9
Sedue yambi Yesus lo pu gono masi ip go
1 Nan Gadara sik so, tandali bayi no klak go, Yesus gemang klong, e... bu ketang ngga idi no, nemot go yakena no gemang pung. 2 Yakena no pung gono, Nemot sono sedue yambi sipsrek no king go, sikabung lo lek go gemang weng. Nemotnang go dabui klaya iti go keng go, Yesus ikum go, sedue yambi sono ngge kalik gemang pu-nawon, “Andua! Yakay ey se! Mot go piam, konkebamling mo suep.” 3 Musa logo demutrui so ngunguok go klui-klui temu, ngga kalik Yesus lo pu go tup gono, gemang duduing, “Ye! Ki Wali Iram so wayang go nebut Yesus lo mo pu-won.” 4 No, kunala ngga Yesus mo senong. Ngga ey, ngge kalik gemang pu-tenawon, “Kuaseni go kunala, dabui ba logo sogo so duing-ketogoy?” 5 Motnang se pen! Nago-a ide dega ey? Sogo kalik go-a Genam ya pu? “Mot go piam mo suep-a?” ya pu? Kua go, “Mot ip go, klong-a?” 6 No, nueya, At tang so mea taling. Motnang se senong, “kukunan ngge nogo Genam Ki Wali Iram sik so weng go Blong Dem no, kuklue piam konkebamling suep genang don mo iti gabe.” Ngga ey sedue yambi sono Yesus lo pu go, “Ip-a! Mot go sip srek lek go, yap no klong-a!” 7 Nggano, sedue ngga buong go, nemot go yap no gemang klong! 8 Tasam ngga ikum go, ngga sogo sikabung, suali ey Ki Wali Iram no ngge kalik ta gemang kokong, “Wali Aya, mot klum eygo! Sedue go ta sono, don ngga kalik go iti go, ngga teguop.”
Yesus sono Matius dabui lo keng go
9 Ngga sik so Yesus koklong gono, blasteng so iyaluim go yap ba sogo sedue meno gemang ikum-nawon. Sedue ngganemot go sui: Matius. Nggano, nemot so Yesus lo gemang usi-nawon, “At no ba keng-a!” Ngga ey, Matius ip go Yesus sono gemang keng-nawon.
10 Ngga blo idi lo, Matius go yap ba no ten dam sogo no, blasteng so iyaluim go ey, sedue kon eygo temu mata so pluep gono, Yesusnang ey klay gono ten gemang dam-netenawon. 11 Sedue Parisi tasam ngga kalik ikum gono, Yesus go andua-andua no gemang pen-netenawon, “Sogo-sogo so, blasteng so iyaluim go sedue, nggano sedue kon eygo temu eygo klay go nogo ten motnang go Klui dedam?” 12 Ngga kalik sedue Parisi lo pu go tup gono, way so nebut yatrang-a ngge kalik Yesus lo gemang pu-nawon, “Sadui eygo sedue logo so, sadui susuey genang sedue mea wet. Sadui kua go sedue logo, sadui susuey genang sedue ya kua wet.” 13 Walinebut ngge go seni suey so motnang se duduing. Ngge kalik Wali Sam klaut ba no mo klik gabe, “Klum-a sikabung lo tetaling go, yakay ey At lo gabe iti. No, taiti pupuit genang menay-a, Genam moyso.” a Wali Nebut ngga sik so gabe senong, “Kuklue piam konkebamling eygo sikabung wet go wawi genang so, Genam weng go. No, mo suey dega go sikabung wet genang so, Genam kua weng gabe.”
Ki Wali Iram nogo duduing tang so genuing tenday susuing go
14 Ngga blo idi lo, Yohanes Busotuigo go andua-andua weng go Yesus no gemang usi-netenawon, “Sogo temoy no atnang, Yohanes Busotuigo go andua-andua ey sedue Parisi eygo-a Ki Wali Iram nogo duduing tang so genuing tenday go ne susuing, no, Mot go andua-andua ngga kalik go, kua suing ne?” 15 Ngga ey, way so ngge kalik Yesus lo gemang pu-nawon, “Yatrang ngge no se duing: sedue no, kabung dok genang walop so pluep go, yakay ey, ten-a dedam, bu-a dedrop, tenday go suing genang kua! Sogo tete so, Nemot go andua-andua genuing eygo ya suing?” Nggano Yesus lo pu go, “No, ku meno so, kabung dok genang sedue Genam ngge, mlak gono genuing tenday go mea suing dali.”
16 Genam lo taling go walitap inim, kunala banim b go ey klay gono yakua klong. Yatrang ngge-a se ikum: nago so mo, amka inim don eygo lo amka buin go put sebut go? Ngga kalik sebut go, amka put kangok so mea tegek. 17 Ngga kalik dali, anggul bu don eygo, bot buin go nogo ya kua sre. Bot banim go ba no sre go, bot tegek go, anggul bu ku no mea pi. Ngga kalik go, bot ey, anggul ey tebadali mea betep. No, anggul don eygo, bot inim don eygo ba no sre go, nemotnamon, yangga walitap ey kutrui go tap eygo, suey so bot ey mea gigit.
Kabung denok kebong go Yesus lo nglong go
18 Nebut maning pen-tenawon gono, Yahudi go dewi yap sogo wengkabui weng go, Yesus go masi ba no unuik go gemang pu-tenawon, “Aya dem! At go debuisop nggeasui ip-batun go se. Nemot blo no ta-a pla tui ba lo tandali nemot wali sogo be!” 19 Ngga ey, Yesus ip go Nemot go andua-andua ey, sedue ngganemot sono gemang keng-nenawon.
20 Seni so! Nemotnang koklong gono, kay seguong, kabung meno kin sadui eygo, mesip so Yesus no gemang keng. Ngga ey, Yesus go amka sring no ta lo gemang tuing-natun. Yagui 12 yam no, sadui ngga kabung ngga lo srek go. 21 Yang, ngge kalik kabung ngga dabui ba lo gemang duduing, “Yesus go amka no ta lo tuing go, at go sadui ngge mea suey.” 22 Yesus taton no lekek gono, kabung ngga gemang ikum. Ngga ey ngge kalik gemang pu-tenawon, “Mia sop, yakay-a! Dabui lo mot keng go tang so, mot go sadui suey go gabe.” Yang, ku ngganemot sik so, kabung ngganemot mo pali.
23 Yesusnang koklong go, Yahudi go dewi yap wengkabui go yap no pung go, ngge gemang ikum-nenawon: sitemoy so uwawi go sikabung mata dega so ku ey uwaluk. Temu lo uyagui kukluo, temu lo don iti genang so suling-a u-u. 24 Nggano, Yesus lo gemang pu-tenawon, “Motnang ngge sik sogo ka! Yap no se klong-lak. Kabung denok ngge kua kebong, usene so srek go.” No, Yesus go nebut sogo nebleng seguo-a nemotnang lo gemang betep-nenawon. 25 No, sikabung naklay yam so yat-nawon gono, Yesus degut go, denok dato go ta mlak gono, nglong go gemang buong-natun.
26 Tasam ngga lemoy go deguo, nan ngganemot nogo keda so masi kap so gemang kap.
Nemu pung go sedue namon Yesus lo pali go
27 Yesus tandali tap lo koklong gono, nemu pung go sedue namon mesip so keng go, kangok so ngge kalik gemang usi-klesiton, “Iram Daut go danon! Atnang nogo klum tra-ya!” 28 Ngga kalik go senang so u-usi go, e... yap meno ba no Yesus gemang degut. Sedue namon yap ngga no pung dali go, Yesus mit no gemang degut. Ngga ey, nemotnamon no Yesus lo gemang pu-nawon, “Dabui lo seni so motnamon kekeng? Nemu At logo ya pali-lu?” Way so nemotnamon lo pu go, “Aya klui, ngga seni se lemoy!” 29 Nggano, nemotnamon go nemu no ta Yesus lo tuing gono, ngge kalik gemang pu-nawon, “Dabui lo mot namon keng go kalik, ngga se lemoy!” 30 Ngga ey, nemotnamon go nemu kekayso gemang pli. Nggano, don ey Yesus lo gemang pu-nawon, “Se senong! Sikabung ibe nogo tasam ngge kua pen!” 31 No, esang! Nemotnamon koklong go Yesus sogo deguo, nan ngga naklay seding no-seding no gemang pen-klesiwon.
Sedue mawo naliwabu lo degut go Yesus lo suey go
32 Yap ngga sik so tandali klong go nogo, Yesus mit no sedue mawo nali lo degut go gemang wawi. 33 Ngga ey, naliwabu kuaseni go ngganemot Yesus lo yat gono, sedue mawo lo nebut gemang tuot-nawon. Tasam ngga ikum go, sikabung mata sogo ta wasrang-a gemang glok. Nemotnang lo gemang pepen, “Nan Israel nogo tasam ngga kalik go maning kua ikum.” 34 No, sedue Parisi lo pu go, “Ngga Kupiamgo don lo naliwabu Nemot logo gemang iyat.”
Sikabung mata sogo no Yesus klum tra go
35 Se senong: yakena kangok go, seguay gono Yesus koklong go, Yahudi go dewi so pupu go yap-yap ba no gemang ngunguok. Nggano Woy Wali Iram go blongdon duduing lemoy go deguo teguop gemang pen. Ngga ey, sadui dalu ey sadui-sadui meno eygo Yesus lo gemang pali-sing. 36 Seni so, tap nega go kalik nsrung-nsrung ey sikabung mata dega so, Nemot no keng go, ikum go, klum gemang tra-nawon. Yang! Sikabung ngga, yam so mo lasu. Esang! Nemotnang ngga yay so susuing golo banom itak go, domba i-inya go kalik gemang. 37 Ngganemot no, Nemot lo kuoy go andua-andua sono Yesus lo gemang pen-tenawon, “Seni so lo: sikabung walitap wawi genang, wasma kalik mata so gabe seseni. No, ngga nguok genang kebali sedue-a, mata so kua gabe. 38 Ngganemot sogo so, wasma so semu go sono, ngge-a se wadong: kebali ngge semu genang kebali sedue, Nemot lo se pu go weng.”