3
Yohanes Busotuigo
1 Yagui kata yam so suing go, kebalita maning Yesus logo kua mlak gono, kaseglokpay nan Yudea no Yohanes Busotuigo gemang pung. Ngga ey, ngge kalik don ey gemang pen-atenawon, 2 “Motnang, se tup! Woy Wali Iram lo tamlak genang blongdon pung so gabe. Ngganemot sogo so, kuklue piam konkebamling se itak!”
3 Se duing! Wali Sam klaut ba no Yohanes sogo nabi Yesaya lo mo pen-ngam,
“Kaseglokpay so, ngge kalik go mot don ey gemang u-usi,
‘Woy Dem uweng go sogo tap, dali nase kebuo.
Tap-tap kukuoy sogo, nemudi so se susuey!’ ” (Yesaya 40:3)
4 Se senong! Yohanes go amka ey kuibey eygo, menay ‘unta’ suk lo semu go. a Ngga ey medop ey duen logo namseguon git eygo-a nemot lo gemang dedam. 5 Se ikum! Sikabung yakena Yerusalem sik sogo, nan Yudea sik sogo nggano bu Yordan ngge idi-ngga idi sik sogo, nemot mit no gemang pluep-lak. 6 Uweng-lak go ngga, kuklue piamkonkebamling-a wa, Yordan bu ba sono Yohanes lo kenok-tenawon.
7 No, partay Parisi ey partay Saduki eygo sik sogo bu degut so uweng go ikum goso, ngge kalik Yohanes lo gemang bebat-nawon, “Lema nok kalik tabat eygo, motnang tang. Esang! Kisebui iti genang sik sogo, motnang yakua kuek. 8 No, tap teguop go ngge-a se taling: dabui lo iwot-dak go Ki Wali Iram no keng go seni eygo-a wali ba nogo se taling! 9 Tebadali kua duing, ‘Babu Ablaham go duo tang so, atnang nogo kisebui ya kua iti gabe.’ Esang! Ablaham go duoyap, demu ngge sik sogo Ki Wali Iram lo mea lemoy dali. 10 Yang, di nogo kalik ey, se duing! Dinuik ba no dali tengangkatui mo tui gabe. Nago no seni kua tagot go, ngga sono tuo go koy ba sono mea puit-lak. 11 Nggeasui go, wali inim seni-a iti go, taling genang so bu seguong lo motnang gabe tutui. No, mesip so genam no keng go Sedue klaya mea pung-ayon. Nemot go blongdon kangok dega. Nemot go koybutasemu sogo taut mlak genang genam logo ya kua. Genam ngge sui kua.Tasam ngge-a Nemot logo mea taling: Ki Wali Waglo ey koy eygo-a Nemot lo mea tui. 12 Suey go-piam go kuoy genang don, Nemot lo gemang mlak. Suey go-a, yaluim genang sip suey gono mea ta. No, piam go-a suep genang, ya kua sut genang idakoy ba sono mea puit-dak.”
Yesus Yohanes lo bu kenok-nawon go
13 Ku ngganemot nogo, nan Galilea sik sogo, Yordan bu no Yohanes lo butui genang so, Yesus gemang-nawon. 14 No, Yesus so Yohanes lo waydang go gemang pu-tenawon, “Ye! Sogo so Mot ngge sono ne weng? Genam bu-a mot lo se kenok!”
15 Ngga ey, way so ngge kalik Yesus lo gemang tenguo-nawon, “Nueya! Nggeasui go, ngge se lemoy! Genam bu mot lo tui-silo go, Ki Wali Iram go duduing seni eygo naklay, imot nogo lemoy genang.” Ngga ey, Yesus go duduing no Yohanes-a, gemang keng-dapnawon. 16 Yesus bu Yohanes lo kenok gono, bu ba sik sogo pung-atenawon go, kayseguong Yesus ikum-biwon go, ut tegek go, ut ba sik so Ki Wali Iram sik sogo Ki Wali Waglo, wi yagui kalik li go, Yesus blo no gemang gualing. 17 Ngganemot temu ey, ut ba sik sogo nebut ngge kalik gemang tuot-kuntun, “Dem sop ngge, Genam go dabuikin seni gabe. Nemot nogo-a Genam dabui gabe yakay.”