6
Taut kua go sikabung no tebok go duoy
1 Se senong! Musa go demutrui no nemudi so mot kekeng go, sikabung ibe lo ikum genang-a pupluok go, ngga piam. Yangga:
- taut kua go sikabung sono duoy tebok go;
- dewi dialo-dialo pupu go;
- tenday genuing susuing go.
Ngga kalik so motnang lo pupluok go, mot nogo teguop tasam ngga sik sogo Ki Wali aya logo motnang nogo mea kua iti.
2 Se duing! Taut kua go sikabung nogo taiti iti gono, dia sono sikabung temu tup genang so kua pepen-klong. Ngga, dabui kua iti go sikabung lo, wamoy so dewi yap ba no pupluok go tasam gemang. Nggano, tap tebuem-tebuem no ip go taiti i-iti go, klong-weng go sikabung lo ikum genang so. Motnang se senong! Ngga kalik pupluok golo, nemotnang go teguop kayseguong so mo iti gemang. Yansi go Blong Dia yakena ba nogo mea kua iti. 3 No, taiti iti genang so mot duing go, sikabung meno ikum go kua senong. Yangga, ngge kalik se: ta semlea idi lo iti go, ta kali idi kua senong! 4 Mot go taiti kok-kok so i-iti go-a suey. Ngga kalik kok-kok so i-iti go, Ki Wali Aya seguong lo ikum go, mot nogo teguop way mea iti.
Dewi tap nogo mangking
5 Se senong! Dewi pu so motnang duing go, dabui ta ey tetegue go sikabung wamoy eygo kalik kua! Nemotnang dega-a sikabung meno lo ikum genang so dewi yap ba, tap tebuem-tebuem no ip go dewi dia lo gemang pupu. Motnang se senong: ngga kalik pupluok golo, nemotnang go u-usey nogo seguot teguop kekayso gemang mo i-iti. Yansi go Blong Dia yakena ba nogo mea kua gemang.
6 No, dewi pu genang, degu ba sono motnang-a degut go, yatap kadun gono, mot go Ki Wali Aya nemu lo kua ikum go sono, dewi se klak! Yang! Dewi ngga pu go tup go, nemu lo kua ikum go Ki Wali Aya lo mo senong. Ngga ey teguop way Nemot logo-a mea iti.
Dewi seni eygo pu genang
7 Ngge se senong: dewi ba nogo, walong bata so nebut kua lelek. Ngga nemot go seni kua. Woy Wali Iram kua senong go sikabung kalik, ngge kalik nemotnang logo gemang duing, “Walong so lek go dewi-a tup go mea tebok.” 8 Motnang-a, ngga kalik kua pupluok! Ki Wali Iram dui ey. Sogo-sogo so motnang lo duduing go, maning kua pu gono, Ki Wali Aya lo banim temu no mo senong gemang.
9-13 Ngga tang so, ngge kalik motnang logo dewi se pu,
O, aya sop! Blong Dia yakena ba sogo.
Mot go sui seguong-a iway se i-iti;
Mot go blongdon teguop so se tetaling.
Blong Dia yakena ba sogo ey kukunan blo sogo eygo,
Mot go duduing-a iwat go se pupluok.
Nggeasui go ku no atnang lo dam genang ten,
tabunga iti-kundo ya!
Atnang logo kuklue piam konkebamling,
ngga sono se kay, Mot logo kua duduing!
Atnang sikabung meno lo piam go,
ngga sono kay go, itak go kalik.
Yatrangmlue ba sono go, atnang kua itak go degut.
No, Kupiamgo ta sik sogo-a, Mot lo se plet-lak!
[Yang! Mot seguong-a Ki Wali Iram,
blongdon eygo tong kua tong go gabe. Seni!] a
14 Se senong! Sikabung meno logo piam, tandali motnang lo kua duing go tang so, motnang lo pluok go piam Ki Wali Iram logo mea kua duing dali. 15 No, mot no sikabung meno lo pluok go piam, mot logo ya kua kay go, mot logo kuklue piam konkebamling, Ki Wali Aya logo mea kua kebet dali.
Tenday genuing susuing go mangking
16 Nggano, Ki Wali Iram nogo tenday genuing so suing go, motnang go nebuemnemu u suk-a kua. Ngga, wamoymlue eygo sikabung lo, sikabung meno senong genang so tetaling go gemang. No, motnang se senong! Ngga kalik pupluok go, nemotnang nogo teguop kayseguong so gemang i-iti. Yansi go Blong Dia yakena ba nogo mea kua iti. 17-18 No, Ki Wali Iram nogo so tenday genuing susuing go, motnang nebuemnemu bu ulu go, betodop mlay nemon ey ut go, yakay ey se! Tenday genuing motnang susuing go sikabung meno lo senong genaning. No, motnang go Ki Wali Aya-a, mo senong. Tenday genuing dia nogo ey kua taling goso suing go, ngga Ki Wali Aya lo gabe ikum. Ngga ey teguop way Nemot lo mea iti.
Kiki taut-a se iyaluim
(Lukas 12:33, 34)
19 Se tup! Mot wali genang, kukunan taut-a kua iyaluim! Kukunan taut ngga: segutmung lo, kui logo pung go, wom sedue logo yap togut go mea king dali. 20 No, kikitaut Blong Dia yakena ba sogo-a, motnang logo se iyaluim! Ngga, segutmung logo, kui logo ya kua pung. Ngga ey, yap togut go wom sedue lo ya kua king dali. 21 No, se senong: mot go taut nago so gigit go, mot go dabui ngga sono gemang lelek dali.
Saysuk nogo neblong
22 Motnang, se tup! Nemutegun ngge, saysuk go sagoy gabe. Nemu suey go sogo so, mot go saysuk naklay mablong so mea itak. 23 No, nemu kuklik go, saysuk naklay ku mea klik dali. Ngga ey mot go blong mea kenip. Mot ba sogo blong kenip go, wali naklay kukuim so mea lemoy.
Wengkabui klaya seguong se
24 Sedue klaya duo, wengkabui namon sogo, suey so kebali ya kua semu. Meno nogo-a klum ey tra go, kebali suey so semu go, meno nogo sesrok ey kebali mea semu. Se senong: walitap ey, taut tap ey, banom-banom gabe. Ki Wali Iram nogo ey Mamon b nogo ey klay golo iway ya kua klak.
Kunala walong so kua lek
25 Walitap ey wali taut banom-banom go tang so, ngge se duing! Wali nogo ten ey bu ey, amka kok genang, motnang kunala walong so kua lek! Se senong! Mot go wali go seni, ten ey bu eygo dedam genang ey kua kerlam. Nggano, saysuk go seni, amka go don ey kua kerlam dali. 26 Wi-a motnang se ikum: Pling go uwet go usu nemotnang logo kua semu. Ngga ey, wasma ta genang yap dali go wi logo kua klik. No, nemotnang nogo ten, Ki Wali Aya lo gemang i-iti. Nemot go nemuku nogo, motnang seni kangok dega gabe. Se duing: Ki Wali Iram go suongku nogo, nando-a sipsuing blo so? Sinok-a? Winok-a? 27 Kunala walong so kua lelek! Yang! Kunala walong so lek go sik sogo, yagui walong so suing genang ku klaya go, motnang logo ya kua tebok. 28 Amka kua go sogo, kunala walong so kua lek. Neguen un no mot se ikum! Kebali semu genang nemot kua senong, keba klik nemot kua senong. 29 No, At lo gabe pen-asitugu, “Di un teguop dato seni, srem teguop go deguena Salomo lo kok go ey kua kerlam.”
30 Se senong! Ku tebot dato go ba no di un kuok go, koy no mea puit. No, di un teguop so Ki Wali Kumam lo mo semu-ngam. Teguop so motnang lemoy genang-a, Ki Wali Iram lo gabe duduing. Sogo so Ki Wali Iram no dabui lo motnang kua keng? 31 Ngganemot sogo so, kunala ngge walong so kua lelek: tendam-budrop, amka kok genang, sogo kalik so ya lemoy? 32 Ngga kalik go kunala Ki Wali Iram kua senong go sikabung logo-a gemang u-usey! No, motnang go walinang sogo naklay ngga Ki Wali Aya mo senong gemang. 33 Yang! Woy Wali Iram go blongdon, seni eygo so, nemudi so iwat genang-a, banim wet go, motnang logo se mlak. Walinang sogo naklay, ngga temoy no mea tebok-sing. 34 Utep genang sogo kunala, kua lek! Yang, utep genang sogo ide ngga mo nemot, tebadali go ey ya kua! Ku klaya go ide ngga, ku ngganemot nogo so mo i gemang.