14
Ku Sabat no sedue sadui sogo Yesus lo pali go
1 Ki Wali Iram go ku Sabat no, sedue Parisi dega go yap no, tendam so Yesus gemang degut-nawon. Ngga ey, Yesus go tasam piam taling genang so, nemu-a tui so-tui go gemang bung-netenawon. 2 Se ikum: tamasi bu lo mot go sedue meno gemang degut-nawon dali. 3 Ngga ikum gono, sedue Parisi ey, Musa logo demutrui so ngunguok go klui-klui ngganemot sono, Yesus lo gemang usi-nawon, “Sogo kalik motnang logo duduing: Ki Wali Iram go Sabat ku nogo, sedue ya pali, kua?” 4 Ngga sogo sedue nebut way kua tenguo, yakot so got-netenawon. Nggano, sadui sogo sedue ngga go ta no Yesus lo mlak go kekayso sadui gemang pali-anatun. Ngga ey, nemot no pu go, “Mot klong-a!” 5 Ngganemot no, sedue Parisi ey, klui-klui ey gono nebutmang ngge, Yesus lo gemang king-nawon, “Motnang go duo-a, sapi-a mu ba no pui go, sogo kalik ya? Ki Wali Iram go ku tang so, nemu-a ya day?” 6 Ngga tup go, nebut way kua tenguo-nesrenawon.
Nando-a blo sono go ya suing
7 Ngganemot no, sedue-sedue sip suey go-a uwet go ikum gono, nebut yatrang-a ten so dedam go glop no Yesus lo gemang pu-tenawon, 8 “Walop sogo so motnang usi go nogo, mot sip suey gono keda so kua klong go suing! Nago no, glop sui eygo mo usi dali mo, 9 walop wengkabui weng go pu genaning, ‘Esang! Sip ngge, glop sui eygo ngga nogo so, sey go be.’ Ngga ey taton sogo sip no, suongsut ey mot klong go mea suing. 10 No, walop so mo usi go, taton sogo sip no mot se suing! Walop wengkabui weng go, ikum gono, mea pu, ‘Andua, mot ip go seboy no klong go suing-a!’ Ngga kalik goso, sikabung logo mot go sui, suey so mea pu. 11 Ngganemot sogo so ngge se senong: nemot tang so nando lo pu go, ‘Genam dega blo so! Sedue ngganemot, ku sono mea kenok. No, nando lo pu go: genam sui kua go sedue-wa!’ Nemot go sui-a, blo sono mea iti.”
Mot go dabuiklum nando no ya taling
12 Glop so usi go sedue no Yesus lo gemang pu-nawon, “Nago no, walop tendam so glop usi go, anduayap, akanang, yap tenglam dagu logo, sikabung taut mata sogo seguong-a mot logo kua usi! Ngga kalik go klum seni kua. Ngge, mot lo ne mea duduing, ‘Way dali sogo nemotnang lo usi genang.’ 13 No, walop sogo so, sedue taut kua go-a, ta leng go masi leng go, yambi sogo, nemu pung go-a, mot logo se usi! 14 Nemotnang logo, mot go tasuey way yakua semu. No, seni eygo, nemudi sogo sikabung tandali nglong genang ku pung gono, mot nogo taiti way mea iti.”
Walop sogo sikabung nando ya pluep
15 Ten so dedam go glop meno, nebutmang ngge tup gono, Yesus sono gemang pu-tenawon, “Woy Wali Iram go walop keng genang so usi go sikabung-a, nenem yakay ey nemotnang gemang!” 16 No, suey so senong genang, way so nebut ngge-a Yesus lo gemang pen-nawon, “Ku meno no, walop kangok go tendam sogo deguo, sikabung mata sogo no, sedue klaya duo lo gemang kung-sing. 17 Walop semu genang woy no, tamot no gemang pu, ‘Mot klong go, walopnang so glop usi go ngga, se pu go weng-lak. Walop tenuing genang, naklay-naklay dali mo ta gabe.’
18 Tamot ngga nawon go, nemotnang naklay lo klay-klay gemang pu-netenawon, ‘Esang! Walop deguo genam yakua keng. Genam go nan imening iti go ikum so be natugu.’ 19 Sedue meno lo tenguo go, ‘Esang! Walop deguo genam yakua keng. Genam go sapi, duoy lo tanamon yam so idok go, ikum so be natugu.’ 20 Sedue meno lo, tenguo dali go, ‘Esang! Walop deguo genam yakua keng. Demening kabung iti-tu go se.’ 21 Walop wengkabui mit no, tandali tamot ngga pung gono, nebut ngga naklay gemang pen-nawon. Nebut ngga tup gono, sagui gemang kong-nawon. Ngga ey ngge kalik tamot no gemang pen-anawon, ‘Kedaso yakena ba sogo tap ketang lo nalo go, tap ketang logo, sedue taut kua go, masi leng sogo, nemu pung go, yambi go, naklay wawi go, ngge sono se weng-lak!’ 22 Ngganemot no, tamot tandali weng gono, walop wengkabui no gemang pen, ‘Aya, mot lo pu go kalik yam mo semu gabe! No, sipsuing maning gemang.’ 23 Nggano, wengkabui lo pu go, ‘Klong go, yakena sik sogo tap seguay go, tebuem-tebuem sogo sikabung, usu tap sogo ta logo ey plong go wawi go se weng-lak! Sikabung ngganemot lo genam go yap se damoy!’ ”
24 Yesus, nebut yatrang go seni ngge kalik gemang taling, “Seni so motnang no gabe pen-asitugu, ‘Banim glop so usi go sikabung, Genam go walop ngge ba nogo, tandali degut go ten yakua dam.’ ”
Yesus no keng go dabui lo Nemot-a se duduing
25 Nsrung-nsrung ey sikabung Yesus no gemang keng-lak. Taton sono tandali Yesus lekek go, ngge kalik gemang we-nawon, 26 “Genam no keng so nando weng go, no, unen-nglangin nogo, nin-senun nogo, denok nogo, seni so, nemot go saysuk nogo-a, dabui ba no tui go, Genam go tamot sogo nemotnang yakua lemoy. 27 Se senong: Genam go andua ide ey suongsut ey gabe. Kebong genang ide kua lek go, Genam eygo no kua kekeng go, At go andua sogo yakua lemoy.
28 Seni so, Genam no keng genang, banim ngge-a se duing: yap kangok go klik so duduing go, banim no, mot suing go suey so kunala-a se duing: yap klik genang di, demu, duoy, naklay mo? Maning? 29-30 Ngga kalik go kunala kua duing go, nemot yap begit-a king go, maning naklay kua klik gono mea itak. Ngga ey, sedue lo nebleng klik go mea pu, ‘Esang, ta-a mlak go yap mo itak naklay kua klik ne.’ ”
31 “Nggano, yatrang meno ngge kalik gabe: deguena meno, deguena meno ey plepung so mo, banim no suing go, suey so kunala mea duing, ‘Genamnang go ple mata so? Koysaula ey mo kerlam? Esang, nemotnang mata so! Genamnang ple temu ya suon? Yakua?’ Seni so, ngge mea duduing, ‘Atnang don kua go!’ 32 Ngga ey deguena meno maning ket sogo no tamot-a mot-dak go mea klong. Nando don kua go, don eygo ey, ta mea luik, nemot go kunala mea keng.”
33 “Ayanang, mianang, motnang ngga kalik, banim no suey so se duing! Yang! Motnang go taut gemang go, ngga sono kua itak go, Genam go andua sogo yakua keng.”
Dabui lo kua keng go andua tom kua go beapdon gabe