9
Deguo teguop pepen genang so Yesus go andua 12 mot-dak go
1 Ku meno no andua 12 Yesus lo yaluim go gemang pu-tenawon, “Naliwabu yat genang don, sadui-sadui naklay pali genang don, motnang go ta no gabe itak-situgu.” 2 Ngga ey, gemang pu-tenawon, “Nggeasui go motnang se klong! Sikabung no Woy Wali Iram tamlak go blongdon duduing taling klong go, sadui sogo sikabung se pali-sing. 3 Koklong go nogo, teguoli kua iti, balui ey duoy ey tete sogo amka eygo kua glung! Ta ulue so se klong. 4 Yap klaya gono degut go, ngga ba seguong se suing, e... yap ngga ba sik so tandali se weng. 5 Yakena meno no klong go, ngga sogo sikabung lo tenguo go, yakena ngga sik sogo masisung motnang lo tegue go se itak. Ngga ey, senong genang: suey, piam, ngga nemotnang go ba so!”
6 Yang! Yakena-yakena sono deguo teguop penklong nogo, sadui bumeno-bumeno naklay gemang pali-sing.
Yesus ey tegu so Herodes duing go
7-8 Nan Galilea tasomlak go deguena Herodes, a Yesus logo tasam iway tup-nawon go, nemot ey negap-nawon. Seni so, sikabung temu lo pen go, “Yohanes Busotuigo, tandali mo nglong.” Sikabung temu lo pu go, “Nabi kangok go meno Elia tandali mo pung.” Sikabung temu lo pu go, “Ki Wali Iram lo mot-dak go nabi-nabi, banim go klaya tandali mo nglong.” Ngganemot sogo so Herodes yam so gemang kukui. Nemot kua senong. 9 Yang! Herodes lo duing go, “Yohanes at lo pu goso tengang lo wengkabui mo tong. No, genam tup go, tasam-tasam kangok goso tetaling go, nando sedue?” Ngganemot sogo so, Yesus ey tegu so, Herodes tap gemang wet-tenawon.
Sikabung 5 ribu sono ten wasey go
10 Deguo teguop pen sik so, Yesus lo mot-dak go andua-andua, tandali pluep gono, Yesus sono nemotnang lo pluok go naklay gemang pen-nenawon. Nggano, sip meno no banom suing genang so, nemotnang Yesus lo wawi go gemang klong. Sip ngga yakena Betsayda dagu so. 11 No, Yesusnang ngga sogo, senong go, mesip so sikabung mata sogo gemang keng dali. Nemotnang ikum go Yesus logo kua yat, suey so gemang wawi-nawon. Ngga ey, deguo teguop Yesus lo nguok go, sikabung sadui sogo gemang pali-sing dali.
12 Ku yam so kiklik, andua 12 yam sogo, Yesus mit no weng go, ngge kalik gemang pu-nenawon, “Sikabung naklay ngge, pu-silo ya! Yakena kangok go, seguay go dagu sogo no se klong-lak. Ngga no tendam go, srek genang! Sip ngge kluim kua go.” 13 No, nemotnang sono, ngge kalik so Yesus lo gemang we-nawon, “Sikabung ngge nogo ten, motnang lo se iti!” Nemot go andua-andua lo way so pu go, “Ye! Atnang logo loti, taidi dato ey dasi namon dato eygo-a be. Sikabung ngge naklay nogo, ten-a duoy lo ya klong go idok?” 14 Sikabung naklay i go, 5 ribu yam no. No, andua-andua no, ngge kalik so Yesus lo gemang pu-nawon, “Nemotnang klay gono yaluim go, 50, 50 yam so, pu go se suing-lak.” 15 Yesus lo pu go kalik, we-nenawon go sikabung yaluim go gemang suing-lak. 16 Ngga ey, loti taidi ey dasi namon ey, ta no Yesus lo iti go, ut sono yalap go, dewi gemang pu-biwon, “Ki Wali Iram! Mot logo gualaklum tendam ngge nogo ey se king-kundo!” Dewi pu gono, loti Yesus lo betok go, andua 12 yam sogo no iti go sikabung mata sogo no gemang wasey-sing. 17 Ten ngganemot dam-nenawon go, nemotnang naklay nu yam so temoy. Ten ngga temu yaluim go kala 12 yam sogo damoy ey gemang tram.
Yesus tegadi so dok Iram
18 Ku meno so, dewi so banom Yesus pupu gono, andua-andua seguong ey susuing gono, gemang usi-tenawon, “Sikabung lo pu go, Genam ngge, nando?” 19 Way so nemotnang lo pu go, “Sikabung temu logo Yohanes Busotuigo; temu logo Elia. b Ngga kua go, Ki Wali Iram go nabi meno, tandali nglong go gabe mo pung.” 20 Ngga tup gono, Yesus lo gemang usi-nawon, “Ngga kalik go, motnang lo duing go, Genam nando?” Petrus lo yang go, “Tegadi so Ki Wali Iram lo dok go Iram Mot ngge gabe!” 21 Nggano, nemotnang sono don ey Yesus lo gemang pu-nawon, “Sikabung klayanang go nogo ngga kua pen!” 22 Yang! Tap ngge-a Blong Dem se keng:
- At nogo idekeba Yahudi go iram-tegay lo mea taling-neyon;
- but go At mea kebong;
- ku nangglik tete no tandali Ki Wali Waglo lo mea nglong.
Yesus no dabui lo keng genang nebut
23 Yesus lo gemang pen-atenawon, “Genam no nandonang keng sogo, banim seni saysuk wegeng se itak. Ngga ey, kuno-woyno kebong genang ide ey lek go, Genam ey se keng.”
24 Se senong! Genam no keng genang so duduing go, no saysuk kebong suali eygo, esang, nemot go wali mea nega. No, Genam sono nando keng golo, kukunan blo wali nega go, wali inim-a senang so mea gigit. 25 Se duing: kukunan go blong naklay sedue klaya duo lo tamlak go, no, wali blongdon nega go waluk go, nemot go seni sogo kalik? 26 Yang! Nggeasui go, Genam sogo, nggano Genam go nebut sogo suongsut nando lo tra go: yansi go Blong Dem, Ki Wali Iram go blong-kenuim ba lo weng go, nemot nogo suongsut mea taling dali. 27 Motnang nogo gabe pen-asitu, “Suey so se senong! Ngge pluep-keto go ba sogo, temu gabe. Nemu kiki so kua kebong gono, mea ikum-neyon.”
Meduim blo sogo no Yesus kikiblong lo teglue go
28 Minggu klaya got-nenawon gono, Petrus, Yohanes, Yakobus, Yesus lo wawi go, dewi pu genang so, meduim blo sono gemang klak. 29 Pung go, dewi sogo no nebuemnemu suk meno so gemang iwot. Ngga ey, Nemot go amka idop-idop ey iwot-a natun dali.
30 Pla ikum! Sedue namon Yesus mit no pung go, nebut so gemang pepen. Ngge, babuasi Musa ey Elia ey. 31 Blong ey nemotnamon gemang pung. Ngga ey, Yerusalem no Yesus go wali yam so semu genang, gemang pen-nebawon.
32 Woy ngganemot nogo, Petrus, andua namon ey usene so mo srek. No, usene ba sik so nemotnang bong go, Yesus blong ba sogo, sedue namon ey gemang ikum-nebawon. 33 Tandali sedue namon ngga, klong sogo no, Petrus lo gemang pu, “Aya klui! Sip ngge seguong so atnang susuing go-a suey dato. Mot lo yang go, meduim ngge blo no bala-a nangglik ey atnang lo ya klik: Mot nogo so meno, Musa tete so meno, Elia tete so meno dali.” No, seni so, tebadali nebut ngga Petrus lo pen-awon go. 34 Ngga kalik go nebut so Petrus maning pepen, blo sik so kenuim-klaut kuntun go, nemotnang nangglik kekayso teglue-abatun. Ngganemot nogo, suali so Petrusnang gemang kuikui-nebawon. 35 Kenuim ngganemot ba sik so Ki Wali Iram go nebut gemang tuot-kunuon, “Ngge At go Demsop teguop go gabe! Nemot seguong nogo-a se tup!” 36 Nebutkluim ngga yam sogo no, banom itak go, Yesus-a gemang got-tebawon. Musa ey, Elia eygo-a mo saguip.
Se senong: tasam ngge naklay ikum go, sikabung meno nogo, Petrus, Yakobus, Yohanes logo kua pen-nesrenawon.
Kebong-nglong sogo denok Yesus lo pali go
37 Ngga utep go, tandali meduim blo sik so Yesusnang lili gono, nemotnang mit no sikabung mata so pupluep go gemang ikum. 38 Yesus ikum gono, ngge kalik sedue meno lo gemang pu-nawon, “Aya klui! Genam go duo klaya go ey pla ikum-a. 39 Da klaya-da klaya duo ngga kuasep kua seni golo mlak go, kayang ey mea kiklik. Tamasi luik-sra go, lom ba logo magon ey mea mot. Iseng kuasep ngganemot lo tetaling golo, saysuk ey waluk go, lasom ey mea tebung. Keda sogo kua itak. 40 Duo ngge ba sik sogo kuasep yat genang, kamso Mot no keng go andua temu no pu-tu go, kuasep ngga nemotnang logo yakua yat.” 41 Nebut ngga tup gono Yesus gemang pu-tenawon, “Esang, sikabung tang ngge! Maning dabui lo At nogo motnang kua keng. Tap piam golo kenatogoy go. Ku kata yam so motnang eygo Genam ya suing? Motnang ikum sogo, Genam mo besam! Ngge sono, duo ngga-a iti go se weng!” 42 Yesus mit sono duo ngge koklong gono, nan temoy sono kuasep lo gemang pui. Nggano tamasi, bobong ey lek-sra so se tebing. No, kuasep piam go ngganemot sono Yesus lo gemang bebat, “Kedaso duo ngge ba sik sogo, mot se pung!” Ngga ey, tandali nglangin sono mo suey go duo ngge Yesus lo gemang itak-nawon. 43 Ki Wali Iram go don kangok go ikum gono sikabung naklay tawasrang ey gemang glok-nenawon.
Tasam ngge so sikabung mata sogo nenega, nemot no keng go andua no ngge kalik Yesus lo gemang pen-atenawon, 44 “Nggeasui go, nemotnang naklay gemang nega-neton. No, ku santugun gono but genang, sikabung go ta sono, Blong Dem mea iti.” 45 No, Yesus logo nebut ngga tup go, seni andua-andua kua senong-nenawon. Seni so, suali eygo so, tandali Yesus no kua usi-nesrenawon.
Nando-a kangok nando-a seguay
46 Ku meno no, Yesus go andua-andua, nebut gemang sedi-nenawon, “Imotnang sik sogo nando dega-a kangok?” 47 Nemotnang lo duduing go Yesus mo senong. Ngganemot sogo so, denok seguay go meno Yesus lo wawi go, Nemot ey gemang ip. 48 Ngge kalik nemotnang sono gemang pu-tenawon, “Genam go sui no, duo seguay go ngge, nando lo wawi go, Genam tang go mo wawi gemang. Ngga ey, Genam wawi go, Genam so mot-dak weng go, Ki Wali Iram tang go, mo wawi gemang. Seni so, motnang sik sogo nando go dabui seguay so lemoy go, nemot-a kangok dega.”
49 Nebutmang ngga, tup gono Yohanes lo gemang pen, “Aya! Koklong go nogo, Mot go sui ba no, naliwabu yat-nayom go sedue meno, atnang mo ikum. No, genamnang kalik so, Mot nogo nemot kua keng ne. Ngganemot sogo so, naliwabu yat genang, atnang lo mo waydang.” 50 Nemot nogo Yesus lo pu go, “Ngga kalik pluok go, piam! Motnang nogo nando lo, kua waydang go, motnang no tebok go sedue gemang!”
Nan Galilea sik so Yerusalem sono Yesus nawon go
51 Kukunan sik sogo, Yesus Ki Wali Iram lo wawi genang ku se dedagu, Yerusalem sono klong so gemang iwat-nawon. 52 Ngga ey, sedue-sedue mot-dak go, sip dali semu so, banim nan Samaria sogo yakena meno no gemang nenawon. 53 No, yakena sedue Samaria ngganemot moyso, Yesusnang Yerusalem c sono koklong go nogo. 54 Kua wawi goso Yesus go andua Yohanes ey Yakobus eygo lo, gemang pu-klenawon, “Aya! Mot duduing? Ut blo sik sogo koy pu go, koy ngganemot lo nemotnang dasing genang?” 55 Nebut ngge tup gono, taton sono Yesus lekek go, nemotnamon no kangok so gemang bebat, “Ngga kalik kua pu ey!” 56 Ngga ey, yakena meno sono nemotnang gemang klong-lak.
Yerusalem sono Yesus eygo nando-a ya keng
57 Tap lo Yesusnang, koklong gono, meno duo lo gemang pu-nawon, “Aya! Nago sono Mot koklong go, genam mea klong dali.” 58 Ngga ey, dem ngganemot no Yesus lo pu go, “Se senong: duenuduo nemot go put gemang. Ngga ey, wi nemot go ut gemang dali. No, Blong Dem nogo wengkabui tui go srek genang iwonedi kua. At no keng sogo deding ba lo gabe!”
59 Nggano, sedue meno so Yesus lo gemang pu, “Genam no mot se keng!” Ngga ey, way so sedue ngga lo tenguo go, “Woy Dem! Genam mea klong dali. No, genam go aya yam sogo-a tuet genang-a, tandali namboy yap no genam nalu go, suey?” 60 No, way so Yesus lo pu go, “Suey kua! Mot-a Genam no se keng! Kebong go sikabung, Ki Wali Iram no kua keng go kebong genang sikabung dali lo na tuet-nenayon. No, Woy Wali Iram tamlak go blongdon duduing-a banim klong go, mot lo se nguok!”
61 Nggano, sedue meno lo pu go, “Woy Dem! Mot ey genam klong dali sogo. No, banim no genam go duokabung, moy-ay nogo suey-a ya pu?” 62 No, way so dem nggenemot no Yesus lo pu go, “Ngga suey kua! Deguo teguop kebali sogo, usu kebali sedue kalik, taton sono go ey, yakua lekek. Nemudi so kebali semu genang.”