7
Sikabung meno go kuklue-a wet go kua pepen
1 Motnang se tup! Sikabung meno go kuklue-a motnang logo kua uwet, motnang tang go kuklue Ki Wali Iram lo wet genaning. 2 Se senong! Sikabung meno so, sogo kalik mot lo neyboy go, ngga kalik dali mot tang go Ki Wali Iram logo mea wet dali. Andua so mot lo tui go yam dali lo, mot nogo yam mea tui.
3 Ngga kalik uwet go yatrang ngge kalik gabe! Dilekop dato andua go nemu ba sogo-a, mot lo ikum go, no, mot go nemu ba sogo ditebot dega-a, mot kua senong ne. 4 Ngga kalik go, sogo kalik so mot logo ne ya pu, “Mot go nemu ba sogo lekop, genam lo ya pla go.” Nemot-a ditebot dega-a, mot go nemu ba so gemang gigit. 5 Motnang, wamoymlue eygo sikabung, ngge se tup! Banim no, mot tang go nemu ba sogo ditebot-a se wagot! Mot go nemu naklay suey gono, nenguon so andua go dilekop ikum go mea tenguo.
6 Ngga naklay senong go, ngge-a se duing dali: mot go blong eygo senongduduing, uduo no-nebo no tebadali sang kua tetega! Uduo go-nebo go masi lo gualing go, iwot go mot tang go-a mea glok ne.
Ki Wali Iram sik sogo-a dewi ba no uwadong genang
7 Ngge, kua kay: dewi ba nogo se uwadong! Ngga ey, se senong, mot nogo mea iti. Dabui lo seni so se uwet! Ngga ey se senong, uwet go ngga mea tegu. Yatap no se tetegak! Se senong, mot nogo yataput mea tenuing.
8 Yang! Nando lo uwadong go nemot nogo mea iti, uwet go logo mea tegu. Ngga ey, yatap no tetegak go nogo yataput mea tenuing.
9 Se duing, “Ten so denok lo wadong go, way so demu-a iti go, motnang sik sogo nando aya-a mo? 10 Dasi so denok lo wadong go, lema-a way so ne iti go?” 11 Yang! Duo no suey go-a iti genang, motnang sikabung piam golo mo mlay. Se senong: teguop seni go-a Blong Dia yakena sogo Ki Wali Aya logo mea iti.
Seni eygo-a pupluok genang tap
12 Ayanang, mianang. Motnang nogo sikabung meno lo suey go-a semu genang so duing go, ngga kalik dali go-a sikabung meno nogo motnang logo se pupluok! Ngga, Musa ey nabi-nabi eygo lo Wali Sam klaut ba nogo ngunguok go kutrui gemang.
13 Wali inim sono degut genang Iram Yesus no tupduk go se keng. Tap ey, yataput bata go logo sikabung, mata dega so gemang koklong. Esang! Kua tupduk go tap ngga waluk go kebong genang gemang. Ngganemot sogo so, yataput kekedik go ba lo wali inim sono go, motnang-a se degut. 14 Se senong! Wali inim sono go tap ey yataput ey kekedik go tang so, sikabung nangglik eygo senang wali sono koklong go seguong lo mea tegu sang!
Wali saguip genang so ngunguok go
15 Wamoy sogo klui-klui nogo kunala temoy no motnang se! Dabui suey go domba kalik pung go mea weng. No seni so, duen uduo wasrang kalong eygo nemotnang gemang. 16 Nemotnang ikum genang, di kalik don sik so, tasam ikum go mea senong. Yang! Isegluan go don anggul sogo ya kua iwot. 17 Se senong! Di suey go seni suey go-a mea tagot. Di piam go seni piam go-a mea tagot dali. 18 Seni suey go di piam go logo mea kua tagot. Ngga deding ba lo. Nggano di piam golo didon suey go mea kua tagot dali. 19 Yang! Don kua tetegot go di, ngga sono tuo go koy no mea puit-lak. 20 Se senong: wamoy sogo klui-klui ngga kalik dali gemang! Nemotnang go tasam seni sik so ikum go, imot mea senong: walitap so pupuem go klui, ngge gabe.
21 Ngga ey, ngge motnang se senong dali! Ngge kalik walong seguong-a Genam sono luluik go, “Woy Dem! Woy Dem!” Woy Wali Iram go blung sogo, nemot ngga mea kua degut. No, Ki Wali Aya go duduing so pupluok go-a mea degut.
22 Se senong! Yansi go ku, tandali Genam weng go nogo, sikabung mata sogo lo Genam sono mea usi, “Woy Dem! Woy Dem!
Mot go sui nogo Wali deguo genam lo mo penklong.
Mot go sui ba no naliwabu pu go mo yat.
Mot go sui no tasam kangok go genam lo mo pluok dali.”
23 Ku ngganemot no, kayseguong-a nemudi so nemot sono Genam lo mea pu, “Demu kua keng go, tabat kuaseni go-a pupluok go sikabung! Motnang, Genam kua senong gabe. At go suongku sik sogo nase klong!”
Yesus no tupduk go ey kua tupduk go sikabung ey
24 Yang! Genam go nebut tup gono takebali so pluok go, ngga demu blo no kunala kalong eygo sedue lo yap klik go kalik gemang! 25 Nebit kangok go iti go, sa watui pu go, bu klak go nogo, yap ngga tutuing kua tra. Demu dawin eygo kutrui blo no klik go nogo.
26 No, Genam go nebut nggenemot tup gono takebali so kua pupluok go, kaseglok blo no sedue puplu lo klik go yap kalik gemang. 27 Nebit iti go, sa watui pu go, bulatang klak golo, yap ngga truik go mea togut. Ngganemot nogo naklay mea waluk.
Yesus go nebut so tup go sikabung lo duing go