2
Kukua go sik so kunala sedue weng-lak go
1 Yakena Betlehem nan Yudea no Yesus tui go nogo, ngga nogo deguena sogo Herodes Dega lo ta mlak go got-nakam. Ku ngga dali no, kukua go woy klak idi sik sogo, yakena Yerusalem no kunala sedue gemang pluep. 2 Yerusalem no pung gono, gemang usi-netenawon, “Yahudi sikabung nogo Iram inim go, nago no mo tui? Woy klak idi no, Nemot so taling go utop ikum go tang so, takong genang so, atnang weng go gabe.”
3 Deguo ngga tup-nenawon go, Deguena Herodes, Yerusalem sogo sikabung naklay ey, saduibong ey pling go gemang nega-netenawon. 4 Ngga ey, keda so woy-woy, yangga: Ki Wali yap ba sogo taiti puit genang wengkabui, Musa go demu so ngunguok go klui-klui, yaluim gono, Herodes lo gemang usi-tenawon, “Tegadi so dok go Sesuoy Iram, nago no ya tui? Wali Sam klaut ba nogo sogo kalik pen-nengam?” 5 Ngganemot no, woy-woy lo pu go, “Yakena Betlehem, nan Yudea no tui genang!” Seni so, Wali Sam klaut ba no, ngge mo klik-nengam,
6 “Ey! Betlehem nan Yudea sogo. Mot seguay go dato.
Mot sik sogo deguena-deguena sui eygo ya kua pung? Kua.
Mot ba sik so Deguena sui eygo dega klaya mea pung-ayon.
Ndengdon ba no Genam go blung Israel
Nemot lo ta mea mlak-yon.” (Mikha 5:1)
7 Ngga kalik tup gono, ibe senong genaning, sop-sop so deguo wet go, woy klak sik sogo kunala sedue-sedue ngga Herodes lo gemang usi-nawon, “Motnang naklay suey so se pen! Utop pung go ngganemot kaning-a mo ikum?” 8 Ngga ey, ngge kalik go gemang pu dali, “Betlehem sono motnang se klong. Nggano pung go, suey so Duo ngga wet go se ikum-kenalo! Mo ikum go, at nogo deguo ey kebando go se pen dali. Ngga ey, Duo ngga nogo ta kong genang, genam klong dali sogo.” 9 Herodes lo pen go tup-nenawon gono, dia no pung go yakena Betlehem no, woy klak idi sik sogo sedue-sedue ngga gemang klong. Yang! Utop klak go ngga, tap taling klong go, Duo susuing go sip blo no gemang tebung. 10 Utop tebung go ikum-nebawon go, yakay kangok golo nemotnang go dabui yam so tram. 11 Ngga sik sogo, nemotnang koklong go, e... yap ngga ba no degut go, unen Maria ey Duo ngga gemang ikum-nenawon. Ngga ey, segabuem unuik go ta gemang kong-nenawon. Ngganemot no, taitinang sogo keba ba sik so, emas, kemenyaan, nggano mur, nsuong go gemang ta-nenawon.
12 No, esang! Nggano to-nenawon gono, sedi ba no nebut mangking ngge mo pu, “Herodes mit lo tandali go motnang kua klong!” Ngga tang so, pay go way so tap meno lo gemang klong-lak.
Nan Mesir sono Yesus wawi go kap go
13 Woy klak sik sogo kunala sedue ngga kalik tandali klong gono, ku walong kua gono, sedi ba no Yusup no Wali tamot gemang pung. Nggano ngge kalik Woy Wali Iram go nebut gemang pen-nawon, “Yusup, Buong-a! Duo ngge iti-lo go unen ey nan Mesir no se kap! Ngga so got-ketenalo go, e... mot mit no tandali Genam mea pung-analu. Seni so, Duo nggenemot but genang so, Herodes ip go gemang uwet.” 14 Wadi ku klik gono kay seguong so, buong go ip-nawon go, Duo ngga unen ey, nan Mesir sono wawi go, Yusup gemang kap. 15 Ngga so got-netenawon go, e... Herodes gemang kebong. Se duing! Ngga lemoy go, Woy Wali Iram go nebut, nabi Hosea lo pu go, ngge lemoy genang,
“Nan Mesir sik so At lo usi go, Genam go Dem sop mo pung!” (Hosea 11:1)
Betlehem sogo sedue denok tuk-sing go
16 Yang! Woy klak sik sogo kunala sedue idi lo pay go, Herodes senong go, dabuipiam kangok so tra-nawon go gemang pu-tenawon, “Betlehem ey yakena-yakena ngga sogo denok, yagui namon no maning kua pung go-a, naklay se tuk-sing!” Ngge kalik duing go: denok tuk-sing go, kekayso Duo ngganemot ey mea but dali. 17 Ngga Herodes lo semu go, ngge kalik Wali Sam klaut ba no nabi Yeremia lo klik go lemoy genang,
18 “U ey kayang eygo kluim-a yakena Rama a sono go,
genam mo tup.
Nemot go duoyap u so gemang kukluo.
Seni so, Rahel b go u,
sikabung meno lo pu go, ya kua tong.
Nemot go duoyap sang mo kua go nogo.” (Yeremia 31:15)
Nan Mesir sik so Duo ngga tandali Yusup ey Maria eygo lo iti go weng go
19 Nan Mesir so, Duo ngga unen-nglangin lo yay suing go e... Herodes gemang kebong. Ngga ey, sedi ba no Yusup ey tegu genang so Wali tamot gemang pung. Ngge kalik gemang pen-anawon, 20 “Buong-a! Nggeasui go, Duo ngge, unen ey wawi go nan Israel no tandali nase klong! Se senong! Duo ngge but genang so u-usey go woy-woy ngga mo kebong gabe.” 21 Ngga ey, Wali tamot lo pu gono keng-nawon go, Yusup ip go, Duo ngga king go, unen ey wawi go, tandali nan Israel sono gemang nebewon. 22 No, nan Israel no pung gono, tup-nawon go, Herodes way so deguena go sip, danon Alkelaus mo suing, suali-dapnawon go, tandali tapmasi kua klong. Ngga ey, sedi ba no taling go tang so, nan Galilea sono duo kabung ey Yusup gemang degut-nawon.
23 Nan Galilea no pung go, yakena meno Nasaret sogo no gemang got-nenawon. Ngga naklay Wali Sam klaut ba no nabi-nabi lo klik go, lemoy genang,
“Tegadi so Ki Wali Iram lo dok go Sesuoy Iram,
‘sedue Nasaret’ so mea pu-netogon.”