18
Woy Wali Iram lo tamlak go blongdon nogo nando-a sui dega ey
1 Blasteng duoy iti genang nebut yam so pen gono, Nemot go andua-andua weng-lak go, Yesus no gemang usi-netenawon, “Aya! Woy Wali Iram tamlak go blongdon ba nogo, nando-a sui dega ey?” 2 Ngga ey, denok dato-a Yesus lo usi go, nemotnang nesip sono gemang weng. 3 Nggano nemotnang sono ngge kalik gemang pu-nawon, “Seni so, gabe pen-asitugu, ‘Wali iwot-dak go, denok dato ngge kalik kua suing go, Woy Wali Iram tamlak go blongdon ba nogo, ya kua degut. 4 No, denok dato ngge go wali kalik dabui-a ku sono nando suing go, Woy Wali Iram tamlak go blongdon ba nogo, sui dega eygo gemang. 5 Genam go sui ba no andua meno denok ngge kalik, nando lo wawi go, Genam wawi go gemang.’ ” 6 No, andua sui kua go, Genam sik so nega genang tap, nando lo tetaling go, nemot no idekeba kangok go-a se iti. Sedue ngga kalik go, tui gono blindon-a pang go kekayso kebong go, suey! 7 Kukunan sikabung! Genam sik so teguey go tap gemang. Ngga ba sono sikabung pui genang so mea lemoy. No, wamoy sogo tap ngga nando lo tetaling go, esang!
8 Motnang se tup, tap piam go-a ta lo pupluok go, ta ngganemot-a tong go, ngga sono se betep! Tap piam go sono masi lo uwawi go, ngga sono tong go nase betep! Wali inim no ta ey masi-idi seguong ey, yambi sogo-a degut go, ngga suey. No, senang idakoy nebleng ba no ta namon ey masi namon ey betep go, ide dega ey. 9 Yang! Ku klik ba sono nemu idi lo mot uwawi go, nemu idi-a wagot go nase betep! No, nemu klaya go ey, wali inim degut go-a suey. Nemu namon ey idakoy nebleng ba sono betep genaning. a
10 Seni so, gabe pen-asitugu, “Kuno-woyno Blong Dia yakena ba sogo, Ki Wali Aya go suongku no, demening keng go yay suing genang Kiwali tamot gemang. Ngge suey so se duduing: andua walitap no demening denok kalik keng go, inya go, ku sono sui kua goso motnang lo kua pu!” [ 11 Blong Dem weng go, tap nega go sikabung kon eygo, walitap sono tandali wawi genang so gabe.]
12 Se tup! Sedue klaya go domba 100 yam so gemang. Nggano, meno-a tap gemang nega. Meduim blo no 99 yam sogo itak go, domba klaya nega go-a, wet genang so mea klong. 13 Gabe pen-asitugu, “Wet gono tegu go, nemot go yakay dega kangok. Temu kua nega goso, tra go yakay ey kua kerlam. 14 Ngga kalik dali, motnang go Ki Wali Iram logo gabe pupluok. Nemot lo duduing go: walitap no demening denok kalik keng go sikabung sik sogo klayanang go nega genaning!”
Andua nogo nebutdrom king genang
15 Tandali Yesus lo pen go, “Blong duoyap sik sogo, andua meno lo kuklue pluok go, maning klay goso mot namon susuing gono, nase pu! Mot lo pu go ngga tup gono, kunala senong go, nemotnang ‘andua’ so tandali mot lo gemang wawi. 16 No, mot lo pu go nebut nogo nemot kua tup go, mot klong go andua meno klaya duo, namon duo-a usi go, nemotnang go nemu damoy so, ngga nase pen. Ngga ey, namon duo, nangglik si lo, piam ngga yang dali genang. b 17 Nemot nangglik go nebut nogo ya kua tup go, nemot go piam ngga blong duoyap damoy so dia no nase tegek. Ngga ey, maning kua tup go, Ki Wali Iram kua senong go saula ey, kuklue lo waluk go sedue kalik, nemot sogo se ikum.”
18 Gabe pen-asitugu, “Kukunan blo nogo, motnang lo dok go, Blong Dia yakena ba nogo mea dok dali. Kukunan blo nogo mot lo plet go, Blong Dia yakena nogo mea plet-dak dali.”
19 Tandali gabe pen-asitugu, “Motnang sik sogo namon duo Iram Yesus go sui no dabui lo klay gono dewi pu go, sogo-sogo motnang lo uwadong go, ngga Ki Wali Iram lo mea lemoy. 20 Ngga tang sogo so motnang se senong: Genam go sui no, namon duo-nangglik si yaluim go, ngga nogo Genam mea pung dali.”
Piam suep go kay genang nebut yatrang
21 Ngga temu ey, Yesus sono Petrus weng go gemang usi, “Woy Dem! At sono kuklue andua lo pupluok go, nemot nogo ‘Esang, nueya!’ da kata yam so genam logo ya pu? Da 7 yam so?” 22 Way so Yesus lo gemang pu-tenawon, “Kua! Da 7 yam so kua! Senang so tandali-tandali c se pupu, ‘Ki Wali Iram itak go kalik gabe itak-situgu!’ ”
23 Ngga tang so, blongdon ba lo Iram so Genam tamlak go, nebut benuey ngge kalik gabe lelemoy: Ku meno no, trangkose nogo drang ta way, deguena lo tagu i genang kalik gabe. 24 Tagu i genang ta mlak gono, deguena sono drang ta way miam dega eygo sedue meno wawi go gemang weng. 25 No, sedue ngga drang way tandali iti genang ya kua. Ngga ey deguena ngga lo pu go, “Sedue ngga go yaptenglam naklay koybutasemu d so nase nay, at go drang ngganemot way dali iti genang.” 26 Nggano, deguena go masi ba no sedue ngga unuik go, dabui lo gemang usi-tenawon, “Aya deguena! Namboy sang. At go drang taway-taway tandali mea yaluim-sing.” 27 Ngga ey, klum lo deguena go dabui ba, bu kalik pi go, sedue ngga sono gemang pu-nawon, “Nueya, drang way genam sono go kua iti!” Yang! Boy ba sik sogo ta gemang itak.
28 No, sedue ngga koklong gono, nemot nogo drang taway seguay go maning kua iti go sedue meno gemang ikum-nawon. Ngga ey andua ngga blindon no mlak-nawon go gemang pu-tenawon, “At go drang taway naklay keda so se iti-silo.” 29 Ngga ey, andua ngga masi ba no unuik go gemang pu-tenawon, “Andua, namboy sang! Mot go drang taway mea iti!” 30 No, sedue ngga, moyso! Nemot andua-a mlak go boy ba sono gemang betep, e... drang way yam so semu gono, mea itak.
31 Tasam ngga trang temu lo ikum go, dabui klum kangok so andua-andua temu lo gemang tra. Nggano, tasam ngga deguena no naklay pen-nenawon. 32 Ngga kalik semu go deguena tup-nawon gono, trang ngganemot gemang usi. Ngga ey, nemot no gemang pen-anawon, “Tup-a! Mot piam kangok go sedue! Mot go kuklue, drang kua ikak go nogo, mot nogo klum genam lo tra go tang so, genam lo mo pu, ‘Nueya!’ Mot sik sogo drang way, genam logo kua wadong gabe. 33 No, mot go andua nogo, genam lo klum go way dali kalik go-a ne kua taling!” 34 Yang! Deguena ngganemot dabuipiam kangok so tra goso, plesedue go ta sono trang gemang iti. Ngga ey, trang ngganemot boy ba no betep-nawon go, e... nemot go drang way tandali yam so semu gono, boy ba sik sogo mea itak.
35 Yesus lo pu go, “Anduasiyap, motnang se senong! Dabui lo andua nogo kua pu go, ‘Nueya, dabui klum! Mot go piam gabe mo kay’, ngga kalik dali Ki Wali Aya lo mea taling, ‘Mot logo tasam piam go mea kua suep.’ No idekeba-a, Nemot lo mea taling.”