5
Dasisokukgo sedue Yesus lo usi go
1 Ku meno no, bu Genesaret ketang so Yesus got-tenawon, sikabung miam dega ey Woy Wali Iram tamlak go blongdon duduing nguok go tup so, Nemot mit no gemang pluep-lak. 2 Ngga ey, bayi namon Yesus lo gemang ikum. Bayi namon ngganemot, beap ketang no metuik blo sono lek go git-tenatun. Dasisokukgo sedue, bayi ba sik so li go, kebapalo bu so gemang lu-netenawon. 3 Nggano, Yesus klong go, bayi meno no gemang klak. Ngga, Simon go bayi. Yesus lo pu goso, bayi ngga beap ketang sono gemang tengetduo. Simon lo tenget go bayi blo no Yesus suing gono, sikabung mata sogo no gemang nguok-tenawon.
4 Yam so nguok-nawon gono, Simon sono Yesus lo we-tenawon, “Simon! Nggeasui go, beap nesip sono bayi wok-a! Nggano dasi kuk genang kebapalo se betep.” 5 No, way so Simon lo gemang pu, “Aya klui, esang! Wadi go kamso wet-etugu, dasi klayanang go kua mlak. No, mot lo pu go tang so, kebapalo gabe bebetep.” 6 Yesus go nebut no keng go gemang betep-nenawon. Se ikum: dasi mata dega so degut golo kebapalo ey se tetegek! 7 Ngganemot sogo so, tebok genang so andua-andua bayi meno sono ta gemang wik. Nemotnang weng go, dasi mata so mlak go, bayi namon ba no gemang suk. Seni so, dasi ide lo bayi bu ba no pu ya degut? 8-9 Simon Petrus, dasi mata so kuk go ikum gono, nemot go andua-andua ey kuikui go, nemu-a way-way so bung-netenawon. Nggano Yesus no takong sogo so Petrus isegabuem unuik go, ngge kalik gemang pu-nawon, “Mot, Woy Wali Iram! Sedue kon eygo genam gabe! Genam eygo Mot yakua suing. Mot se klong!” 10 Simon go andua temu, Sebedeus go danonnang Yakobus ey Yohanes ey, ngga kalik dali. No, Simon no Yesus lo gemang pu, “Suali kua tra! Nggeasui go sik so, Woy Wali Iram tamlak go blongdon duduing no keng genang sikabung mlak genang so mot gabe wawi.” 11 Yang! Dasi so memlak go taut bayi ey naklay itak go, Yesus no keng go nemotnang gemang klong-lak.
Sedue yaulat eygo Yesus lo pali go
12 Ku meno no, yakena meno so Yesus got-tenawon. Yakena ngga sogo sedue klaya, nemot go saysuk naklay yaulat ey a gemang. Kekayso Yesus mit no gemang ip-nawon. Sedue ngga Yesus ikum go segabuem unuik gono, ngge kalik gemang pu-nawon, “Esang Aya! Genam no Mot se tebok! Mot iwat go, genam go sadui se pali!” 13 Yaulat eygo sedue lo usi go tup gono, sedue ngganemot sono Yesus ta sra go mlak gono, gemang we-tenawon, “Yang, seni so! Genam mo iwat, mot go sadui se pali.” Se ikum: woy ngganemot no, sedue ngga go yaulat kekayso se pali-anatun. 14 Ngga ey, tegadi ngge kalik sedue ngga no Yesus lo gemang pu-nawon, “Mot go saysuk no lemoy go ngge sikabung nogo kua penklong!” No, taitisopuit go trang no mot go saysuk-a klong go se taling! Mot seni so pali go, nemotnang lo mea yang. Ngga ey, Musa logo demutrui kalik taitisuey pu genang taiti se iti go puit. Ngga taling golo, ibe senong genang, “Seni so, mot go yaulat Ki Wali Iram logo so mo pali.”
15 Nemot-a kua pen so Yesus lo pu go, no Nemot sogo iway masikap so gemang kap. Ngganemot nogo, Nemot go nebut tup sogo, sadui eygo pali genang so, Yesus mit no nsrung-nsrung ey gemang pluep-lak. 16 Ngga sik sogo, dewi pu so sip kluim kua gono Yesus gemang nawon.
Piam konkebamling Yesus lo suep go
17 Ku meno so, sikabung so nguok-tenawon gono, sedue Parisi ey Musa logo demutrui so nguok go klui ey Yesus mit so gemang. Yakena-yakena meno sik so nemotnang mo weng: nan Galilea sik sogo, nan Yudea sik sogo, nggano Yerusalem sik sogo gemang dali. 18 Se ikum: sedue yambi sogo meno andua-andua lo lek go Yesus go dabui ba no tui so, gemang degut-nenawon. 19 No, seboy idi yam so woy-banu pluep golo mo kenok, yatap blo nogo ey ip-lak. Ngga tang so, yap bloda no klak go, put-a tenuing go, sedue yambi kebleng ey tegan lo keduik gono, put ngganemot ba lo leguit go Yesus go dabui ba no gemang tui. 20 Yang! Dabui lo nemotnang Yesus no keng go ikum go tang so, sedue yambi sono ngge kalik gemang pu-nawon, “Dem! Mot go kuklue piam konkebamling mo suep gabe.” 21 Musa logo demutrui so ngunguok go klui-klui Yesus lo pu go tup gono, ngge kalik dabui ba lo gemang duing-netenawon, “Ye, nebut piam go sedue ngge lo we-siwon go. Suali kua go be, ngga kalik pu golo Ki Wali Iram ey wayang go. Sikabung go kuklue piam konkebamling Ki Wali Iram logo so mea suep.” 22 Nemotnang go kunala ngga, Yesus mo senong. Ngga ey, nemotnang no gemang pu-tenawon, “Sogo so, ngga kalik go kunala dabui ba lo duing-ketogoy? 23 Sedue yambi ngga sono At lo pu go, ‘Mot go piam mo suep!’ Ngga kalik go mea duing, ‘Ngga nebut-a pu go! No, tasam ngga seni ey?’ No, At lo pu go, ‘Bong-a ip-a!’ Ngga seni so lemoy go, sogo kalik motnang logo ya duing? 24 Motnang senong sogo, Blong Dem, Blong Dia yakena sik so weng go Genam gabe. Sikabung go konkebamling suep genang don Genam sono Ki Wali Iram lo mo iti gabe. Ngga taling genang so tasam ngge gabe semu-situgu.” Ngga ey, sedue yambi sono Yesus lo pu go, “Bong-a! Sip srek lek go yap no se klong!’ ” 25 Kekayso sedue yambi ngga ip go sipsrek ey lek go pung go, woy-banu gemang ikum-nenawon. Ngga ey, yap sono koklong go, Ki Wali Iram sono go taitisuey ey, gemang kong-siton.
26 Tasam ngga ikum go sikabung mata sogo, ta wasrang gemang glok-nenawon. Ngga ey Ki Wali Iram sono go iway ey taitisuey eygo-a gemang iti-netenawon, “Yang! Nggeasui go ku no, imotnang maning kua ikum go tasam, mo ikum gabe.”
Blasteng so iyaluim go Lewi dem Yesus no keng go
27 Yap ngga ba sik so Yesus pung gemang klong. Ngga ey, sedue klaya duo, Lewi gemang ikum-nawon. b Nggano, Yesus lo gemang pu-nawon, “Genam no mot-a keng-a!” 28 Ngga ey, kekayso ip-nawon go, Yesus sono Lewi dem se keng-dapnawon. Yap ngga ba sik sogo taut ey naklay gemang itak-nawon. 29 Nggano, yap ba no, Yesus nogo walop kangok go Lewi lo gemang semu-nawon. Sikabung mata so pluep-anatun go blasteng so iyaluim go sedue temu, nggano sikabung temu, gemang dali.
30 No, esang! Sedue Parisi ey Musa logo demutrui so nguok go klui-klui ngga kalik ikum go, dabuipiam Yesusnang nogo gemang tra-nenawon. Ngga ey Yesus go andua-andua no gemang pu, “Esang! Blasteng so iyaluim go ey, kuklue piam konkebamling eygo sedue temu ey Yesus ne dedam!” 31 Way so Yesus lo pu go, “Sogo tang so, nemotnang ey klay gono yakua dam? Sadui eygo logo so, saduisopali go mea wet. Sadui kua go logo mea kua wet. 32 Yang! Naklay dega go sikabung usi so Genam kua weng. Kon eygo sikabung-a uwet so, Genam mo weng gabe!”
Walop-a kokong go genuing-a suing go
33 Tandali sedue Parisi lo pu go, “Yesus! Tenday genuing ey dewi pupu go, Yohanes Busotuigo go andua ey sedue Parisi eygo-a gabe suing. Mot-a, andua ey ten-a dedam bu ne drop.” 34 Ngga ey, way so ngge kalik Yesus lo gemang pu-nawon, “Kabung dok genang walop no yakay ey susuing go sedue, ten-a mea dam, bu-a mea drop. Andua-andua genuing eygo sogo so ya suing? Kua! Se duing: sedue ngga andua-andua maning go, genuing yakua suing. 35 No, ku gemang! Nemotnang sik sogo sedue ngga wawi gono, nemot nogo dabui duing go tang so tenday genuing ey mea suing.” c 36 Se duing dali: kunala banim go ey, wali inim eygo yakua kluing. Ngga taling genang, benuey ngge-a Yesus lo gemang pen, “Nago so mo, dan inim don eygo lo keba buin go put sebut go? Ngga kalik sebut go, keba put kangok dega so mea wok. 37-38 Ngga kalik dali so, anggul bu don eygo, bot buin go ba nogo yakua sre. Bot banim go ba no sre go, bot tegek go, anggul bu ku no mea pi. Ngga ey, bot ey, anggul ey tebadali mea betep. No, anggul inim sre genang, negum inim don eygo dali ba no se sre! 39 Way so, anggul banim goso dedrop go logo mea pu, ‘Anggul banim go-a suey dato. Anggul inim nueya!’ ”