8
Sedue sadui sogo Yesus lo pali go
1 Meduim blo sik so Yesus li go koklong gono, nsrung-nsrung ey sikabung miam ey gemang weng-lak.
2 Nggano, yaulat kuo eygo sedue klaya Yesus mit no gemang weng. Yesus go suongku no segabuem unuik go, ngge kalik gemang pu-tenawon, “Aya, Mot lo iwat go, genam go sadui se pali!” 3 Nggano, sedue ngga sono ta sra go, mlak-siwon gono, gemang pu, “Genam iwat go, mot sadui suey-a!” Woy ngganemot dali no sedue ngga go yaulat kuo kekayso se kua-anatun. 4 Ngga ey, sedue ngganemot no Yesus lo gemang pen-nawon, “Mot go saysuk Genam lo pali go ngge, ibe nogo, kua pepen-klong! No, Ki Wali yap no se klong. Ngga ey, taiti so pupuit go trang no mot go saysuk-a taling go, Musa logo demutrui no, menay iti go Ki Wali Iram nogo taiti-a se puit! a Ngga semu golo ibe no taling go senong genang. Seni so, nemot go yaulat kuo mo suey.”
Plesedue go koybutasemu sadui sogo Yesus lo pali go
5 Yakena Kapernaum no Yesus pung gono, Roma go plewengkabui b meno Yesus mit no weng go nemot no tebok genang so gemang usi-tenawon, 6 “Aya! Genam go koybutasemu yambi go, iseng kangok so tetra go se.” 7 Ngga ey plesedue wengkabui no Yesus lo gemang pu-tenawon, “Nemot suey genang sogo Genam-a mea belu!” 8 No, way so Yesus sono plesedue wengkabui ngganemot lo pu-tenawon, “Mot don kangok go, genam don seguay go, at go yap sono klong genang, yakua! No, nebut dato-a, ngge sik so pu-silo go, ngga ey suey-a nemot no na pung-abayun. 9 Se duing: Roma go plesedue wengkabui genam ngge gabe. Genam blo sogo plesedue wengkabui gemang dali. Ku sono go at go plesedue tala nogo, genam tang go don mea taling dali. Plesedue tala no at go pu go, ‘Klong-a!’ Nemot mea klong. ‘Weng-a!’ Nemot mea weng. ‘Ngge se semu!’ Nemot lo ngga mea semu! Mot don kangok go, ngganemot sogo so, nebut dato-a, ngge sik so pu-silo go, suey-a nemot nogo na pung-abayun.”
10 Ngga kalik plesedue wengkabui lo pu go tup gono, yakay ey saduibong ey Yesus gemang pling. Ngga ey, nemot no keng go sikabung no gemang pu-tenawon, “Se senong! Sedue ngge Ki Wali Iram sono dabui lo don dega ey mo keng. Nemot kalik keng go, klayanang go sikabung Israel Genam kua tegu gabe.” 11-12 Yang! Motnang sono gabe pen-asitugu, “Woy klak sik sogo, woy sut sik sogo amble saula-saula miam ey mea weng-lak. Nggano Blong Dia yakena ba no babuasi Ablaham, Isak, Yakop ey klay gono ten suing go, mea dam. No, Woy Wali Iram go blung no degut genang tegadi so dok go danonnang-a, kua keng go tang so, ku klik go ba sono mea tega-sing. Ngga ba so iseng eygo lo unebu ey sring kluim eygo-a mea nenegot.” 13 Ngga pen gono, ngge kalik Roma go plesedue wengkabui sono gemang pu-nawon, “Klong-a! Dabui lo mot keng go tang so, ngga nase lemoy.” Woy ngganemot dali no, plesedue wengkabui go koybutasemu, sadui gemang pali.
Sikabung Yesus lo pali go
14 Yesusnang koklong go, Petrus go yap no pung go gemang degut. Ngga ey, Petrus go unen kabuisegla nengkoy sadui king so sesrek go gemang ikum-nawon. 15 Nggano, kabung go ta blo no ta tui-nawon go, sadui ey kekayso se pali-anatun. Nggano ip go Yesusnang nogo ten-a semu-tenatun.
16 Use go ku kiklik gono, naliwabu lo degut go sikabung, Yesus sono wawi go gemang nekunuon. Yesus lo pu gono naliwabu kekayso gemang pluep-lak. Ngga ey, sadui eygo sikabung gemang suey-sing dali. 17 Se senong: Wali Sam klaut ba no nabi Yesaya lo pen go tang so ngga naklay kekayso lemoy-anatun go gemang,
“Imot go ide ey sadui ey Nemot lo gemang mo tebuo!” (Yesaya 53:4)
Yesus no keng genang
18 Sikabung Yesus mit sono miam ey pluep go ikum gono, Nemot lo gemang pu-tenawon, “Bu ngga idi sono bayi no klak go se klong.” 19 No, nebut ngga tup gono, Musa logo demutrui so ngunguok go klui meno Yesus mit no weng gono gemang pu-tenawon, “Aya klui! Nago sono Mot koklong go, genam mot seguong no mea keng.” 20 Ngga tup gono, iwot go nemot sono way so Yesus lo gemang pen-tenawon, “Se duing! Duen uduo nemot go put gemang, ngga ey, wi nemot go ut gemang dali. No, Blong Dem-a, wengkabui tui go srek genang, iwonedi kua. At no keng genang deding ba lo gabe.”
21 Nggano, Yesus no keng go andua meno lo gemang pu-tenawon, “Aya! Genam mea keng dali, no namboy tandali yap no klong go, aya-a tuet-nalu.” 22 No, way so nemot no Yesus lo pu go, “Mot-a genam no se keng! Kebong go sikabung, Ki Wali Iram no kua keng go, kebong genang sikabung dali lo na tuet-nenayon.”
Bu alui Yesus lo bebat gono tebung go
23 Nggano, bayi ba sono Yesus klak go, nemot go andua-andua keng go gemang klak dali. Ngga ey, bu ngga idi sono bayi gemang klong. 24 Koklong go, kay so nebit kangok so kong go, bu ngga blo sono gemang li. Ngganemot nogo, bu yalui lo bayi ba nogo ey se tetey. No, Yesus-a usene so naklay mo temoy-nawon. 25 Nggano, Yesus mit no weng gono, senglok-nenawon go, gemang usi, “Woy Dem! Imot bu lo kekenok go se! Kedaso pla tebok-a!” 26 Way so nemotnang no Yesus lo gemang pu-nawon, “Sogo so suali tra-ketogoy? Dabui lo don ey maning motnang kua keng ba?” Nggano, Yesus ip go nebit ey kayem kangok go sono gemang bebat-nawon, “Bu blo nebit tebung-a! Bu alui se la!” Ngga ey, kekayso bu blo nebit tebung go, bu alui se la-anatun.
27 Ngga tup go senong go, ta wasrang ey sikabung glok go, gemang pen-netenawon, “Bu yalui ey, nebit ey Nemot no yam so tupduk go mo keng. Nemot ngga, sogo kalik go Sedue?”
Sedue namon ba sik sogo nali piam go Yesus lo yat go
28 Yesusnang bayi lo koklong go, bu ngga idi nan Gadara no rlo gono, naliwabu piam go don lo degut go sedue namon simu blo sik sogo, Yesus ey tegu so tap sono gemang kap weng. Seni so, don ey iseng dega eygo tang so, suali so sikabung tap ngganemot logo kua koklong. 29 Nggano, nali piam go nebut, sedue ngga go lom ba lo gemang bega-klekunton, “Ey, Ki Wali Danon! Mot genamnang nogo sogo semu so uweng? Kisebui ku maning gono, atnang nogo iseng taling so, Mot ngge sono go uweng?”
30 Se ikum: woy ngganemot nogo, sip ngga dagu sogo nebo daley ten so uwet go gemang. 31 Nggano, sedue ngganemot ba sogo naliwabu piam golo pu go, “Genamnang yat sogo, nebo ngga ba sono pu go se degut.” 32 Ngga ey, Yesus lo pu go, “Klong-a!”
Nggano, sedue namon ngganemot ba sik sogo naliwabu piam go pluep go, nebo daley kangok go ngganemot ba no gemang degut. Ngganemot nogo, nebo daley ngga, day ba sono kuek go, e... bu lo nasup go, gemang leguot-sing. 33 Ngga tup go ikum go, nebo yay so susuing go sedue yakena sono gemang kuek-nebiwon. Naliwabu lo degut go sedue pali go nebut gemang pen-nebawon. 34 Ngga ey, yakena sik sogo sikabung naklay kuntun go Yesus ey tegu genang so. Ngga ey, don ey Yesus so gemang ka-nenawon, “Ngge sik sogo, Mot nase klong!”