15
Tap nega go sikabung wet so Yesus mo weng
1 Se ikum: kon eygo sikabung, blasteng so iyaluim go, kuklue meno-meno eygo naklay, Yesus logo deguo teguop tup genang so gemang yaluim-nenawon. 2 Ngga ikum gono, sedue Parisi ey Musa logo demutrui so nguok go klui-klui ey dabuipiam tra go, ngge kalik way-way so, gemang pen-netenawon, “Se ikum! Kon eygo sikabung ey Nemot suing go klay gono ten dedam go.” 3 Kunala ngga senong go, ngge kalik nebut yatrang Yesus lo gemang pen-nawon, 4 “Se tup! Sedue meno, domba mata so gemang popong. No, duen ba no, nok klaya tap gemang nega. Ngganemot sogo so, domba temu, sip meno no itak-nawon go, domba nok tap nega go wet so, nemot-a gemang nawon, e... domba nega go tandali gemang tegu. 5 Uwet go, ikum nawon go, yakay ey yalu blo no lek go gemang banuon. 6 Domba ey yap no tandali nemot pung gono, nemot go andua-andua ey yakena sikabung ey usi go, yakay kangok so gemang semu-nenawon. Ngga ey ngge kalik mea pen, ‘Tap nega go domba nok ngge, tandali mo ikum.’ 7 Ayanang, mianang! Ngga kalik dali, Blong dia yakena ba nogo gabe. Tap mo nega go sedue klaya duo, iwot go tandali keng go nogo, yakay kangok dega. Yang! Nemudi sogo tap mo senong go nogo yakay ey kua kerlam.”
8 “Yatrang meno: nando kabung-a mo, duoy kluip tanamon yam so. No, kluip meno-a klaya gemang nega. Ngga ey, temu itak go pelita blon go, yap ba ut yam so sengan go, duoy kluip nega go ngga gemang ikum-natun. 9 Yakay sogo so, andua-andua ey yap dagu sogo sikabung eygo no gemang pu-tenatun, ‘Genam go duoy kluip mo ikum! Weng-a! Yakay-a ya pla go!’ 10 Ayanang, mianang! Gabe pen-asitugu, ‘Sedue kon eygo sik so, klaya duo kon itak go, tap suey-a keng go sogo yakay kangok so Kiwali tamot lo pla go, duoy kluip tandali tegu go kabung ey mea kerlam!’ ”
Duo sat nega go tandali pung go
11 Nebut benuey meno ngge kalik gemang pen-anawon, “Sedue meno danon namon ey gemang. 12 Ku meno no, ngge kalik nglangin sono danon sat lo gemang pu-nawon, ‘Aya! Nggeasui go genam tete sogo taut se wasey!’ Danon lo pu go tup-nawon gono, nesip so taut tegek go, gemang wasey-nawon. 13 Ku maning kua luik gono, danon sat tete sogo taut duoy so nay gono, duoy ngga ey, nan meno ket sogo no gemang nawon. Nan meno no pung go, tebadali-tebadali duoy ngga yam so tega-nawon. 14 Ngga kalik semu go nogo, duoy yam so se kua. Pla ikum! Ku ngganemot no nan ngga sogo ten se kua-natun. 15 Tenday tebadali teguom-tenawon go, nan ngga sogo sedue meno sono kebali usi so gemang klong. Wet-tenawon go, sedue meno ey gemang tegu. Sedue ngganemot lo pu, ‘Mot, nebo a yay suing genang so, usu no se klong.’ 16 Kebali ngga semu-tenawon go, ten piam so gemang tra-nawon. Ngga tang so, nebo nogo tensuk dam genang ey gemang duing-nawon. Esang! Nemot nogo ten sikabung logo kua iti. 17 Woy ngganemot no gemang suang-nawon, ‘Aya go yap ba sogo kebali sedue mata dega so. Ten-a mata so tebadali dedam sang. No, ngge so tenday got-tegu go, ten lo mea kebong-silu sang.’ 18 Yang! Nggeasui go, ip go aya mit sono genam mea klong. Pung go nemot no ngge kalik mea pu, ‘Aya! Ki Wali Iram ey, mot eygo no kuklue kangok so genam mo pluok. 19 Nggeasui go, mot go duo so tandali genam kua wawi! Kebali sedue kalik genam no se taling!’ 20 Kekayso, ip-nawon go nglangin mit sono gemang klong.
Maning uweng, ket sik so nglangin lo gemang ikum-siwon. Danon ngga ikum gono, dabui klum kangok dega so gemang tra-nawon. Ngga ey, danon mit no keda so kap go, ta lo teguot go, nebuem kong gemang tebok-nawon. 21 Danon lo pu go, ‘Seni so, aya! Kuklue kangok go genam lo mo pluok. Ki Wali Iram nogo, aya nogo ey mo kuklue gabe. Mot go duo so tandali genam kua pu!’ 22 Danon go nebut nogo, nglangin kua keng-srenawon. Kebali sedue sono pu go, ‘Amka, taglang nogo srem, masi suk teguop go, inim-a iti go, at go duo no nase kok. Ngoydan iti go, blindon sono se glung dali. 23 Nebo kangok go luk go se weng! Walop kangok go yakay ey imot pla genang. 24 Seni so, genam go duo mo kebong. Nggeasui go tandali gabe wali. Nega go, tandali gabe tegu. Ngga nang so, walop kangok go yakay ey gemang pla-netenawon.’
25 Pla ikum se! Danon trang-a, usu so maning got-tenawon. Usu sik so uweng go woy no, yap dagu no pupung, negui kluim, usre kluim ey, gemang tup-biwon. 26 Ngganemot sogo so, koybutasemu meno no gemang usi, ‘Sogo lemoy-anatun?’ 27 Koybutasemu lo pu go, ‘Mot go sat, suey so tandali pung goso, aya lo pu go nebo kangok go tong go, walop ngganemot so gabe pepla.’ 28 No esang! Nebut ngga tup go, dabuipiam kangok so tra go, yap ba sono danon trang degut genang moyso. Nglangin, danon trang lo semu go ikum go, dia sono pung go, degut genang so danon trang-a mlue-tenawon. 29 Ngga ey, nglangin sono gemang pu-tenawon, ‘Yagui sa peng? Aya nogo kebali so genam lo pluok-sanyu go? Aya go nebut nogo genam kua waydang. Sogo piam-a, genam nogo so aya lo mo tong? Genam andua-andua ey walop semu sogo, nebo nok klayanang go aya lo iti go kua gabe. 30 Esang, ikum-a! Mot go duo ngga lo, yam so kamea kabung ey taut tega gono, nggeasui nebo kangok go mot lo luk-to go, walop gabe iti-to!’