16
Tasam inim-a semu genang so sedue Parisi ey Saduki eygo lo usi go
1 Se ikum! Partay Parisi ey Saduki eygo sik sogo sedue, Yesus mit no gemang weng-lak. Ngga ey, gemang usi-netenawon, “Atnang nogo tasam inim meno ut sik sogo-a taling lo ya!” 2 No, ngge kalik way so nemotnang sono Yesus lo gemang pu-nawon, “Ye! Use woy kin u go nogo motnang lo mea pu, ‘Utep go ku suey dato so mea blong-ayun.’ 3 Nggano, wadikua woy kin u go nogo motnang logo mea pu, ‘Ye! Se ikum: ngge ku sa so nebit ey gabe!’ Yang! Ut temoy no taling go tasam-tasam, motnang mo senong. No, esang, Woy Wali Iram tamlak go blongdon ngengap go tasam lelemoy go ku-a, motnang kua senong ne.
4 Yang! Nggeasui go tang ngge yam so waluk go mo puplu-sing! Dabui lo kua keng, tasam kangok go-a uwet go sikabung! Nggeasui go tasam kangok go meno inim ya kua taling-srelu. No, nabi Yunus no lemoy go tasam-a a mea ikum-kelo.” Ngga kalik so pu gono, nemotnang-a itak-nawon go, ip go, Yesus gemang klong.
Partay Parisi ey Saduki eygo senong piam go, kunala temoy no se
5 Nemot go andua-andua ey bayi lo ketang ngga idi no koklong go, nemotnang go ten mo itak. 6 Woy ngganemot dali no, nemotnang sono ngge kalik Yesus lo gemang pen-atenawon, “Partay Parisi ey Saduki eygo senong piam go, kunala temoy no se! Nemotnang go senong ngga, tepung no ‘ragi’ bubluot go kalik gemang. Nemot-a seguay dato so tui go, tepung naklay ba lo mea degut.” 7 Ngga kalik Yesus lo pen go tup gono, nemot go seni-a ne kua duing. No, way-way so ngge kalik nemotnang lo gemang pen-netenawon, “Esang, imotnang go loti mo kay go itak.” 8 No, nemotnang lo sosok go Yesus mo senong. Ngga tang so nemotnang no ngge kalik gemang usi-tenawon, “Sogo nebut so motnang sok-ketogoy? Motnang go loti kua goso? Esang! Genam nogo dabui lo kangok so motnang maning kua duing ba.” 9 At go nebut, motnang logo keda so ya kua mlak dali ba! Se duing: sikabung 5 ribu yam sogo loti taidi yam dato wasey go dam go, motnang mo kay? Ten temu itak go, yaluim go kala ey ngga, mo kay dali? 10 Ngga ey, sedue 4 ribu yam sogo no loti 7 dato wasey go dam go temu kala ey itak go, mo kay dali? 11 Ten nebut so motnang no kua pen-sretugu. No, motnang no pu-tu go, “Partay Parisi ey Saduki eygo senong piam go tepung ey bluot go ragi kalik, motnang ba no degut genaning. Nemotnang nogo kunala temoy no peli ey motnang se wegeng!” 12 Ngganemot no, andua-andua gemang senong-nenawon, “Seni so, sedue Parisi ey sedue Saduki eygo ragi ngga, tepung ey bluot goso kua pu, no, nemotnang go nebut piam b so ngunguok goso pen go.”
Tegadi so dok go Iram Petrus lo yang-nawon go
13 Yesus kota Kaysarea Pilipi no klong go. Ngga no pung gono, Nemot go andua-andua no ngge kalik gemang usi-tenawon, “Motnang se pen: sikabung sogo kalik ya duduing? Ki Wali Iram sik sogo Blong Dem, nando?” 14 Way so nemotnang lo pu-nenawon go, “Sikabung temu logo pu go: Yohanes Busotuigo; temu logo Elia so, c temu logo nabi Yeremia so pupu go. Ngga kua go, Ki Wali Iram go nabi meno, tandali nglong go gabe mo pung.” 15 Ngga ey, Yesus lo gemang usi-nawon, “Ngga kalik go, motnang lo duing go, Genam ngge nando?” 16 Ngga ey, Simon Petrus lo wa go, “Mot ngge, Ki Wali Mani Iram lo tegadi so dok go Iram, d Ki Wali Danon klay king gabe!” 17 Nggano, Simon sono Yesus lo gemang pu-tenawon, “Simon, Yunus go danon! Woy Wali Iram lo iwat go, teguop-yakay ey mot gemang. Ngga kukunan sedue lo kua pen. No, mot no Genam go Ki Wali Aya, Blong Dia yakena ba sogo lo taling go. 18 Nggano, mot nogo ngge kalik At lo gabe pupu, ‘Mot ngge Petrus gabe!’ Petrus go seni: ‘demu wamea!’ Mot lo pu go ngga, demu wamea dali gemang. Demu wamea nggenemot blo no, At go blung mea buong-silu! Seni so: sikebong logo, At go blung ya kua gluik. 19 Yang! Woy Wali Iram go blongdon degut genang yatap sebendi, mot go ta sono gabe ya itak-silu. Kukunan blo no, mot lo dok go, Blong Dia yakena ba nogo mea dok dali. Nggano, kukunan blo no mot lo plet go, Blong Dia yakena nogo mea plet-dak dali.” 20 Nggano, Nemot go andua-andua no gemang pen-nawon, “Genam ngge, Ki Wali Iram lo tegadi so dok go Iram gabe. No, nebut ngge, sikabung klayanang go nogo kua pen!”
Iseng tra genang nebut da klaya tete so Yesus lo pen go
21 Ku ngganemot sik so, Nemot go andua-andua no, ngge kalik Yesus lo gemang taling-tenawon. Tap ngge-a Ki Wali Iram lo pu goso Genam lo se keng:
- kota Yerusalem sono At klong go;
- At no idekeba kangok so Yahudi go iram-tegay lo taling go;
- but go At mea kebong;
- ku nangglik tete no tandali Ki Wali Waglo lo mea nglong.
22 Ngga kalik tup go, Yesus ta no lek-nawon gono, don ey Petrus lo gemang bebat, “Woy Dem! Ki Wali Kumam don dega ey golo, ngga ya kua lemoy. Suey so Mot-a mea suing.” 23 Ngga ey, Petrus sono iwot gono Yesus lo gemang pu-ton, “Ka ya, Kupiamgo! At go tap nogo mot lo kua puem! Mot lo duing to go, Ki Wali Iram go duduing kua, no kukunan go kunala.”
24 Nggano, ngge kalik Nemot go andua-andua sono gemang pen-atenawon, “Genam nogo nandonang keng so mo, banim no nemot go saysuk wegeng kua goso, kebong genang tap lo Genam ey se koklong! 25 Se senong! Genam no keng so nando lo duduing go, no saysuk kebong genang suali eygo, esang, nemot go wali mea nega. No, Genam no keng genang so kukunan wali nega go, wali inim senang sogo, nemot-a mea gigit. 26 Seni so, kukunan go taut blong ey naklay, sedue klaya duo lo ta mlak go, no nemot go wali blongdon nega go, nemot go seni kua. Nemot go wali blongdon sut go way, kua dali. 27 Se senong! Nglangin go blong ba lo Kiwali tamot nesip lo Blong Dem weng go, tasam seguot pung go tang so, sikabung klay-klay nogo way mea taling! e 28 No, se tup! Gabe pen-asitugu, ‘Seni so, Blong Dem pung-ayon go blung ta mlak go, motnang eygo sikabung maning kua kebong golo gabe ya ikum.’ ”