12
Ki Wali Iram no dabui lo keng go banom go yakua itak
1 Sedue Parisi nogo nebut dawin ey Yesus pen-nawon gono, Nemot mit no nsrung-nsrung ey sikabung gemang pluep-anatun. Nemotnang tang so, masi blo nogo ey gemang gualing. Woy ngganemot no, banom so Yesus lo kuoy go andua-andua no gemang nguok-nawon, “Sedue Parisi go wamoymlue iglom ip kalik go, motnang ba no degut genaning!” 2 Seni so, sogo-sogo wamoymlue ngga ba no dok go, dia sono mea plet. Nggano, maykok so pepen go, dia no naklay mea neguon. 3 Kua kay! Kuklik go ba no yakot so motnang lo pepen go kublong so dia sono naklay mea pen. Nggano, degu ba no kama ba sono yakot so seglup go, yap neguon blo sik so dia sono mea bega-nenayon.
Suali ey Ki Wali Iram nogo se
4 Nggano Nemot go andua-andua no Yesus lo gemang pen, “Genam go anduasiyap motnang gabe. Motnang suali kua tra! Saysuk seguong-a, nemotnang logo but go mea kebong. No, wali nogo, sogo-sogo nemotnang logo yakua semu. 5 Gabe pen-asitugu, ‘Ki Wali Iram nogo-a, motnang klaya suali se tra! Kebong go nogo seguong-a kua, no idakoy nebleng ba nogo motnang Nemot lo mea betep dali. Tandali gabe pen-asitugu, ‘Ki Wali Iram seguong nogo-a dabui klaya se suali!’ 6 No, banom go motnang Ki Wali Iram logo mea kua itak dali. Ikum-a! Udong wi seguay dato go, duoy seguay go sogo mea nay dali. No, se senong: naklay-naklay Ki Wali Iram go nemu ba no mo degut, Nemot kua iwat go klayanang go yakua nega! 7 Seni so, Ki Wali Iram go klum, motnang nogo kangok dega. Suali kua tra! Motnang go betodop yam so Nemot lo mo i gemang. Udong wi miam dega eygo, Ki Wali Iram go suongku nogo, klaya duo motnang sik sogo ey kua kerlam. Motnang-a blo so gabe.”
Yesus so paysing go nebut
8 Motnang, suey so se senong, “Sikabung meno go suongku no Genam go sui nando lo yang go, yansi go Ki Wali tamot damoy sogo, nemot-a Blong Dem lo mea yang dali. 9 No, Genam-a sikabung meno go suongku no nando lo paysing go, yansi go Ki Wali tamot damoy sogo, nemot sogo Genam lo mea paysing-balu dali. 10 Se senong: Blong Dem sogo nando lo paysing go, kuklue ngga mea suep. No, Ki Wali Waglo no wayang go, kuklue ngga suep genang yakua. 11 Yahudi go iram-tegay ey, pemlenta eygo lo neyboy genang so motnang mlak go, suali kua tra! Walong sogo kunala ngge kua duing, ‘Sogo-a ya pen-analu?’ 12 Yang! Woy ngganemot no, mot ba no Ki Wali Waglo lo plok go-a, motnang lo pen genang so mea taling.”
Taut-a iyaluim go wali mea nega
13 Woy ngganemot no, sikabung mata so yaluim go sik sogo sedue meno lo, Yesus sono gemang usi-nawon, “Aya klui! Genam go aka no, mot lo se pu, ‘Atnamon go aya kebong go logo taut, genam nogo se wasey dali!’ ” 14 Way so sedue ngga sono Yesus lo pu go, “Motnang go taut wasey genang so, Genam nando lo taling? Genam neyboy genang sedue kua! Genam samsoklik go kua dali!” 15 Ngga ey, sikabung naklay sono Yesus lo gemang pen-nawon, “Kunala temoy no motnang se! Gugluik eygo so kua lemoy! Seni so, taut mata sogo tang so sikabung go wali ngge kua suing gabe.”
16 Nggano, nebut yatrang meno, Yesus lo gemang nguok-nawon, “Sedue klaya duo gemang. Nemot go usuwasma mata dega so gemang seni. 17 Ngga ey, ngge kalik, gemang duing-nawon, ‘Ye... genam go wasma miam dega ey mo seni. No, wasma ta genang sip kua ne. Sogo kalik ya semu-lu?’ 18 Nggano, gemang duing-nawon, ‘Nggeasui go, wasma so ta go yap, seguay-seguay go ngge togut go, kangok dega so mea klik-alu. Genam go usuwasma, taut naklay ngga ba no ta sogo be.’ 19 Yap ngga klik lu go, genam mea yakay. Nggano, genam tang so mea pu-alu, ‘Ye... nggeasui go mo suey. Yagui no-yagui no mot lo dam genang wasma, taut, mata so gemang. Dia-a mot mea susuing, ten-a mea dedam, bu-a mea dedrop. Kuno-woyno rley-a mea pupluok!’ 20 No, way so nemot sono Ki Wali Iram lo pu go, ‘Mot puplu sogo sedue! Nggeasui wadi dali, mot go dabuilap Genam lo mea teguik. Ngga ey, mot go saysuk nogo so taut yaluim go, nando no ne ya itak?’ ” 21 Tandali Yesus lo pu go, “Nemot go saysuk seguong nogo taut-a, nando lo iyaluim go, no, Ki Wali Iram nogo klum kua go, sedue ngga kalik dali nemot mea lemoy.”
Kunala walong so kua lek
22 Tandali Nemot go andua-andua no Yesus lo gemang pen-nawon, “Ngganemot sogo so, nggeasui go motnang no gabe pepen, ‘Wali nogo ten ey amka kok genang, kunala walong so motnang kua lek.’ 23 Se senong: wali ey saysuk ey, tendam amka kok genang ey kua kerlam. Wali ey saysuk eygo-a taut blo so! 24 Wi no se ikum: nemotnang didon bluim kua senong, wasma iti kua senong, nggano, nemotnang go ten so ta go yap kua dali. No, kuno-woyno, nemotnang nogo ten Ki Wali Iram lo gemang i-iti. Se duing! Wi eygo motnang ngge, kua kerlam. Ki Wali Iram go klum, motnang nogo katu ey. 25 Yang! Kunala walong so lek go sik sogo, yagui walong so suing genang ku klaya go motnang logo yakua tebok. 26 Seguay go ngga motnang logo yakua tebok go, sogo so, taut temu sogo kunala, walong so ya lek?
27 Neguenun-a se ikum: sogo kalik so, un suey so pupung go! Nemot go ta logo, dan yakua ining, amka yakua sebut dali. No, neguenun teguop dato, srem teguop go deguena Salomo lo kok go ey, kua kerlam. Neguenun teguop dato seni. 28 Se senong! Ku tebot dato go ba no di un kuok go, koy no mea puit. No, di un teguop so Ki Wali Kumam lo mo semu-ngam. Teguop so motnang lemoy genang-a Ki Wali Iram lo gabe duduing. Sogo so dabui lo ngga kua kekeng ne? 29 Ngganemot sogo so, ten dam genang, bu drop genang kunala-a, kangok so motnang kua lek! 30 Kunala ngga, kukunan blo sogo sikabung lo duduing go gemang. Saysuk nogo kunala-a, walong so motnang, kua lek. Mot lo duduing go naklay Ki Wali Iram lo mo senong gemang. 31 Yang! Woy Wali Iram tamlak go duduing mot go wali ba no lemoy genang-a, banim se uwet. Ngga ey mot go wali nogo sogo naklay mea tebok-sing dali.
32 Genam no keng go sikabung domba nok kalik motnang gabe. No, suali kua tra! Se senong: motnang nogo Ki Wali Aya yakay kangok. Motnang nogo Nemot go blongdon duduing mo wasey gabe.
33 Gabe pen-asitugu: motnang go taut naklay, duoy so nase nay! Duoy ngga sik so, sikabung taut kua gono taiti so se ikak. Woy Wali Iram go blongdon ba nogo tatui sip-a mot se semu, suey so yakua buin go taut-a yaluim genang. Ngga sogo so, womsedue logo mea kua togut go ikak. Ki logo, segutmung logo yakua pung. 34 Yang, seni so! Nago so mot go taut gigit go, dabui ngga sono gemang lelek dali.”
Ki Wali Iram go ku sogo dali-dali se bubung
35 Yesus lo gemang pen, “Walipeli suey so yay se susuing. Motnang go sagoy dali-dali se blon. 36 Kabung dok walop sik so wengkabui uweng goso kebali sedue lo bubung go kalik motnang se suing. Yatap no nemot lo tetegak go, keda so buong go, yataput tenuing go, keda so wawi go degut genang. 37 Se senong: dali-dali bubung go kebali sikabung-a, nenem yakay ey gemang. Seni so gabe pen-asitugu: Yang! wengkabui lo mea pu, ‘Motnang suing-lak, nggeasui go, motnang nogo ten iti genang, genam lo mea tebok.’ 38 Seni so, pung genang woy wengkabui logo kua pen gabe. Wadi nesip ya pung? Ku blong yam no ya pung? No, woy ngganemot nogo maning yay-a dali nandonang lo bubung go, wengkabui weng go, nemotnang sono nenem yakay-a mea iti. 39 Kua kay! Yap wengkabui mo senong go, kaning so wadi womsedue ya pung go, yap yay suey so sedue ngga lo mea suing. Ngga ey, wom sedue degut genang, yakua. 40 Ngga kalik go, walipeli yay suey so motnang se susuing. Blong Dem weng genang ku ngga motnang yakua senong.”
41 Nebut ngga yam so tup-nenawon gono, Woy Dem sono Petrus lo gemang usi-nawon, “Aya! Nebut atuia nggenemot, atnang seguong nogo so pen-ato? Sikabung temu nogo ey?” 42-43 Ngga ey, yatrang meno Woy Dem lo gemang pen-nawon, “Petrus! Ngge mot se senong: nando tamot suey so kebali pupluok go, e... tandali wengkabui pung go, tamot ngga nenem yakay ey mea. Yang! Suey so sikabung nogo ten so i-iti go ikum go, kebali sedue temu nogo wengkabui so, tamot ngga-a mea temuit! 44 Motnang se senong: taut naklay nemot go kebali sedue ngganemot go ta sono, wengkabui lo mea itak. 45-46 No, nando tamot lo ngge kalik duing go, ‘Genam go wengkabui, keda so tandali go yakua pung-wa!’ Ngga ey, kebali sedue temu, demun balop go yat gono, nemot tang go-a, ten dedam bu drop golo gemang puplu. No, wengkabui pung so pung go taybat ngga ikum go mea pu, ‘Kebali sedue ngga suey so kebali kua sesemu.’ Esang! Kekay so tamot ngga wengkabui lo but go mea kebong. Suey so kua kekeng go sikabung ey mea tenguo.”
47 “Kua kay! Wengkabui go senongduduing go, kua keng go, tamot ngga kangok so demun mea suey dali. 48 No, wengkabui go duduing kua senong go, suey so kebali kua semu go, tamot ngga nogo demun, seguay so mea but.”
“Ngge motnang se senong: nando no miam ey mo taling go, nemot sik sogo, miam dali so tang mea usi. Nggano, nando no, seguay so taling go, nemot sik sogo seguay dali so tang mea usi.”
Yesus no keng go logo tong-tong mea lemoy
49 “Se senong: kukunan ngge nogo teguop go-a, piam go sik so tegek genang koy-a iti go Genam gabe weng. No, nemot go woy maning. Koy ngga pung go seni ngga ikum genang, kangok so Genam gabe duduing. 50 No esang! Idekeba-a genam lo banim mea lek-silu. Ngganemot, maning kua lemoy go nogo, kangok dega so dabui ide gabe tra-tugu. 51 Suey so motnang se duing: kukunan blo nogo ngengam-a iti go Genam kua li. Sikabung banom-banom tong genang plesagui-a, Genam iti go gabe weng. 52 Nggeasui go sik so, yap tenglam sedue taidi yam sogo, namon so mea truk-sing. Nangglik si lo, namon duo no sagui kong go, kua go, namon duo lo nangglik si sono sagui mea semu dali. 53 Way-way so danon, nglangin ey; denun, unen ey sagui mea pung. Nggano, denunduo go, unenkabuisegla ey sagui mea pung dali.” a
Tasam-a ikum go nemudi sogo tap-a kua senong
54 Ku ngganemot no, sikabung mata sogo no, nebutmang ngge kalik Yesus lo gemang king-nawon, “Motnang lo pepen go: woy sut sik so utkenuim klak go, sa pu-yun so gabe. Ngga, sa seni so mea pu. 55 Nggano, woy sut sik so nebit iti go, woy seguong so mea pipli. Ngga, seni so mea lemoy. 56 Motnang segaplu! Kukunan go tasam ut temoy nogo naklay keda so motnang logo mea senong. No, gabe usi-situgu, ‘Keda sogo, Ki Wali Iram go tasam, sogo sik so motnang kua sesenong? 57 Sogo temoy no, seni eygo, nemudi sogo tap motnang tang go logo ya kua pu?’ 58 Se duing, ‘Nago no, sedue meno ey sagui semu go, maning tap koklong go, woy ngganemot no, taluik go keda so nase ngengam! Ngga kalik kua go, woy-woy go ta sono sedue ngganemot lo iti go, neyboy go, plesedue sono iti go, boy ba sono mot gemang ne ya betep.’ 59 Seni so gabe we-situgu, ‘Boy ba sono mot betep go, tandali go yakua pung! No, taitak genang duoy naklay iti goso mot tandali go mea pung.’ ”