26
Idekeba lek genang nebut i goso Yesus lo pen go
1 Blong Dem Nemot go blong ba lo pung genang nebut ngga yam so pen-nawon gono, ngge kalik Nemot go andua-andua no gemang pepen, 2 “Yang! Motnang mo senong? Ku namon dali no, walop Paska semu genang! Nggano Blong Dem-a di no glung genang so, mea iti-neyon.”
3-4 Nebut ngga Yesus lo pu go nogo, taiti so pupuit go trang dega Kayapas go saliyap so, trang-trang dega ey, iram-tegay eygo yaluim go, Yesus mlak go kay-kayso but genang nebut so pen-netenawon. 5 No, nemotnang lo pu go, “Walop Paska ba lo kua semu! Sikabung walop so pluep golo, suep-suep lemoy genaning.”
Kinemon mlay teguop go lo Yesus pi go
6-7 Yakena Betania so, Simon yaulat mo pali go yap ba so Yesus got-tenawon. Se ikum! Samonsuip ey kinemon teguop go mlay, kabung meno lo iti go, Yesus mit sono gemang degut. Ngga ey, Yesus ten so dam-tenawon go, mlay ngga lo wengkabui blo sik so gemang pi-natun. Seni so, mlay ngga go drang blo dega so. 8-9 Tasam ngga ikum gono, Yesus go andua-andua lo sagui nebut so gemang bebat-nenawon, “Sogonang so, drang blo sogo lo iti go mlay ngga tebadali pi? Mlay ngga kalik go drang so nay go, duoy mata dega so idok go, taut kua go sikabung no tebok genang.” 10 No, Yesus tup go, senong-nawon go, ngge kalik gemang we-nawon, “Sogo kalik goso, kabung ngge nogo dabuisadui nebut ne bebat-ketogoy? Ngga tasam seni eygo dega, Genam nogo so nemot lo seni so mo pluok-situn gabe. 11 Sikabung taut kua go ngga, motnang ey mea got-ketogoy! No, Genam-a motnang eygo senang so mea kua got-eton. 12 Genam go saysuk blo no mlay pi-tun go ngge, Genam kebong go tuet genang takong genang so, mlay ngge lo dali pi-kuntun go gabe. 13 Seni so gabe pen-asitugu: nago no, genam Iram so temuit go deguo teguop pepen klong go nogo, kabung ngge lo taling go tasam suey go ngge ey mea penklong dali. Yang! Nemot go tasam senang so duduing genang.”
Yesus mlak genang klayta Yudas ey duing go
14 Ngga blo idi lo, Yesus lo kuoy go sik sogo andua meno Yudas Iskariot pung go, taiti so pupuit go trang dega mit sono gemang nawon. 15 Nggano, gemang usi-tenawon, “Motnang go ta sono Yesus genam lo iti genang, sogo drang-a ya semu-kelo?” Ngga ey, Yudas sono klaydrang 30 perak-a a gemang king-nenawon. 16 Woy ngga sik so, Yahudi go woy-woy go ta sono Yesus iti genang ku suey go-a, Yudas lo gemang uwet.
Walop Paska ten andua-andua ey klay gono dam go
17 Tepung seguong-a duik go loti dam genang walop b ku klaya itak go, Yesus go andua-andua weng go, ngge kalik gemang usi-netenawon, “Mot lo duing go, use go Paska ten, nago no dali ya semu-enalu?” 18 Ngga ey, Yesus lo pu go, “Yakena Yerusalem sono kenalo go, Genam lo taling go sedue ngga sogo no, ngge kalik se pu, ‘Aya Klui pu go: Genam go ku dedagu go se! Andua-andua ey Walop Paska mot go yap ba no mea dam-elu.’ ” 19 Nggano, Walop Paska nang sogo ten Nemot lo pen go kalik, andua-andua lo dali gemang ta-nenawon.
20-21 Ku klik gono, Nemot lo kuoy go sedue 12 ey ten so dedam gono, ngge kalik Yesus lo gemang pen-atenawon, “Dia sono neguon so gabe pen-asitugu, ‘Genam but go kebong genang sedue go ta sono go, motnang sik sogo klayduo lo mea iti-yon.’ ” 22 Ngga tup-nenawon gono, dabui ide ey, anduasiyap klay-klay lo gemang pu, “Aya! Genam logo ya kua.” 23 Nggano, Yesus lo pu go, “Tegun klaya go ba no nando go ten Genam ey king go, ngga nemot gemang. 24 Yang! Ki Wali Iram sik sogo Blong Dem-a, Wali Sam klaut ba no Ki Wali Iram lo klik go kalik, mea seyon. No, esang! Genam but go kebong genang so iti go nogo idekeba, kangok dega. Esang! Kukunan nogo, sedue ngga kua tui go-a, suey.” 25 Klayta so duing go, Yudas lo gemang pu-tenawon, “Klui! Genam lo ya iti yabung?” Way so Yesus lo pu go, “Mot tang so mo pu-nato lo.”
Teguop ten klay gono dabui lo dedam genang taling go
26 Ten so dam-netenawon gono, loti iti go, Ki Wali Iram sono taitisuey pu-biwon go, loti betok go, nemot go andua-andua sono wasey go, ngge kalik gemang pu-tenawon, “Iti go se dam! Ngge, Genam go saysuk gabe.” 27-28 Ngga ey, daysruk anggul eygo ta no iti go, taitisuey pu gono, andua-andua sono wasey-nawon go, ngge kalik gemang pu, “Tegun ngge ba sik sogo anggul ngge, motnang naklay lo se drop! Yang, Genam go kin ngge, Ki Wali tegadi inim so dok go kin gabe. Tap demening c go ngga logo so, sikabung seni eygo, nemudi so Ki Wali Iram go suongku no mea ip. Sikabung mata sogo kuklue piam konkebamling teglue genang so pi go kin, ngge gabe!” 29 No, motnang no gabe pen-asitugu, “Nggeasui go sik so iti go, Genam eygo anggul tandali go motnang mea kua drop, e... Ki Wali Iram go blongdon ba no, anggul inim-a mea drop.”
Yesus Petrus lo mea paysing
30 Ki Wali Iram go sui iway iti genang usam kluo-nenawon go, Nemot go andua-andua ey meduim Saytun sono Yesus gemang klong-lak.
31 Tap koklong gono, ngge kalik nemotnang no Yesus lo gemang pen-tebawon, “Nggeasui wadi go, Genam itak go, motnang mea kuek-kebalo. Seni so, Wali Sam klaut ba no ngge kalik Ki Wali Iram lo mo klik,
‘Nemot yay sogo wengkabui-a Genam lo mea but.
Nemot go blung mea teglik-lak!’ (Zakharia 13:7)
32 No, tandali Genam nglong gono, banim nan Galilea sono mea klong.” d 33 Way so Petrus lo gemang pu-tenawon, “Nemotnang go dabui-a mo sret go! Genam-a yakua sret gabe!” 34 Yesus lo pu go, “Seni so, mot sono gabe pen-asitugu, ‘Nggeasui wadi go, ayang nebut maning kua tuot gono, da nangglik yam so, Genam sogo ngge mot lo mo paysing, Sedue ngga genam kua senong-wa.’ ” 35 Tandali Petrus lo pu-nawon go, “Kua! Mot ey klay gono genam kebong go, Mot sogo genam logo ya kua paysing. Mot kua senong go sogo, genam yakua pu.” Ngga ey, Yesus no keng go andua-andua temu logo ngga kalik dali gemang we-nenawon.
Usu Getsemani nogo nebut
36 Ngga ey, nemotnang klong go, andua-andua ey usu meno nemot go sui, ‘Getsemani’ no gemang pung-nenawon. Nggano, andua-andua no gemang pu-tenawon, “Motnang-a ngge no se suing! Genam ngga sono, dewi pu so be koklong.” 37 Petrus ey Sebedius go danon namon Yohanes ey Yakobus eygo-a, Nemot lo wawi go gemang klong. Ngga no pung go nogo, dabui ba nogo Yesus u tra go, bobong ey gemang king. 38 Ngga ey, nemotnang nangglik no ngge kalik we-tebawon, “Genam go dabui ba u kangok so tra-tugu go se! Motnang-a ngge so, suey so Genam yay ey se susuing.” 39 Ngga ey, ngga dato sono Yesus klong gono, nan blo sono unuik go ngge kalik dewi gemang pu-nawon, “O, Ki Wali Aya! Mot lo duing go, Genam blo sik sogo bete eygo ide ngge ya tebuo go, ngga sono se betep! No, Genam lo duing go tang so kua, Mot lo duduing go-a se lemoy!” 40 Ngga ey, nemotnang nangglik mit sono tandali gemang kunuon. Esang! Nemotnang ikum-nawon go, usene so mo srek. Nggano, Petrus sono ngge kalik gemang pu-tebawon, “Woy klaya dato go, genam eygo yay motnang yakua suing? 41 Wegeng ey se susuing, dewi se pu! Piam ba sono motnang pui genaning! Yang! Waglo-a kekeng so, no saysuk-a don kua.”
42 Ngga ey, da namon tete sogo Yesus klong go, dewi ngge kalik Nemot lo gemang pu-bawon, “O, aya sop, Ki Wali Iram! Bu bete eygo nggenemot ngga sono klong-a! No, Genam go duing no kua! Mot go duing-a lemoy go, Genam logo mea drop sang.” 43 Tandali go tete Yesus nawon go, nemotnang mo srek-lak, nemu yam so ide go nogo. 44 Ngga ey, ngga kalik nemotnang itak go, tandali dewi pu genang so gemang bewon. Da nangglik tete sogo dewi kerlam go dali-a gemang pu-bawon. 45 Ngganemot no, Nemot go andua-andua mit sono kunuon go, ngge kalik gemang pu-tenawon, “Nggeasui maning usne-a motnang ya srek, dia ya suing? Ki Wali Iram sik sogo Blong Dem, sikabung kon ey go ta sono iti genang ku, mo pung-atugun gabe. 46 Buong-lak-a! Weng-a, imot ya klong go! Se ikum! Genam sogo klay sedue mo dedagu go sang.”
Yesus mlak go
47 Maning nemotnang ey nebut so Yesus pepen gono, Nemot go andua 12 sik sogo meno Yudas gemang weng. Nggano, nemot eygo sedue daley kangok go, tengang ey suon eygo gemang. Taiti so pupuit go trang dega ey, Yahudi iram tegay eygo lo mot-dak goso weng go. 48 Seni so, sedue deley no ngge kalik klay sedue ngganemot lo mo pen, “Nando-a nebuem kuong genam lo tebok go, Nemot gemang! Nemot-a se mlak!” 49 Ngga ey, Yudas keda so klong go, Yesus ey tegu gono ngge kalik so gemang pu-nawon, “Aya klui suey lo!” Ngga ey, nebuem kuong gemang tebok. 50 No, nemot sono Yesus lo pu go, “Esang andua! Genam ta suey taling genang so, ngge sono mot mo weng?” Ngga temu ey, plesedue pluep go keda so Yesus-a gemang mlak-nebawon. 51 Ngga ikum go, Yesus no keng go andua meno lo tengang keda so sok go, taiti so pupuit go trang dega go koybutasemu kamadop idi-a kekayso tut-siwon. 52 No, ngge kalik nemot sono Yesus lo gemang pu-nawon, “Tengang ngga nemot go sip ba sono tandali kok-a! Tengang ple nando lo tui go, tengang logo nemot-a mea tong. 53 Mot maning kua senong? Ki Wali Iram sono go, Genam lo pu go, Ki Wali tamot miam dega ey Genam no tebok genang, Ki Wali Iram lo pu go mea pluep. 54 No, ngga kalik Genam lo pu go, Wali Sam klaut ba no klik go nebut, sogo kalik ya lemoy? Se senong: genam no lemoy go, ngga ba no naklay mo klik-nengam!” 55-56 Ku ngganemot no, ngge kalik plesedue mata sogo no Yesus lo gemang pepen, “Motnang lo duing go, Genam ngge ambledante? Ngganemot sogo so, tengang ey suon ey, naklay ikak go kebanto? Kuno-kuno motnang nesip so Ki Wali yap ba sogo sikabung Genam lo mo nguok. Ngga nogo, motnang lo kua mlak ne! No, ngge lemoy go, Wali Sam klaut ba no nabi-nabi lo klik go naklay lemoy genang.”
Woy ngganemot no, Yesus-a banom itak go, Nemot go andua-andua-a kuek-nenawon.
Iram-tegay go suongku no Yesus wawi go ip go
57 Yesus plesedue lo mlak gono, taiti so pupuit go trang dega Kayapas mit sono wawi go gemang klong. Ngga sogo Musa go demu so ngunguok go klui ey, Yahudi go iram-tegai eygo, nemot go saliyap seguong no mo yaluim. 58 Petrus-a ket sik so keng go, e... taiti so pupuit go trang go yap seboy no gemang pung. Ngga so nemu luik genang so, koybutasemu ey got-netenawon.
59 Se senong: taiti so pupuit go trang-trang dega ey Yahudi go iram-tegay naklay lo, nebutpen genang sedue-sedue ta lo semu go, gemang uwet-netenawon. Ngga ey, nebut wamoymlue sogo-a pen go, Yesus but go kebong genang. 60 Sedue mata so nebut wamoymlue pen go, klaya duo nebut don eygo kua ikum. No, i go seni sogo, nisonoso sedue namon ip go gemang pen-klenawon. 61 Nemotnamon lo pu go, “Sedue ngge lo pen go, ‘Ki Wali yap ngga sono togut go, ku nangglik ba no tandali Genam lo mea klik.’ ” e 62 Nggano, taiti so pupuit go trang dega ip go, Yesus no ngge kalik gemang usi-tenawon, “Nebut way Mot logo ya kua pen-srelo? Ngge Mot lo pu go nebut seni so?” 63 No, nebut way Yesus kua pu-srenawon. Ngga ey, Yesus no taiti so pupuit go trang dega lo gemang pu-tenawon, “Ki Wali Mani Iram go sui no gabe u-usi, ‘Mot ngge, tegadi so dok go Iram, Ki Wali Danon, Mot ngge Nemot?’ Se pen-sando!’ ” 64 Way so Yesus lo pu go, “Mot tang so mo pu-santo! No, motnang naklay ngge no pluep gono, gabe pen-asitugu, ‘Nggeasui go sik so, Blong Dem, Ki Wali Iram don kangok go tasemlea idi so susuing go, ut blo lo gum ey uweng go, mea ikum-kelo.’ ” 65-66 Ngga kalik Yesus lo pu go tup gono, taiti so pupuit go trang dega, Yahudi go demu kalik amka tegek go, gemang bega-tenawon, “Ki Wali Iram so wayang go nebut Nemot lo mo pu-siwon go! Sedue meno lo pen genang, sogo so ya wet? Nggeasui Ki Wali Iram mo wayang-siwon go, motnang tang so mo tup. Woy-woy naklay, sogo kalik duing-ketogoy?” Nggano, saliyap blo sogo iram-tegay lo pu go, “Kebong genang sogo idekeba-a se taling!” 67-68 Ngga ey, mlabui nemotnang lo seguop go, ta kemuk lo wengkabui temoy no bubut, gemang usi-netenawon, “Ey, tegadi so Ki Wali Iram lo dok go Iram, se pu! Mot nando lo but?”
Yesus Petrus lo wayang go
69 Ngga kalik Yesus so semu-netenawon go, seboy so Petrus-a gemang got-tenawon. Nggano, koybutasemu kabung gemang weng. Ngga ey, ngge kalik Petrus sono gemang pu-tenatun, “Mot ngge! Sedue Galilea ngga ey keng go uwet go dali?” 70 No, ibe blo no wamoy so don ey Petrus lo we-nawon go, “Kua senong-wa! Sogo so usi-togoy?” 71 Nggano, yataput kangok go sono Petrus koklong go, koybutasemu kabung meno lo ikum go, ibe no ngge kalik gemang pen, “Yang! Sedue ngge, klay golo Nasaret sik sogo Yesus ey uwet go gabe.” 72 Tandali ta ey nat go Petrus lo gemang pu, “Sedue ngga, genam kua senong-wa!” 73 Ku walong kua luik gono, ngga sogo sikabung Petrus mit no weng go, gemang we-netenawon, “Seni so lo! Yesus ey uwet go sedue meno, mot ngge gabe! Mot go nebut bluem sik so, atnang senong-esitu go.” 74 No, tanat go don dega ey gemang pu-tenawon, “Ngga sono genam-a na kebong! Pu-situ go sedue ngga, genam kua senong.” Kekay so, ayang nebut tuot go gemang tup-nawon. 75 Ngga ey, Yesus lo pu go nebut Petrus gemang duing-bawon, “Maning ayang nebut kua tuot gono, da nangglik yam so mot lo genam mo paysing, ‘Sedue ngga, genam kua senong-wa!’ ” Nggano, sip ngga Petrus itak go dia sono pung go, kangok so u gemang kluo-nawon.