4
Usu kebali sedue no didon idok go
1 Ku meno no, tandali Galilea bu ketang logo yakena-yakena no deguo teguop Yesus lo gemang nguok-siton. Ngga ey, sikabung miam dega ey nguok genang so gemang pluep-lak. Nemotnang nesip no Yesus-a betep-nenawon. Ngga ey, Sikabung miam dega ey pluep go bu ketang lo ip-lak tang so, bu ketang sogo bayi meno blo no klak go Yesus-a gemang got-nawon. 2 Walitap mata so nebutbenuey so Yesus lo gemang nguok-nawon, nggano ngge kalik gemang pen-tenawon, 3 “Se tup-lak! Usu kebali sedue klaya gemang. Ku meno no, didon bluim so gemang nawon. 4 Didon ngganemot bluim-siton go, temu tap ketang no gemang bluim-asitun, ngga ey wi pling go uweng golo didon ngga yam so ne dam-nesiton. 5-6 Nggano, temu nan demu eygo blo lo gemang net. Didon ngga tip keda seni so pung go, nan pupuem kua go nogo. No, wadikua go woy sagon-sagon pli go lemok golo didon tip pupung go ngga, nan ba no srang kua degut go nogo kekayso kuok go gemang lekuoy-anatun. 7 Ngga ey, temu dali teganwong diding eygo nesip ba lo gemang net. Ngga ba no didon tip pung go, diding wong uwalong golo pok go, yangu go kua kangok, seni kua tagot. 8 No, nan suey go blo no bluim go-a, tip pung go yam so babu go, seni ey gemang tagot. Didon ngga seni nemotgoda-nemotgoda so gemang buo-sing. Da nangglik sogo tete, dan taidi sogo tete, ngga ey da tanamon tete sogo gemang buo-sing dali.” 9 Yam so nebutbenuey ngga pen gono, sikabung sono Yesus lo gemang pu-tenawon, “Nando kama gemang go nebut ngga se tup!”
10 Yesus banom gono, Nemot lo kuoy go andua 12 ey sikabung temu ey Nemot sono gemang weng-lak. Ngga ey, Yesus no gemang pu-nenawon, “Nebutbenuey ngga go seni atnang nogo pen-a!”
11 Ngga ey, nemotnang no Yesus lo gemang pen-anawon, “Yang! Sikabung ibe, Woy Wali Iram tamlak go blongdon duduing yakua senong. No, nggeasui go, motnang nogo-a senong ngga mo iti, Woy Wali Iram go blongdon nogo senongduduing. Ngga tang so, dabui lo Ki Wali Iram no kua keng go sikabung nogo-a, nebutbenuey so mea pepen.” 12 Ngga kalik Genam lo nguok go, Wali Sam klaut ba no ngge klik go ey mo kerlam,
“Yang! Nebut ngga tup go dabui lo keng go,
nemotnang go wali buin itak go,
nemotnang go kuklue piam konkebamling,
Genam lo gemang ne ya suep.
Nueya! Nemot-a nemotnang lo mea tup,
seni-a mea kua senong.
Nemot-a mea ikum, no, seni-a yakua mlak.” (Yesaya 6:9-10)
13 Nggano, ngge kalik nemotnang no Yesus lo gemang pu-tenawon, “Nebutbenuey ngge go seni motnang tang go kua mlak go, sogo kalik go tap lo nebutbenuey temu go seni ya senong-kelo?” 14 Nebutbenuey ngga go seni ngge kalik: usu kebali sedue ngga, Ki Wali Iram go tamot, deguo teguop so penklong go. 15 Tap ketang lo net go didon ngga, deguo teguop so tup go sikabung. Nemot-a tup gono, walong kua luik gono, Kupiamgo pung go, dabui ba sik sogo deguo teguop ngga gemang idok. Ngga ey, sikabung ngga deguo teguop se kay. 16 Nan demu eygo blo no bluim go didon ngga, deguo teguop tup go, keda so yakay ey keng go sikabung. 17 No, deguo teguop srang ey dabui ba nogo kua king. Ngganemot nogo, walong so don eygo kua suing. Koywong iseng deguo teguop tang so tegu go, keda so wayang go ngga sono mea itak. 18 Diding wong eygo ba no pung go ngga, sikabung deguo teguop nemot-a tup go, no, dabui logo suey so kua keng. 19 Suali kangok so sikabung temu no tra golo, duoy kunala so lekluik go, kukunan nogo kunala piam-piam lo, Ki Wali Iram sik sogo deguo teguop tegandiding logo kalik so gemang pok-sing. Ngga tang so, seni eygo yakua lemoy. 20 Nggano, nan suey go blo no bluim go ngga, deguo teguop ngga tup go dabui keba ba no suey so king go sikabung. Ngga ey, deguo teguop seni ey mata dega so gemang tagot. Seni ngga, da nangglik yam sogo, da taidi so yam sogo, nggano da tanamon yam sogo gemang tagot dali.
Sagoy neblong nogo nebut
21 Ngganemot no, ngge kalik go nebutbenuey meno sikabung mata sogo no Yesus lo gemang pen-anawon, “Sedue lo sagoy blon go, saula kabui logo yakua kebet. Nggano sip srek masi ba nogo yakua kong. Ngga kalik kok go, ibe logo blong ngga mea kua ikum. No, yap dabui ba no sagoy blon go ngga se tui! Ngga sogo so, yap ba naklay mablong so mea itak. 22 Se senong! Banim nogo, Ki Wali Iram go nebut ibe nogo maning kua taling. No, nggeasui go, nebut ngga motnang nogo mo iti. Ku santegun go nogo, nebut ngganemot sikabung meno mea senong dali. Ngga banim nogo sikabung meno no maning kua taling go nebut, neguon so nemotnang lo mea ikum. 23 Ngganemot sogo so, nando kama gemang go suey so se tup.”
24 “Se duing! Genam go nebutpen go motnang lo suey so duing go, motnang senong genang Ki Wali Iram lo mea tebok. Ngga ey senongduduing mata so motnang nogo, Nemot lo mea iti. 25 Genam go nebut nogo nando kunala eygo, nemot nogo senongduduing kangok so mea iti dali. No, nando go kunala, Genam go nebut nogo kua keng go, nemot ba sik sogo kunala blong seguay go ngga, tandali mea sok.”
Wasma kuali go tip pupung go kalik
26 Yesus tandali nebutbenuey meno gemang pen-anawon dali. Woy Wali Iram tamlak go blongdon duduing lemoy go, sikabung miam eygo yakua senong, e... Ki Wali Iram lo sikabung naklay neyboy go kuoy genang ku no mea pung. Ngga, usu kuali so klong go sedue kalik gabe. 27 Ku klik go nemot usene so mo srek. Ku blong go nogo nemot gemang buong. Kuklik-kublong didon ngga tip pung go yam so walong. No, sedue ngga kua senong-srenawon, sogo kalik di ngga tip pung go un ey mo lemoy. 28 Nan ba sik so wasma ngganemot seni gemang tagot. Un kong go, un sik sogo tega pung go, tega temoy no seni mea tagot. 29 Ngga ey, sedue ngga ikum go, didon seni buo yam no mo pung. Ngga ey kekayso tengang lo mea ibot-sing.
Didon seguay go babu dega so pung go
30 Ngga ey, ngge kalik Yesus lo gemang usi, Woy Wali Iram go blongdon duduing pung go. Sogo kalik go nebutbenuey lo ya pen-alu? 31 Nemot go sikabung miam ey, didon seguay go kangok dega so lemoy go kalik. Sedue meno lo didon seguay seni go iti go, nan ba no gemang kuali. Didon ngga seguay dato seni kukunan blo sogo ey kua kerlam. 32 No, didon ngganemot pung go, kangok so mea walong, di meno eygo yakua kerlam. Nemot walong dega, nggano kali-kali mata dega so mea but-sing. Nggano kali-kali blo no wi pling go uweng go gualing go, ut gemang klik. Ngga ey ngga blo so mea susuing-lak.
33 Nebutbenuey mata sogo ngga kalik pen golo, sikabung walitap senong genang gemang nguok. No, nemotnang go senongduduing no pung go, mea nguok. Ngga blo no kua. Nemotnang go senongduduing nago yam so? 34 Sikabung nogo walitap, nebutbenuey ba seguong lo gemang nguok-nawon. No, Nemot seguong-a banom Nemot go andua-andua eygo, nebutbenuey go seni naklay dia sono gemang pen.
Bualui ey nebit ey Yesus lo bebat gono tebung go
35 Ku ngganemot nogo use woy yam no pung go, Nemot no keng go andua-andua no Yesus lo gemang pu-tenawon, “Weng-a! Imot bu ngga idi sono ya iseyon go.” 36 Sikabung mata sogo-a, ngga no gemang itak. Sip ngga sik sogo, Yesus wawi go bayi klaya gono klak go nemotnang gemang klong. Sikabung temu bayi-bayi meno blo no blongot go gemang keng dali. 37 Walong so maning kua klong gono, nebit kangok go gemang iti. Ngga ey bualui kangok go gemang kong dali. Bayi ba nogo bu ey tetey go bayi ngga, bu lo yam so se dedamoy. 38 Woy ngganemot nogo, bayi metuk mesip temu blo lo iwonedi tui go usene so Yesus mo gemang srek. Nggano, Nemot no keng go andua-andua lo gemang senglok-netenawon, “Aya, imot go bayi yam so bu lo kekenok go se! Mot duing-a! Imot bu ba no ya leguot-eyon?” 39 Yesus bong go, sagui kangok so gemang kong-nawon. Ngga ey, bualui sono gemang bebat-nawon, “Nebit tebung-a!” Woy ngganemot no bualui ey nebit eygo naklay se tebung-anatun. 40 Nggano, Nemot no keng go andua-andua no gemang pu-tenawon, “Sogo kalik go sik so, motnang suali kangok so tra-keto? Sogo-sogo so, dabui logo Genam nogo don ey motnang kua keng?” 41 Nemotnang suali kangok so tra-nenawon go, way-way so gemang usi-netenawon, “Sedue ngge nemot, nago kalik go sedue, Nemot go nebut nogo, bualui ey nebit ey, da klaya tup go mo tebung.”