam gabe.” 22 Se ikum! Walinebut ngga, sikabung naklay lo gemang yang-nenawon. Seni so, nebut teguop go Yesus lo pen go ngga tup gono, tawasrang ey gemang glok-nawon. Ngga ey, way-way so gemang pen, “Nemot suey! No, Yusup go danon lo! Sogo kalik go nebut-a Nemot logo ya pen-yon?” 23 Yesus lo gemang pu, “Seni so, genam sogo nebut way ngge kalik mea pu-kesando, ‘Mot tang go, sadui-a banim se suey, dokter! Yakena Kapernaum no, tasam-tasam kangok go taling-nayo go, atnang tup go, yakena nogo ngga naklay se taling-silo dali!’ ” 24 Tandali Yesus lo pen go, “Ngge kalik so Genam lo gabe pepen, ‘Yakena klaya go nabi, sikabung ngga sogo logo suey so kua wawi go keng!’ 25 No, Genam lo pen go nebut, seni eygo! Ngge-a se duing: Nabi Elia got-akam go nogo, yagui nangglik nesip yam so woy dalu kangok go, sa kua pu, ten yam so se kua-ayum. Se senong: ku ngga nemot nogo, Israel sogo kabung nalo mata so gemang. 26 Esang! Nan Sidon yakena Sarpat sogo kabung nalo lo ten iti genang so, Ki Wali Iram lo mot-dak go, nabi Elia gemang klong. Saula Israel go kabung nalo sono kua klong. 27 Ngga kalik dali so, nabi Elisa got-akam go nogo, Israel sogo sikabung yaulat eygo mata dega so gemang. Esang! Nan Siria sik sogo sedue-a mo suey-nangam. Yang! Nabi namon ngga kalik dali, yakena tang go nogo Genam logo tasam-tasam kua taling gabe.”
28 Dewi yap ba sogo sikabung, nebut ngga yam so tup gono, Yesus no sagui kangok so gemang kong-nenawon. 29 Ngga ey, ip-nenawon go, yakena Nasaret meduim sik so day sono tenget genang so, Yesus mlak go wawi go gemang klong. 30 No, Yesus-a nemotnang nesip ba lo sesuoy so gemang pung.
Yahudi go dewi yap Kapernaum no Yesus degut go
31 Yakena Nasaret sik sogo nan Galilea dali sogo yakena Kapernaum no Yesus gemang li-siwon. Nggano, ku Sabat nogo Yahudi go dewi yap ba no gemang nguok-nawon. 32 Yesus lo ngunguok go tup gono, sikabung naklay tawasrang ey gemang glok-nenawon. Nemotnang mo senong, “Yesus lo nguok go nebut seni ey, don kangok. Ngga, Ki Wali Iram lo taling go nebut.” 33 Ku ngganemot nogo, naliwabu piam golo dok go sedue meno dewi yap ba no mo degut go suing dali. Ngge kalik kayang ey gemang bega-tenawon, 34 “Ye, Yesus sedue Nasaret! Sogo-a atnang nogo, ya semu-silo? Atnang tuk-sing genang so Mot weng? Genam mo senong: Mot ngge Ki Wali Iram sik sogo Iram teguop go.” 35 Ngga ey don ey ngge kalik Yesus lo gabe bebat-nawon, “Mot seglaplu! Sedue ngge ba sik sogo, pung go, mot se klong!” Naliwabu piam go nebut ngga tup go, sikabung nesip ba no, sedue ngga tenget go gemang pui-nawon. Nggano, naliwabu piam go pung go kap go sedue ngga se suey-dapnawon. 36 Sikabung, tasam ngganemot ikum go, naklay kukui go nemu-a sena go bung-netenawon. Ngga ey, way-way so, gemang pen-netenawon, “Nemot lo pu goso naliwabu piam go kekayso gemang pluep-lak. Nago sik so, don ngga Nemot no mo iti?” 37 Tasam ngga semu-nawon go iway, nebit no tui go kalik, da klaya keda so nan ngga sogo no pen go sikabung naklay gemang tup-nenawon.
Sadui eygo sikabung mata so Yesus lo pali go
38 Dewi yap ba sik sogo, Yesusnang, Simon go yap no gemang klong. Se senong: Simon go unen kabuisegla nengkoy sadui kangok so tra goso yap ba lo sesrek. Nggano, nemotnang lo gemang usi-nenawon, “Aya! Simon go unen kabuisegla sadui sogo, Mot lo ya pali?” 39 Nggano, kabung ngganemot mit no Yesus ip go, ngge kalik gemang pu-tenawon, “Nggeasui go nengkoy sadui se pali!” Yesus lo pu gono, nengkoy sadui naklay se kua. Ngga ey, ip go glop nogo ten-a gemang semu-tenatun.
40 Woy yam so susut gono, sikabung sadui bumeno-bumeno tra go, wawi go Yesus mit no gemang pluep-lak. Nemotnang klay-klay blo no Yesus lo ta tutui, sadui bumeno-bumeno naklay gemang pali-sing. 41 Sikabung ba sik sogo naliwabu Yesus lo yat go gemang pluep-lak dali. Ngga ey ngge kalik naliwabu lo gemang bega-netenawon, “Mot, Ki Wali Danon!” Kua kay: naliwabu mo senong, “Yesus ngga tegadi so Ki Wali Iram lo dok go Iram pung go.” Ngganemot sogo so Yesus lo pu go, “Motnang senong go ngga, ibe nogo kua pepen!”
42 Wadikua ku boblong gono, yakena ngga sik sogo, sip kluim kua gono Yesus gemang klong. No, Nemot so tatuigo wet go sikabung lo gemang uwet-netenawon. Yesus ey tegu gono, gemang gluik-netenawon, “Ngge sik sogo Mot kua klong!” 43 No, Yesus lo pu go, “Yakena-yakena meno nogo, Woy Wali Iram tamlak go blongdon duduing Genam se klong go pen dali. Ngga nang sogo so Genam Ki Wali Iram lo mot-dak go gabe weng!” 44 Nggano nan Yudea naklay no, dewi yap ba lo deguo teguop gemang nguok-tenawon.