13
Didon so bubluim go sedue
1 Ngga ey, ku ngganemot nogo yap ba sik so pung go bu ketang no Yesus gemang got-nawon. 2 Bu ketang so got-tenawon gono, miam dega ey sikabung pluep-lak go, nemotnang nesip no Yesus-a gemang betep-nenawon. Ngga sogo so, sikabung miam eygo-a itak go, bayi metuk blo sono way so Yesus-a klak go gemang got-nawon. 3 Bayi blo no suing gono, Woy Wali Iram tamlak genang duduing, nebut benuey so ngge kalik miam ey Yesus lo gemang pen-anawon, “Se tup! Sedue meno gemang. Nemot usu no klong go, didon bubluim genang so.” 4 Didon temu tap ketang no bluim-siton. Bubluim go ngganemot wi pling go uweng golo, didon yam so ne dam. 5 Nggano, nan demu eygo blo lo temu gemang bluim dali. Sip ngganemot nogo nan plap-plap so, nan babu kua go nogo, didon ngga tip keda so gemang pung. 6 Nan ba sono srang suey so kua degut go nogo, woy keklak go nengkoy lo tip ngga kuok go se lekuoy-anatun. 7 Nggano, temu dali teganwong deding ba no gemang bluim. Ngga ey, didon tip ey teganwong-diding tip ey kerlam so gemang pung. No, esang! Teganwong deding eygo lo di tip ngga pok go, se newi-anatun. 8 Se ikum! Temu, nan suey gono bluim go tete-a, tip pung go, e... seni nemotgoda-nemotgoda so gemang tagot-anatun. Seni tagot go ngga, da 100 yam so tagot go, da 60 yam so tagot go, nggano, da 30 yam so tagot go, ngga ey gemang buo-nenawon. 9 Ayanang, mianang! Nando kama gemang go, nebut ngge suey so nase tup.
10 Nebut benuey ngga yam so Yesus lo pen-nawon gono, Nemot go andua-andua weng go, ngge kalik Yesus no gemang usi-nenawon, “Sogo kalik goso sikabung miam dega eygo nogo Woy Wali Iram tamlak genang duduing, nebut benuey so pen-ato?” 11 Ngga ey, Nemot go andua nogo Yesus lo gemang pen-anawon, “Nebut benuey so At lo pen go, kua keng go sikabung lo Woy Wali Iram go tamlak genang duduing kok go, senong genaning. No duduing ngga senong genang don, motnang nogo Ki Wali Iram lo mo iti gabe.” 12 Se senong! Woy Wali Iram tamlak genang senongduduing, nando lo uwawi go, nemot nogo-a tebok go miam eygo so mea lemoy. No, nando ba sogo kua uwawi go, nemot lo uwawi go-a, tandali Ki Wali Iram lo mea idok. Ta ulue so nemot-a mea itak. 13 Nemotnang nogo nebut benuey seguong so Genam lo pepen go, ngge kalik: Esang, nemot-a nemotnang mea ikum, no ya kua senong. Nemot-a tup go, no ya kua mlak. 14-15 Nemotnang nogo, walinebut nabi Yesaya lo pen go ey, mo lemoy gabe,
“Motnang, nemot-a suey so tup go, senong duduing-a yakua iti.
Motnang nemot-a suey so ikum go, seni-a yakua mlak.
Yang! Saula tang ngge go dabui, demu so mo lemoy.
Nemotnang go nemu dali mo sup.
Nemotnang go nemu pli genang ya kua, ide dega ey.
Nemot-a nemu lo i-ikum go, ikum genang moyso.
Nemot-a kama lo tup go, tup genang moyso.
Nggano dabui ba no senong genang moyso dali.
Esang, ngga kalik kua go, suey so nemotnang mea ikum,
Tup go, gemang ne ya senong.
Tandali nemotnang mea teguey ne.
Ngga ey, Ki Wali Iram lo gemang ya suey!
No, nemotnang moyso!” (Yesaya 6:9-10)
16 Yang! Motnang-a, Genam no keng go andua-andua, nemu lo ikum go, kama lo tup go nogo mo mlak gabe. Ngga tang so Ki Wali Iram lo iwat go sikabung, teguop yakay eygo, motnang-a gabe! 17 Yang! Gabe pen-asitugu, “Nggeasui go Woy Wali Iram tamlak go duduing lelemoy go, tegu go ngge, banim nogo Ki Wali Iram go nabi miam eygo lo ikum so mo duduing bung-neakam. Yang! Seni eygo nemudi sogo sikabung temu dabui lo mo bung-nengam, no kua tegu sang. Ngga ey, motnang lo tup-ketogoy go ngge tup genang so, kangok so mo duing-nengam. No, kua lemoy.”
18 Woy Wali Iram tamlak go senongduduing genang so, nebut benuey seni se tup!
19 Tap ketang no bluim go didon ngga, Woy Wali Iram tamlak genang duduing sogo deguo teguop, nando lo tup go, seni kua senong. Ngga ey dabui ba sik sogo senongduduing Kupiam golo tandali weng go ne ikak. 20 Nan demu eygo blo no bluim go didon ngga, deguo teguop ngga tup gono, keda so dabui ba no yakay ey wawi go sikabung gemang. 21 No, dabui ba nogo srang suey so kua king go, walong so kua suing. Senongduduing ngganemot uwawi go tang so, ple ey tengang ey truk goso walitap ne itak go teguey. 22 Tegan deding eygo sip no bluim go didon ngga, senongduduing ngganemot-a tup go, no, wali nogo kunala ey taut no walong so lelek golo deguo teguop ngga saguip go, seni ne kua tagot. 23 I go sogo, nan suey go blo no bluim go didon, ngga dabui ba no senongduduing suey so degut go, seni mlak go, ngga ey miam ey tagot go sikabung. Didon ngga kalik seni daso-daso gemang tetagot. Da 100 yam sogo, da 60 yam sogo, da 30 yam so.
Sagot ey yensagot eygo nogo nebut benuey
24 Ngge kalik go nebut benuey meno Yesus lo gabe pen-nawon, “Woy Wali Iram tamlak go duduing pung genang, ngga didon suey go usu kebali sedue lo bluim go kalik gabe. 25 No, wadi go ku klik gono, sikabung yam so srek go, koysaula-a pung go, usu damoy lo sagot un-a bluim-siwon go, tandali gemang kap. 26 Ngga ey, yensagot tip pupung go nogo, sagot tip gemang ikum dali. 27 Ku meno no, usu kebali sedue temu klong go, ikum go, ngge kalik usu wengkabui no gemang pu-netenawon, ‘Aya! Usu no kuali go didon ngga suey? Ngga yensagot seguong kua! Sagot tip gemang pung dali.’ 28 Ngganemot no, woy ngga lo pu-tenawon, ‘Yang! Koysaula go takebali ngga gemang!’ Ngga ey, nemot go kebali sedue lo pu-netenawon, ‘Ngga kalik go, inalu go sagot-a ngga sono ya trok!’ 29 Ngga ey, usu wengkabui ngganemot lo pu-ton, ‘Namboy kua klong go trok! Sagot so motnang lo trok-kenalo go, yen ey mang-ne ya pluk.’ 30 Itak go kerlam so na walong-atenayun. Yen seni go nguok sogo no, kay seguong-a sagot ey mea ibot. Ku ngganemot nogo At lo mea pu, ‘Sagot-a kuoy go koy no dok gono se puit, yensagot-a ten so teta go yap ba no ikak go mea ta.’
Woy Wali Iram tamlak go duduing ngga kalik gabe pung.”
Saula-saula mata so dabui lo mea keng
31 Nemot go andua-andua nogo so, nebut benuey ngge Yesus lo gabe pen-nawon, “Woy Wali Iram tamlak genang duduing, sawi un dato sedue lo kuali go kalik mea pung. 32 Nemot-a, sawi un ngga seguay seni, nemot pung go nogo, di kangok go kalik mea walong. Ngganemot no, wi ut ba lo pling go uwet go, di kali-kali ngganemot temoy no weng go, ut gemang klik-nenawon.”
Woy Wali Iram tamlak go blongdon duduing ngga kalik mea pung.
33 Ngganemot no nebut benuey meno ngge kalik Yesus lo gemang pen-nawon, “Se senong! Woy Wali Iram tamlak genang duduing, tom beap kalik gemang. Mianang lo seguay dato so tui go, ten mata sogo naklay ba nogo, nemot seguong ey mea degut. Ngga kalik blong duoyap go wali naklay Woy Wali Iram tamlak go blongdon duduing mea degut.”
34 Se senong! Sikabung miam dega eygo nogo, Woy Wali Iram tamlak go duduing pung go sogo, nebut benuey seguong-a Yesus lo gemang pen-nawon, neguon sono kekayso kua pen-srenawon. 35 Ngga kalik Yesus lo pen go tang so, nabi Yesaya lo pen-ngam go ey gabe lemoy,
“Takuduen sik sogo,
Woy Ki Iram tamlak genang duduing kok go ngga,
nebut benuey seguong so, ibe sono go mea pen-atenalu.” (Mazmur 78:2)
Yensagot ey sagot eygo nebut benuey go seni
36 Ngga naklay pen go, sikabung miam dega eygo pu go mo klong gono, Yesus Nemot go yap sono gemang nawon. Yap no pung go nogo, andua-andua weng go, ngge kalik gemang usi-netenawon, “Aya! Usu no sagot pung go, ngga sogo ne? Nemot go seni, genamnang nogo pen-alo ya!” 37-39 Ngganemot no, Yesus lo pu-ton,
“Yensagot so srui go sedue ngga: Ki Wali Iram sik sogo Blong Dem.
- Usu ngga: kukunan sikabung gabe.
- Yensagot ngga: Woy Wali Iram lo tamlak go blung.
- Sagot ngga: Ki Wali Iram nogo koysaula.
- Sagot go don bluim go ngga: Kupiam golo piam-piam tetaling go.
- Usu seni ibot genang ku pung go ngga: yansi kusemu genang so pen go.
- Usu seni ibot genang kebali sedue: Ki Wali tamot-tamot gemang.
40 Yang seni so, yansi kusemu go ku ngganemot no, Kupiam gono keng go sikabung, sagot tegan lo dok go kalik, koy sono mea puit. 41-42 Yangga: Ki Wali tamot Blong Dem lo mot-dak go mea klong-lak. Ngga ey, walidemu no kua keng go sikabung, nggano tap piam goso taling go sikabung, Woy Dem go blung sik so wawi go, koy ba sono mea tega-sing. Seni so, idakoy ba no iseng sogo so, wasrang negot ey, unebu eygo-a mea luluik. 43 Ku ngganemot nogo Woy Wali Iram go blongdon ba nogo, seni eygo nemudi so yang go sikabung-a blong ey woy kalik mea pli-sing. Ayanang, mianang! Nando kama gemang go, nebut ngge suey so nase tup.”
Woy Wali Iram tamlak genang duduing sogo nebut benuey temu
44 Woy Wali Iram go duduing tegu genang, benuey ngge kalik dali gabe: nan usu damoy sogo, drang miam ey ngga ba so kok go gigit go gemang. Drang ngganemot, sedue meno lo ikum go, ngga ey, nan-a tandali puem go itak. Sedue ngga yakay kangok. Yap no klong go, nemot go taut naklay duoy so gemang nay. Duoy ngganemot ey kunuon go, nan ngga usu ey kekayso gemang king-won. Yam.
45 Woy Wali Iram go duduing tegu genang, benuey meno ngge kalik dali gabe: demu samon demu kuadon blong dega eygo so uwet go naysedue kalik se! 46 Demu samon teguop go ngga ikum gono, klong go taut naklay drang so se nay. Drang ngganemot lo demu samon blong eygo iti genang. Yam.
Dasi so kukuk go nebut benuey
47 Seni so, Woy Wali Iram go duduing pung genang, dasi so kukuk go kebapalo beap ba no betep go kalik gabe. Ngga ey, dasi tang meno-tang meno kebapalo ngganemot ba nogo gemang degut. 48 Kebapalo ba no dasi yam so damoy gono, metuik sono mea lek. Ngga ey suing-lak go, dasi suey go-a sip ba no iyaluim, kua dedam go-a ngga sono mea tetega. 49 Se senong! Ku yam sogo nogo ngganemot kalik mea lemoy-ayun. Ki Wali tamot mea weng-lak. Ngga ey, sikabung suey go ey piam go ey nemot lo kuoy go, ngge idi, ngga idi no mea tenong-sing. 50 Nggano, taybat eygo sikabung piam go idakoy nebleng ba sono, ikak go mea tega. Ngga ba so unebu ey, wasrang kluim eygo-a mea negot.
51 Nebut benuey ngga naklay pen gono, Yesus lo gemang usi, “Nebut ngganemot go seni motnang nggeasui go naklay mo senong?” Nemot go andua-andua lo pu go, “Yang, genamnang mo senong!” 52 Way so Yesus lo pu go, “Ngga suey! Se senong: Wali Sam so ngunguok go klui-klui naklay, Woy Wali Iram go senongduduing genang so, banim go kunala ey, imening go ey blot go yakay ey gemang tetaling.”
Yakena Nasaret no Yesus paysing go
53-54 Ku ngganemot nogo, nebut benuey yam so pen go, Nemot tang go yakena Nasaret sono Yesus gemang klong. Nggano pung go, Yahudi go dewi yap ba no degut go, Yesus lo gemang nguok-tenawon. Ngga naklay tup go, ikum go nogo, ngga ba sogo sikabung kuikui go nemu seguong-a bung-netenawon. Ngga ey, ngge kalik gemang pepen, “Ye, nguok genang kunala kalong eygo, tasam pluok genang don, nago sik so mo iti? 55-56 Nemot ngga, imot naklay mo senong:
- nglangin Yusup ey di kebali so sesemu go;
- Nemot go unen: Maria;
- ntatonnang: Yakobus, Yusup, Simon, nggano, Yudas.
- demanonnang imotnang ey gabe.
No, Nemot kunala kalong ey, esang, don eygo ngganemot nago sik so mo iti-yom?” 57 Ngganemot sogo so, Yesus gemang wayang-nenawon. Ngga ey, way so nemotnang sono ngge kalik Yesus lo gemang pen-nawon, “Yang! Sip meno-meno nogo Nemot go deguo pen genang so, Ki Wali Iram lo mot-dak go nabi, suey so tup genang so mea wawi. No, yakena tang go nogo, yaptenglam ba nogo yakua tup. Suali ya kua tra, ta eygo ya kua kong.” 58 Seni so! Nemotnang go kunala suey so kua keng go tang so, yakena ngga nogo tasam, miam eygo Yesus logo kua semu-srenawon.