2
Yesus tui go nebut
1 Yesus tui genang ku se dedagu, nan-nan naklay nogo deguo ngge kalik Kaysar Agustus lo gemang pung-asitun, “Blung tagu i genang, amble go sam ba no, sikabung naklay sui se klik!” 2 Kirenius, nan Siria no Gubernul so suing go nogo, sui klik go tagu i genang ngge, da klaya tete sogo gabe. 3 Deguo ngganemot tup gono, sui klik genang so, nemotgo-nemotgo yakena no sikabung gemang klong-lak. 4 Yusup, iram Daut go mlena walasrang no pung go gemang. Ngga tang so, nan Galilea yakena Nasaret sik sogo, nan Yudea sogo yakena Betlehem no gemang nawon. 5 Yusup go baynang pu go kabung, Maria duonu sogo ey, sui klik genang gemang kenatun. 6-7 Betlehem no pung go, glopyap nemotnamon tete sogo kua. No, domba betui ba no gemang ta-klenatun. Ngga ey, Maria kuom tra go kuduong sogo duo sedue denok gemang tui natun. Nemot nogo sip srek kua go sogo so, amka lenan a lo pok go, domba go tendam sip ba lo gemang wew-natun.
8 Woy ngganemot nogo, sip ngga dagu so udong blo sogo, dombayay sogo sedue gemang got-netenawon. Wadi go, usene kua srek-nenawon. 9 Kekayso nemotnang mit no Ki Wali tamot klaya pung-nawon go, dombayay sogo sedue, Ki Wali blong lo mablong so itak-anatun. Kangok so suali gemang tra-nenawon. 10 No, Ki Wali tamot lo pu go, “Suali kua tra! Genam, motnang sikabung naklay nogo, deguo teguop pen so weng go. Deguo ngge tup go, sikabung naklay nenem yakay lo mea tram-sing. 11 Se senong: nggeasui wadi, Daut go yakena Betlehem no Sesuoy Iram mo tui gabe. Nemot ngga tegadi so Ki Wali Iram lo dok go Iram. Yangga, Woy Wali Iram. 12 Senong genang, tasam namon ngge-a se ikum-kenalo: duo kinsay ngganemot, amka lenan lo pok go, domba go tendam sip ba lo gemang wew.” 13 Ngga temu ey, kekayso Ki Wali tamot mata so pluep-lak go, klaya go ey tebok go Ki Wali Iram sono takong genang so, ngge kalik u gabe kluo-netenawon,
14 “Blong Wali Iram! Blo dega so Mot got-togoy. Mot Kiki Iram!
Kukunan blo sono go Mot go ngengam-yakay mo li.
Sikabung naklay blo nogo Mot go gualaklum mo pung gabe.”
15 Deguo nggenemot yam so pen gono, ut blo sono Ki Wali tamot gemang klong klak. Nggano way-way so dombayay sogo sedue gemang pen-netenawon, “Weng-a! Yakena Betlehem no, ya klong go ikum. Woy Wali Iram lo pen go kalik, sogo-a mo lemoy-anatun?” 16 Nggano, Betlehem sono keda so kuek-nesiwon go Maria, Yusup ey, duo kinsay domba go tendam sip ba lo wew go, gemang ikum-nenawon. 17 Duo ngga ikum-nenawon gono, sikabung ngga sogo no, Ki Wali tamot lo pen go nebut naklay gemang pen-nenawon dali. 18 Nebut ngga tup go, sikabung ngga sogo naklay kamso nega-netenawon. 19 No, nebut nggenemot, dabui ba no Maria lo king go, walong bata so kunala-a gemang tega-natun, kua kay.
20 Udong blo sono tandali dombayay sogo sedue, dombayay so koklong go nogo, Ki Wali Iram nogo ta ey gemang kong-nesiton. Seni so, nemotnang lo ikum go Ki Wali tamot lo pen go tasam namon ey kerlam go, seni so mo lemoy.
21 Se senong: ku taidisonangglik tete no, sedue Yahudi go demu kalik, Yesus saduisuk tong sogo no, Nemot go sui gemang temuit. Sui ngga: Yesus b Maria duo maning kua iti gono Ki Wali tamot lo pen go kalik.
Ki Wali yap sono Yesus king go klong go
22 Duomluey sik so Maria pung genang ku no, Musa logo demutrui kalik, yakena Yerusalem sono gemang klong. Woy Wali Iram go ta sono Yesus itak genang so gemang king go kenatun. 23 Seni so, Woy Wali Iram lo nguok go demutrui no, ngge kalik mo klik, “Kuduong so tui go sedue denok, Woy Wali Iram sono se itak!” c
24 Nggano, demu no klik go kalik Woy Wali Iram nogo taiti se iti dali: wabukurlung-a, yagui-a, namon ey se iti! d
Yesus sogo nebut Simeon lo pen-nawon go
25 Ngga ku nogo, Yerusalem sogo sedue seni klaya gemang. Nemot go sui: Simeon. Woy Wali Iram go demu nogo seni eygo nemudi so Simeon gemang kekeng. Ngga no, nemot go wali teguop seni. Nemot go bubung duduing ngge kalik gabe, “Kaning so, sikabung Israel Ki Wali Iram lo taling go gualaklum ya ikum?” Yang! Ki Wali Waglo, Simeon ey gabe wali. 26 Se senong: Simeon no ngge kalik Ki Wali Waglo lo mo taling-nangam, “Maning got-togoy go, tegadi so Woy Wali Iram lo dok go Sesuoy Iram pung go, mea ikum-lo.” 27 Ki Wali Waglo lo mot-dak go tang so, Ki Wali yap ba no Simeon gemang degut.
Yang! Ki Wali yap ba sono unen-nglangin lo Yesus iti go gemang degut-klenatun, demu no klik go kalik pluok genang so. 28 Ngga ey, Duo ngga ta no iti go, Ki Wali Iram sono, ngge kalik go dewi Simeon lo gemang pu-tenawon,
29-32 “Ya, Woy Wali Iram, taitisuey!
Tegadi Mot lo dok go kalik, maning kua kebong gono,
Sesuoy Iram genam tang golo mo ikum-tu gabe.
Nggeasui go, ngengam-yakay ba lo
Mot go koybutasemu genam gabe ya selu.
Yang, saula-saula sesuoy genang, ta mo mlak gabe.
Nemotnang go tap sono ngap genang blong mo pung gabe.
Blong ngga tang so, Mot go blung,
sikabung Israel go sui blo sono mea pu.
Genam go dewi ngge no yam!”
33 Duo ngganemot sogo dewi, Simeon lo klak go tup go, unen-nglangin tawasrang ey gemang glok. 34 Ngga ey, unen-nglangin blo no ta tui go, Yesus go unen Maria no, Simeon lo pu go, “Se senong! Yang, nebut sikabung lo sosok genang so, Nemot mea babu-dapyon. Sikabung Israel temu Danon ngge lo mea waluk, temu-a Nemot lo mea sesuoy. 35 Sikabung go kunala naklay, Danon ngge lo pupluok golo mea plet-lak. No, esang Maria! Duo nggenemot sogo, tengang lo uluk go kalik dabui ba mea tra-lo!” e
36-37 Ku ngganemot dali nogo, kabung nalo meno gemang. Kabung nemot go sui: Hana. Panuel go denun, tang Aser sik sogo. Nemot Ki Wali Iram go sesenong eygo kabung. Nemot go yagui walong dega so mo suing. Se senong: maning gono, sedue iti go yagui 7 yam so nemot mo suing. Nggano, nalo so suing go, yagui 84 yam no. Kuno-woyno Ki Wali yap ba so Ki Wali Iram nogo dewi-a tenday genuing gemang susuing. 38 Unen-nglangin pung gono, nemotnang mit sono Hana gemang natun. Ngga ey, Ki Wali Iram sono Duo ngge sogo iway gemang iti-bitun. Se senong: ngga sogo sikabung ey way-way so Hana gemang sok-netenawon. Yerusalem ey sikabung Israel eygo ta itak genang ku so nemotnang gemang bubung. Nemotnang ey Duo ngganemot sogo Hana lo gemang pen-tenatun, “Duo ngge Sesuoy Iram gabe.”
Ki Wali Iram go klum ey Yesus bebabu go
39 Woy Wali Iram lo taling go demutrui no klik go tasam yam so pluok gono, nemot go yakena Nasaret, nan Galilea no tandali Yusup ey Maria ey gemang klong. 40 Ngga no, Duo ngganemot don ey kunala senongblong ey gemang babu-daptenawon. Ki Wali Iram go taitiklum Nemot blo no gemang gigit.
Ki Wali yap ba no woy-woy ey nebut tui-nawon go
41 Se senong: yagui yam-yagui yam, Yesus go unen-nglangin walop Paska pla genang Yerusalem sono gemang koklong. 42 Mo mlay go kalik, unen-nglangin ey, danon so pu genang, masi da klaya go yagui 12 yam no Yesus ey gemang keng. 43 Walop yam sogo no, yakena sono sikabung tandali gemang suep-lak. No, unen-nglangin kua senong, Yerusalem no Yesus-a gemang itak. 44 Unen-nglangin lo duing go, “Banim go sikabung ey Yesus gemang koklong.” No, ku klaya yam so kenatugun go, Yesus kua keng go, gemang senong. Kamso wet go, menggo ey andua-andua eygo no usi go, kua tegu-srenatun. 45 Ngganemot sogo so Yesus wet so tandali Yerusalem no gemang kenatun. 46 Wet-klesitugun go, ku nangglik tete no, Ki Wali yap ba no, gemang ikum klenatun: Ye! Musa logo demutrui so ngunguok go klui-klui nesip so, Yesus suing go, way-way so nebut senang so tui go gemang ikum-klenatun. 47 Seni so, Yesus go kunala ey nebut eygo tup go tawasrang ey sikabung gemang glok. 48 Ngga naklay ikum go, unen-nglangin kuikui go, nemu-a bubung. Nggano unen lo pu go, “Dem! Sogo so tasam ngge, genam namon nogo semu-to? At ey aya ey mot so uwet go, dabui ey kenuong go se.” 49 No, unen-nglangin no Yesus lo pu go, “Sip meno-meno sono, sogo so uwet? Se senong: Wali Aya, suey so keng genang so, Nemot go yap ba so gabe got-situgu.” 50 Ngga tup go, unen-nglangin seni kua senong.
51 Unen-nglangin eygo sono Yesus keng go, yakena Nasaret no tandali gemang nenawon. Ngga sogo, kuno-woyno, unen-nglangin eygo no tupduk-tenawon. No, Maria kua kay, dabui ba so tasam ngga king go gemang gigit. 52 Babu-daptenawon go, senong blongdon kangok golo Yesus gemang tram. Yang! Nemot nogo Ki Wali Iram go gualaklum kangok. Sikabung Nemot nogo yakay dega ey.