5
Sedue namon ba sik sogo nali Yesus lo yat go
1 Ngganemot no, Yesus, andua-andua ey, bu Galilea ketang ngga idi, sikabung Gerasa lo susuing go sip no gemang tebok. 2 Demening bayi blo sik sogo Yesus li gono, simu blo sik sogo sedue klaya duo Nemot ey tegu so tap sono gemang weng. Sedue ngganemot naliwabu go don lo mo degut. 3 Sip ngganemot demu put ba so nemot gemang susuing. Sedue ngga, don dega ey nggano iseng ey. Nemot-a, tamasi tegan dok go, ta yakua mlak. 4 Yang! Da mata so lante tegan lo tamasi dok go, don dega ey golo lante mo utuik-sing. Tamlak go tebung genang, sedue klaya duo logo don kua. 5 Kuklik-kublong, simu blo lo, ku meduim blo lo, wak ey nemot gemang uwet. Ngga ey, nemot tang so, saysuk temoy demu lo gemang bubut. 6 Bayi ba sik so Yesus li go, ket sik so ikum-siwon go, kekap go Yesus go masi ba no unuik go gemang got-nawon. 7-8 Ngga Yesus ikum go, ngge kalik nemot sono gemang bebat-siwon, “Ey, nali piam go! Keda so sedue ngge ba sik sogo mot se pung!” Ngga ey, Yesus sono kayang ey kangok so sedue ngga lo bega-kunton, “Ey, Yesus, Ki Wali Danon! Sogo so genam mit nogo Mot uweng? Ki Wali Iram go sui no gabe pu-situgu, ‘Genam nogo iseng kua taling.’ ” 9 Nggano nali sono Yesus lo gemang usi-won, “Mot go sui, nando?” Sedue ngga ba sogo nali lo pu go, “Genam go sui, Legion.” Nemot go seni: mata dega so. 10 Don ey, sedue ngga ba sogo nali lo Yesus no gemang wadong, “Sip ngge sik sogo, atnang yat go kua pung!”
11 Se ikum! Woy ngganemot nogo, sip ngga sogo tablang ba lo ten so uwet go nebo daley gemang. 12 Nali ngganemot nebo ikum gono, Yesus no gemang pu-nawon, “Nebo daley ngga ba sono pu go atnang degut-a.” 13 Ngga, Yesus lo yang-siwon gono, sedue ngganemot ba sik sogo naliwabu pluep-lak go, nebo daley ba sono gemang degut-lak. Ngga ey, day ba sono nebo daley ngga kuek go, bu ba no pung gono, bu lo nasup go gemang leguot-lak. Nebo daley ngga, tagu i go 2000 yam no.
14 Ngga tup go ikum go, nebo yay sogo sedue, kekayso yakena-yakena sono kuek-nebiwon go, sedue no lemoy go ey, nebo eygo no lemoy go tasam gemang pen-nesiwon. Ngga kalik tup go sik so, sikabung yakena-yakena ngga sik sogo weng-lak go, tasam ngga ikum genang so. 15 Yesus mit no pluep-lak go, ikum-nenawon, “Ye! Naliwabu miam eygo lo degut go, nggeasui go amka suey go kok go, kunala suey so tandali lemoy go be got-ton!” Ngga kalik so ikum-newon go, suali kangok so nemotnang gemang tra. 16 Ngga ey, nemotnang no, sedue ey nebo ey gono sogo kalik so tasam lemoy go naklay gemang pen-sing. 17 Ngga ey, don ey nemotnang lo gemang ka-nenawon, “Ngge sik sogo Yesus nase klong!”
18 Yesus bayi ba no keklak go nogo, sedue nali lo degut go suey go ngga lo, Yesus no gemang we-nawon, “Mot ey klay golo genam suing sogo se!” 19 No, Yesus kua yang-srenawon. Way so sedue ngganemot no Yesus lo gemang pu-nawon, “Yap sono mot klong go, mot go sikabung nogo, mot nogo sogo kalik go tasam kangok go Woy Wali Iram lo pluok go, nggano klum kangok go Nemot lo taling go-a se pen-sing!” 20 Nggano, sedue ngganemot nawon go, yakena-yakena nan Dekapolis sogo no tasam kangok go Yesus lo pluok go gemang pen-asiwon. Nebut ngga tup go sikabung naklay ta wasrang ey gemang glok-nenawon.
Kabung kin sadui sogo ey denok sadui sogo ey Yesus lo suey go
21 Tandali bu ngga idi sono Yesus bayi lo pung go, sikabung mata so Nemot ey tegu genang so gemang weng-lak. Ngga ey bu ketang no Yesus gemang got-nawon. 22 Se ikum! Sedue meno, nemot go sui Yairus. Nemot Yahudi go dewiyap sogo wengkabui meno dali. Yesus ikum gono, Nemot go masi ba no segabuem gemang unuik-nawon. 23 Nggano, dabui lo Yesus sono gemang wadong, “Aya dem! At go debui sop nggeasui ip-batun go se! Mot sang weng-a, nemot blo no ta-a pla tui ba lo, tandali wali sogo be!” 24 Ngga ey, Yesus ip go sedue ngganemot no gemang keng-nawon.
Sikabung mata so way-way so nsrung-nsrung ey Nemot no keng-lak. 25 Sikabung mata sogo ngganemot eygo, kabung klaya gemang. Kin sadui so nemot lo srek go, yagui 12 yam so. 26 Idekeba kangok so nemot lo mo tra. Da mata so dokter-dokter no mo klong. Seni so, nemot go taut ey duoy ey sadui ngga so mo tega. No, maning kua suey sang, sadui-a tandali ne i-ide. 27-28 Yesus sogo nebut, kabung ngga mo tup. Nemot lo duing go, “Yesus go amka no ta lo tuing go, kekayso sadui ngge mea suey.” Ngga kalik duing goso, sikabung nesip ba lo Yesus mit sono klong go, taton sik so Yesus go amka no, ta gemang tuing. 29 Kayseguong so, nemot go kinsadui gemang tong. 30 Woy ngganemot no, Yesus go saysuk ba sik sogo don pung go gemang tra-nawon dali. Ngga ey, sikabung sono iwot go gemang usi, “Genam go amka seding nogo nando lo tuing-won?” 31 Way so, andua-andua lo we-nenawon go, “Esang Aya! Mot tang so mo ikum. Mot sono nggablo-nggablo sikabung weng-lak go. No, Mot lo usi go, ‘Amka seding nogo nando lo tuing-won?’ ” 32 Yesus iwot-siwon go, nemu so totong, Nemot go amka nogo ta, nando lo tuing. 33 Kabung go saysuk no lemoy go senong-tun go, tamasi bobong ey, suali ey kangok so gemang tra-natun. Ngga ey Yesus go suongku no, segabuem unuik go, tasam lemoy go naklay gemang pen-natun. 34 Ngga ey, kabung ngga no Yesus lo gemang pu-nawon, “Debui sop, yakay ey! Dabui lo keng go tang so, mot mo sesuoy gabe. Se klong! Mot go sadui naklay mo pali gemang!”
35 Maning kabung ngganemot ey nebut so Yesus pepen, Yairus go yap sik sogo deguo sedue gemang weng-lak. Ngga ey, Yairus no gemang pen, “Aya, mot go duo mo kebong-batun! Tebadali Klui pu go ya klong sang?” 36 Deguo ngga tup gono, Yairus no Yesus lo gemang pu-nawon, “Suali kua tra, dabui-a klaya Ki Wali Iram sono se iti.” 37 Nggano, sedue temu keng genang Yesus kua pu-srewon, no, Petrus, Yakobus, nggano ntaton Yohanes, seguong-a keng go gemang klong. 38 Yairus go yap no pung go, Yesus nemu yalap go, sitemoy so wawi go sikabung mata so ku ey uwaluk. 39 Degut-sawon gono, sikabung no gemang pu-ton, “Sogo kalik go u so motnang kluo-ketogoy? Duo ngge kua kebong wa! No usene nemu so srek-tun go!” 40 No, nebleng seguo-a Yesus go nebut sogo gemang betep-netenawon.
Ngga tang so, yap ba sik sogo, sikabung ngga Yesus lo gemang yat. No, unen-nglangin ey andua eygo-a duo temoy so wawi go degu sono gemang degut. 41 Duo go ta no mlak gono, Iblani nebut so Yesus lo gemang we-nawon, “Talita kum!” nemot go seni, “Debui sop buong-a!” 42 Woy ngganemot dali no, kekayso denok kebong go ngga buong go, gemang ip-natun. Ngga ey gemang uwet-tenatun. Nemot go yagui 12 yam no mo pung. Ngga no pluep go sikabung naklay, tawasrang-a gemang glok-netenawon. 43 Nebut don ey Yesus lo gemang pu-nawon, “Tebadali dia lo tasam ngge lemoy go kua penklong, sikabung senong genaning.” Ngga ey, Yesus lo pu go, “Duo ngge ten iti go nase dam!”