5
Meduimdedon blo sik so Wali tap Yesus lo nguok go
Teguop yakay dega eygo
1 Ku ngganemot nogo sikabung mata so uweng go ikum go, meduimdedon blo no Yesus gemang got-nawon. Nggano, Nemot lo kuoy go andua-andua, Yesus mit no gemang weng dali. 2 Ngga ey nemotnang no ngge kalik Yesus lo gemang nguok-tenawon,
3 Ki Wali Iram go suongku nogo nando dabui ku sono susuing go,
nemot-a Woy Wali Iram lo iwat go, teguop-yakay ey gemang.
Se senong! Ki Wali Iram ey blong ba no wali genang,
nemotnang-a gemang.
4 Unebu ba lo uwet go,
nemot-a Woy Wali Iram lo iwat go,
teguop-yakay ey gemang.
Se senong! Mlatueng go, Ki Wali Iram lo iwat go,
dabui yakay genang-a, nemotnang nogo mea taling.
5 Ki Wali Iram go suongku nogo unuim-unuim so nando wali go,
nemot-a Woy Wali Iram lo iwat go, teguop-yakay ey gemang.
Se senong! Nan seding no-seding no tamlak genang,
nemotnang go ta no mea itak.
6 Walitap seni eygo-a ten sogo kalik kangok so nando lo uwet go,
nemot-a Woy Wali Iram lo iwat go, teguop-yakay ey gemang.
Se senong! Wali seni ey tagot go miam eygo
nemotnang no Ki Wali Iram lo mea iti.
7 Dabuikuala goso nando-a lemoy go,
nemot-a Woy Wali Iram lo iwat go, teguop-yakay ey gemang.
Se senong! Sikabung ngga nogo klum way dabuikuala-a mea taling.
8 Dabui klaut eygo so nando lo susuing go,
nemot-a Woy Wali Iram lo iwat go, teguop-yakay ey gemang.
Se senong! Ki Wali Iram nemotnang logo-a mea ikum.
9 Ngengam-yakay genang nando lo pupluok go,
nemot-a Woy Wali Iram lo iwat go, teguop-yakay ey gemang.
Se senong! Nemotnang-a kikiwali duoyap so mea pu.
10 Walitap seni eygo-a wet go,
Ki Wali Iram lo iwat go-a pupluok go tang so,
ple ey tengang ey tutruik go, nemot-a teguop-yakay ey gemang.
Se senong! Ki Wali Iram ey blong ba no wali genang,
nemotnang-a gemang.
11 Ngga naklay blo sogo, ngge kalik Genam lo gabe pen-atugu, “Blong Dem no dabui lo keng go tang so, motnang sikabung lo truik go, mlak go, kemla pu go, iseng taling go, nggano wamoy eygo so pu go, nueya! Ki Wali Iram lo iwat go, teguop-yakay motnang mea tra.” 12 No, motnang tom-a se tup! Kua kay! Ki Wali Iram lo mot-dak go nabi-nabi banim pluep-angum go, ngga kalik dali mo taling-nengam gemang. Yang, yakay-a kangok so se tra! Motnang go seguot nogo taiti kangok go, Ki Wali Iram lo dali-dali mo tui-sing gemang.
Kukunan nogo beapdon ey wali neblong eygo
13 Se senong! Motnang ngge, Genam no dabui lo keng go sikabung, kukunan sono go beapdon kalik gabe. Beapdon demu kalik go ngga, tom yam so kua go, tandali tom eygo, sogo lo ya tom? Yakua. Tom kua goso mo lemoy go, nemot go seni mea kua dali. Ngga kalik go beap, nasrok sip sono betep go, klong-weng go sikabung lo mea gualing.
14 Nggano, kukunan nogo neblong motnang ngge gabe. Meduim blo sogo yakena go neblong, ngga ba nogo ya kua kok. Nemot go neblong neguon so mea ikum. 15 Nggano, yap ba blong genang neblong, saula logo ya kua kebet. No, pelita so kokong go sip no mea kong. Ngga ey, yap ba sogo sikabung mablong so nemot lo itak genang.
16 Sikabung temu ikum genang, neblong ngga kalik so motnang ngge se blong. Motnang go tasuey ikum go sik so, Blong Dia yakena sogo Ki Wali Aya go sui iway-a iti genang.
Musa logo demutrui seni eygo-a teguop so pupluok genang
17 Se tup! Ngge kalik motnang lo duing genaning: Musa logo demutrui ey nabi-nabi lo pen-nengam go ey, nabay so Genam pung? Ngga kalik kua! No, demutrui seni-a lemoy genang so At pung go gabe. 18 Ngga sogo so, ngge kalik gabe pen-asitugu, “Ut ey nan ey maning gigit go, demutrui don ey mea gigit, e... nemot go seni naklay se lemoy, plon klayanang go demutrui ngga, ya kua nabay-sing.” 19 Musa logo demutrui sik sogo klaya dato, nando lo paysing go, nggano sikabung temu nogo sang ey tui go, Woy Wali Iram go blongdon ba nogo, ku seni sogo sipsuing-a mea iti. No, demutrui ngga naklay nando lo keng go pupluok go, ngunguok go, Woy Wali Iram go blongdon ba nogo sip, blo dega sogo-a nemot no mea taling. 20 Se senong! Ki Wali Iram go suongku no seni eygo so lemoy genang, kamso don ey Musa logo demutrui so nguok go klui-klui ey sedue Parisi eygo lo u-usey. No, gabe pen-asitugu, “Tasam seni eygo ngga blo sono motnang, Genam go andua-andua logo kua pung go, Woy Wali Iram go blongdon ba nogo, motnang mea kua degut dali.”
Ngengam go nebut
21 Yatrang-yatrang ngge, Genam lo iti go nogo-a se duing: Babuasi nogo ngge kalik, Ki Wali Iram lo mo pen-ngam, “Sedue kua but go kebong! Sedue nando lo but go kebong go, ibe lo neyboy go, idekeba se taling!” a
22 No, esang! Motnang nogo, ngga blo sogo demu-a Genam lo gabe tetaling, “Andua nogo dabui piam-a nando lo tra go, neyboy gono, sedue ngga nogo idekeba se iti!” Nggano Nemot andua so nando lo pu go, “Mot yane sogo!” Iram-tegay lo neyboy genang sogo nemot ngga nase wawi go klong. b Andua so nando lo pu go, “Mot, puplu sogo. Sedue ngga, kisebui idakoy nebleng ba sono mea betep.”
23-24 Yang! Motnang no gabe pen-asitugu, “Piam konkebamling suep genang taiti ey Ki Wali yap sono uweng gono, andua lo tene-sing go, tandali duing go, namboy dewi se itak. Ngga ey, ngengam genang-a se klong. Ngengam gono, Ki Wali Iram sono taiti ngga se iti.”
25 Kua kay! Nago no, sedue meno ey sagui semu go, maning kerlam so tap koklong gono, keda so nase ngengam! Ngga kalik kua go, mot iram-tegay lo neyboy genang so sedue ngga lo itak go, nggano, boy ba sono betep genang, plesedue sono gemang ne ya iti. 26 Gabe pen-asitugu, “Boy ba sono betep go, tandali ngga ba sik sogo mot ya kua pung! No, ta itak genang drang naklay king goso mea pung.”
Kabung iti-itak go
27 Ngge se senong dali! Musa lo pu go, “Kamea kua pluok!” c 28 No, esang! Tap ngga blo sogo-a gabe taling-situgu, kabung no ikum go, saduikenok sogo ey nando lo duing go, dabui ba logo kamea nemot lo mo pluok gemang. 29 Ngga kalik go, sogo kalik ya? Yang, gabe pen-asitugu, “Nemu idi lo ku klik ba sono mot uwawi go, nemu-a wagot go nase betep! Tamasi klaya itak go-a suey! Saysuk naklay idakoy nebleng ba sono betep genaning.” 30 Ngga kalik dali: tabat kua seni go ta idi lo pupluok go, ta ngganemot-a tong go nase betep! Ta idi-a itak go ngga suey. Tabat tang so, tamasi naklay idakoy nebleng ba sono, betep genaning!
31 Ngge se senong dali! Musa lo pu go, “Senun nando lo tenguo go, tenguo go taling genang sam se iti!” d 32 No, motnang nogo tap ngga blo sogo-a, At logo gabe tetaling, “Senun nando lo tenguo go, kabung ngga nogo kamea tap nemot lo gemang taling. Kabung ngga so iti go sedue, kamea so gemang uwet dali. Demutrui no kua tong go, kamea tap lo iti go-a, mea itak.”
Ta nat go
33 Yang! Blung Israel no Musa lo pu-ngam go motnang mo senong, “Ki Wali Iram go suongku no ta ey nat go tegadi-a, suey so se keng!” 34 No, tap ngga blo sogo-a motnang nogo At lo gabe tetaling, “Tebadali go ta kua nat seni!” Ut sono go ta kua nat! Ut ngga, Ki Wali Iram go iramdemu seguong so taling go. e 35 Nan sono ta kua nat dali! Se senong: nan ngge, Ki Wali Iram go masi gualing sip. Ngga ey, yakena Yerusalem sono pu go, ta kua nat! Yerusalem ngga Woy Wali yakena seguong-a gemang. f 36 Yang! Mot tang so mot go wengkabui sono pu go ta kua nat! Se senong: wengkabui ngga Ki Wali Kumam lo semu go. Mot go wengkabui blo sogo betodop klayanang go mot tang so pu go ya kua blong, ya kua seguo dali. 37 Ngge-a se taling: seni sogo, seni-a se yang! Kua go, kua so se pu! Tebadali mot lo tanat go, ngga Kupiamgo sik sogo gemang.
Piam way kua taling
38 Babuasi no ngge kalik Musa lo pen-ngam go, motnang mo tup, “Nemu wagot go nemu way se wagot dali; wasrang tuot go, wasrang way-a se tuot dali!” g 39 No, motnang nogo tap ngga blo sogo-a At logo gabe tetaling, “Motnang no piam semu go, waydang go, piam way dali-a kua taling! No, kadon idi no, nando lo plapang go, kadon meno iti go nase plapang-nayon dali.” 40 Nago no, mot sik sogo taway tandali iti genang so sedue meno lo wadong go, nase iti. Mot go wip gluik so duduing, wip inim nase iti dali. 41 Nggano, ta logo ey plong go, woy klaya yam so klong genang, woy namon yam so nemot go taut lek go se klong! 42 Sogo-sogo taut so weng go wadong go, kua naglong nase iti! Duoy namboy iti so wadong go, nase iti kua yat dali!
Way-way sogo klum
43 Ngge kalik go Musa lo pen-ngam go mo tup dali, “Way-way so andua nogo klum-a imot se tetaling! No, plesi nogo dabui ikle-a se!” h 44 No, motnang nogo tap ngga blo sogo-a, At logo gabe tetaling: plesi nogo motnang klum se taling! Ngga ey ple ey tengang ey tutruik go sedue sogo dewi-a se pu. 45 Ngga kalik semu go tang so, Ki Wali Iram go duoyap so motnang mea pu.
Se senong: sikabung suey go-piam go naklay nogo, Ki Wali Iram lo pu goso, woy gabe keklak, ngga ey, sa Nemot dali lo gabe i-iti. 46 Se duing! Motnang no klum andua lo taling go, ngga ey andua nogo klum way tetaling go, Ki Wali Iram nogo seni, sogo kalik? Ki Wali Iram nogo seni seguay. Klum ngga kalik go, piam eygo sedue blasteng so iyaluim go logo gemang tetaling dali. 47 Nggano, andua seguong nogo-a suey, mot lo pupu go, sogo teguop go-a mot lo ne tetaling? Ki Wali Iram nogo seni seguay. Ki Wali Iram kua senong go sikabung logo ngga kalik go klum gemang tetaling dali. 48 Yang! Mot lo taling go klum teguop dato so se! Blong Dia yakena sik so teguop so sikabung suey go piam go sono, Ki Wali Iram lo kuklum go kalik.