17
Yesus meduim blo sogo no kikiblong lo teglue go
1 Minggu klaya got-nenawon gono, Petrus, Yakobus, ntaton Yohanes eygo-a, meduim kangok go blo sono Yesus lo wawi go gemang klak. Ngga sogo, nemotnang seguong-a banom! 2 Woy ngga dali no, Yesus go nebuemnemu-a woy blong suk so se blong-abatun. Nggano Nemot go amka blong ey irop golo, nemu ey gemang kli. 3 Pla ikum! Blong ngganemot ba lo wengkabui babu Musa dega ey, babu Elia sui dega eygo nabi ey, gemang perla-klebawon. Nggano, nebut so Yesus ey pen-netebawon go gemang ikum. 4 Ngga kalik ikum gono, Yesus sono ngge kalik Petrus lo gemang pu-tebawon, “Woy Dem! Sip ngge seguong so atnang susuing go-a, suey dato be. Mot iwat go, ngge no bala-a nangglik ey atnang lo ya klik: Mot tete sogo, Musa tete sogo, nggano Elia tete sogo meno dali.” 5 Ngga kalik go nebut so Petrus maning pen-atenawon, kenuim-klaut Kiki blong eygo blo sik so kuntun go, nemotnang nangglik klay seguong-a teglue-abatun. Ngga temu ey, kenuim ngganemot ba sik sogo Ki Wali Iram go nebut ngge kalik gemang tuot-kunuon, “Ngge At go Demsop teguop dato seni go gabe! Nemot nogo-a Genam gabe iwat! Nemot seguong nogo-a se tup!” 6 Nebut ngga tup gono, Yesus go andua-andua suali-bubuong ey king go, nan blo sono gemang unuik-nenawon. 7 No, Yesus weng go, nemotnang no kling gono gemang pu-tenawon, “Ip-a! Suali kua tra ey!” 8 Ngga ey, tandali blo sono nemu iti go, sogo-sogo kua ikum-nesrenawon. Yesus seguong-a banom gemang ikum.
9 Meduim ngga blo sik so tandali lili gono, nemotnang sono ngge kalik Yesus lo gabe pen-anawon, “Meduim blo no ikum go tasam ngganemot, sikabung meno nogo namboy kua penklong! Ki Wali Iram sik sogo Blong Dem, kebong go sik so tandali nglong gono, sikabung ibe nogo mea pen.”
10 Ngga ey, Nemot go andua lo gemang usi, “Ngga kalik go, sogo temoy no Musa logo demu so nguok go klui-klui lo ne pepen, ‘Banim temu no nabi Elia-a mea pung-ayon. Ngga blo idi lo, Ki Wali Iram lo tegadi so dok go Iram mea pung.’ ” 11 Way so Yesus lo pu go, “Yang, ngga seni so lo! Sikabung go walitap kebuo genang, banim temu no nabi Elia-a gabe ya pung. 12 No, gabe pen-asitugu, ‘Nabi Elia mo pung gabe! Nemot-a ikum go sikabung logo kua senong. Ngga ey, woy-woy go kunala no, nabi Elia nogo tasam piam go-a mo semu. Ngga kalik dali so, Ki Wali Iram sik sogo Blong Dem nogo idekeba nemotnang lo mea taling dali.’ ” 13 Ku ngganemot no, Nemot go andua-andua gemang senong-nenawon: ‘Nabi Elia’ Yesus lo pepen go ngga, Yohanes Busotuigo goso pu go.
Kebong-nglong sogo denok meno Yesus lo pali-nawon go
14-15 Tandali meduim blo sik so, uneng gono, sikabung mata sogo klay gono pluep go ey, sedue meno weng go, Yesus ba no segabuem unuik go, ngge kalik gemang pu-tenawon, “O, Aya! Genam go duo sadui sogo se. Nemot nogo klum tra-ya! Kebong-nglong so pupluok go, koy blo nogo, bu ba sono gemang pupui. 16 Ku nayum gono, Mot go andua-andua sono wawi go mo beyu. No, sadui ngge nemotnang logo kua suey ne!” 17 Ngga ey, sikabung temu ey Nemot go andua-andua eygo sono, Yesus lo bebat go, “Motnang wengkabui demu eygo! Ki Wali Iram lo tegadi so dok go Iram, maning motnang kua mlak ba. Esang! Ku kata yam so motnang sogo ya gigling? Duo ngga, ngge sono wawi go weng-a!” 18 Ngganemot no, ida kuaseni golo mlak go denok ngga sono dawin ey Yesus lo gemang bebat-nawon, “Se pung go klong!” Ngga ey, denok ngga ba sik sogo ida kua seni go, kekayso pung go, gemang kap. Yang! Woy ngga dali no, denok ngga gemang pali-dapnawon.
19 Ngga blo idi lo andua-andua ey banom suing gono, Yesus no gemang usi-netenawon, “Sogo temoy no ida kuaseni go denok ngganemot ba sik sogo atnang lo yat go, ya kua pung?” 20 Nemot go andua-andua no gemang pu-tenawon, “Genam nogo don ey dabui lo motnang kua keng go, yakua lemoy.” No, gabe pen-asitugu, “Genam nogo dabui lo senim un dato kalik go keng go, meduim ngga sono motnang lo pu go, ‘Se teguik! Beap ba sono degut-a!’ meduim ngga kekayso mea teguik. Yang! Ngga kalik Genam no dabui lo kekeng go, naklay-naklay motnang logo mea lemoy seni. Ya kua lemoy go, kua.” [ 21 Sadui ida kuaseni golo ngga kalik go degut go, yat genang sogo deding ba lo. Genuing-a tenday, dabui lo dewi suing go don iti goso, mea yat.]
Ide iseng ey lek genang danamon tete so pen go
(Markus 9:30-32; Lukas 9:43b-45)
22-23 Nemot go andua-andua ey nan Galilea lo koklong gono, Yesus lo gemang pen-tenawon, “Yang! Ki Wali Iram sik sogo Blong Dem, but go kebong genang so, sikabung go ta no mea itak. Ngga sik so, ku nangglik tete no tandali mea nglong.” Ngga tup go tang so, andua-andua go dabui u kalik gemang tra-nenawon.
Ki Wali yap sogo blasteng duoy iti go
24 Yesus, Nemot go andua-andua eygo koklong go, yakena Kapernaum no pung gono, Ki Wali yap Yerusalem nogo blasteng so iyaluim go gemang weng. Petrus ey tegu gono gemang pu-tenawon, “Ki Wali yap nogo blasteng duoy a motnang go klui logo ya kua iti-sreyon?” 25 Ngga ey, way so Petrus lo pu go, “Blasteng mea iti lo.” Ngga temu ey, yap ba no degut go, Petrus lo maning kua pen gono, banim no ngge kalik Yesus lo gemang usi-nawon, “Simon! Mot lo duing go, kukunan go deguena-deguena, nando sik sogo duoy iyaluim? Nan nok sik sogo-a? Saula meno sik sogo-a iyaluim?” 26-27 Way so Petrus lo pu go, “Saula meno sik sogo-a, iyaluim go wa!” Way so Petrus sono Yesus lo gemang pu-tenawon, “Ki Wali yap ngga At go Aya go yap, sogo kalik so Genam logo blasteng ya iti? No, blasteng so yaluim go sedue yakay genang ngge-a se pluok-nalo: yano-a iti go, bu sono nalo go se betep. Kuduong so lek go dasi mlak go, lom ta lo ngang go, duoy namon ey mea ikum-nalo. Duoy ngga iti go, motnang tete sogo ey Genam tete sogo blasteng ey kekayso se semu-sing!”