3
Yohanes Busotuigo kebali tamlak go
1 Roma go wengkabui dega, Kaysar Tiberius lo iram so suing go, yagui 15 tete nogo Yohanes butui genang, kebali ta gemang mlak-nawon. Ku ngganemot nogo, nan Yudea no Pilatus gubernul so, deguena Herodes nan Galilea no, ntaton Pilipus-a nan Iturea ey Trakonitis eygo no, nggano Lisanias nan Abilene no, deguena so gemang got-nenawon. 2 Nggano, Ki Wali yap ba no, taitisopuit go wengkabui, Anas ey Kayapas ey gemang. Ku ngganemot no, Sakarias go danon Yohanes sono, kebali ta mlak genang deguo Ki Wali Iram lo gemang mot-dak. Seni so, kaseglokpay so Yohanes got-tenawon. 3 Bu Yordan so Yohanes got-tenawon go, sikabung ibe sono klong go, ngge kalik gemang nguok-siton, “Motnang go wali duing go, teguey genang bu-a nase degut-kesilo! Mot go piam konkebamling Ki Wali Iram lo suep sogo.” 4 Yohanes lo pen go ngganemot lemoy go, banim no Wali Sam klaut ba no nabi Yesaya lo mo klik-ngam, ngge kalik,
“kaseglokpay sogo sedue klaya gemang.
Don ey nemot lo gemang usi-tenawon,
‘Woy Dem nogo walitap dali-dali se semu!
Nemot nogo tap, nemudi so se kebuo!
5 Netuik-netuik eygo suey so se tram!
Kukuoy sogo metuik nemudi so se nebuem-sing!
Kuso-bloso go nan naklay suk go se suey!
6 Ngga ey, sikabung naklay ikum genang,
Ki Wali Iram logo sesuoy-siton.’ ” (Yesaya 40:3-5)
Nabi Yesaya lo klik go nebut ngge, Yohanes lo gabe pluok.
Wali buin itak genang Yohanes Busotuigo golo pen go
7 Tebadali Yohanes mit no bu degut genang so sikabung mata so gemang pluep. Ngga tang so, Yohanes lo gemang bebat-nawon, “Lema nok kalik tabat piam eygo tang, motnang gabe! Yansi kisebui iti genang sik sogo, motnang yakua kuek. Kuek genang so motnang nando lo mo pen? 8 No, tap teguop ngge-a se taling: dabui lo iwot go, Ki Wali Iram no keng go, seni eygo-a wali ba no se tetaling! Tebadali go motnang kua pen, ‘Atnang ngge, babu Ablaham go duoyap, kisebui atnang nogo yakua iti.’ Esang! Ngge gabe pen-asitugu, ‘Ablaham go duoyap, demu ngge sik sogo Ki Wali Iram lo mea lemoy dali!’ 9 Se senong! Dinuik ba no dali tengangkatui mo tui gabe. Nago no seni kua tagot go, ngga sono di tuo go, koy ba sono mea puit-lak. Motnang go tasam piam go-a ngga sono banim se itak, ngga ey, tasam suey go-a se tetaling.”
10 Yohanes go nebut ngga tup gono gemang usi-nenawon, “Ngga kalik go sogo kalik atnang ya semu-elu?” 11 Way so Yohanes lo pu go, “Nando go amka namon eygo, amka kua go sikabung sono meno-a se iti. Nando ten gemang go, ten kua go sikabung sono temu se iti.” 12 Blasteng so iyaluim go sedue butui genang dali so, gemang weng-lak. Yohanes no nemotnang lo gemang usi-nenawon, “Aya klui! Sogo kalik so atnang ya semu-elu?” 13 Nemot lo pu go, “Pemlenta lo pu go yam so blasteng se yeyaluim, motnang logo ey kua tebok!” 14 Plesedue lo gemang usi-nenawon dali, “Sogo kalik genamnang ya semu-elu?” Yohanes lo pu go, “Meno duo go duoy, ple lo motnang kua sagon. Ngga ey, klayduoy mot kua iti dali. No, pemlenta lo mo pu go duoy-a yakay ey se!”
Ki Wali Waglo ey koy eygo tui go
15 Ku ngganemot nogo, Ki Wali Iram lo tegadi dok go Iram weng genang, kunala kangok so sikabung mata sogo lo duing-netenawon. Nggano, way-way so gemang usi-netenawon, “Yohanes ngge, nemot?” 16 Yohanes, kunala ngga senong go tang so, nemotnang no ngge kalik so, gemang pen-tenawon, “Nggeasui go, taling genang so bu seguong lo motnang gabe tutui. No, mesip so genam no keng go Sedue klaya mea pung-ayon. Nemot go blongdon kangok dega. Nemot go koybutasemu so taut mlak genang genam logo yakua. Genam ngge sui kua. Tasam ngge-a Nemot logo mea taling: Ki Wali Waglo ey koy eygo-a Nemot lo mea tui. 17 Suey go-piam go kuoy genang don, Nemot lo gemang mlak. Suey go-a, yaluim genang sip suey gono mea ta. No, piam go-a suep genang, ya kua sut genang idakoy ba sono mea puit-dak.”
18 Ngga kalik sikabung no deguo teguop ey nebut mangking ey Yohanes lo nguok-tenawon go. 19 Se senong! Nan Galilea go deguena Herodes lo, ntaton go senun Herodias uwet go ey taybat meno-meno eygo so Yohanes lo gemang bebat-nawon. 20 Esang! Taybat meno Herodes lo gemang pluok-nawon. Bebat go tang so, boy ba no Yohanes mlak go gemang betep-nawon.
Ki Wali Waglo Yesus blo no li go
21-22 Se ikum! Sikabung mata so Yohanes lo butui go, ngga ey bu sono Yesus kenok-nawon dali gono, dewi so maning pupu, ut tegek go, ut ba sik so Ki Wali Waglo, wi yagui kalik, pling go li go, Yesus go wengkabui blo no gemang gualing. Ngga temu ey, ut sik sogo nebut ngge kalik gabe kuntun, “Genam go dabuikin seni, Mot ngge gabe. Mot nogo-a Genam dabui gabe yakay!”
Yesus pung go tap
23 Yagui 30 tete no pung gono, kebali ta Yesus gemang mlak-nawon. Sikabung lo duing go: Yesus ngge, Yosep go danon. Ngga sik so iti go, senong go: Yosep, Eli go danon. Nggano tagu i go, e... Ki Wali Iram go danon Adam no gemang pung.
Seni so, babuasi go sui, ngge kalik so gabe: 24 Matat, Lewi, Malki, Yanay, Yusup, 25 Matika, Amos, Nahum, Hesli, Nagay, 26 Matat, Matika, Simey, Yosek, Yoda, 27 Yohanan, Resa, Serubabel, Sealtiel, Neri, 28 Malki, Adi, Kosam, Elmadam, Er, 29 Yesua, Elieser, Yorim, Matat, Lewi, 30 Simeon, Yehuda, Yusup, Yonam, Elyakim, 31 Melea, Mina, Matata, Natan, Daut, 32 Isay, Obet, Boas, Salmon, Nahason, 33 Aminadap, Atmin, Arni, Hesron, Peres, Yehuda, 34 Yakup, Isak, Ablaham, Terah, Nahor, 35 Seruk, Rehu, Pelek, Eber, Salmon, 36 Kenan, Arpaksat, Sem, Nuh, Lamek, 37 Metusalah, Henok, Yaret, Mahalalel, Kenan, 38 Enos, Set, Adam, Ki Wali Iram go danon.